Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Sunday, May 27, 2007

اجيال ورا اجيال

فى البداية سورى انى لسه مش كومنت على كومنتاتكم اللى قريتها كلها وفرحتنى

بس مطحووون يا ولدى مطحوون

وداخل تخاطيف

قلت ااحطلكم حاجه تسليكم كده

فى اليومين اللى هغيبهم ان شاء الله

اتمنى انكم تستمتعوا












بسا

وانتوا بتتفرجوا على تأثير المذاكرة والامتحانات عالطلبة

ههههههههههههههههههههههههه

Thursday, May 24, 2007

i need youuuuuuu

محتاجك

اسم مش جديد عليا

بس ساعات كتير

لما ابقى قاعد مع نفسى

وده المعتاد

اابص للسقف

واتأمل فى شكله وافتكر انى عاوز اادهن اوضتى السنة دى ان شاء الله

مش موضوعنا يعنى

المهم اافكر

والاقى نفسى ااقول محتاجك

لمين بقى ؟!!!

لناس كتيييييييييييييييييييييييييييييير

ممكن يبقى اول حد ااقولها تبقى الكلمة دى

ااقولها وانا بصلى الفجر

وقاعد بدعى

والدموع بتنزل منى

وامد ايدى واقول لربنا محتاجك تبقى جمبى بجد

محتاجك تقف جمب عبد من عبادك فى الدنيا دى

محتاجك تنورلى طريقى

محتاجك تفضل معايا بعد كل اللى عرفتهم سابونى لوحدى

ممكن ااقولها لحد من اهلى اللى مش معبرنى

او دى كنت بقولها زمان

من اربع او خمس سنين

دلوقتى مبقتش اافكر فى الكلمة دى

لانهم هما مش جت على بالهم خاالص

فيه اولويات طبعا

ومن العبث ان نفكر بالحب او الاهتمام او الحنية بتاعت الابناء دوول

لازم يطلعوا جامدين يعتمدوا على نفسهم فى معترك الحياة

مش من حقنا اننا نسأل على كلمة منهم ...

بس من حقنا اننا نقول حاضر وبس

وديه من حقوقهم علينا اننا نبر بيهم

ومش معترض خالص بجد

بس زى ماهما ليهم حقوق عندنا

احنا لينا حقوق وبسيطة جدا

محتاجك

ممكن ااقولها لصديق نفضلى

ههههههههههههههههههه

بلا قرف ...مش عاوزك ياض ...غوور

محتاجك

اخر انسان هقولهاله

حبيبتى

المجهولة

هقولها محتاجك

فى يوم

فى النماذج دى...يعنى من شهر او اتنين ممكن

كان اخر يوم بقى

والواحد قضى احلى 4 ايام فى عمره بجد

جت لحظة الاستفتاء النهائى

حاجات فى اغلبها مضحكة

زى اجمل كرافتة وايشارب

بهلوان المجلس

وحاجات مهمة

زى احسن قاضى واحسن محامى

العبد لله اخد احسن قاضى ...ووقفت واتكرمت مرتين

مرة وسط المجالس كلها ووقفت ...واختى بعتتلى بوسة طائرة ..ههههههههههههههههه

ومرة تانية واحنا بنودع بعض اعضاء المجلس

وناس بتعيط

ورفعونى فوق وحاجات من دى

روحت البيت ...كنت متخانق معاهم اصلا عشان حوار

ماسك الهدية ...

ومعايا ذكريات يوم طويل جداااا

بصيت للهدية

وحطيتها عالمكتب

والميدالية علقتها فى سلسلة المفاتيح

اليوم ده بجد فاكره انى كنت عامل زى الطفل الصغير اللى راجع من المدرسة

وفرحان بالنجمتين اللى الميس حطتهم فى كشكولة

وعاوز حد يقوله كده

بس للاسف مش لاقى

انا كنت زى كده

ببص لحاجتى

وجوايا كلام كتير عاوز ااقوله

بدل ما انام وانا فرحان ..

