طرطش طراطيش...مسك الالوان...وطرطش عالحيط 2

بما ان اخونا روك...مجابش الصور لحد دلوقتى

وبما انه كان عامل حاجتين حلوتيين

فقلت استعطفه

عشان يبعتلى الصور...واعمله اعلان غير مدفوع الاجر عالمدونة

وهوا المفروض انى اروح واجز عنقه

بس الواد ده غالى عندى...وكمان هوا مسافر كمان ااقل من شهر وعايز اخرج

هههههههههههههههههههههههههههههههههه

استغلالى انا معلش

نقدم لكم

3 مدونات جامدين جدا

بس عايزين ناس تقرا وتتفاعل معاهم

اول مدونة وهى المدونة الرئيسية

اوقــــات فـــراغ

مدونة كاملة متكاملة ....

بيكتب فيها

وتعاونه

الزميلة

باربى جيرل

وتانى مدونة

دى وعدونا انهم هيناقشوا فيها الافلام الجديدة والقديمة

هى مدونة

وحيـــدا فـــى الــصــــالــــــة

حرص على نفسك بقى السفاحين بيكتروا فى الضلمة الايام دى

واخيرا ...مدونة رقيقة...

بتاعت المشاعر والاحاسيس

الناس اللى لو بطلت تحلم هتموووووووووووووووووت

مدونة

احــــــــلامــــ عــمــــرنـــــــــــا

ودى مخصوص هتلاقوا فيه بوست هيجوعكوا ...ويخليكوا تعملوا حفظ للصورة على اجهزتكوا...

هههههههههههههههههههههههههههههههههه

يلا اى خدمة...

هات الصور بقى...اهىء اهىء اهىء

طرطش طراطيش...مسك الالوان طرطش عالحيط

اولا بعتذر عن الغياب اللى خارج عن ايدى ومش عارف راح فين..الواطى لما الاقيه بس :P

اخباراتكم ايييهع ...كونيصين طبعا طبعا ....

وحشتكم...كفاية هتافات...انا عرفت قد ايه غالى عندكم...

شكرنز شكرنز...

بس ...وحصل معايا كام موقف بايخ جدا ...خلانى اكتئب واتنرفز

اولهم ان فودافون العزيزة موزع متخلف من موزعين تحت السلم

بوظلى شريحة عشان بسلامته الموظف اللى اشتريت منه الخط من سنة مش سجل بيانات العقد بتاعى..

بالتالى الموزع لما استحمر ملقوش بيانات عند الخط...وشغل نمرتى لواحد تانى نمرته غير نمرتى بتاتا

ههههههههههههههههههههه

بس وانزل اتخانق معاهم وازاى ...وقالولى كع 11 جند وخدلك شريحة جديدة

واتخانق تانى وتالت ...والشبكة مشتغلتش وبلاوى زرقا

اييييييييييييه ....دنيا

بس وكان فيه ظروف مرضية جامده لناس فى العيلة ...منهم جدو والحاجه عندنا فى البيت

الحاجه قامت بالسلامة بس جدو خلاص بقى العادى..:)

ومممممممممممممممممممممممممممم

كان فيه ليا واحد صاحبى او اخويا مامته بتعمل عملية وحاجات زى كده

المهم يعنى ظروف عك فى عك

بس

والنهاردة او بالاصح امبارح بقى ...

نزلت مشاوير وحاجات من دى ....

ومنها انى رحت المتحف بتاع بلدنا

المتحف المصرى يعنى يا جدعاان
سبحان الله بعدى عليه كل يوم ويمكن اكتر ومفكرتش مرة نروحه

النهاردة كان معايا مرشد سياحى درجة اولى

هههههههههههههههههه

والله شرح احسن من اى حد بيشرح جوا :D

بس

فمستنى اخينا ينزل الصور بتاعتنا ويبعتهالى

واكتب بوست عن الرجلة

اللى اصلا مرة واحده كده طقت اننا نعملها ...

عالم رايقه

حلوة اوى العيشة دى...

بس ارخم حاجه المناظر اللى جوا المتحف ...البشر الاجانب

واننا مش عرفنا نصور حاجه..:(

عذرا ايها السادة

بعتذر ليكم جامد جاامد

على انقطاعى الغير مقصود عن التدوين

بس كل ما اطلع من حاجه ادخل فى حاجه تانية

سواء ظروف منزلية

او حد من قرايبنا عيان

يا انا اللى اعيا

او انشغل فى شغل جامد

واهو جالى دور برد فى الصييف

هههههههههههههههههههههه

والانسة مرمر كنت معتمد عليها بس راحت تصيف

وشكلها هتبيعنى تانى وتسافر اخر الاسبوع

ان شاء الله على يوم التلات او الاربع بالكتير ارجعلكم

.:)

عذرا ايها السادة

مــــدونـــتــى على الهــــواء

فى لقاء لذيذ جدا

مع البرنامج الجامد جدا ...مدونة على الهواء

والمذيع الاجمد برضه....محمد عز الدين

صاحب مدونة بيت العز

سجلت لقاء معاه ...

والبرنامج ده اللى اذاعة حريتنا بتذيعه

اللى اكيد مش محتاجه تعريف

مش هطول فى الكلام ...

