مذبحة بحر البقر

فسكونيا بتاعتنا

بلد المتناقضات 

فعلا لازم نغير اسمها لكده 

بنقول حاجه ونعمل عكسها عالطووول 

****************

للاسف الناس اختزلت الاسلام فى الدقن والجلابية والنقاب 

الدين المعاملة 

مش المظاهر 

مش حد "مطول " دقنه يبقى شيخ 

ومش هقول مربى لان التربية بتسرى على الخارج والداخل 

ومش واحدة لابسه النقاب ولا محجبة يبقى ملاك ماشى عالارض 

احنا اه انس يعنى بنغلط وبنعمل صح بس مش دايما بنكون صح ولا دايما بنكون غلط 

تانى الاسلام مش انك تطول دقنك وتقول سنة 

اوك سنة .. بس فين باقى السنن 

طبقتها كلها ؟؟ معاملتك لجارك بطلت ترمى زبالة فى الشارع طيب؟؟ حق الطريق احترمته؟؟ وانت سايق عربيتك كسرت على واحد وتطلع من الشباك تسب الدين ليه وترجع تستغفر ربنا وتقول عالم معندهاش اخلاق 

بطلت تكدب طيب ؟؟ تقول لابنك لما يرد عالتليفون قولهم نايم ولا مش موجود ...ما دى كدبة بردوا 

بطلت تاخد حاجه مش من حقك ؟؟

بتسأل على اهلك ووالدك ووالدتك وبتصل رحمك ؟؟

قرايبك يعنى بتودهم ولا تشوفهم فى الشارع تقول يلعن **** ابوك وعيلتك وتلف تمشى من شارع تانى ؟؟

بتعامل اللى مش من دينك كويس وبتراعى ربنا فى كل حاجه ؟؟

واسئلة اكتر واكتر 

بس لاء 

اللحية اولا ويأتى من بعدها اى شىء 

انا مبعملش اغلب الحاجات اللى فوق ...حاجات بتقع منى وحاجات لاء على حسب 

مربتش دقنى عشان متأكد لو طولتها هتاخد كمقياس 

ويوم ما اغلط هينسب الغلط للدين بتاعى 

ووقتها هاخد ذنوب اكتر 

بس انا مهتم بالجوهر اكتر دلوقتى 

وانت لما تكون من جوا كويس ...الظاهر بتاعك هيبقى كويس اوى اوى 

لان كل اناء بينضح بما فيه 

نبطل غش وخداع وزيف شوية 

ونبطل نلقى الناس بالباطل عالفاضى والمليان 

************

بمناسبة الفتنة والاتهامات بالتخوين لاى حد اليومين دول 

وتلزيق الاتهامات فى اى حد من الناس حافظينها

سواق تاكسى من كام يوم بيشتم فى حركة 6 ابريل و"بتوع التحرير" 

مليش احتكاك بـ6 ابريل الا كام فرد فى المنطقة عندى او من اصدقاء اصداقئى وعندى تحفظات فى حاجات كتير 

بس الراجل خنقنى ورديت عليه وسألته ايه رايه فى تهريب 6 ابريل للمتهمين الاجانب ؟؟

او ايه رأيه فى دور 6 ابريل فى تعطيل محاكمة مبارك اللى فى الغالب هياخد براءة فيها 

او حتى انهم السبب فى كل احكام البراءة للناس اللى قتلت المتظاهرين 

سكت وقالى بلد وسخة كلها وولع سيجارة ومتكلمش تانى 

شوية كلام بيحفظوه للناس من غير اى دليل 

زى ايام الثورة والمناوى يطلع عالنيل للاخبار يقولك الناس اللى فى التحرير تمشى عشان فيه ناس معاهم كرات من النار ومتجهة اليهم وتحذير استمر لكذا ساعة 

عارفين احنا زى ايه بالظبط ؟؟؟

زى واحد بيغتصب واحدة فى نص الشارع ومعريها 

ونتجاهله ونبصلها ونقعد نلومها على الاغتصاب او اللى بتتعرضله ده 

وازاى تسيبه يغتصبها 

او ازاى بتصرخ بصوت عالى...وطى صوتك يا ماما وانتى بتـ*** عشان عامله دوشة 

ونلف رقبتنا الناحية التانية ونتجاهلها 

او نتهمها بأنها سبب خراب البلد

وفى حين اننا احنا السبب بسلبيتنا دى 

*******************

اعتصام جامعة القاهرة بسبب الاعتراض على الانتخابات الطلابية الجديدة 

والصفقة المشبوهة بتاعت طلاب الاخوان مع الوزير 

واقرار اللايحة الجديدة اللى من ضمنها منع العمل السياسى بالجامعة...يعنى من الاخر اسمع الكلام وبس

يخلوك صنم 

فى المدرسة صنم فى الجامعو صنم ...فى الشغل صنم وفى كل حتة صنم

بنرجع لورا مش بنطلع لقدام 

***************

اللى بيقول عالناس بلطجية من شكلهم 

هنجيبهم منين بروح امك؟؟

عايش فى فرنسا بروح امك وابوك وعيلتك كلها ؟؟

بالنسبة ان اغلب البلد تحت خط الفقر ؟؟

بالنسبة ان فيه ازمة اسكان وميه وكهربا واكل وشرب وطاقة 

عاوز الناس تكون عاملة ازاى ؟؟

فيه طلبة اعرفهم عندهم طقم لبس او اتنين بيروح بيه الجامعه فى الصيف وزيه فى الشتا وبس 

الفقر مش عيب محدش اتولد غنى من اول يوم 

بطلوا العنصرية الطبقية دى شوية !!!!!حاجه تقرف 

 