قعدت مكشر وعيطت حبة

سبحان الله سفاح وبيعيط :D

اليوم ده بجد

كان اكتر يوم

كلمة محتاجك كانت موجودة فى ذهنى

محتاجك جمبى

محتاجك حضنك

محتاج كلمة واحده منك

محتاج انى ااشوف وش ملائكى بيضحك

مجرد حتى ابتسامة

محتاج انى اشوف قلب بيبص لقلبى وبيضحك معاه

محتاج قلب يقعد يتكلم مع قلبى ويشيل حبة من الحمل اللى شايله بقاله سنين

محتاج حاجات بسيطة

بس للاسف فى زماننا ده بقت زى لوغاريتم صعب حله

للاسف بقت عملة نادرة

رغم انها موجودة

بس مبقناش نعرف نشوفها

من كتر الدموع اللى بقت مغطية عيونا

مبقناش نعرف نمسكها من كتر ما ايدينا اتعودت انها تفلت الناس اللى مش عاوزانا

مبقناش نعرف نحبها من كتر ما قلوبنا اتعلمت القسوة فى حياتنا

مبقناش محتاجينها ....لاننا اتعودنا اننا نعيش من غيرها

مبقتش ااقول محتاجك ؟؟؟

تؤ

لسه بقولها ....بس فى سرى

لسه بقولها بس بقلبى

يمكن يجى اليوم

اللى كلمة محتاجك دى تقتصر على ربنا بس

ومتبقاش لحد تانى

:(

-----------------

بالنسبة للوسم تاج اللى من عند مها

ان شاء الله قبل امتحانى بكام يوم هعمله عشان هختفى مؤقتا اسبوع كده ...:)


Tuesday, May 22, 2007

تاجونى ومحدش سمى عليا

ههههههههههههههههههه
باين ان التاجات بالموسم فعلا

وجايلى 3 تاج

واحد من عند شادى فايد...والباقى من عند مها...و وشوشنى كمان

يعنى الناس متوصية بيا وقبل الامتحانات كمان ....اشطززز

هنبتدى بتاج شادى فايد الاول ...


وتاج ده برضه من عند سها ...وات ايفر

أحب شخص لقلبك فى الدنيا؟

قلبى انا

انسان مستعد تضحي بحياتك – ركز فى كلمة حياتك - عشانه؟

ممم...فى حياتى...ممكن حد من اصحابى يستاهل كده

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

دكتور سقطنى سنة ظلم

ما هو:اسم أجمل كتاب كتبه بشر قرأته ومحتفظ به حتى الان؟
اسم كتاب -كتبه بشر برضة- انت متعلق بيه وبتقرأه كل فترة؟

البداية والنهاية لشيخ الاسلام: الامام :
عماد الدين ابى الفداء اسماعيل بن عمر بن كثير القرشى الدمشقى


اهم جهاز منزلى انت متعلق بيه او بتستخدمه كتير؟
مكان تحس بالراحة عندما تدخله؟

الكمبيوتر بتاعى

شىء تحس بالراحة النفسية عندما تنظر اليه؟

السما وقت الليل او وقت الفجر كده

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
لما بقعد قدام اى مكان فيه ميه ..ماعدا الترع والمصارف :p

اجمل مدينة زرتها داخل مصر ؟

لغاية دلوقتى ...الغردقه...واسكندرية..

أجمل مكان طبيعي رأيته داخل مصر ؟

الشعاب المرجانية

شخصية كارتونية بتحبها؟

كونان

نوع هاتفك المحمول؟
Nokia 6610i

سرعة بروسيسور جهازك؟

3Ghz,

حجم ذاكرة –هارد- جهازك؟
200G

المساحة التى تشغلها المواد الاسلامية على جهازك؟

مش كتير اوى

أهم هدف انت واضعه لحياتك الآن؟
للاسف اتغيرت الاهداف انى اتخرج...بعد كده احب اى ملاك واتجوزها ..:)

مواصفات فتاة الأحلام بالنسبة لك؟

مش حاطط مواصفات صعبة...انها تكون انسانه...رومانسية...لاسعه ...عندها القدرة عالابداع ...جميلة ...
وتكون اهلاوية :D
واهم حاجه تكون بتعرف تحب الناس

صف ما يأتى:

شعورك لما بتسمع كلمة مصر ؟

بالفخر

شعورك لما بتسمع كلام عن اليهود؟

بالقرف


شعورك لما بتشوف ظابط شرطة؟

يارب يفضل كويس

شعورك لما بتشوف الكناس العجوز فى الطريق؟

فين ولادك؟!!


افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
عاتى مواطن وماشى فى الشارع

احساس يراودك فى اشارة مرور مغلقة بسبب مسئول كبير؟

فرصة للدعاء عليه والضحك ان يوم القيامة مش هيلاقى السكة سالكة كده..:)

اللى عاوز يعمل التاج يعمله....عشان مافيش ولا واحد من الخونة اللى مررلتهم تاج زمان عملوة...فقتلتهم


Sunday, May 20, 2007

Tuesday, May 15, 2007

Family Support

"ابنى لاعب فى النادى الفلانى ...وانا فخور بيه جدا ...والاسرة كلها وراه ومعاه لغاية لما يكمل حلمه "

"سمعت شريط ابنى الجديد...حتى الاغنية اسمها كذا....."

ده ملخص للطرطشة اللى بقالى فترة طويلة عاوز ااكتب عنها

وهى الدعم بتاع الاسرة للابناء

ولنشاطاتهم اللى بيقوموا بيها

الدعم ده ممكن ناس تستهيفه وتفتكر انه مالوش لازمة ...

بس الصراحة رايهم غلط جدا...وهو مهم جدا فى الحياة العائلية

لان لما يكون الابن او الابنه ...عارف ان اهله بيساندوه فاللى بيعمله من نشاط

وعارف ان اهله مؤمنين بقدراته واللى بيتبان من خلال النشاط

متتخيلوش كمية السعادة اللى بيبقى فيها ....

لكن لما تلاقى اهل مافيش عندهم هم او اى شاغل الا العيال تخلص دراسة وتشتغل وبس

طب اانضم لكذا...لاء..زمالهاش لازمة..

طب هدخل فنون...تؤ ...مش هتمشى فيها

طب يا سبحان الله ...طب بتخلفونا ليه ...ولا عشان تقرفونا

اذا كان الحاجه اللى احنا بنبرع فيها ...مش مقتنعين بيها

هديكم مثالين كده فى حياتى

فيه عمرو خالد من كام سنة كان طرح فكرة التوعية الصحية للامراض غير المعدية....

كان وقت الاجازة لما سمعت عن ده...وانضميت فعلا لمنتدى صحى بجامعة عين شمس

واخدت كورسات وقتها تنمية بشرية

وكورسات ميديكال كتير...وعرفنا ازاى نوعى الناس

عندى فى البيت لما عرفوا ترددوا فى الموافقه...واشترطوا انها تقتصر على الاجازة

ولما عرفوا انى بكملها فى الدراسة اتهمونى بعدم الفهم وانى مش عارف مصلحتى...ودى مش هتفيدنى فى حاجه !!!

الصراحة فادتنى فى حاجات كتير ...اتعلمت حاجات عن امراض مكنتش ااعرفها...اتعلمت ازاى ااحتك بانواع كتيرة من الناس ...وازاى ااخرج من المواقف اللى بتحصل...اتعلمت قيمة جسمنا ...وانه امانه هنتسأل عليها يوم القيامة

بس هما شايفين انه مش مهم ...ركز فى دراستك يا سفاح ...ولما تخلص ااعمل اللى انت عاوزة

حاجه تانية

النماذج بتاعت جامعة الدول اللى بمووت فيها وبنضملها دايما

مش مقتنعين بيها وشايفين انها تضييع وقت

بس لو كانت تضييع وقت مكناش بناخد عليها شهادات من رئيس الجامعه وعميد كلية سياسة واقتصاد

ومكناش هنحطها فى الcv بتاعنا كمان

حاجات كتيرة بنبقى مجتاجين دعمهم ...بس للاسف ممكن يقابلوها بالرفض التام من قبل ما يعرفوا ايه هى

ياريت الاهالى يخلوا بالهم شوية من ابنائهم

ويؤمنوا حبة بقدراتهم اللى اغلبهم مش شايفنها

ويقربوا منهم اكتر....ومش يعتقدوا انهم يعرفوا كل حاجه عنهم...وفى الاصل مش موجودين...

