I'm Back

 after long period no posting, many years full of joyful moments and sorrow 

I'm back 

just only to say i failed :)

جمعة طيبة

لا تنسوا قراءة سورة الكهف 

جمعة طيبة عليكم باذن الله

الخميس السرى 39

القواعد سهلة وبسيطة 

اللى عنده سر او فضفضة عاوز يشاركنا بيها 

ممكن يجى يكتبها هنا بالاكاونت بتاعه او يحب يكون مجهول 

لو حد عاوز ياخد الفكرة كما يريد بس يقول نروح نشاركه 

Happy week end Every One =)

هوا ايه الحب ؟؟

هوا الحب ايه بالنسبالك 

انك تقول لحبيبك بحبك ،تبعت مسج فيه كلام حب وغرام 

تعاكسه او تعاكسها ...وتروح توصلها اى مكان وتخرج وتنبسط ؟؟

لاء لو فكرتك كده عن الحب ..ممكن تروح تتسلى فى اى مكان تانى 

الحب انك تخاف

تخاف على شريك حياتك انه يضيع منك ...تخاف علي مشاعره ايه اللى ممكن يجرحه ويتعبه وتبعده عنه

انك تخاف انه فى يوم مش هيكون معاك ،فتخلى كل يوم اكنه اخر يوم ليكوا مع بعض 

الحب انك تهتم ،مش مطلوب منك تتصل بيه 90 مرة فى اليوم واو تبعت مليون مسج 

الاهتمام انك تفتكره وعالطول على بالك 

عيد ميلاده عيد جوازكم يوم كتب الكتاب او ذكرى خطوبتكم 

اول مرة خرجتوا سوا حتى اتقابلتوا صدفة فين 

اشياءه المفضلة ايه 

لو حد من اهله متوفى تهتم انك تحاول على الاقل تملى شوية الفراغ ده 

الحب انك تتحمل مسئولية 

والمسئولية هنا مش بس انك تنزل تشتغل وتجيب فلوس وتدفع مصاريف 

لاء كمان انك تكون عارف انك مش لوحدك فى المركب 

معاك حد تانى...هتغرقوا سوا وهتنجوا سوا 

فلازم تكون اد المسئولية 

انك تحافظ على شريكك 

انك تخلى العلاقة متجددة ومحدش يزهق من التانى 

الحب انك تتعب 

تتعب فى الشغل عشان تجيب فلوس تبنى بيه مستقبل

تتعب فى تنفيذ افكار 

تتعب فى انك تدور 

كل التعب ده طعمه حلو طالما فى النهاية رايح لحاجه حلوة اوى 

وهتيجى يوم تفكر فى مدى روعة التعب ده

ومدى انك تكون مطبق يومين بس اللى مصحيك هى او هو على بالك دايما 

فى الاخر الحب مش بس كلام وشعارات

الحب اللى بجد 

افعال 

=)

Just because you don’t see the tears on the outside doesn’t mean it isn’t pouring on the inside !

الخميس السرى 38

ميعادنا الاسبوعى 

عودة بعد توقف معلش 

القواعد سهلة وبسيطة 

اللى عنده سر او فضفضة عاوز يشاركنا بيها 

ممكن يجى يكتبها هنا بالاكاونت بتاعه او يحب يكون مجهول 

لو حد عاوز ياخد الفكرة كما يريد بس يقول نروح نشاركه 

Happy week end Every One =)

ست فلول

من كام يوم نازل الجامعة وراكب الميكروباص بتاع التحرير اخدته من فيصل عندنا 

والعربية اتملت وطلعت وست كبيرة كده بتاع 50 سنة فى الكنبة ورا السواق مرة واحدة فتحت الموضوع والتحرير ومش عارف ايه 

فعادى كل يوم الناس بتتناقش مبركزش ...لحد ما راحت عكت وقالت الثورة دى ربنا اللى عملها اما الشباب دول ولاد كلب ولا يفهموا فى حاجه ...هنا بقى عدد 5 شباب انا منهم دمنا اتحرق واتعدلنا فى قعدتنا ونكلمها 

ودى شغالة مبررات واهية 

المهم واحد بن حلال ورايا دخل فى الموضوع واتكلم معاها وعمال يهاتى ويزعق ودخلنا فى شفيق وعمرو موسى والاخوان وغيره 