عمرنا ما هنتغير - تانى مرة -

البوست ده كتبته يوم 16 فبراير 2011 ووقتها اغلب اصحابى قالولى بطل تشاؤم 

=D 

شفته امبارح بالصدفة قعدت اضحك وجبت الناس اللى ردوا عليا ومحدش عبرنى ودور وشه الناحية التانية 

قلت اجيبه نكتئب مع بعض سوا 

^_^

***

الثورة قامت وخلعنا مبارك وشايفين ناس كتير من الكبار بيتحاكموا بتهم الفساد اللى ريحتها ازكمت انوفنا

والناس نضفت الشوارع ودهنا الارصفة ومبقناش نرمى زبالة فى الارض ومش عارف ايه

لكن لسه مش اتغيرنا

مينفعش من سلوك يوم ولا اتنين نقول احنا اتغيرنا

طالما لسه فيه ناس بتحط قايمة الناس اللى شتمت فينا وهاجمتنا وازاى هنشتمهم ونطلع سنسفيل اجدادهم عشان يتربوا

وطالما لسه بنتريق على مخاليق ربنا فى الرايحة والجاية ...مع اننا لو بقينا فى مكانهم هيبقى رد فعلنا قاسى جدا جدا جدا

والشىء اللى لسه متاصل فينا بردوا لما طرف يحب يكره طرف فى شىء اخر لازم يطلعه انه ابن كلب وملحد عشان نبعد عنه

يعنى بتوع الحزب الوطنى ومش عارف مين تانى قرروا ان وائل غنيم ماسونى ومش عارف ايه ...عشان لابس بتاعه بلاستيك وعلامة التى شيرت ...واللى مطلع وثائق من تحت البلاط بتقول انه عميل امريكانى محترف والثورة دى متخططلها من سنة 2006 !!! صباح الهبل وان فيه ناس بتصدق

ونطلع بقى نشتم فى اى حد احنا مختلفيين معاه فى الراى لمجرد الاختلاف وكمان توصل بينا نقطع ومنكلمش بعض بسبب كده

ونبعت المسج بتاعت من النهاردة هنعمل كذا وكذا

المهم فيها سطر بيقول وهنسأل على بعض واللى بعتولى المسج اصلا مطبقين نظام لو شافك فى الشارع يمشى من شارع تانى !!! 

+ اى شخصية عامة تعجبنا بنرشحها رئيس او وزير ونعمل فان بيدج تقرفنا ونتخانق ونشتم ونلبس ذنوب نجف لحد السنة اللى بعدها من غير ما تعرف الشخص ده يستحق كده ولا لاء؟؟؟

مش شرط ان حد ناجح فى مجال يبقى هينجح فى المجال ده على مستوى الحكومة...ساعات العمل بحرية احسن من التقيد بمنصب وبروتوكلات ...نحكم عقلنا شوية

طب فين بقى التغيير اللى بنقول عليه...والصراحة احنا فى الكلام جامديييين اوى...بناخد وعود بقالنا عشرين سنة وبنصدقها ونضحك على نفسنا وخلاص

اخرة الكلام اللى عاوز يتغير او يعمل اى حاجه لنفسه او لبلده ...بيغيرها بعدين بيقول انا غيرت فيا كذا ...لكن مش بيعمل اعلان عشان امة لا اله الا الله تعرف بعدين ميعملش

وعشان محدش يقولى انا بتكلم بصفتى مواطن من كوكب عطارد....لاء انا فيا حاجات وحشة بردوا ..بس مبجيش ااقول انى هعمل حاجه عارف انى نفسى مش هتعملها دلوقتى ولا بعدين ...عارف حدودى على الاقل

اعقلوا شوية يا جدعان عشان نعرف نتغير صح

******

بالشفا 

=D

خربتوا البلد بقى

انتوا خربتوا البلد ثورة ايه وهباب ايه ما كنا عايشين وبناكل وبنشرب وبنقبض 

ده بقى كلام اغلب الناس ابتدوها العواجيز واتبعها الشباب 

فحبيت اجى اعدد مميزات مصر قبل الثورة 

اولا مهزلة التوقيت الصيفى والشتوى يوم ما يتعدل عشان البهوات ميصموش ساعة زيادة فى رمضان ويعرفوا يفطروا ويتسحروا بدرى بدرى وبعد رمضان اتغير ...ماهى عزبتهم 

المرتبات الهزيلة اللى الناس كانت بتاخدها وكانت بتكفى بالعافية 

الواسطة اللى فى اى حاجه ...يا راجل ده عشان نركب عداد ميه جبنا 5 واسطات واتنين زيهم عشاهن العداد يركب ...غير كده كنا دفعنا فلوس وغرامات ملناش ادنى ذنب فيها 

الكهربا اللى قعدت على مدار 11 شهر تتسرق والفولت اللى بيعلى بعد 12 بالليل لحد الساعه 6 الصبح كل يوم على مدار الشهور دى ...وتبلغ يقولك مفيش حاجه 

الشرطة اللى كانت فى خدمة الحكم والواسطة بردوا ...يجوا يشيلوا السوق عشان حد مهم سكن عندنا ومش عاجبه صوت الراجل بتاع الخيار تحت عمارته 

عواميد النور اللى منظر بس 

توفير الكهربا المنطق الغريب اللى كان بيحصل وتمشى عالدائرى بالليل تلاقيه كحل وتصحى الصبح تلاقى العمود بيطلع لسانه ومنور وبيغيظك 

