Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Tuesday, August 30, 2011

Happy ....







First Of All ....

انا بعشق يوم التلات ده عشان اتولدت فيه 

وبقيت اعشقه السنة دى عشان عيد ميلاد احلى هاجر فيه 

كل سنة وانتى طيبة ...ويارب تكون سنة حلوة عليكى ونكون مع بعض دايما 

دى حاجه بسيطة عشان معرفتش اكون جمبك ومعاكى السنة دى 

ان شاء الله السنة الجاية نكون سوا مع بعض :) 

******************************


كل سنة بقى وانتم طيبين عيد سعيييييد عليكم كلكم 

هنوا بعض وباركوا واعزموا كحك عليا بليييز

واخر دعواى 

اللهم ارزقنى عيدية تفوق كل توقعاتى 

^_^ 


Monday, August 29, 2011

كل عيد وانتم بخير

من موبايلى بسرعة اوى اوى كده 

كل سنة وانتم طيبين 

بكرة اول ايام العيد 


Thursday, August 25, 2011

الخميس السرى 26


ازيكم عاملين ايه ؟؟؟ 

الموضوع باختصار يوم للفضفضة ...ممكن تيجى تكتب سر  ليك او لغيرك 

بالاكاونت بتاعك او تحب تبقى مجهول 

اكتب اللى انت عاوزه مفيش رقابة :) 

يارب يكون يومكم حلو ولذيذ ان شاء الله 

=)

Monday, August 22, 2011

8 Days left !!

فاضل 8 ايام بس يا جماعه 

ثمانية ايام ورمضان هيفارقنا 

البركة هتقل شويتين 

والجو الروحانى ده هيقل اكتر

وترجع المساجد فاضية الفجر اكتر ونعمل صف واحد بالعافية 

الخير هيقل شوية 

بس انا عندى امل ان الناس هتتغير رمضان ده 

ويفضل الخير مستمر 

والادب والذوق مكمل مع الناس 

عشان نرضى ربنا بردوا 

ادعوا على قد ما تقدروا 

ادعوا بكل حاجه حلوة ...ليكم او لاحد تانى

ادعوا ربنا يتقبل صيامنا وصلاتنا وقيامنا وسجودنا ودعائنا 

محدش بس يبقى ضامن حاجه فى جيبه 

الرسول عليه الصلاة والسلام ربنا مبشره بالجنة يعنى ضامن وكان بيقف يدعى ربنا لحد ما يتعب 
واحنا بنكسل لسه 

ادعوا ربنا يعتقنا من النار 

ادعوا ان قرائتنا للقرآن بالليل تشفع لينا عند سؤال الملكين وعند الصراط وعند باب الجنة 

ننوى انه من النهاردة نتغير للأحسن فى كل حاجه 

علاقتنا بربنا اول حاجه وعلاقتنا بأهلنا واصحابنا وقرايبنا وحتى الناس اللى مش نعرفهم

ادعوا ان ربنا يبلغنا ليلة القدر 

وربنا يستجيب دعواتنا يااااارب

Friday, August 19, 2011

To Israel

We Gonna **** You If you Just Think for while to Fight With Us !! 


هذا من شأننا على فكرة

اغلب الناس اللى علقوا على مقالة عمرو حمزاوى النهاردة او اللى كانت امبارح على اعتبار اننا الجمعه ...قالوا واحنا مالنا ياجدع بحياتك الشخصية ..بس بننسى اننا عايشين على حياة المشاهير من كل الانواع والتخصصات الشخصية 

بندخل عالنت عشان نشوف فلان طلق مين وفلانة اتجوزت مين ولا ازاى ...وهنروح بعيد ليه ...اللى خلاه يكتب المقالة الخصوصى لبسمة وعبر فيها عن حبه ليها...كان ان الناس كالعادة قعدوا يسألوا وانتوا بتخرجوا مع بعض ازاى...ممثلة ودكتور جامعة ...وكلام من شبه كده 

ونرجع نقول حياتكم الشخصية عاملينها مشاااع ليه !!!!!!!! عجبى بجد 

**************

العته اللى حصل من اسرائيل على حدودنا النهاردة...عته متواصل كالعادة بردوا

اظن اللى ما يتسمى لو كان فى الحكم...وابو الارض الزراعية اللى كان قالب الخارجية عزبة كانوا موجودين ...كان هيقولك ضبط النفس ومش عارف ايه ...مش بقول هوب يلا نحارب اسرائيل ...بس بتكلم رد فعلهم كان هيبقى معروف واكن البلد مش بلدهم...لانها فعلا مش بلدهم دى كانت عزبتهم 