بس دوس عاللينك

واسمع الحلقة

سفاح كرموز...فى مدونة عالهواء

تحديث

البرنامج بيتذاع دلوقتى على راديو حريتنا

http://www.horytna.net/home.aspx

هنستحمى...هيييييييييييييه

فى يوم من الايام...قمت من نومى ...الدنيا حرررررررررررررر بغبااء...وقلت لما اعمل تغيير ...وادخل اخد دش....يفوق الواحد ونظبط الاداء..عشان ااعرف ااقضى اليوم يعنى ....فقمت وسبت السرير ...وابتديت اطلعلى هدوم بقى ...ماهو مش هستحمى بنفس هدومى يا ذكوكو

المهم ...لقيت اختى الكبيرة واقفه على باب الاوضة ...ومتنحه...وبتقولى : ايه اللى انت بتعمله ده؟؟
قولتلها بكل بساطة...داخل اخد دش...

نهارك اسوح...هتستحمى ازاى ...انت اكييد اتجننت ..استنى كده...وحطت ايدها على راسى تشوف سخن ولا حاجه...تقولى لا لا ...الامر مش طبيعى ...لازم ااقول لماما

واسمعلكم صويته من هنا لغاية القناطر ...يالهوتىىىىىىىىىىىىىىىىىىىىىىىىىىىىىىىىىىىىىىىىىىىىى ابنى داخل يستحمى...انت اكيد اتجننت...امشى من هنا ودخل هدومك دى جوا عشان ابوك لو صحى وشافك كده ...هيصور قتيل او ممكن يروح فيها....

وانا واقف مبلم مش فاهم فيه ايه ...ومش عارف زعلانيين ليه ....المهم زقونى عالاوضة ...وفى الطريق ...بابا كان صحى عالدوشة والزعيق ...وبيزعق فيه ايه ....طبعا قالوله انى كنت داخل استحمى....لقيت الراجل برق...ووشه جاب الوان ...وعرق ...واغمن عليه

طبعا فوقنااه وكده ...وبصلى....ومسك ايدى جامد....سفاح...اوعدنى يابنى انك مش هتعمل كده...اوعدنى والا هحرمك من الميراث ....
انا لغاية دلوقتى مش مجمع اللى بيحصل ...فيه ايه يا جدعااان ...ده حمووم...يعنى ميه وصابون وشاور جيل وشامبو ...وطبعا حمبى ...اللوووووووووووووووووووووووووووووووووفة

المهم...زقيتهم على جمب ...ومصمم برضه عاللى فى دماغى ....وفجأة...الموبايل رن...ترن ترن ترن ...الو...لو استحميت يا سفاح...هنقطع عنك الميه....ونخنق لوفتك حبيبتك...تراك...السكة اترزعت يعنى

انا الفار ابتدى يلعب فى الفانلة الحملات اللى لابسها ...لاء الموضوع فيه ان .....بس برضه
لازم ااعمل اللى فى راسى واستحمى...وفى النص جاتلى مسج من شيخ من شيوخ مصر الكبار ...بيقولى : ولا تلقوا بايديكم للتهلكة...ولكن ان كنت مؤمن وتريد خوض المعركة...فتوكل على الله ...واستحم...!!!

ههههههههههههههههههههههههههههههههههههههههههههههههههههههههههههههههههههههههههههههه

صبااح البتنجان بجد ...ايه اللى انا فيه...يعنى كل ده عشان ميه وصابون وشاور جيل وشامبووو وحمبى اللووووووووووووفة؟؟
اشك فيه أن بجد....

قلقت وكنت هغير رأيى ....بس سمعت الاخبار عالجزيرة بتقول : وقد افادنا مراسلنا من امام شقة السفاح انه عازم كل العزم على خوض هذه التجربة والمضى قدما ....فى خطوة كبرى نحو تحقيق الحرية للمواطنين والشعب المصرى بأكمله ...وندعو الله ان يوفق الشعب المصرى عامة والسفاح خاصة...

انا اشتهرت ....خلااااص كفاية لت وعجن ....دخلت الحمام ...قفلت الباب ....علقت هدومى....طششششششششششششششششششششششششششش

واخدت الدش يا جدعااااااااااااااااااااااااااااااان

كانت فرحة عامرة ....البشر مصدقتش ...بصيت من الشباك لقيت الاهالى فرحانيين وبيرقصوا ....وبدل هنروح المولد الشهيرة...هنروح البانيو...والنهاردة هستحمى يا جدعان ...عاوز كله يبقى تمام ...

وانا برضه مش مستوعب ...يمكن فقت شوية لما جالى لفلفوون من المحافظ يقولى انه تم اختيارى لنيل وسام المحافظة من الدرجة الاولى مع لوفة الشرف ....

طيب ...وقال ايه ...الريس هيكرمنى...وسيراميكا كليوباترا هتبعتلى حمام مخصووووووووووووووص هدية خاصة من مجلس ادارة الشركة ليا ...وكان موولد...

وفى الاخر ...اعلنت محافظة الجيزة...انه فى يوم الاربعاء الموافق 11 يوليو من عام 2007 قد اصبح عيدا للحموم ...يستحم فيه كل مواطن بالمحافظة...اجباريا ...عند نصب سيدى ابو السفاح بمنطقة التعاون ...ودمتم

صدفــــة....2

طبعا فيه ناس كتير مستنين البوست ده ...