هى لقت نفسها بتتزنق رجعت تشتم فينا تانى وبصتلى تقولى انتوا مبتفهموش وعملا وخونة ومخربين ...قولتلها ليه يعنى قالت عشان ثورة ايه وزفت ايه اللى بتعملوه وتقولك فى طلعت حرب طلعوا عليها فى بيتها بسنج ومطاوى وكانوا هيغتصبوها...قولتلها فين فى طلعت حرب تقولى الميدان ااقولها ايوة فين يعنى عمارتك تقولى الميدان اقولها ايوة عند الشرو ولا مدبولى ولا جمب البنك تسكت وتتوه الموضوع 

ما علينا 

لحد ما فى الاخر راحت مزعقالى وتقولى انت بتتكلم ليه انت ايه اللى حشرك فى الموضوع 

رحت مزعق واتحرق دمى الصراحة من الصبح فالقانا وتقولك القانون ومش القانون 

قولتلها القانون اللى فلقتينا بيه من الصبح بيدينى حرية فى اى مكان عام 

انتى لو قاعدة فى بيتك وانا جيت دخلت فى نقاش وقتها من حقك تزعقى كده ...لكن انتى فى مكان عام ومش من حقك او من حق اى حد مهما كان ايه فى ام دى بلد يصادر حقنا اننا نتكلم او نعبر عن رأينا ...قالتلى اتلهى ...قولتلها بتتزنقوا وتجيبوا ورا وتغيروا الموضوع 

بعدين قولتلها يا حجه انا شايف انك بسم الله ما شاء الله عقلك يوزن بلد وبتحبيها عشان كده انا شايف انك ترشحى نفسك رئيس البلد وانا هديكى صوتك ...راحت مشرشحالى ولا اكنى شتمتها ...الناس ضحكت اصلا ...هى مضايقة وتقول لو كنت رئيسة هعمل واسوى وقولتلها خلاص رشحى نفسك وهنصوتلك راحت مش عاجبها وتقولى وانا مستنياكى عشان تدينى صوتك...قولتلها ليكى الشرف والله انى هتفضل وانزل من بيتى واصوتلك عشان اكيد عارفه مصلحتنا اكتر مننا 

وسيبتها ونزلت 

المهم افتكرت انى ركبت معاها شهر 4 وكانت بتشتم فى الثورة لوحدها بس وقتها ولد وبنتين هما اللى تولوا النقاش معاها وفى الاخر شتمتهم ونزلت برضوا :D 

اييييه زمن 

ليه؟؟؟

طب طالما الناس اللى بتدخل فى حياتنا 

بتكون عندهم النية انهم يمشوا 

ليه بقى بيدخلوا وبيعلقونا بيهم 

ويقولك متزعلش لو انا مشيت 

!!!

Pain sucks !

Pain Refusing to STOP !!

about love !

Love doesn't need to be equal or be fair, it only needs to be REAL !!

الخميس السرى 37

الاسبوع ده هيكون مميز طبعا 

عشان الخميس ده جى فى حملة التدوين اليومى اللى انا اشتركت فيها 

عموما الناس الجديدة الفكرة كالتالى 

يوم مخصص للاسرار 

كل واحد عنده سر او يحب يفضفض هنا يجى ويكتبه فى الكومنتس 

بالاكونت بتاع بلوجر او يحب يكون مجهول 

زى ما يحب 

لو حد حب ينقل الفكرة يقول بس عشان نبقى نيجى نشاركه الاسرار :)

لو عاوزين تشوفوا ال36 بوست اللى قبل دول دوسوا عالهاش تاج اللى تحت البوست 

happy weekend every one 

=)

Winter Whisper

نفسى اعمل زيها كده 

بس يكون الجو برد...انا بعشق حاجه اسمها شتا 

بستناه بفارغ الصبر

بعشق الهواء المتلج اوى ده...شعور انك ماشى ايدك فى جيب بنطلونك ولا الجاكيت والهوا بيخبط فى وشك وتحس بمناخيرك بتتجمد من السقعة ...وتبقى ماشى فرحان اوى بالشعور ده 

زى اما تاكل ايس كريم بسرعة اوى تحس مخك بيتجمد وقشعريرة فى جسمك حلوة كده

ويا سلام لو بتتمشى على شط اسكندرية وهوا اسكندرية فى الشتا متعة احلى من القاهرة بكتير 