مبدأ انا محدش هيحاسبنى اللى كان سائد ده مبقاش موجود 

فعلا احنا خربنا البلد لما حاولنا نرجع للعيال الصغيرة جزء الانتماء 

انك تخليه يفخر انه من البلد دى فعلا 

خربناها لما حاسبنا اللى قعدوا سنين طويلة بياخدوا من لحم الغلبان الحى 

خربناها لما كشفنا كم الفساد اللى فى البلد حتى اللى كان شكله ابن ناس طلع ابن كلب 

خربناها لما بطلنا نسكت عالاهانة

خربناها لما ابتدينا نحقق العدل 

وخربناها اكتر لما سكتنا وصدقنا وعد اللى ملوش امان 

خربناها اننا سيبنا الناس تصدق ان التغيير هيحصل فى يوم وليلة 

بس لاء مش احنا اللى خربناها 

انتوا اللى خربتوها بسلبيتكم وصمتكم الدائم من منطلق ادينا عايشين 

سيبونا احنا بقى نعيشها 

Mohamed El-Durra

احدى عشر  عاما مروا 

ولكنك مازالت فى الذاكرة 

مازالت مشهد الفيديو الذى يبين اطلاق النار عليك وعلى والدك دون اى شفقة او رحمة 

وكان كل ذنبك 

انك فلسطينى الجنسية 

عربى الهوية 

!!!

هما واحنا

من كام يوم ركبت ميكروباص التحرير اللذيذ وكده من عندنا...عندنا فين مش فارقة 

المهم طلع ركب ولد وبنت معانا وست كده بتاع حاجه واربعين سنة ...وراجل عجوز قاعد جمب السواق 

وانا مأنتخ فى مكانى ورا والسماعات على ودانى بسمع ديفيد جيتا وعايش حياتى 

المهم بدأت خناقة نقاشية ما بينهم معرفش ايه اللى بدأها المهم كانوا بيرغوا فى قانون الطوارىء 

بغض النظر عن موضوع النقاش والطريقة...بس الست من الاول تقولوهم انتوا يوم ما عملتوا الثورة وقفنا جمبكم وانتوا كسرتوا وانتوا عملتوا ...وبعدين تقول بس احنا واحنا وهما 

ثوانى مش فاهم دلوقتى ...انتى جنسيتك ايه يا حجه معلش ؟؟ تقولك مصرية ..طب ليه دلوقتى بنفرق ما بين الجنسيات بكلمة احنا وهما ؟؟

اصل كلنا فى نفس المركب محدش يعنى راكب لنش لوحده وهيروح مكان ماهو عاوز 

يجى بقى عمو اللى قدام يقولك السيئة تعم ...فأنا اضايقت مبدأ السيئة تعم بتاع المدارس لما الفصل ينضرب عشان حتة عيل ولا مؤاخذة لبس الفصل كله ومعملش واجب فنتعاقب معاه !!

فأنا قولتله دلوقتى انا حرامى وقتال قتلة ...يبقى كده كل اللى معايا فى الميكروباص قتالين وحرامية ولاد تيييت ...طبعا قالك لاء وازاى انا راجل محترم...فقللتله ده نفس مبدأ حضرتك بتاع السيئة تعم...ماهو دلوقتى السيئة عمت الميكروباص كله ينفع ولا لاء...قالى لاء طبعا...قولتله يبقى مينفعش نعمم على ضابط الشرطة...عالثوار عالشعب ذات نفسه 

الناس مضايقة من البلطجة والسرقة والقتل والنهب  هوا ايه الفرق بين زمان ودلوقتى ؟؟؟

زمان كان سرقة مقننة وبمساعدة ناس من الاقسام ودلوقتى مبقوش يحموهم وممكن يقبضوا عليهم ...رغم ان اغلب الشرطة بتكسل نوعا ما عشان هيحتاجوهم قدام 

بس هى هى نفس الظروف...بس عشان احنا مسلطين عليها الضوء وبقينا نركز معاها اكتر من الاول ...فحسينا انها كترت 

بعدين اللى بيسرق ده من الناس المحتاجة ...وصل لمرحلة لازم يسرق عشان يعيش..انا مش بحلل السرقة ولا الغلط بس انا بشرح ليه ناس كتيرة محتاجه قامت تسرق وتنهب وشايفة ناس سرقانا بأم القانون 30 سنة واكتر ومحدش بيحاسبهم ...يبقى من حق الناس تضايق وتتنرفز 

بعدين واحد قالها حكمة فى مرة 

الشعب المصرى اشترى حريته جديد ...بس مش معاه الكتالوج فعشان كده بيقلب فى الزراير كلها :) 

عاوز اوصل بس فى الاخر مفيش فرق بين احنا وهما 

كلنا نفس الشخص ...وكلنا فى نفس المركب ونفس البلد 

اخترت انك تهاجر وتسيبها ...مترجعش تانى تشكيلها وتضايق من اللى فيها 

عشان انت فى يوم ما كان فى ايدك انك تصلحها ...قررت تسيبها 

!

حينما تتغير الموازين

الموازين اتغيرت فعلا واتقلبت 360 درجة 

فبقينا نشوف الحرامى بطل قومى ونمجده ونطلعه فى كل وسائل الاعلام نحتفى بيه ونستنى بشوق ولهفة حكاياته عن ازاى قتل ولا سرق وهوا بيتكلم بكل فخر والناس بتستقبله استقبال الفاتحين 

لكن الناس العدلة المحترمة ياخدوا بالجزمة فوق راسهم ونقول لاء ...مش سلعة رائجة اليومين دول ومش عليهم طلب زى الحرامية والقتلة 

بجانب اول مرة اشوف ناس معتوهين بيفرحوا لمقتل شخص ...بنى ادم زى زيه ..ما عدا صنف معين الا وهم الاسرائيلين اللى بفرح لما اسمع حد منهم بيموت لحد ما فلسطين تتحرر ان شاء الله 

