الوردة

موجودة فى كل الجناين بمختلف اشكالها وأنواعها ، بس فيه ورد تقرب منه متلاقيش ليه رائحة ..وساعات شكله بيكون عادى مش مميز يعنى يخطف بصرك 

بس فيه ورد بيخطف نظرك من على ابعد مسافة ، ورائحته مميزة 

عندى فى الشغل ورد فى الجنينة 

معرفش نوعه ايه ..بس بحب ريحته 

ولما بقعد وقت الراحة ببصله معرفش بفتكرك ليه 

مرة فكرت اقطف واحدة اشيلها عندى جوا فى المكتب 

بس تراجعت فى اخر لحظة ..قلت لاء هأذيها كده

وبعدين الورد اللى حواليها اكيد هيزعلوا من اللى انا عملته

وتنزل عليا لعنة الورد الكبرى

لاء

هى حلوة كده ..على الأقل هاجى كل يوم ابص عليها

اقعد قدامها واسألها عملت ايه من غيرى ..يومها كان عامل ازاى 

هى اكتر من وردة

:)

-----------------------------
دائما لما تخاف من فقدانك لأى شىء ..للاسف بتفقده
لأنك بتكون حريص انك متغلطش ..وقتها هتغلط بغباء 
وبعدها هتفقده للأبد
الحل انك متخافش
وقتها عقلك هيبقى مركز اكتر مع كل حاجه حواليك 
وهتحافظ اكتر على اللى معاك 

----------------------------------

Seven Years !

لما تقرر انك تكتب بوست عن حد تعرفه من زمان اوى الموضوع بيكون صعب

صعب عشان بتفكر هتقول ايه وكل كلمة هتتحسب ازاى وهتتفهم بانهى شكل 

بس المشكلة هنا انى مش عارف هقول ايه ولا ايه

هقول شكرا لأنك على طول موجودة فى حياتى

مريت معايا بكل حاجه حلوة او وحشة

فضلتى موجودة فى وقت ناس كتير قرروا يشيلوا ايدهم ويبعدوا 

ضحيتى بحاجات كتير على ما اتذكر 

فـ شكراً على 

انك دخلتى حياتى من سبع سنين 

مش عارف اقول ايه بجد :D

بس نعتبر البوست ده مجرد تسخين للى هقوله قدام ان شاء الله 

:)

500 Days of ....

دائما التوقعات "بتفشخنا" فى افكارنا 

بنتوقع انها هتحبنا بعدين

انها هتكون مبسوطة معاك

هتعيش معاك الحياة زى ما انت عاوز 

هتقولك كل حاجه بتخاف منها وتجرى تستخبى وراك

مش هتسيبك لوحدك

مش هتسيبك تسأل نفسك 100 سؤال 

هتجاوبك على طول 

على أهم سؤال 

ليه 

!! 

بس للأسف الواقع غير كده 

مش هتحبك قد ما انت بتحبها 

مش هتكون مبسوطة بالقدر اللى انت متخيله 

هتكون عاوزه تعيش بمزاجها مش بمزاجك انت 

مش هتحكيلك على كل حاجه

هتحكيلك بس اللى هى عاوزاك تعرفه

باقى التفاصيل مش مهمة 

بالنسبالك مش بالنسبالها 

واهم حاجه

مش هتجاوبك على سؤالك 

ليه

!!

متتوقعش اى حاجه

متتوقعش هى هتحيك قد ايه

هتقولهالك امتى

هتكون احسن صديقة وحبيبة وممكن زوجة ولا لاء 

هتمشى معاك على نفس الرتم ولا لاء

هتكونوا شبه بعض فى كل حاجه ولا مختلفين

متتوقعش اى شىء اطلاقاً 

سيبها تمشى زى ما مكتوبلها تمشى 

صدقنى هترتاح اكتر

على الأقل مش هتيجى بعد 500 يوم تسأل 

ليه

!!