عاوزين يعرفوا ايه الصدفة اللى كنت اتكلمت عليها فى البوست ده بتاع الصدفه

مممممممممممممممممممممممممممممم

مش عارف يعنى هما 10 صدف فى بعض ...وكانت معرفه حلوة اوى

بس قلت هسيب الايام فى الاخر هى اللى تقرر

ايه اللى هيحصل او ايه اللى هيتم

المهم

كان يا ما كان ....

ولد قمور ...يسمى بالسفاح بتاع كرموز

ماشى مع واحده صديقته...سفاحه برضه...نيهااااع

المهم وقفت تسلم على صاحباتها السفافييح التانيين

المهم ببص بشبه على قمر واقف بينهم...وهى بتشبه....انا واثق انى شفتها قبل كده

بس بينى وبينكم

عمو السفاح بطيخه انه يفتكر اسم حد سواء ولد او بنت

المهم....قالها انه بيشبه عليها ...وسبحان الله طلعت هى كمان بتشبه

اتعرفوا على بعض ...والاسامى طبعا...زوطلعت زييه بالظبط سواء فى السنة الدراسية او الكلية او حتى المكان

اللى بيقعدوا فيه فى جامعة السفافييح

الاختلاف بس المجموعه ...مفرقتش يعنى :D

المهم قالت هتوصل اصحابها للباب الرئيسى ...وراجعه...وانا كنت هوصل السفاحه اللى معايا ...واجيب حاجات كده

وارجع تانى

المهم سجلت اسمى واخدت الشنط....عشان كان عندى بالليل الاوبننج بتاع مؤتمر السفافييح الكبير

ورجعت عالمكان...مش لقتها ...انا بينى وبينكم كنت مستبيع وهقعد ...وعنى مارحت بالليل

بس اختى اتصلت بيا عشان الحق اروح واجهز نفسى وكده عشان بالليل بقى

مشيت زعلان انى مش عرفت ااشوفها

خلصت المؤتمر فى اسبوع...واخدت اسبوع نقاهة كمان ...

ورجعت الجامعه....مش لاقيها برضه

قلت يلا ....اهو حلم وعدى

يوم كده فتح محل مأكولات جميل عندنا فى الجامعه

فالحر كان لسه فى اوله ....والناس بتسف الايس كريم من عند الراجل...

رايح ااشترى من هناك ليا وللشلة بتاعت القتلة اللى اعرفهم

لقيتها رايحه برضه

سبحان الله وهتشترى لاصحابها برضه

المهم وقفنا نتكلم ونسينا كنا رايحين نعمل ايه

ولقيت واحد صاحبى جه واخد منى الفلووس ...وقالى اااه ...طيب...هات الفلوس هجيب انا

هههههههههههههههههههههههههههههههههههههههههههههههههه

وهى برضه نفس النظام

بس اتفقت معاها انى هستناها ونروح مع بعض وكده ...

بس جالنا تلفوون مهم لازم نروح المطار نجيب اخو زعيم سفاحيين القاهرة

يادى النيييلة

قولت مش رايح وهقعد ااستناها ...بس قعدنا يتحايلوا عليا

وقولتلهم لغاية الساعه 6 بعدها نفك....وجت الساعه 6....ومجتش...اهىء اهىء

بس قلت يبقى زى المرة اللى فاتت

هى لو كانت بتنزل كل يوم كنت هجبها بسهولة

بس هى عاملة زىى....الجامعه بقت خنقه والدفعات الجديدة اطفال موووووووووووووت

فبنفض...وهى نفس النظام وهى دى البروبلم...

ام هند....بتسلم عليكوا اوى وتقولكوا ابقوا تعالوا ;P

بس جت الامتحانات وكنتت بشوفها لحظات

لغاااااااااااااااية اخر يوم امتحانات

قعدنا وقت اطول نتكلم

سيبكم من الكلام اللى كان بيتقال

بس وقتها كنت حاسس انى فرحان جدا...الله اعلم عالسبب وهى كمان كانت كده

طريقة المقابلة الغريبة...

نقعد ندور على بعض وفى الاخر نقابل بعض بطريقة اغرب ...سبحان الله

مممممممممممممممممممممممممم

مش عارف....احنا متفقين على اول يوم فى الدراسة نتقابل

محددناش ميعاد

ولا حتى مكان

سبناها بقى لوقتها :D

بس كده...ادى اجمل صدفه حصلتلى حتى الان

ومين عارف ايه اللى ممكن يحصل بكرة ;)

من تكون ايها الحب؟؟

الحب،

مامعنى تلك الكلمة الغريبة؟

كلمة تتكون من مقطعين، او بالاصح من حرفين

الحاء و الباء لتكون لنا كلمة اسمها الحب ،

كثيرا ما تسائلت عن معنى تلك الكلمة او ما هو اصلها،

كلمة حب،

الكلمة التى يتداولها كل شخص فى انحاء العالم بمختلف اللغات ولكن بمعنى واحد وهو الحب،

يقولها كل حبيب لحبيبه ،

الكلمة التى ذاب من اجلها قلوب،

كلمة وضعت الموده بين قلوب،

تلك الكلمة الرائعه التى لا يعرف لها اى شخص حتى الان معنى ثابت ،

وانت الم تسئل نفسك فى يوم ماهو الحب ،

من اين يأتى؟

والى اين يذهب

وماهذا التأثير العجيب له على قلوب الناس ،

تأثير يجعل طرف يضحى من اجل سعادة الطرف الاخر،

تأثير يجعل قلبان يذوبان ليصبحا قلب واحد ممزوج بالحب والحنان ،

ليصبحوا انسان واحد ،

ليصبحوا يدا واحده تجاه اى بغض او كره ،

كلمة تجعلنا سعداء ،

كلمة تجعل قلوبنا تتجرع من الحب حتى يثمل،

ولا تدرى الا وهم يقولون احبك ........