اضافة ان احنا اهل الاسلام مش عارفين لسه بردوا نوصل صوتنا للعالم الغربى ...العالم ده اللى زمان كان بيتعلم منا وبيرسل اهل دولته وشعوبهم وعلماؤهم يتعلموا منا فى الاندلس زمان ...بس دلوقتى بقينا ماشيين جمب الحيط فالحين بس بنتشطر على بعض نلبس النقاب ولا نقلعه ونطول الدقن ونقصر الهدوم ونسمع الاناشيد بلحن ولا لاء ..معتقدش سمعت اى رد فعل من اى قادة دولة اسلامية على قانون فرنسا بتاع حظر النقاب والحجاب هناك واللى بدأ تطبيقه 

ومعتقدش ان فيهم راجل هياخد موقف رجولة وشهامة فعلا ويعمل المعاملة بالمثل على رعايا الدولة الفرتسية بحجة الخوف عالسياحة وحجج فاضية تانية 

والله ده اللى جايبنا ورا ...بنلتمس الاعذار للى بيطلع ميتين ابونا ...ونيجى عند اهالينا ومافيش ولا عذر والسع يا معلم ...على رأى المثل مقدرش عالحمالر بيتشطر عالبردعة ...عشان عارف ان البردعة ولا بتنطق ولا هتتكلم ؟...بس الحمار ممكن يرفس امه وينهق فى ودنه ليل نهار 

امتى بقى هنرجع الموازين تانى لوضعها الصح ؟؟؟

امتى هنبتدى فعلا نقول للغلط لاء ...لكل الغلط 

مش ننقى اللى بيجى على مزاجنا واهوائنا الشخصية وعند حاجات تانية نعمل من اى دولة تانية ولا اكننا سمعنا حاجه 

ربنا يرحمنا برحمته 

مذبحة قانا

كى لا ننسى 

هجوم قانا الأول في 18 أبريل 1996 تمت في مركز قيادة فيجي التابع ليونيفل في قرية قانا جنوب لبنان، حيث قامت قوات الاحتلال الإسرائيلي بقصف المقر بعد لجوء المدنيين إليه هربا من عملية عناقيد الغضب التي شنتها إسرائيل على لبنان، أدى قصف المقر إلى مقتل 106 من المدنيين وإصابة الكثير بجروح. وقد اجتمع أعضاء مجلس الأمن للتصويت على قرار يدين إسرائيل ولكن الولايات المتحدة أجهضت القرار باستخدام حق النقض الفيتو.

الشعب يريد ايه؟؟

الشعب يريد اسقاط النظام

الشعب يريد محاكمة النظام

الشعب يريد اسقاط شفيق

الشعب يريد محاكمة شفيق 

الشعب يريد اسقاط الشعب 

:D

شعارات كتيرة من يوم 26 يناير واحنا بنسمعها...مبدئيا ناس ممكن تختلف معايا او تتفق...بس دى وجهة نظر عاوز اقولها 

مش هغنى واقول احنا حققنا اهداف كتيرة مكناش نحلم بيها...ولا هقعد اقنع فى كل واحد ااقوله ليه يقول لاء وليه يقول نعم واضربك لو مكنتش على رأى اللى يعجبنى 

ومش هبقى سلبى - زى ما ناس قالت- وهنتقد ان فيه ناس مع الثورة قطعت علاقتها بناس اصحابها ضد الثورة او واقفين على الحياد 

بس الشعب دلوقتى فعلا عاوز ايه؟؟؟

هل فعلا عاوزين نوقع الاستفتاء بتاع السبت الجاى ؟؟

ولا هيبقى لاول مرة فى حياتنا نروح ندى صوتنا واحنا عارفين ان مفيش غش ولا تزوير؟؟

ليه دايما نحب نظرية المؤامرة والجيش هيبعنا واحنا مغفليش ...bla bla bla

 ليه منفترضش حسن النية شوية عشان نتغير ؟؟؟ بننصح واحنا اول ناس نعمل عكس النصيحة 

الشعب يريد الاستقرار 

الشعب يريد ان ياكل لقمة نضيفة وحلال

الشعب يريد الامان لاهل بيته وعياله

وعشان كل ده يتحقق لازم نساعد بعض ونفكر اللى بيحصل كل يوم ده فعلا هيبقى مهم جداااااااا لقدام ولا ممكن يستنى؟؟

خصوصا ان فكرة الثورة ومبدأ انا ثائر بيتفهم غلط اولهم طلبة المدارس اللى شفت منهم عملوا مظاهرات قبل ما يقعدوا يتكلموا مع ادارة المدرسة ويقولوا مطالبهم

التفكير الاول

الشعب يريد ايه فى التفرة دى 

والشعب هنا مش الناس اللى نزلت التحرير لمدة 18 يوم وناس استشهدت او اتسجنت

الشعب يعنى مصر كلها ...اللى لازم ينزلوا ان شاء الله يوم 19 مارس ويقولوا هما عاوزين ايه

ياريت منضيعش الفرصة دى من ايدنا 

تخاريف 2

No One Care , So Why I Have To Care ?!!!

Fuck them any way , I don't care at all =)

============================

بفكر كل يوم اعمل بوست عن مادة او اتنين من مواد الدستور واشرحلهم للناس اللى مش فاهماه ...بس المشكلة تكمن ان نص الدستور مش ماشيين بيه...اللى بتسيرنا او بتمشينا لوائح منظمة تخالف الدستور كلياً !!!

===========================

فى الشارع بنتكلم فى السياسة
فى البيت بنتفرج ونتكلم فى السياسة
فى الحمام وانت تحت الدش عالتواليت بتفكر فى السياسة
وانت نايم وبتحلم بعربية بتجرى وراك كلها سياسة
تبص على ميدان التحرير تلاقى ناس قاعدة بتحلم بالسياسة
تنزل تحشش تلاقى الناس بردوا بيألفوا فى السياسة
ياخى كـ**** السياسة كفاية بقى انا قرفت !!!