--------------------------

سورى للى مش عملت كومنت للناس اللى ردت عالبوست اللى فات نظرا لظروف الامتحانات...وعندى برد...روعه ...فبقعد عالكمبيوتر تخاطيف ...:)

هحاول اارد عليكم ان شاء الله

Wednesday, May 09, 2007

تــــحـــــيـــة إلـــــــى

المرة دى ...سيكون هذا البوست ممتلىء ...ودسم

كنت اجلس مع ملزمتى الحبيبة ...احاول ان افهم ما اقرأ او اقرأ ما افهم...ولكن فى الحالتين باءت المحاولات بالفشل

فجلست اافكر كالعادة...اذا طلب منى فى يوم من الايام ان احضر مؤتمر ما ( سيحدث قريبا ان شاء الله )

فبالطبع سيكون هناك كلمة افتتاحية لى ...

فكيف ستكون ...فعندما حاولت ان اقوم بكتابتها وجدت اننى سأقوم بتوجيه مئات الاف من التحيات والسلامات والتشكرات.
لاناس كانوا السبب فى تغيير حياتى ...او جعلى اتمسك بهدفى اكثر من الاول...وحتى ولو بكلمة صغيرة...وحتى لو كان مردود كلامهم قليل

ولكنهم احدثوا هذا التغيير الذى لا استطيع ان اتجاهله ...همممممممم

كلام كثير اود قوله فى هذه الطرطوشة ....

حسنا ...سأقوم بالكتابة ...ومثلما تأتى ...فلم اعتد ان احضر لشىء سأكتبه او اتحدث عنه...

اترك الكلمات تنساب من قلبى الى اصابعى ...التى تضرب هذه الازرار الالكترونية...فتجدوها امامكم

اول تحية اود ان اهديها لاصدقائى هنا فى عالم التدوين

فالتحية الاولى الى العزيزة ياسمين ...والتى اشعر كلما دخلت هنا بأن ملاكا قد عبر لبرهة ...لا اعلم ...فهى تذكرنى بشخصيتى القديمة قليلا قبل ان تتغير بفعل عوامل التعرية والاحتكاك مع الغيلان المسمون بالبشر فى مجتمعنا اللذيذ

تحية الى ياسمين ..والى ما تفعله ...من مجهود يكتب لها فى حسناتها ان شاء الله ...فمن يومين دخلت لمدونة ريمو بالصدفة البحته ...فوجدتها كانت فى الحالة التى يمر بها معظمنا ...ولكن استوقفنى شكر موجه الى ياسمين ...ممممممم...اظن ليس هناك كلمات اخرى تكتب تصف كيف هى ...وبالطبع هذا رأيى بناء على التعامل الذى حدث بيننا او فى القراءة والكتابة ورؤية مواقفها الكثيرة هنا

هى الان كانت تشكو من انها انسانه وليست مسخ ...ونحن نؤكد على هذا وندعوها الا تلتفت الى كلماتهم ...فكل يوم نقابل اشخاص كثر يقولون نفس الاشياء ويجعلون نفنسا تبدو وكأنها مسخ بالفعل ...وليس بشر ...ربما هى انفسهم امساخ يحنون الى العودة بشر من جديد

تحية اخرى الى سمراء النيل ....كانت هى اول كومنت فى طرطوشة اوبس ...وفعلا كلماتها ايقظتنى من غيبوبة كنت فيها ....كانت مثل الشخص الذى غرقت به عبارة فى المحيط الهندى ويحتاج الى قشة ...ليتعلق بها...فكانت كلماتها مثل تلك القشة ....فشكرا لكى جزيلا

اشكر المدون القدير ...راسبوتين على البوست الذى طلب منى ان اقوم بقرائته ...فهذه قشة اخرى قد اصبحت معى ...فبدأت فى الوقوف قليلا ...والبدء من جديد ...وفقك الله فى عملك وحياتك يا جميل

تحية ايضا الى نــونى...بكلاماتها الرقيقة ايضا التى اصبحت القشة الاخرى ...او لكى اجمع الطوف الذى سأعود اليه لموطنى ...
فشكرا لكى ...على كلماتك تلك

تحية الى عاشقة الوطن بكلماتها الرقيقة والمضحكة ...لا تقلقى السفاح قد عاد...ولكن انتى لم تعودى :p

وتحية اخرى الى كوكو الكميل ....ريرى ....ضوء القمر

مممممممممممممممممممم...انتهينا من ارسال التحيات الى عالم التدوينات....عذرا فسأعود لعالمنا الواقعى لارسل بعض التحيات فقط...وسأعود