تحس انك نخلة والهوا بيزقك يمين وشمال ...هوا متلج اكتر بردوا

وياسلام بقى لو الدنيا مطرت وتمشى تحت المطر وتبقى مبلول من اولك لاخرك كده 

جربوا مرة كده الدنيا تمطر جامد انزل اقف فى الشارع وافتح دراعك اكنك بتحضن السما وبص لفوق وهتلاقى نفسك بتضحك

يا من عبطك يا هتضحك لما تحس باحساس جديد غير احساس انك هتلبس برد السنين :D

الاحساس ده جربه وانت بتنط فى البسين او البحر ...بس بلاش  ارتفاعات عشان الكرباج وكده ^^

جرب تسيب نفسك للهوا يزقك شوية 

احساس انك طاير مش بمزاجك ده بيخليك تسترخى اكتر 

بالظبط زى الصورة دى

مسترخية على وش الميه 

مفيش حاجه على بالها

وممكن تكون بتفكر فى حد او اتنين

بس الاهم هتكون مبسوطة اوى 

مبسوطة عشان حد من اللى على بالها بيخليها تضحك عالطوول 

بيخليها تنسى الدنيا ولو لثوانى

بينقلها لعالم تانى عالاقل 

ودى ميزة الشتا عندى

مليان ذكريات حلوة ووحشة 

بس الحلوة بتفضل عالبال عالطوول 

بفتقد الانسان اللى كان ذكرياتى معاه 

بس الابتسامة على قد ما بقدر ااخليها تدوم 

المهم بردوا نرجع لمرجوعنا 

الشتا كنت عاوز ااقوله

حمد الله بسا يا برنجى 

=D 

:(

تليفون المنزل بعافية هوا والنت 

من كام يوم كنت بتبطر عالنعمة

طارت النعمة يا ولداه 

محدثكم من الهاتف الجوال

سفاح 

:(

You are responsible for your own happiness. If you expect others to make you happy, you’ll always end up disappointed =)

وجع السنان

ونظرا لأنى دايما ذكرياتى سيئة مع اطباء الاسنان 

وقلما لما برجع من عند واحد ومشتموش هنا او ادعى عليه

اقر انا سفاح كرموز ...[ان دكتور النهاردة ليس له اى ذنب فيما اقترفه زملاء مهنته من اساءة اليها 

والراجل يشكر موجعنيش بتاتا :D 

ودى حاجه تخلينى اتشجع واروحله تانى

وشكرا :D 

سحقا للانترنت

التكنولوجيا رغم فوايدها الكتيرة ومنقدرش ننكرها 

بس هى بوظت حياتنا الاجتماعية 

 زمان قبل الفيس كان اخرنا الاى سى كيو وكانت اللى بتعبرنى وقتها ليندا ودى اشهر سبام ليه وقتها 

بعدين الياهو والالعاب بتاعته

بس كنت ااقابل اصحابى وننزل ونروح ونيجى 

الفيس انا دخلته فى 2008 

كل مدى الحياة بتتقلص وتنحصر عليه

يعنى لو مستنى حد تحت بيته اسهل حاجه تبعتله على الوول ...ولو مش قاعد البلاك بيرى هيدى رنة معينة تقوله حد كتب حاجه عنده 

عيد الميلاد عليه ...الوفاة حتى الناس بتعزى اونلاين بدل ما تتصل او تروح 

تحجز المطاعم السينما وكمان الجيم تجدد اشتراكك من عليه

وتلعب وتجرى وتنطط زى ما بيقولوا 

وفيه ناس بتتجوز من مسافات بعيدة بسببه !!

حتى بقينا بنكسل نكمل الحروف 

Okay =ok=k 

Happy birthday = HBD 

be right back = brb

take your time = tyt 

والى اخره 

مش عارف ايه الحل ...بس عامة دى ضريبة التقدم التكنولوجى

لان زى ما ليه مميزات عيوبه موجودة

بس المهم نعرف نستغل المميزات صح ازاى

فى حاجه تفيدنا مش تضرنا 

:)

Your Future

Don’t sit around and try to change your past, when you have your entire future to look forward to !

حملة التدوين لشهر نوفمبر 11-11-2011

دعوة انك تدون لمدة شهر 

وهنبتدى من يوم مميز جدا ان شاء الله 

وياحبذا لو لحقت الساعه 

11:11 

:D 

any way 

اللى عاوز يشارك معانا يدوس على اسم البوست هنا هيوصله على طوووول على الايفنت :)