=========================

دلوقتى اى حد بيختلف فى الرأى مع اى حد تانى ، بيقتلوا بعض ...فرقنا ايه بقى عن الهمج والغوغاء اللى نزلت سرقت البلد يوم الجمعه واللى بتحكمنا 30 سنة ؟؟

========================

مهما عدى من الوقت مش هتفهمى ...ولو فهمتى هيكون متأخر جدا

========================

محدش معاه ايميل الرئيس مبارك ؟!!! هبعتله رسالة من مواطن مصرى

Gaza Strike ..

كى لا ننسى ، ذكرى العدوان الاسرئيلى الغاشم على غزة ...

فى مثل هذا اليوم بدأ منذ عامان

مثلما يتذكر كل العالم ما حدث فى احداث الحادى عشر من سبتمبر، يجب علينا نشر هذا لكى يتذكر العالم الوجه القبيح لاسرائيل

To not forgot what happened On 27 December 2008, When Israel start the war against Gaza , & start to Kill The civilians without Mercy ,,,

And as the whole world still remember what happened on 9/11 , Spread it to let them know The Ugly Face of Israel ..

وزير الكهربة والتوفير

وزير الكهربا طالعنا بطلعته البهية من كام شهر وقالك بص ياعم الشعب كل عية عندها سبعتلاف تكييف مش تشغله وتلبس فلوسه ولا مؤاخذه ويقعدوا لازقين فى بعض تحت تكييف واحد عشان نوفر كهربا ونبطل نشغل النور والغسالات والكمبيوتر وخلافه ...ولا اكننا بناخد وصلة كهربا من حد

طبعا احنا اجدعها شعب يحب التنفيض والممنوع مرغوب دايما ...فتفتق ذهن الوزير بتاع التوفير تانى عن فكرة جهنمية...وفعلا بتودى جهنم
انه قرر انه يطفى عواميد النور بتاعت الشوارع بالليل ...كل يوم منطقة معينة...طب حلو يعنى مش ازمة...لاء ماهو الفكرة انه بيطفى الشوارع الرئيسية والبس بقى يا مواطن

وطبعا بردوا اغلب شعبنا بيوفر عشان بيحسبها صح عشان ميطلعش تربنتين اهله صح اخر الشهر، ففى ناس حسبى الله ونعم الوكيل فيها بتمشى بالليل بالعربية من غير نور امامى او خلفى او حتى فلاشر جانبى ..والبس تانى يا مواطن

بجد بجد بجد قمة فى سوء الادارة والتخطيط ...مش عارف دول اتخرجوا من جامعات ازاى ؟؟؟انا بفكر اصورلكم الشوارع بالليل من الضلمة بتبقى عاملة ازاى وكمية الحوادث اللى بتحصل وسرقة ونشل عينى عينك فى الضلمة دى

دى معلش اخوانا الخلايجة بيعيشوا ازاى وهما فى الصيف عندهم الحرارة اعلى مننا والتكييف عندهم زى شاى عندنا ...بيستعملوه 24 ساعه...بيجيبوا كهربا منين معلش؟؟ ولا عندهم سد عالى ولا سد واطى ولا احنا مسلفينلهم سلك كهربا ارضى من السد العالى ؟؟

قمة فى الاستفزاز اليومى اللى الواحد بيشوفه ...ياعم دى اثيوبيا عندها كهربا احسن مننا ...فين بقى مصادر توليد الكهربا اللى طلعونا ميتين اهالينا واحنا فى المدرسة من حضانة لثانوى بندرس فيها ، ولا كلام كتب وخلاص ...واللى بيحصل دلوقتى اجهاض مش توليد

اهم شىء التوفير

توفيرا فى الكهرباء = اهدار لروح المواطن

والعزا فى عمر مكرم باذن الله

!!!!!!!!!!!!!!!!!!!!!!!

متفرجين الى الابد

جربت يوم تروح استاد وتقعد تتفرج على ماتش؟؟

بلاش دى ...شعورك ايه وانت قاعد بتتفرج عالتلفزيون بتشجع اى حاجه او اى حد

مبتحسش من جواك انك عاوز تعمل حاجه فى يوم وتبطل تبقى مشجع ؟؟؟

مش كل الناس للاسف ...فيه ناس بتستمتع بالتشجيع ...واللى بيشجع اغلبهم فى حياتهم بيشجعوا بردوا...مبيحبوش يطلعوا فى الصورة ولا حتى ابطال مساعدين

انا بس امبارح لما ركزت اوى اكتشفت اننا كعرب عالطول بنشجع

ااه مشجعين فى المدرجات عالطول ...ولما تجيلنا فرصة ننزل تحت فى الملعب مش بنرضى

فى المدرجات بقى تلاقى الهلس على اصله ...والضحك والهزار

لكن اللى فى الملعب بيتكلموا جد...انت اتجننت يابنى...جد ايه اللى عاوز تعمله

حتى فى الافلام احنا مشجعين ودرجة تالتة كمان

شوف اى فيلم اجنبى

هاتلى بس كام فيلم كنا فيه قوة

مافيش الا كام فيلم يتعدوا عالصوابع

والباقى بنقعد ندعى ربنا قدام الجامع او الكنيسة

ومستنين الخطر يمشى

دى فكرة الغرب عننا ...والصراحة عداهم العيب وازح

اننا متفرجين...وهنفضل متفرجين

نشجع ونهيص

لكن وقت لما تجيلنا فرصة ويفتحولنا باب الملعب هنرفض

ليه ؟؟؟

عشان احنا وهمنا نفسنا اننا اتخلقنا عشان نشجع وبس

مع اننا الملعب الرئيسى اصلا

يا خسارة بجد

!