تحية الى حبيبتى السابقه التى قد تمكنت من انتزاع قلبى بكل مهارة والاحتفاظ به سنة ونصف ...وتحية مجددا لها لانها قد تمكنت وبكل مهارة ايضا من نوع السكين وطعن هذا القلب بكل جدارة ...فشكرا لكى

تحية الى صديقى الذى ظللت معه 7 سنوات ...نأكل وننام ونشرب ونخرج سويا ...وفى الاخر خطف الفتاة التى احببتها ...تحية له لانه قد علمنى اننى لا اثق ولا اامن لاى شخص مهما كان

تحية الى اصدقاء المصلحة الذى لا يتذكرونى الا فى شىء يريدونه

تحية الى صديق الطفولة رامى ....فانت رجل بمعنى الكلمة....ورغم اننى اعلم انك لن تقرأ هذه الكلمات ...ولكن اود ان اعلن اننى فخور بكونك اخى الذى لم تلده امى ...

تحية الى اصدقائى الجدد واخوتى ضياء...و وسام...رغم اننى قد تعرفت عليكم منذ سنة فقط...ولكننى اشعر اننى اعرفكم منذ سنوات طوال

تحية الى تلك الفتاة التى هى ملاك يمشى على الارض ...والتى تدعى انجى ...ووالتى جعلتنى اذهب للجامعه شهر متواصل كى ابحث عنها واين تجلس ...فتحية لها لاننى لم اجدها حتى الان

تحية الى رئيس مجلس الوزراء ...ومحافظ الجيزة وضيوفهم الكرام لايقاف شارع الهرم ...وفتح وصلة غريبة على شارع الجامعه...فشكرا لانهم اعطونى اليوم اجازة من الذهاب للجامعه فى هذا القيظ

هل هناك احد قد نسيته ...لا ادرى ....

ولكن اود فقط فى النهاية ان اوجه تحية مخصوصة لكل من ....قلبى الذى تحمل كل تلك السنوات ولم يمت حتى الان

وتحية لكل من دخل هذه الطرطشة وترك تعليق او اكتفى بالمشاهدة ورحل ...

Tuesday, May 08, 2007

Stop...



ازويكم يا جماعه

بس حبيت ااعمل اعلان

عن افتتاح مدونة جديدة فى بحر المدونات

وان شاء الله تعلى اكتر واكتر

مممممممممممممممم

لسه مافيهاش غير توبك واحد

بس ان شاء الله تتملى

صاحبتها اخت صغرى لى ..

وربنا يوفقها ان شاء الله

دوووس عاللنك بالراحة بس...

Stop here

Saturday, May 05, 2007

اشمعنى الكوووووسة ؟..!

اشمعزة الكوسة ...

اى واسطة...يقولك كووسة

سالت السيد الوالد...قالى عشان ورقها بيبقى باين فووق...بس من تحت متبقاش عارف ايه اللى بيحصل

ده تقريبا اللى فهمته منه

ولا عشسان عندنا وفرة منه فى مصر

انا بحب الكوووسة مووت

خصوصا لما بتتحشى ...يا سيدى...واشوفها فى الحلة بتتمختر ..

واقولها: اكلك منييييييييين يا كووسة ااكلم منييين؟

ويا سلام لما تشوفها بتستجم فى الدمعه

واقعد اتغزل فيها واقول: قوامك ممشوق...وطعمك مبلووع...ودمعتك صاروووووووووووووووووخ

يم يم

معلش جوعتكم
بس ممكن اللى بتغزل فيه ده بيحصل

يعنى تروح مكان ويقولك ده معاه حلة كووسة انما ايه ...