وبردوا الناس مينفعش تنادى بحرب شاملة ونقصف ايلات باللى فيها بصواريخ سكود زى ابن المجنونة الليبى ...ونقوم ونعمل ونسوى عشان البلد فاتحه بقها زى ما بنقول ومش ناقصة خراب اكتر 

خير ان شاء الله 


Thursday, August 18, 2011

الخميس السرى 26


ميعادنا الاسبوعى 

سورى عالاسبوع اللى فات بس مكنتش فى الموود انى انزل البوست ده 

القواعد بسيطة كالعادة 

عاوز تكتبت سر شايله 
عاوز تفضفض براحتك

بالاكاونت بتاعك او تحت بكون مجهول 

Have a good week end every One =)

Tuesday, August 16, 2011



Story of My Life !! 


Sunday, August 14, 2011

شوية طراطيش


فيه ايام كده من الشهر بيجى عليا وقت بكون زعلان اوى اوى اوى 

ممكن اكون الصبح فرحان 

واجى بالليل اقلب عالوش التانى بسرعة، وساعات الفرحة دى اللى بتخلى الواحد يكتئب اكتر على فكرة ...صباح الجنان يعنى 

بس المرة دى انا عارف السبب ايه فى انى زعلان 

ربنا يكرمنى والسبب ده يروح ان شاء الله 


***********

ساعات ربنا بيرزقنا بناس يكونوا فى طريقنا عشان يوصلوا رسالة لينا 

رسالة بقى مفادها ان اختياراتنا غلط ...او صح 

معناها مثلا لاء ناس غيرك بتقع وتقوم تكمل وانت عاجبك اوى انك بتقع ومبتحبش تقوم 

بالظبط كده لما تلاقى حد أأقل منك فى المستوى وتلاقيه انجح منك ووصل لاعلى سلم النجاح زى ما بيقولوا ..أأقل واجب هتنكسف على دمك وتقوم 
نفسى ابطل ااقع بقى عشان تعبت 
تعبت انى أقع وافضل عالارض ولما الوقت يكون أزف ابتدى أقوم
عاوز العادة دى تمشى بقى عشان مبقتش احبها 
بالنسبة للناس اللى بتسندنى 
بقصد او غير قصد احب اقولهم كلمة شكرا دى قليلة عليكم اوى اوى اوى 
ربنا يخليكم ليا 
:) 

************

ربنا يسعدلك ايامك ويفرح قلبك 

ربنا يستجيب منك يارب 

احلى دعوة حد دعالى بيها لحد دلوقتى 

بعد الماما بتاعتى يعنى طبعا 
:D 

***********

بكرة هيكون عدى نص رمضان بالظبط 

زعلان اوى اوى 
خمستاشر يوم عدوا وفيه منهم سبعة ولا ستة وقعوا منى على ايام متفرقة فى الصلاة وده مش حلو خالص خالص خالص 
اللى بيوقعنا مش الشياطين ...ما كلهم مصفدين فوق 
بس النفس مش متعودة 
خدتنا الحماسة اول كام يوم بعدين الكسل بتاع النفس رجع تانى وبقت تتكاسل 

هزتنى رسالة فى بريد الجمعة امبارح اوى اوى 
ست عجوزة لوحدها مريضة لدرجة انها مش بتعرف تقوم تروح الحمام وممكن بعد ما تتوضى متعرفش تمسك نفسها وتعملها فى مكانها 
وبتقول انها تعبانة ومحدش جمبها يساعدها وبتبكى انها مش قادرة تسيب الصلاة خالص 
يا ربناااا بجد انا بقيت قاعد فى مكانى مضايق ومتكدر اوى من نفسى 
جدتى كانت عملت قلب مفتوح ودعامة وحاجات كتير والصوم بيتعبها اوى
بتغفلنا ساعات وبتصوم وتتعب وتقوم تفطر وتصوم تانى وتالت 

اى بجد يعنى 
واحنا مستكترين 15 ساعة بنصومهم...فى عز الحر ...مش هقولك غيرك بينام من غير اكل والكلام اللى الناس بتضايق منه ده ومش عارف ايه
بس عالاقل 15 ساعة ممكن ينفعونا يوم لا ظل الا ظل الله 
الـ15 ساعة دول فى 30 يوم ممكن يعملوا ثواب كبير اوى 
انا مش واعظ بس بقول اللى بحسه 
ياريت منكسلش تانى وانا اول واحد 
مش ضامن انا هصحى النهاردة تانى ولا لاء 
محدش مننا ضامن العمر امتى هنموت ولا هنعيش قد ايه
وهننزل تحت مش هينفعنا الا عملنا ودعاء اهالينا وعيالنا 
اغتنموا الايام دى ربنا يكرمنا ويجعلنا من عتقااااء شهر رمضان باذن الله 

:)

Wednesday, August 10, 2011

أوسطه مغفرة



ايام مباركة 

يجب علينا ان نغتنمها فى طلب المغفرة من الله 

وطلب الرحمة ايضا

وندعو الله ان يتقبل صيامنا وصلاتنا وقيامنا 
ويجعلنا من عتقاء شهر رمضان 

اللهم امين 


Monday, August 08, 2011







انا اتوجعت بجد 

بجد اوى 

!!