مشكلة العصر

القضية دلوقتى اننا نرفع قضية على عماد متعب عشان شبهة تطبيع او نكفر خالد النبوى عشان الفيلم كان فيه يهود او اى بتنجان

بالظبط عاملين زى واحد بيشترى بطيخة ولقى نملتين واقفين عالبطيخة راح مقروف منها ورماها...مقصدش ابدا انى اشبه الاتنين دول بحاجه

بس احنا فعلا كده بنمسك فى الصغيرة ونسيب الكبيرة

وبقت مصر مش بتطبع مع اسرائيل ...وجم الاتنين اللى خرجوا برا النص ولازم يتشنقوا فى ميدان عام...ااه ميدان عام ما احنا بقينا المدينة الفاضلة وكل حاجه حلوة ومش بنصدر غاز ولا اتفاقية كويز ولا سينا بيبرطعوا فيها ولا اى حاجه

يلا اما الحق اعمل جروب عالفيس اجمع مليون مصرى عشان نشنقهم فى الميدان العام

وقرفى !!

عمو..ممكن بق ميه؟

عمو عمو ممكن بق ميه ؟!!

امشى ياض انجر من هنا ...انت عارف لتر الميه بكام ..ب60 جنييييييييه ..قال بق قال

:(

على فكرة النيل ده عندنا من زمان ...وكان ليه فرع بيعدى قدام الهرم زمان ايام الفراعنة وكده

لكن دلوقتى بقم اتنين

على فكرة النيل ده عندنا من زمان ...بس بنتصرف فيه ولا اكننا فى مبولة عمومية

النيل ده عندنا من زمان ...ااه ما هوا بتاع مصر لوحدها

النيل مش هيبقى عندنا قدام زى ما كان عندنا زمان

لسبب اننا دايما بنحل الازمة بعد ما بتقع ...مش بنتنبا بيها

مع ان كل اللى حوالينا شايفين اللى احنا مش شايفينه

او سورى...اللى مش عاوزين نشوفه دلوقتى

وبنرجع نزعل بعد كده من اللى بيحصل

تفتكروا هيغلوا القعدة على ترعة المريوطية بدل النيل قدام ؟؟

ضد سياسة الاستخدام العادل

سياسة الإستخدام العادل خلاص نزل قرار بالفعل بتطبيق سياسه الاستخدام العادل للانترنت فى جميع شركات الانترنت فى مصر بلا استثناءليصبح الاستخدام بالشكل التالى:سرعه 512: 25 جيجا شهريا / سرعه 1024: 40 جيجا شهريا / سرعه 2048: 60 جيجا شهريا / سرعه 4098: 80 جيجا شهريا
تصحيح هام للمعلومه قرار من هيئه الاتصالات المصريه ntra وده قرار ملزم لجميع شركات الانترنت فى مصر مش بس لينك وتى اى داتا كل الشركات بما فيها اتصالات وفودافون وكل الشركات بلا استثناء وده قرار ملزم للجميع وبعد انتهاء الكوتا او الجيجا المخصصه لكل واحد بتنزل السرعه الى 128 كب بالاضافه الى ان الهيئه قررت الغاء كل العروض الى بتقدمها الشركاتاى عرض كانت عاملاه اى شركه زى الروتر المجانى مثلا فى شركه لينك قررت الهيئه الغاء كل العروض الزاميا للشركات ولسـا ياما هنشوف


2-

ADSL غير محدد الكميه

السرعه شهر 3 شهور 6 شهور 12 شهر سياسة الإستخدام العادل
512 ك ب / ث 95 280 555 1090 25 جيجابايت / شهريا
1024 ك ب / ث 140 415 820 1610 40 جيجابايت / شهريا
2048 ك ب / ث 220 650 1290 2530 60 جيجابايت / شهريا
4096 ك ب / ث 380 1125 2230 4380 80 جيجابايت / شهريا
8192 ك ب / ث 695 2055 4020 8000 120 جيجابايت / شهريا
16384 ك ب / ث 1355 4010 7845 15600 180 جيجابايت / شهريا
24576 ك ب / ث 1950 5770 11310 22500 250 جيجابايت / شهريا

3-

يا جماعه النهارده نزل قرار بالفعل بتطبيق سياسه الاستخدام العادل

للانترنت فى جميع شركات الانترنت فى مصر بلا استثناء

ليصبح الاستخدام بالشكل التالى:



سرعه 512: 25 جيجا شهريا

سرعه 1024: 40 جيجا شهريا

سرعه 2048: 60 جيجا شهريا

سرعه 4098: 80 جيجا شهريا

تصحيح هام للمعلومه

انا بشتغل فى احدى شركات الانترنت الكبرى الى اتعمل ده مش الشركات هى الى عملته ده قرار

من هيئه الاتصالات المصريه ntra وده قرار ملزم لجميع

شركات الانترنت فى مصر مش بس لينك وتى اى داتا كل الشركات

بما فيها اتصالات وفودافون وكل الشركات بلا استثناء وده قرار ملزم للجميع

وبعد انتهاء الكوتا او الجيجا المخصصه لكل واحد بتنزل السرعه الى 128 كب/س

سياسه الاستخدام العادل بالاضافه الى ان الهيئه قررت الغاء كل العروض الى بتقدمها الشركات

اى عرض كانت عاملاه اى شركه زى الروتر المجانى مثلا فى شركه لينك قررت الهيئه

الغاء كل العروض الزاميا للشركات يبقى يا جماعه ياريت مانقولش كلام على الشركات او الناس او اى حد