تخيلوا كده انه بدل الواسطة اللى بقت خلاص سلو بلدنا

يجى الشاب مننا يتقدم لوظيفه...بدل السى فى بتاعه ...وشهادات خبراته...يدخل

معزز مكرم...رافع راسه لفووووق

شايل حلة كوسة محشية ...او بالدمعه...وممكن طاجن

كل واحد بقى وشطارته فى الطبيخ

والمدير يدوق...واللى تعجبه...يشغل الواد

تصدقوا فكرة

ماماااااااااااااااااااااااا

ممكن تطبخيلى كوسة عشان ااشتغل بيها ؟؟

Friday, May 04, 2007

يوم فى دريم بارك


اليوم: الخميس 3 مايو 2007

الزمان : الساعه 10 فى ميدان رمسيس

اينعم المفروض كانت 9..بس انا نسيت موبايلى ورجعت ااجيبه تانى..وباقى الولاد...اتاخروا لظروف الصحيان وكده

العدد 8...3 ولاد..و5 بناويت

اتقابلنا...واتمشينا لحد الموقف...ركبنا ميكروباص...طبعا اغلبهم من القاهرة...وانا الوحيد اللى من الهرم...فحسوا انهم بقالهم كتييير ماشيين

وصلنا عالساعه 11 كده...وابتدت المعركة

لظروف معينة ...انقسمنا اتنين جروب ...4 و 4

مجمل اليوم كان تحفة بجد

بغض النظر عن اللعب اللى مركبتهاش ...عشان عندى رهاب الاماكن المرتفعه

او اللعب اللى ركبتها بس جبت قرف للى كان راكب معايا

ههههههههههههههههههههههههههههههههههه

وكمان الاكل اللى بطنى كانت خربانه من اللعب

بس عاوز بس ااقول ان اليوم ده خلانى فرحاان جدا...

وخلانى ااغير جو كنت محتاجه

بس من هنا..عاوز ااوجه كلمتين لاصحابى اللى كانوا معايا يومها

سوسو كعب الغزال: سعدت والله برؤيتك...وانتى بنت زى العسل ..جداا...وفقر..هههههههه...ومخك حلو برضه...ووجودك خلى اليوم ليه طعم ...شكرنز..او مياوووووووووووو

درش دير جروسا: انت يابنى مجنوون مووت...وعسل برضه...وانت عارف التانى ...ههههههههه...شكرا يا حمبى

لونلى : حبيب قلبى من جوا وقاعد من برا مبرطع عليه...مش عارف هتقرا كلامى ده ولا تؤ...بس بجد كان يوم جامممد مووت يوم لما اتعرفت عليك

وباقى الناس اللى جم بشكرهم...ر...ب...د...ب 2

نورتم اليووم

كان نفسى ااروح معاكوا....بس كنت تعباان جدا...والمشوار من رمسيس كان بمثابة انتحار ليا

بس نسيت ااكلمكم واطمن وصلتم امتى...عشان ببساطة روحت اخدت دش ونمت...سورى:$

كان نفسى يكون معانا وســـام...بجد اليوم كان ناقصك...بس المذاكرة اهم...والترم ده اهم ترم...ولازم تخلص عشان نفرح بيك بقى يا حمبى

برضه ...افتقدت شيماء...ومروة

وان شاء الله نعملها فى الصيف تانى

---------------------------------

انا بشكر الناس كلها اللى سابت كومنت عندى فى البوست الكئيب...وبجد ردودكم هى اللى خلتنى ااثابر وارجع من تانى

هرد عليكم واحد واحد...بس كمان شوية كده

اختى الكبيرة...بتعمل مشروع تخرجها وواخده الجهاز مقاولة...فمش بعرف ااقعد الا كل فين وفين

قريبا ...

-------------------------------------


تحديييييييييييث

الله يسامحك يا ضياء...منك للى اكلت دراع جوزها...بتعملى قرنين ..مااشى

دى كنا تعبانيين مووت...وهما لسه فايقين مووت ...ونازلين من الغسالة












ضياء..او لونلى...كان رايح يتصاحب على اخينا الغلبان ده









"المحفظة فين ياااااااااااض؟؟"
ده كان نص الحوار بينى وبين ضياء ...قال اخدت المحفظة قال..هع هع
انا باخد رقااب :p












وعشان تعرفوا انى عمو سفاااح طيب القلب ...دى صورتنا مع بعض قبل ما ااقتلهم هما التلاته ...نيهاااااااااااااااااااااع










كان يوم تحفه جدا...ومميز مووت....ورغم اننا متصورناش...ربنا يسامح اللى كان السبب... بس يستاهل الصراحة وحاسس انى مش هنساه...وهيفضل محفور فى الذاكرة دايما

يلا نخلص اامتحانات ونعمل رحلة للبلوجرية كلاتهم
:D