Happy 26' to Meeeeeeeeeeeeeeeee

النهاردة يوم عيد ميلادى وكملت 26 سنة 

يمكن النهاردة يوم مميز عشان اول سنة منذ ذربيح من الزمان ميكونش عندى امتحانات او عيد ميلادى ميكونش جى فى وسط ايام رخمة 

النهاردة مريت بكل الأجواء 

فرح

حزن

شغل

كئابة 

مفاجأة

ابتسامة كبيرة من الودن للودن

هدايا غير متوقعة 

بالرغم من كده انا شايف انه يوم مميز جداا 

مش معنى انى محتفلتش اوى انه مش حلو 

لاء

كفاية ان حواليا الناس اللى بيحبونى وبحبهم

مش عاوز حاجه اكتر من كده فى الدنيا 

كل سنة وانا كويس

وبخير

ومبسوط

وان شاء الله فعلا السنة دى هتكون احسن من اللى قبلها 

=)

Thursday 30 August 2012

اليوم ده مهما عدى عليا فى حياتى هفتكره ان شاء الله 

من الايام اللى اصبحت مميزة على قلبى 

لأن اليوم ده بيفكرنى بفضل ربنا عليا أولا 

وتانى حاجه عرفنى بجد مين هما اصحابى اللى بجد ووقفوا جمبى وقت ما كنت محتاج واحد بس 

وكانوا بيدعولى من غير ما تربطنا مصلحة ولا سابق معرفة 

واليوم ده بردوا اللى أهلى كانوا جمبى فيه اوى 

ربنا يكرمنى ويبقى فيه يوم او اتنين مميزين تانى كده ان شاء الله 

=) 

عمرو فكرى وريهام رمضان

انه فى يوم الاثنين الموافق 20 أغسطس 2012 

تم زفاف الاستاذ عمرو فكرى 

على الاستاذة ريهام رمضان 

بمسجد الرحمن الرحيم 

وكان ثانى ايام عيد الفطر 

وسط لفيف من الاسرة والاصدقاء وزملاء العمل الخ الخ الخ 

آل فكرى 

وابتدى المشوار الحمد الله 

ربنا يكرمكم ويجعلكم سعداء ويعوض صبركم خير ان شاء الله 

صديقكم 

سفاح كرموز 

الشهير بمشمش 

=) 

Painful !!

تستيقظ من نومها فزعة يتصبب العرق من كل مسام جلدها تشعر بالاختناق فتمتد يدها بكل تلقائية الى عنقها لتخفف من حدة تلك الياقة الضيقة ولكن سرعان ما تنتبه انها لا ترتدى الا هذا القميص الخفيف فمن اين اذا يأتى هذا العرق والاختناق ؟!

تذهب لتشرب كوب من الماء البارد ، تمشى الى مطبخها حافية القدمين ...دائما كانت تحب ان تمشى حافية وتشعر بتلك البرودة وتبتسم كطفل مازال فى اعماره الاولى بتلك الدنيا يستمتع بتلك اللحظة بكل براءة .

تتذكر لومه لها عندما يراها هكذا ويرجوها ان ترتدى شىء كى لا تصاب بذات الرئة او ما شابه وتنصاع اليه بعدما تبدى امتعاضها من هذا الامر ولكن فى قرارة نفسها تضحك كطفلة تبلغ من العمر سنتين وربما اقل .

ترتشف من الكوب الماء البارد ولكن لازال جسدها ساخن والعرق يسيطر عليها تشعر وكأن هناك من يجثم فوق صدرها ...تشعر بالاختناق ولكن لا تستطيع ان تبعد هذا الشعور عنها 

تعود مجددا الى فراشها الوثير لتحاول ان تنال قسطا من النوم بل ذهابها للعمل مبكرا ...ولكن عيناها تنظر من حولها ...انفها تلتقط رائحة مميزة ...رائحة عطر بشرى اخاذ قد اعتادت عليه تنهض مسرعة من مكانها وتلتفت يمينا ويسارا ولكن ...انه الاشتياق 

الاشتياق له ...الى رائحته...الى وجوده بجانبها الى تلك الهالة المضيئة التى ظلت تؤكد له انها تراه وهو يسخر منها ولا يهتم ...ولكنه رحل 

نعم رحل يا عزيزتى ...مخاطبة نفسها لن يعود بعد الان ...لا لم يرحل مالزلت رائحته فى كل مكان نعم ...انا اشعر به يلف يديه حول صدرى ويضمنى بقوة اليه ..اشعر بهذا وبقوة..ولكنه شعور زائف 

شعور الحنين يؤلمنا دائما ويجعلنا نشتاق ...الى من ...الى ماذا او كيف ...لا احد يدرى ...جل ما ندركه اننا نشتاق اليهم ..فقط 

!!