لا يعرفون اى شىء فى الحياة الا الحب ،

الحب........مازلت ابحث عن معناك ،

ايها الكائن الغريب اللطيف ، من تكون؟؟

من انت بحق القلوب التى ادميت منك ومن كثرتك.؟

من تكون يا من قامت الحروب لاجلك ؟

من انت يا من مات العشاق من كثرة تجرعك فماتوا سكارى ؟

من تكون يا اجمل احساس فى الوجود ؟

اانت انس ام جان ؟ ام تكون كائن خارجى

من كوكب الحب فى مجرة العشاق درب العشق ، سأظل طوال عمرى اسالك

حتى اعلم من انت

وحتى اعلم حقيقتك

سأظل اكتب واتسائل

من يكون الحب

--------------------------------

تحديث:

صديقة الطرطشة...كاتروز...اضافت اضافة حلوة فى الكومنتس ...فقلت حرام نضيع المجهود ولازم ننشر الكلام

عايز تعرف ايه الحب
عارف الاحساس الجميل ده
لما تحس انك طاير
سعيد و مبتسم
حتى و انت فى اسوا حالاتك
فى حاجه جواك كده بتخليك تبتسم
ممكن تقفل باب الاوضه عليك و تحط راسك على المخده
و تنام و دموعك ماليه عينيك
غصب عنك هتبتسم
عشان انت بتحب
يااااااااااه
قد ايه شعور رااائع
لالا رائع دى قليله عليه
عارف لما تكون محتاج شخص معين يكون معاك فى اى وقت
شخص انت ممكن تضحى بكل حاجه فى حياتك عشانه
و تبقى عارف
انه هو كمان هيضحى عشانك بأى حاجه
هو ده الحب
عارف لما تحس ان كل حاجه مش صح
الا بوجود الشخص ده
تحس ان الدنيا جميله
تبقى عايز تخلى كل الناس يشاركوك الشعور ده
هتلاقى نفسك بتحب كل الناس
بسبب شخص واحد انت بتعشقه
عارف لما تبص للبحر و متحسش بحزن
لا تحس انك عايز تعوم فيه
و تبقى متيقن انك مش هتغرق
هو ده الحب
عارف لما تبقى قاعد جنب التليفون و
مستنى شخص معين يكلمك
و لما يكمك تبقى مبسوط اوى و عايز تصرخ و تقول يا ناااان
فلان بيكلمنى انا
:D
هو ده الحب
طيب عارف بقى لما اول ما تشوف شخص معين كده تحس بشعور غريب
انت خايف و مبسوط و فرحان فى نفس الوقت
خايف انه يمشى تانى
مبسوط لانه معاك
عارف لما تكون مع حد و الساعه تعدى كانها دقيقه
هو ده الحب
اجمل الاوقات اللى بيعيشها الانسان
كتير بيقولوا مفيش حب اليومين دول
لااااااا و الف لااااا
فى حب و يمكن حب اجمل من حب ايام زمان كمان
هييجى فى يوم كده واحده زى القمر
تحس انها مختلفه عن كل البنات اللى عرفتهم
فيها حاجه هتشدك كده بجد
فى الاول مش هتبقى فاهم ايه ده ولا ليه بيحصل كده
ولا ازاى حصل
بعدين هتكتشف ان ده الحب
انت بتحب البنت دى
انت بتعشقها
و تمر السنين و تتجوزوا و تجيبوا بنوته زى القمر هى كمان
تاخد عينيك و جمال مامتها
و تبص لهم الاتنين و تفتكر اول مره شفتها فيها
اهو هو ده الحب
و بعدين لما تكبروا و تبقوا عواجيز
و تيجى البنت تزروكوا
و تقعدوا انتوا الاتنين تفتكروا ايام زمان و انتوا ماسكين ايد بعض
فهو ده الحب
هو ده
عرفته ولا لسه معرفتهوش
........:)

اكــــــرهـــــــــــك

احببتك

احببتك بكل جوارحى

احببتك بكل عضو فى جسدى

اخذ قلبى يردد اسمك كل يوم

فى كل دقيقة وثانية

مع كل خفقه له

اسمع اسمك يتردد بداخلى

احببتك دون اى مقاومة

فعندما رأيتك

لم استطع ان احرك ساكنا

وجدت نفسى وراءك

منسحبا بدون اى وعى

احببتك ...وضحيت بأشياء كثيرة

كى اظل معك

كى اظل احبك

كى اظل قلبا واحدا لك

ولكن

ماذا فعلتى انت

ماذا كان ردك على حبى لك

طعنة واحده

كلمة واحده

اشارة واحده

من يديك

لا

حبك لم يعد يكفينى

حبك لم يعد يرضينى

اننى ابحث عن حب اقوى

اننى ابحث عن حب انقى

اننى ابحث عن حب خالد...