من غير ما نعرف الحقيقه ولا نعرف ايه الموضوع بالظبط

4-

الشكوي



نص الرساله



--------------------------------------------------------------------------------


السلام عليكم

إلي جميع الساده و المسئولين و المدافعين عن الحقوق في مصر , إلي كل قلم صحفي أو أعلامي أو مسئول يهمه إلا تحدث عمليه نصب واسعه علي أغلب الشباب المصري الذي يعتبر الأنترنت هو المتنفس الوحيد له , منذ أن تولي السيد أحمد نظيف رئيس الوزراء رئاسه وزاره الأتصالات من سنوات عده حدث تطورا ملموسا و واضحا و أستمر كل جاء من بعده علي نهجه , إلا أن الجميع فوجئ في الأيام العديده الماضيه بأحد أبتكارات الجهاز القومي لتنظيم الأتصالات و شركات الأنترنت المصريه المقيده للحريات و المخالفه للأتفاقيات الموقعه مع المشتركين و المخالفه لتوجهات الدوله بضروره أنتشار الأنترنت بمصر و هو ما يسمي بسياسه الأستخدام العادل لتقييد حجم التحميل للسرعات غير المحدوده كما هو منصوص في التعاقدات مع الشركات المختلفه مما يعني مخالفه هذه الشركات بنود هذه العقود و مما يعتبر أستهتار و أستهانه بوزاره الأتصالات و بتوجهات الدوله حيث أن الكميات التي حددتها الشركات لا تكفي لمجرد التصفح اليومي للأنترنت و عمليه التحديث المطلوبه لأغلب البرامج الحديثه و الكفيله بأنهاء هذه الكميه , فبعض أنظمه تشغيل الحاسب الحديثه تحتاج تقريبا لتحديثات تمثل نصف هذه الكميه المتاحه هذا بخلاف التصفح و التحميل الفعلي , نرجو من سيادتكم التدخل و بذل الجهد لأعاده الحق لأصحابه و عدم حرمان الشباب من المتنفس الوحيد لهم و مواجهه أستغلال شركات الأنترنت و مخالفتها لعقودها و من القوانين الغير مدروسه من الجهاز القومي لتنظيم الأتصالات الذي يبدوا أن القائمين عليه بعدين كل البعد عن توجهات الدوله أو حتي مجال عملهم في تقييم الأحتياجات المتوسطه لمستخدم الأنترنت .



--------------------------------------------------------------------------------


نرجو إرسال هذه الرساله مصحوبه بتوقيعك للجهات التاليه

ديه تحطها مره واحده في خانه العنوان

questions@cabinet.gov.eg; cccomplaints@tra.gov.eg; info@techdevfund.com; eltahrir@eltahrir.net; akhbarelyom@akhbarelyom.org; ahram@ahram.org.eg; ait@ahram.org.eg; baridelgomaa@ahram.org.eg; alkaheraalyoum@orbit.net; a_ragab@akhbarelyom.org; 7day@mbc.ae; al3ashera@dreams.tv; mostafabak@hotmail.com; 90min@elmehwar.tv



رئاسه مجلس الوزراء

questions@cabinet.gov.eg

الجهاز القومي لتنظيم الأتصالات

cccomplaints@tra.gov.eg

info@tra.gov.eg

وزاره الأتصالات

http://www.mcit.gov.eg/ar/Contactus.aspx?x=1

صندوق تنميه التكنولوجيا

info@techdevfund.com

جريدة الجمهورية
eltahrir@eltahrir.net
________________________
أخبار اليوم
akhbarelyom@akhbarelyom.org
________________________
جريدة الأهرام
ahram@ahram.org.eg
________________________
مجلة لغة العصر
ait@ahram.org.eg
________________________
بريد الجمعه:
baridelgomaa@ahram.org.eg
________________________
عمرو أديب
alkaheraalyoum@orbit.net
________________________

أحمد رجب
a_ragab@akhbarelyom.org
________________________
برنامج اليوم السابع
7day@mbc.ae
________________________
برنامج العاشرة مساء_قناة دريم
al3ashera@dreams.tv
________________________
مصطفى بكرى-جريدة الاسبوع
mostafabak@hotmail.com
________________________
برنامج 90 دقيقة
90min@elmehwar.tv

________________________


xskoot@almasry-alyoum.com
________________________

بلال فضل
belalfadl@hotmail.com
________________________
جريدة الشروق
contact@echoroukonline.com
________________________


جروب الفيس بوك

http://www.facebook.com/group.php?gid=239479795006

............
5-

ما هي الخدمات التي من شأنها أن تحتسب في تجميع السعة المخصصة لي؟

جميع الخدمات (التصفح، تحميل، P2P، تدفق... الخ) يتم حساب استهلاكهم من السعة المقررة.

ما هي الخدمات التي ستتأثر عندما تنخفض بسرعة؟

ستنخفض سرعة جميع الخدمات حتى نهاية الشهر في حالة تعدي السعة المقررة، ثم تعود بسرعة إلى وضعها الطبيعي في بداية الشهر الجديد.

6-

** *** يا مصر علي ** ** نيلك

:)

يا ليت العام كله اوباما

يوم الخميس القادم ان شاء الله هيشرف جامعة القاهرة ومنطقة بين السرايات قبل مصر ..ههههههههههههه زيارة الرئيس الامريكى اوباما للمنطقة يعنى عشان يلقى خطابه المرتقب للعالم الاسلامى

طبعا الجواب بان من عنوانه

يعنى عشان هيقول خطاب مدته ساعه وهيقعد فى الجامعه ساعه وربع مثلا ....فيه ميزانية مفتوجة لمحافظة الجيزة لتطوير الجامعه من اسفلت ودهان وتلميع القبة اللى متلمعتش فى المئوية حتى وورد بيتزرع بقاله يومين وبيتسقى بمياه معدنية كمان وحاجه اخر فوللى يعنى

وشاللوا الزبالة ودهنوا الرصيف ومانعين العربيات تدخل الجامعه بقالهم اسبوع يا سلااااااااااااام بجد يا حلاوة يا ولاد

تفتكروا لو كان السنة كلها لاوباما فى مصر

لو قرر يزور الاهرامات مثلا ...بكده هيقعدوا معانا فى بيت كل مواطن فى شارع الهرم فرقة مباحث