حاجات كتير اوى

النهادرة عيد ميلاد والدى العزيز

كل سنة وانت طيب ويجعل ايامك كلها سعادة وتفرح بيا ان شاء الله قريب 

وربنا يديلك الصحة وطولة العمر 

========

Merry Christmas every one 

=)

======== 

الشهر خلاص بيقفل ...عاوز اعمل حصاد للسنة دى ان شاء الله

فى البوستات اللى كتبتها 

واللى كان نفسى اعمله 

غير حصاد على مستوى حياتى 

بس ده هأجله فى عيد ميلادى اظرف 

هيكون متناسب مع مناسبة الربع قرن 

على أى حال 

تفائلوا بالخير تجدوه ان شاء الله 

========

الجمعة 23 ديسمبر سنة 2011 

الساعه 8 ونص بالليل 

Welcome Home Lara =)

Winter Whisper

نفسى اعمل زيها كده 

بس يكون الجو برد...انا بعشق حاجه اسمها شتا 

بستناه بفارغ الصبر

بعشق الهواء المتلج اوى ده...شعور انك ماشى ايدك فى جيب بنطلونك ولا الجاكيت والهوا بيخبط فى وشك وتحس بمناخيرك بتتجمد من السقعة ...وتبقى ماشى فرحان اوى بالشعور ده 

زى اما تاكل ايس كريم بسرعة اوى تحس مخك بيتجمد وقشعريرة فى جسمك حلوة كده

ويا سلام لو بتتمشى على شط اسكندرية وهوا اسكندرية فى الشتا متعة احلى من القاهرة بكتير 

تحس انك نخلة والهوا بيزقك يمين وشمال ...هوا متلج اكتر بردوا

وياسلام بقى لو الدنيا مطرت وتمشى تحت المطر وتبقى مبلول من اولك لاخرك كده 

جربوا مرة كده الدنيا تمطر جامد انزل اقف فى الشارع وافتح دراعك اكنك بتحضن السما وبص لفوق وهتلاقى نفسك بتضحك

يا من عبطك يا هتضحك لما تحس باحساس جديد غير احساس انك هتلبس برد السنين :D

الاحساس ده جربه وانت بتنط فى البسين او البحر ...بس بلاش  ارتفاعات عشان الكرباج وكده ^^

جرب تسيب نفسك للهوا يزقك شوية 

احساس انك طاير مش بمزاجك ده بيخليك تسترخى اكتر 

بالظبط زى الصورة دى

مسترخية على وش الميه 

مفيش حاجه على بالها

وممكن تكون بتفكر فى حد او اتنين

بس الاهم هتكون مبسوطة اوى 

مبسوطة عشان حد من اللى على بالها بيخليها تضحك عالطوول 

بيخليها تنسى الدنيا ولو لثوانى

بينقلها لعالم تانى عالاقل 

ودى ميزة الشتا عندى

مليان ذكريات حلوة ووحشة 

بس الحلوة بتفضل عالبال عالطوول 

بفتقد الانسان اللى كان ذكرياتى معاه 

بس الابتسامة على قد ما بقدر ااخليها تدوم 

المهم بردوا نرجع لمرجوعنا 

الشتا كنت عاوز ااقوله

حمد الله بسا يا برنجى 

=D 

بفتكر

بفتكر كده زمان

مش زمان اوى

او يمكن بعيد حبتين 

ضحكتك

لما كنت بهزر معاك 

النظرة بتاعتك الجادة والصارمة اوى 

كنت بحب ابص لصورتك انت وهى ...وبستغرب مين دول 

فاكر مرة كنت انت عاوز تسافر ورحت خبيت الجزمة بتاعتك...انت يومها اضايقت 

بس قعدت تضحك 

بس برضوا فاكر زعيقك الجامد اوى 

النرفزة اللى عالطووول كانت عندك 

كنت بقول فى نفسى ايه القرف ده 

فين ضحكتك راحت 

ومكنتش بطيقك 

جيت لما كبرت اكتر

وضهرك انحنى اكتر واكتر

وبقيت ساعات بتنسى انا مين 

فى الاول كنت بزعل اوى 

بعدين بقيت اتقبل سؤالك بضحكة وارد عليه ..وتنسى 

وبعدها بكام دقيقة افكرك 

وحشتنى قعدة السفرة 

بس انا كنت بحب اقعد فوق السفرة ذات نفسها 

واخد سلة العيش البلاستيك دى فى حضنى

وطبق العسل الاسود البلاستيك الاخضر 

كنت بحب اوى الصندرة

بلكونة المطبخ الضيقة 

بلكونة الصالة اللى كان بيلعبوا فيها كورة 

المكتب بتاعك اللى كنت بقلبه يمين وشمال واخد الميدالية اللى بتفتح وتقفل

كنت بحب صورهم وهما صغيرين ...واتفرج على المشاريع اللى كانت متبروزة 

كنت بحب انام عالسرير فى الاوضة الكبيرة وابص للسقف والمروحة العتيقة دى 

من السبعينات باين 

ويمكن ااقدم كمان

بس فيه ايام وشهور وسنين عاوز اشيلهم من ذاكرتى

لما انت تعبت وسبت البيت 

بس الفترة دى كنا قريبين اوى من بعض...ادخل اوضتك تفتكرنى وتدعيلى 

حد تانى كنت تسأل مين ده ...يااااه دعوتك دى عندى بالدنيا 

لما رحنا مستشفى عين شمس وكنت بتتوجع وفايق وبتقول اه قلبى كان بيوجعنى وانا واقف متكتف كده 