لن يموت بموتك

اهكذا تخيلتى حبى لك

اهكذا فسرتى مشاعرى

بدون اى سابق انذار

رفعت سكينها

ووضعته ببرود

فى القلب الذى احبها

وضعته بكل برود

والقلب ينظر لها متفاجئا

ماذا تفعلين

مالذى تقومين به

انتظرى

الست انا حبيبك

الست انا قلبك

كيف تقومين بقتلى

كيف تقومين بطعنى

كيف قوت يديك على فعل هذا

ان تضعى حدا للابد لهذا الحب

كأم وضعت طفلها للتو

ثم وضعت يديها على وجهه

لتقوم بوأده فى مهده

مثلما انتى فعلتى

ووأدتى الحب الذى كان بيننا

لا ارى ظل دمعة فى عيونك

لا ارى حتى اثر شفقه على وجهك

وابتعدتى

كما يبتعد الصياد

بعيدا عن ضحيته

ليبحث عن غيرها

لكى يقتلها بكل برود

ليس لحاجته اليها

كلا

فقط ليشبع حاجته للقتل

واراقة الدماء

ولا يهم النتائج

فهو يعيش وحده

بمفرده

فى غابة قاسية

هكذا اصبح قلبى

جالس

وحيدا

فى غابة مظلمة

ليس بها اى ضوء

او بارقة امل

ظننت لوهلة

اننى بداخل حلم

كلا

انه لكابوس

وكابوس مؤلم

وسأستيقظ الان

ولكن ....

انه واقع

واقع يحدث

ولست احلم

للأسف

قلب ....ظن....انه ...

احبــــــــــك..

ولكن للاسف

لقد كان اختيار سيئا

فقد وقع حظه العاثر

فى قلب بارد

ميت

يخلو من اى مشاعر

الا البرود

هو سمته

قلب

لا يبكى

قلب

لا يتنفس

قلب

لا يحب

كان يعتقد انها ملاك

وللأسف

اتضح انه

شيطان

يسرق القلوب

ليقتلها

ثم يلقى بها على قارعة الطريق

لكى تكون عبرة

لاى محب

اراد ان يحب

احببتك

بالامس كان هذا

واليوم

كرهتك ...

للأبد

الفرق بين طبق الفول...والـ..... ..ز

فى الاول....

ياريت بس تسيبوا الفيدو يحمل



ايوة هوا الاخ ده

وبعد كده عاوزكم تركزوا كويس اوى فيه

خصوصا الحاج بتاع طبق الفوول

بس

الطرطشة دى مش سياسية ...

بس دى عاوزة توصل لحاجه

اننا شعب مش مهتم باللى بيحصل فى بلده

او معندوش وعى سياسى حتى

او منفض

طالما هوا هوا :D

ربنا معاكم بقى

واحلى سلام لطبق الفوول

جابولى تـــــاج ولولى

جالك التاج يا تارك البلوج

هع هع هع

تاج

من المدونة الرقيقة

الوردة البيضاء....باتريسيا

انت مين ؟؟

سفاح كرموز....بيدور على قلب معين ...يخطفه ويخليه عنده...ومش هيقتله...بالعكس هيرويه بدماء اعدائه

مين اكتر ست اشخاص بتحبهم ؟؟؟

فلان وعلان وترتان وبتنجان وسحلان وشحلان
هههههههههههههههههههههههه
6 مش يكفوا حبايبى ..:)

هل انت سعيد ؟؟

هوا طالما عايش مستور الحمد الله ....يبقى سعيد...بغض النظر عن العك اليومى بتاع الحياة

لو اجتمعت مع حسنى مبارك فى مكان واحد هتعمل ايه ؟

هقعد ااقرا قرءان فى ركن لواحدى ....واشوف لو معاه سيجارة ااقضى بيها الوقت

لو معايا مليون و نص اعمل ايه ؟؟؟

اشمعزة يعنى ؟؟؟؟....بس يلا اهو رضا ...هاخدلى نص ...واسيب الباقى لعيلتى ...يتصرفوا بيه ...ومع انى كنت عاوز ااديهالهم كلها بس الطمع بقى ولازم اضمن حقى :D

بتحب مصر ؟؟

كل يوم بصحى الفجر ااصلى ...وادعى لاهلى واصحابى ونفسى وبلدى ....وانزل اتمشى عالكورنيش اابص لنيلها ...واقول لسه بحبك يا مصر

مين اكتر شخصية متقدرش تستغنى عنها ؟؟؟

انسان بحبه جدا....زى اخويا ...لو حصله حاجه مش هستحمل تانى

ايه اكتر موقف محرج ؟؟-

نزلت ومتأخر ولحقت المترو...ودخلت قعدت بقى ...وبرحرح وبمسح العرق بمنديل وببص فى الساعه ...وسامع همهمة ...ابص الاقيها عربية ستات ...ههههههههههههههههههههههههههه...وقاعد جمبهم كمان ...والاقى الست بتبصلى بقرف وتقولى ايه يا استاذ....قولتلها متقلقيش ...انا مرتبط ...ومش هاكلكم ولا اخطفكم....واول ما المحطة اللى بعدها جت عالطوول غيرت ....ودخلت عربية الستات اللى بعدها :D

كان يوم ما يعلم بيه ربنا

الامنية اللى اتمنا تحقيقها ؟؟

رضى ربنا عنى ...واهلى....والاقى القلب اللى كنت بتكلم عنه

التاج باه يتمرر لمين ؟؟؟؟

التااااااااااااااااج ده اجبارى لكل واحد هيدخل ويرد عليه :D

وياريت حد يعبرنى ويعمله ...ولو مرة واحده ...:(

هل انتى القمر؟؟

سؤال بسيط...