Sunday, August 07, 2011

سابع يوم

نزلت صليت الفجر محستش اننا فى رمضان لان الجامع اتملى بالعافية ولسه فى سابع يوم 

والتراويح كذلك ...لاء وناس تصلى الـ8 ركعات وتسيب اخر 3 الشفع والوتر او تمشى ومتصليش الوتر...اللى قعدك كل ده هى ركعة والراجل بيدعى حلو اوى بسم الله ما شاء الله يخليك تندمج معاه واللى بيقوله 

طب نص الشهر هنعمل ايه بقى على كده ؟؟

******


تانى يوم اتوفى والد واحد صاحبى 

والصبح حسن الاسمر 


ربنا يرحمهم برحمته 

بجد اتوفوا فى ايام حلوة اوى اوى اوى 

**********

مش فاهم الناس اللى بترمى زبالة قدام الجامع مفيش 50 متر يعنى دى ديانتهم ايه بالظبط 

دور عبادة قدامه مقلب وانت بتصلى تشم ريحة الزبالة والقرف 

ربنا يهديهم او يهدهم 

عشان مكسلين يمشوا 200 متر يرموها فى البرميل عالشارع !!

*******

ناس مضايقة من ان حملة التبرعات للصومال زادت اليومين دول 

معلش محدش جرب انه يبات يوم من غير عشا 

ولا جربوا يوم من غير اكل خالص ولا ميه 

*********

اتكلمت جد اتاخدت بهزار 

انا من الاول مكنش ليا حق انى انصح حد اصلا 

خسارة فيها حق النصيحة :) 

********

انا عاوز فانوس 

محدش جابلى 

:(

Saturday, August 06, 2011

6 رمضان

عن أبي هريرة - رضي الله عنه - قال : قال رسول الله - صلى الله عليه وسلم - : " إن الله لا ينظر إلى صوركم وأموالكم ، ولكن ينظر إلى قلوبكم وأعمالكم " . رواه مسلم .

Friday, August 05, 2011

الخامس من رمضان



النهاردة خامس يوم رمضان 

والنهاردة ان شاء الله يوم جمعة 

يعنى الفرحة فرحتين 

المهم متنسوش تقروا سورة الكهف 

وكمان احرصوا على الصلاة وخصوصا التراويح 

احنا 11 شهر بنخرج ونسافر ونشيش ونهييس ونهرتل ونعيط وبنعمل كل حاجه 

مجتش من 30 يوم تخلص فيهم كده وتنوى انك تكون لربنا بس 

تعبده ليل نهار وتدعيله 

ان يوم ما تتوفى وتيجى تنزل تحت فى القبر 

ربنا يهونها عليك وقت سؤال الملكين 

ولا حتى صلاتك او قراءة القرآن تشفع ليك عند ربنا 

وينوروا قبرك لحد يوم الدين 

اصل القعدة تحت دى وحشة اوى اوى 

ولو حد اتوفى ليه ونزل تحت وحس برهبة القبر ...طب هنعمل ايه لما نكون فى كفن ولا حول لنا ولا قوة 

والباب يتقفل علينا ويتحط الرمل ويبقى سكوت تااااااااام وانت لوحدك 

لوحدك بمعنى الكلمة 

وعملك بس هوا اللى هيبقى ويكون شاهد عليك 

اللهم استرنى فوق الارض وتحت الارض ويوم العرض عليك 

يااااارب


Thursday, August 04, 2011

الخميس السرى 25




روتين خزعبلى ...بتاع 4 ساعات اللى بلاقى وقت اعمل فيهم الحاجات كلها عشان كده مش بنزل بوستات ...هحاول كده من بكرة ان شاء الله اجرب 

عموما كل سنة وانتم طيبين تانى ويارب يكون شهر مليان خير علينا كلنا 

نفس الشروط...قول السر زى ما انت عاوز 

باسمك او تحب تكون مجهول 

اعتبره يوم للفضفضة لحد غريب ولا تعرفنى ولا اعرفك

نعرف اسماء حركية ليس الا 

:)