كانت اول مرة فى حياتى اشيل حد متكفن واحطه فى اللحد

كانت اول مرة انزل قبر تحت واحط الكفن جوا واشوف الراجل وهوا بيحط التراب عليك 

كانت اول مرة ابقى فى صدمة كده 

بس انت لسه فى بالى 

يوم عيد ميلادى بفتكرك اكتر عشان انا يوم 13 وانت يوم 14 

البوست ده بدرى بشهر وحبة 

بس بقالى كام يوم بشوفك فى اماكن كتير 

ربنا يرحمك يا جدو يا حبيبى 

ويلحقنا بيك فى الجنة باذن الله 

=)

صاحبة القبلة

مرت من جوارى

شممت عطرها 

التفت كى ارى من هى صاحبة هذا العطر الاخاذ 

وجدتها تقف امامى والابتسامة ترقص على شفتاها 

فابتسمت بدورى وهممت ان اتكلم ولكنها 

وضعت اصبعها على فمى ونظرت الى 

نظرة واحدة 

مجرد نظرة 

مليئة بالعديد من الكلمات والمشاعر 

وتركتنى ورحلت 

جاءت فقط الى حياتى 

لتطبع تلك القبلة 

قبلة قلبت حياتى راسا على عقب 

فشكرا لتلك القبلة 

التى انتشلتنى من احزانى 

واعادتنى الى ما كنت عليه 

شكرا لك 

فقط انتى

كلما تاقت نفسى الى الراحة وترك ما انا افعله

كلما اردت ان استسلم واترك الامر برمته 

كلما وجدت نفسى مليئا بتلك المشاعر السلبية

كلما وجدت اننى لا استطيع استكمال الطريق 

فقط 

ذكرت نفسى انك على الجانب الاخر من الطريق 

تنتظرين منى العبور 

وارى يدك ممدودة الى 

فقط

كى تجعلينى استمر فى هذه الحياة 

فقط

لك انت وحدك من يجعلنى استمر فى هذه الحياة 

:)

Happy 23 To Meeeeeeeeeeee

Today officially I'm 23 years old ...

كل سنة وانا طيب ...سورى شرير وسفاح طول العمر

وياااااااااااااااااااااااااااااااااااااااااااااااااااااااااااااااااااااااااااااااارب

تبقى سنة حلوة عليا

وعلى نونا ونونى ...ونفضل دايما مع بعض

ومع حبيبة القلب ....ويارب تكون السنة دى بداية حلوة ليا وليكى ...ونهايتها تكون حلوة كده...ادعوا انتوا بس

^_^

مش عارف...فرحة + خوف من اللى جاى...اينعم لسه صغير مكملتش كتير

بس كل لما بنكبر سنة او يوم مسئولية بتزيد

حاجات بتتغير ...وحاجات بتروح...حاجات كتير يعنى

ما علينا

مهما كانت الظروف حواليا

مهما كان الجو برضه

هقضى اليوم ده بالطول والعرض

^_^

Love was made for me and you

L is for the way you look at me
O is for the only one I see
V is very, very extraordinary
E is even more than anyone that you adore can

Congratulations...

الحمد الله

حرقوا دمنا وهنلعب الماتش الفاصل


مبروووووك لمصر




وعاوز ابارك لاتنين من المدونين

اصحاب مدونة اوقات فراغ

The Rock

&

Barbie girl

كتب كتابهم بكرة يا جماعه ان شاء الله

والفرح التلات

تعمل ايه لو ابنك تعب...تروح تدفنه طبعاً!!!!!