خطر على بالى ...

وانا اجلس على الكورنيش ...

وانظر الى السماء

واتطلع الى القمر

وانعاكسه الرائع فوق مياه اسكندرية

واتخيل صورتك

مكان هذا القمر

واقول

هل انتى هذا القمر ؟؟

هل انتى فعلا الملاك الذى يشع نورا

هل انتى فعلا الفتاة التى خفق قلبى لها

الاجابة صعبة قليلا

ربما سأحاول ان اسأل قلبى ...

ولكن هناك مشكلة

فهو جالس الان مع قلبك...

ويقول لك...

احبك

كيف ااتصل به ...واجعله يسألك السؤال

كيف اجعله ان يعلم ما فى بالى الان

ولكن مهلا....

مثلما علم اننى احبك

ومثلما علم اننى بدونك لا اقوى على الحياة

سيعلم بالتأكيد سؤالى اليك

وسأجد الاجابة اليوم التالى

عندما ارى وجهك الملائكى

وهو يضىء بابتسامتك الرقيقة

ونظرتك الحانية الى

وعيناكى الجميلتين

هل اوفيتك حقك

من كلماتى

ومن اشعارى

او حتى من ذكرى لك فى قصصى

بالطبع لا

فحبى لك ...اكبر بكثير من اى كلمة سأكتبها

او حرف سينطق به لسانى

حبى لك ليس له نهاية ....

افيق من تفكيرى

واجد القمر كما هو

بظله الرائع فوق صفحة المياه ...

وقارب الصيد الواقف فى هذا الظل ...

وانظر مجددا اليه

فارى صورتك امامى

يا حبيبتى

هل انتى القمر فعلا؟؟؟

بين شطين وميه

بين شطيييييييييين وميه ..

عشقتهم ااه عنيااااااااااااااا

يا شط اسكندرييييييييييييييييييييييييييييييية

معلش ازعجتكم بصوتى الكروااااااااان

وناس هتلاقيسه فززززيييييييع

تحت المريييييييع بشوية

بس مسافر تومورو ان شاء الله اسكندرية

هعمل دماغ تدوينية هنااك

وارجع فايق ان شاء الله

هوا كان فى عندى امل انى اادخل من سيبر هناك وكده ...بس العيال اللى رايحلهم

مبيرحموووووووووووووووووووووووش

زى الوحوووووووووووووووووووووش

فلو قلت لواحد منهم هعدى على سيبر...

هاخدها عوم لايطاليا :D

واهى فرصة انى اجدد جو...لانى بجد كل ما اجى اكتب...الافكار تطير...

وبالمرة اارجع اكمل بوست الصدفة الحلوة :D

بس مش هطول اصلا عليكوا...

يلا ...

حد عاوز حاجه من سكندرية

ايووووووووووووووووووووووووووووووووووووووووة :D

وفاة والد كاتروز

انا لله وانا اليه راجعون

توفى ليلة الخميس

والد اختنا المدونة

Catroz

لا اجد كلمات الصارحة تصف حالى الان ..

لاننى كنت اكلمها اليوم ظهرا ...او فجرا ...

ووالدها كان مريضا فى الفترة الاخيرة...

ولكنه كان يتحامل على نفسه

مش لاقى كلام ااكتبه او اقوله خاالص...

عشان انا فى حالة مش مستوعب ايه اللى بيجرى

البقاء لله

صدفة...!!!

مجرد صدفة

حياتنا عبارة عن صدف مع بعضها

مع اختلاف انواع الصدف دى

يعنى ممكن النهاردة تبقى نازل من البيت رايح الشغل

وتقابل حد مش متوقعه...صدفة

بس بتفرق لو كان الحد ده بتحبه...ولا مش بتطيق اهله

فهنا بس هتفرق اذا كانت صدفة حلوة....او وحشة

وكمان الصدف دى....بتأثر فى سير يومنا

يعنى انت بعد ما شفت اخينا اللى بتتخنق منه صدفه

ورحت الشغل لقيت الدنيا معكوكة...

طبعا هتلعن سنسفيل امه ...واللى جابوة..

واليوم اللى مشيت فى الشارع وشفته

لكن لو شفت وجه ملائكى عالصبح كده

طبعا هتروح الشغل وانت مبسووط...

ومزبط مزاجك...وكل حاجه هتبقى السطة

وتدعى ربنا ان كل يوم يرزقك بالصدفة دى

حياتنا بالظبط كده

مش معنى كده انى بلغى القدر...تؤ

بس بتحصل لحظات فارقة معانا ...فى ايامنا

شغلنا...دراستنا...بتأثر فعلا علينا

سواء بالسلب او الايجاب

سواء بالفرح والسعادة...

او بالحزن والكئابة

كام واحد منكم فاكر الصدفة الحلوة بتاعته؟؟

واحد...تلاته...عشرة ممكن...

طب ياترى كانت حلوة ولا وحشة ...

هتقل عليكم...انكم تكتبولى ..

اى صدفة كانت فى حياتكم...وكان تأثيرها ايه

اما بالنسبالى ....فحكاية الصدفة عاوزلها بوست لوحده

يحكى قصة اجمل صدفة حصلتلى فى شهرين ونص ...