ولو طلبت معاه زى القذافى يعدى على عم بخ ياكله شندوشتين كبدة وسدق او يعدى على شيخ العرب ياخد فطيرتين قشطة يحلى بقه بيهم

او عامل كريدت جديد فهينزل مترو يتبضع او ابو ذكرى كمان...مافيش حاجه بعيدة عليه يعنى :D

بس رغم اننا هنتحبس فى بيوتنا اجبارى

بس البلد هتبقى نضيفة...الزبالة هتتشال ...والشوارع اللى جوا هتتسفلت بعد ما تتحفر للمرة المليون عشان بيدوروا عالبترول عندنا

فعلاً

ياريت العام كله اوباما

او يارتنى كنت الانتيخ بتاعك يا اوباما

تحديييييييييييييييييييييييث

مصر يا جدعان بجد هتبقى اجازة يوم الخميس

محدش يخرج بقى ...لغوا امتحانات جامعة عين شمس وفيه شائعات عن الغائها فى حلوان

ومصر الجديدةو ومدينة نصر هتكون مقفولة

يعنى مش هنعرف نتفسح فى الويك اند كمان

:(

بلد سفاحيين

مقتل واصابة مش عارف كام

اب يقتل زوجته ويحرق اولاده

ابن العم يطعن ابن اخوووه 50 طعنة ويخنق اخته الصغيرة

زوج يقتل زوجته ويفصل رأسها عن جسدها ويلقى بباقى الجثة فى القمامة

ايه يا جدعان

البلد مالهاد بجد

غلبتونى والله

يوم لما اطلع ااقتل ولا اديح مش بعمل كده

كل يوم تلاقى حد قاتل حد تانى

تفتكروا ليه

غياب الوازع الدينى

العقوبة ...طب ما العقوبة غليظة جدا

الرادع؟؟؟؟؟؟

مافيش تقريبا

اسهل حاجه دلوقتى القتل

يعنى لو الدكتور منجحنيش فى ام الامتحان

اشد سكينة ولا اشترى الى اروح اجيب اجله اسهل واوفر

تفتكروا بجد

ايه اللى حصل فى مصر وشعبها

سيبكم من الجوع والحكومة لان فيه ناس بتقتل بعض وهما اغنى من بيل جيتس ذات نفسه

ده فى المنطقة الاسبوع اللى فات اتنين دبحوا بعض عشان جنيه واحد

اه والله العظيم جنيه اتنين ضربوا بعض عشانه والمسألة اتفه ما يكون

اخ قتل الخوه عشان مقلبش عالمسلسل

فكروا كده معايا

ليه البلد بقت سفاحييييييييييييييييييييييييييييييييييييييييين

تحدييييييييييييييييييييييث

طيب من كلام اغلب الكومنتات

ان الاسباب كانت غياب الوازع الدينى ...واختلاف الشخصية المصرية

لو حد لسه بيقرا جرايد خصوصا الاهرام هيلاقى انهم فعلا اتكلموا على مدار اسبوع تقريبا عن الموضوع ده وان شخصية المواطن فعلا اختلفت عن زمان بكتير ودلوقتى كله بيقول يلا نفسى وعلى اسباب تافهة زى اول امبارح حد قتل شخص تانى بسبب اتنين جنيه
بس فى احوال تانية الاتنين جنيه اللى بالنسبالى تافهيين ...بالنسبة لناس مش لاقياهم مهمة جدااا

ربنا يعافينا عامة

صيف ساخن جدا ....2008 مشاهد من وطن

قالك متخلف...

محمد سعد فى فيلم كركر ...طلع تربنتيين الخدام عشان بس قاله مانت ...كلمة بسيطة...اسمها مانت الواد اضرب هوا وسنسفيل اللى جابوه عشان مانت دى ...نص ساعه ضرب وشتيمة...قال مانت قال

من كام يوم فى مجلس الشعب اترقينا وبقينا زى دول العالم المتقدم الصين واليابان والنواب اتخانقوا وضربوا بعض...سيبك من دى ...سبب الخناقة ان احمد عز قال عالقانون الجديد من ضمن قوانين من هدفها تحويل الشعب المتخلف لشعب بيفهم

اسكت يا لسانى...اتقفل يا بقى

نفسى اعرف اصول الناس اللى بتقول علينا متخلفين كانوا ايه بالظبط؟؟؟

قال متخلف قال ...سحقا بالملبن

طب بما اننا شعب متخلف ومش بنفهم...وسايبنله وامثاله انهم يفهمونا...ايه السبيل لكى نرتقى ؟؟؟ونكون زى الغرب المتحضر

وبمناسبة الغرب...الاهرام وقت 6 ابريل وحملة التشهير بالفيس بوك كتبوا جملة خلتنى اضحك....ان الغرب بيستخدموا النت احسن استخدام ...واحنا لاء...طبعا مش شعب متخلف

طب كان نفسى والله ابعتلهم ايميل ااقولهم ان الغرب المتحضر هوا السبب فى اغلب البلاوى عالنت ان مكنتش كلها....

صناعة افلام البورنو لوحدها فى امريكا بتجيب ثروة...الارباح يعنى بالملايين ...رغم انها بتتكلف ملاليم فى ظل المكسب اللى بيجنوه...

عمليات التجسس والهكرز هما اللى بيصدروها لينا...ممممممممممم

الاخلاق المنحلة هما سببها ...بيسألوا الشباب ماله وزمان ومش عارف ايه...قال يعنى دول مكنوش شباب ...سحقا بالملبن تانى

نهايتو...اايه وقاصد اكتبها بالواو....

نهايتو يعنى ...بما ان الشعب طلع متخلف ولا يفقه شىء....فنرجو من الله ان يرزقنا العلم الكافى ...ويرزقنا العقل والصبر اهم حاجه ...والستر وراحة البال

وسمعنى سلام سلامتها ام سحس