على مدار حياتى كلها

بجد احلى صدفة لغاية دلوقتى قابلتها

يلا...مستنيكم..:)

عندما يطرطش الابداع

عندما يطرطش الابداع

وتنفجر الشرارات

وينبعث الدخان

وتتشفنحر الشفنحيرات

الخ من تلك الشوبعبرات

المهم يعنى


بعد المقدمة الطويلة دى

حصل فى يوم من الايام

جريمة نكراء

ان قتل شاب ...

ابيض اللون...

القلب يعنى ابيض

قتل نفسه...

جراء ترك حبيبته له

مع العلم ان حبيبته مش اى بنت يعنى

تؤ

دى موديل ومتظبطه ...وكمان مشهورة اوى اواوىاوىىىىىىىىىىىىى

قتل نفسه ياعينى بالسكينة ...

اللى كان بياكل بيها لفة قمر الدين

وخر صريعا ...ولكنه

وهوا بيخر يعنى

تذكر فعلته الشنعاء

وانه قتل نفسه

انتحر يعنى يا جدعان

وانه سيترك لها العالم بأسره ...

لتبرطع فيه...

هى والمرسيدس اللى وراها

لتبرطع برطعه...

وتروح تتجوز بروس ويلز

الخاينه

يلا مش هطول عليكم

تصادف وجودى انا وواحد تانى ...

عشان نكون شاهدين على الجريمة البشعه

اللى حصلت فى احدى ضواحى

المنطقة الراقية الهادئة

المطرية سيتى :D



والتصوير لو طلع وحش معلش...

امسحوها فى اى حيطة

قول للزمان ....ارجع

عايزنا نرجع زى زمان ...قول للزمان...ارجع يا زماان

اييييييييييييييه

وتنهيدة طويلة...وانا قاعد بسمع الست وهى بتغنى ...اغنية فات الميعاد...
ونفتكر المواعيد اللى فاتت ...هنلاقيها كتير ...

وهنلاقى نفسى بتقول للزمان يرجع لورا عشان االحق اى ميعاد من اللى فاتوا
بس وتفيد بايه يا ندم...:(

مش هيفيد الندم بتاعى بحاجه...بالعكس هتتعك اكتر ما هى معكوكة ....
بس هفضل ااغنى واقول ارجع يا زمن

بس انا نسيت الابتسامة..زى ما نسيت الالم...والزمن نسى فرحى وحزنى ياااما
نسيتها طبعا ...والزمن بينسى فعلا ...الواحد الحاجات الحلوة او الوحشة....

بس سبحان الله الواحد بقى ينسى الحلو...ويفتكر الوحش...مع ان ده ضد الطبيعة
ان المفروض نفتكر الحلو...وننسى الوحش ...بس هنعمل ايه

ونرجع نقول قول للزمان ارجع يا زماان
بس عمره ما هيرجع...وعمرنا ما هنعرف نصلح اللى باظ

راكب المترو النهاردة...وست دخلت ...واقفه جمبى شايلة نونو زى العسل...بنوتة تقريبا...
بتبصلى فى ازبهلال بتاع الاطفال الجميل ده...

ايه النخلة اللى واقفه...ومنعكشه شعرها ودقن طويلة...وفاتحة بقها بطريقة عسل جدا...مامتها تلاعبها...ولا هى هنا..
اهى البنوتة دى ...خلتنى اافتكر الاغنية اكتر....

ان الواحد يفكر لو يرجع زمان...ويجيب مجموع حلو...او يقعد عالكتاب اربع سنين يتخرج..
ويشتغل ...ويتجوز بنوتة زى القمر كده ...ويبتدى حياته

لكن يبقى قاعد يلاقى حياته بتجرى من حواليه ومش عارف يعمل حاجه...وغيره اتخرج او هيتخرج
لازم يقول ارجع يا زمن

بس ميزة...عشان الواحد يبص لقدام اكتر...ويحاول يحقق ذاته المختفية ...تحت اكوام من التراب
وطموحه اللى مات من زمان...

بس اهى محاولة يائسة ...وخلاص ...بس اكيد هتتعمل...
او جارى عملها

بس هنفضل برضه نقول

عاوزنا نرجع زى زمان...قول للزمان ارجع يا زمان

يا دبلة الخطووووبة عقبالنا كلنا

كعب الغزاال يا متحنى كعب الغزاااااااااااااااااااااااااااال

ويا دبلة الخطوبة عقبالنا كلنا ...ترلملم

انا كنت منزل بوست مختلف

وحطيته درافت

اول ما شفت خبر

جميييييييييييييييييل اوى

فى مدونة سمراء النيل العزيزة

الا وهو

خطوبة الانسة سمراء النيل

على الاستاذ

طارق واحد من الناس

هيييييييييييييييييه

قيموا الافراح والليالى الملاح

طب واللى عاوز يهمى

يروح فين ولا يجى منين

خدوا اللنك ده

سمراااء هتتخطب يا ددعان



يلا عاوز الاقى حلل الشرباااات اللى فى مدونتى يخلص

متعبش وانتوا تتفرجوا

صينية باذنجان بالخضار

بخ....فاصل قصير ...مع مطبخ عمو السفاح ...ونواصل

باتنجان بالخضار

المقادير:

بتنجانتين اسود كبيرة..المكعبرين دوول...ااسألوا اى بنت وهى هتقولكم ...متقطعين شرائح

بصلة متوسطة...متقطعه شرائح

فلفلاية خضرا متقطعه برضه

طبعا سفاح لازم كله متشرط ومتقطع

3 طماطم متقطعين قطع صغننه

2 فص توم مهروس

1/2 ملعقة صغيرة فلفل .

1/2 كوب جبنة مبشورة ...رومى يعنى

ملح ...

زيت عشان تقلوا...بطلوا بخل واشتروا اى ازازة

طريقة الطبخ:

نحمر البتنجان فى الزيت ...لغاية ما يبقى لونه ذهبى ...ونحطه على جمب ....

ونسخن فى مقلاية معلقتين زيت...ونحط عليهم بعد كده شرايح البصل ...وبعدين الفلفل الرومى...ونحمرهم 5 دقايق

وبعد كده نحط الثوم والطماطم ...ونسيبهم عالنار لمدة 5 دقايق ...بعد كده نحط الفلفل والملح

ونجيب صينية فرن ...ونجط فيها البتنجان ونحط فوقه الخضار ..الخليط اللى احنا عكيناه سوا ...وبعد كده نحط الجبنة المبشورة لغاية لما تسييح

وبخ ...خلصت الاكله ...

بصوا جربوها كده...

عشان جربتها وشبهت عليها انها ممكن تكون مسقعه ...

وبالهناء والشفاء...

ولا تنسوا الدعاء لعمو السفاح

طرطشة عالحيطة

سكان الطرطشة الكرااام

وحشنى بجد بجد بجد

والامتحانات فحتتنى بالمعنى

حتى بقيت بطرطش عالحيطة من كتر الطحن

دى مش امتحانات

دى معركة حامية الوطيس

ممممممممممممممممم

طبعا اغلبكم من النص اللى خلص ...ومريح ومرتاح

مسيرنا نحصلكم :D

اما اللى بيمتحن ...

من موقعى هذا

عالكمبيوتر فى الصالون

ارسل له باقة ورود مليئة بالدماء

واعلن استعدادى لجز اعناق الدكاترة بتاعته كلهم

ولو فى مدارس ممكن الناظر ...

عشان اصلا فيه عجز فى عدد المدرسين

وكلية تربية بتطلع منهم الالف كل سنة

ما علينا

موقف من مواقف الامتحانات

بنت النهاردة قاعده فى القاعه

والراجل اللى ماسك القاعه

رئيسها يعنى

يزعقلها يقولها انتى مش هنا

وتقوله تؤ هنا واسمى مكتوب

يقولها يا انسه مافيش بنات عندى

وهى برضه مصممة انها هنا

المهم قامت وراحتله وتؤكد ان امتحانها السبت

المهم فى الاخر

طلع ان الانسه اتسطلت وجت يومين بدرى

اصلها اولى

هههههههههههههههههههههههههههههههههههههههههههههههههه

صباح السطل

عشان تعرفوا حقوق بتعمل اكتر من كده

كان نفسى ااديلها كوباية الموكا اللى كنت بشربها وقتها

كانت تفوقها ولا حاجه

بس قولت يلا ...ان ازر تايم

ايييه تانى حصل

ممممممممممممممممممممم

قابلت ناس اصحابى ...اللى بقالى شهرين مش شفتهم

بتوع الليسانس دوول ...ربنا معاهم

او يتولاهم

وشفت ناس برضه ...كان نفسى ااشوفهم

يعنى وحشونى وكده :D

بيدوا الواحد حبة امل شوية ان لسه فيه حاجه كويسة فى الحياة

وواحد صاحبى طلع خطب....والواطى ولا يعزمنى ولا يوقلى الا النهاردة

سحقا بالملبن

لاء وانا اللى كنت معرفه على خطيبته برضه لما كنا مع بعض اول ترم

واطى بقى ...هنقول ايه :D

واحد عزيز عليا جدا هيسافر كمان 5 ايام السعودية يشتغل هناك...

عشان يرجع يتجوز بقى ان شاء الله

ونفسى ااشوفه ومش عارف بسبب الزفت الامتحانات ..:(

طرطشت انا كتير النهاردة

بس عندى حاجات كتير عاوز ااكتبها واقولها

ممكن بكرة او بعده هاجى هنا اطرطش شوية

فى الاخر ...ااحطلكم كام صورة ...تضحكوا شوية ...:)


فلاش بس مش عارف مرضاش ينزل ليه

هحطلكم اللينك بتاعه

ومعلش تعالوا على نفسكم

وادخلوا الموقع وسيبوه يحمل

بس بجد تحفه

ده اول جزء

المصمم...والضحية
http://www.atomfilms.com/film/animator_vs_animation.jsp

تانى جزء ...

الانتقام الدامى

http://www.atomfilms.com/film/animator_vs_animation_2.jsp


البكلام ده كتبته بالليل ...قلت ااحطه

ممكن حد يعجبه

اراكى فى قلبى ...ترقصين على انغامه

اراكى فى عيونى ...تسبحين فى بحر دموعى

اراكى فى عقلى ...تشاهدين مكانك عندى

اراكى امامى ....تسحرينى بجمالك

اراكى فى حياتى ....ملاك وجدته امامى

اراكى حبيبتى ....فكونى لى يا ملاكى