عندك عيل صغير ؟؟؟؟

طب هوا اكيد كويس؟؟

طب مفكرتش يوم لما يتعب او تحصله حادثة - لا قدر الله - ومحتاج تنفس صناعى عارف هتروح بيه فين؟؟

لو مش عارف انا اقولك

خدها من قصيرها ورتب الدفن بتاعه وترتيبات العزا والصلاة عليه اسهل بكتير من انك تستنى فى مستشفى او مع عربية الاسعاف وتشوف ابنك بيموت قدامك عشان مش لاقيين جهاز بتاع التنفس الصناعى ...او لقيته فى مستشفى بس مديرها مش راضى يدخله رغم انك واقف بتبوس رجله ...وكل اللى انت طالبه منه تنفس صناعى لحد الصبح بس ...مجرد نفس...مش نفس سيجارة حشيش ولا سيجارة بانجو او حتى كليوباترا...نفس هوا ...عشان يعيش على امل

بس لاء ...لازم نقول لاء ...عشان سمعة مستشفى ...ممكن

عشان احنا مبنهتمش غير بابناء الناس المهمة...ممكن

عشان اللى مالوش واسطة مالوش ضهر ...ممكن برضه

امبارح الساعه 9 بالليل وقع طفل صغير عنده سنتين الا شهرين من شباك شقته من الدور السادس على الرصيف تحت ...اتنقل مستشفى الهرم وقتها عالطول كان هناك الساعه 9 وربع تقريبا واتشخصت حالته ...كسر فى الجمجمة ، ارتشاح فى المخ ونزيف فى المخ ...طب ايه المطلوب دلوقتى يا جماعه ؟؟؟

جهاز تنفس صناعى للاطفال الصغيرين ...طب ده مش عندكم...لاء ماعندناش ...بس عربيات الاسعاف الطائر فيها..بس مش هينفع تقعدوه فيها لحد الصبح ...شوفوا مستشفى يكون فيها الجهاز...

القصر العينى الفرنساوى فيها بس مافيش مكان وفيه ناس عالانتظار كمان
سوزان مبارك التخصصى للاطفال للاسف مفيهاش ومعرفشى ازاى ...مين اللى عنده؟؟؟

مستشفى كيدز فى المهندسين ...بنتحايل عالراجل ساعه الا ربع مدير المستشفى يعنى

عربية الاسعاف واقفة معانا فى مستشفى الهرم اكتر من ساعه ونص ...والمفروض تمشى فيه حالات تانية ...

عدى ساعة ...ونص...ساعتين ...ونص

البقاء لله يا جماعه...الولد اتوفى وبقى عند ربنا خلاص

فى خلال الساعتين ونص دول...بندور على مستشفى فيها الجهاز بتاع الاطفال ده

وبنتحايل على بتاع كيدز يقبل الولد...مجرد نفس مش عاوزين عمليات والصبح هننقله

لاء...اليوم واقف على 2500 ...معانا فلوس...طب لازم يكون معاه الاشعات ونفحصها بعدين نقرر...طب يكون معاه دكتور...لاء اصل احنا مش بنقبل حوادث ...طب انا ايه يضمنى انكم تعرفوا مدير مستشفى سوزان مبارك...انا هكلمه اتأكد منه ...طب مش عارف ايه تانى

حجج ورا حجج

طب اهله والاهمال ...وفاة الولد اعتقد عقاب من ربنا ليهم ...وابتلاء كمان ليهم ...وممكن يكون سبب انهم يدخلوا الجنة

طب الدكاترة دول؟؟؟؟

والمستشفيات دى؟؟؟؟

طب دلوقتى اللى عنده عيل صغير يروح فين لما يتعب او تحصله حادثة...نطلع عالمدافن احسن ...ولا نتفرج عليه وهوا جمنبنا بيموت؟؟؟

حسبى الله ونعم الوكيل


عارفين اللى يخنق ايه اكتر؟

اننا كان معانا وسايط امبارح

:S

Ask Me Answers

طيب انا سبت البوست بتاع 5 ايام على اساس حد ممكن يضيف اى حاجه بس محدش اضاف :D



فيه سؤال مشترك الاول ما بين كذا حد هوا سبب اختيارى لاسم سفاح كرموز

السؤال ده اللى ساله :

mimi & واحدة مفروسة

طيب هوا كل الموضوع بينقسم لنصين...اول نص انى زمان لقيت اسم مشمش محجوز فاكتفيت انه يكون فى اللينك بس بتاع البلوج...عشان انا عملتها زمان ونسيتها بتاع فترة طويلة لحد ما رجعتلها
السبب التانى ان كذا حد اعرفه قالى انت سفاح ..ههههههههههه او فيا حاجات من السفاحين ...من ضمنها الهدوء مثلا فى التعامل مع كذا حاجه او كذا شخص وطريقة التعامل معاهم...فقررت اسمى نفسى كده...فعشان الناس تيجى لحد عندى...لازم يكون اسم يشد الناس ...فاكيد مش هسمى نفسى سفاح اسكندرية ...فمافيش غير سفاح كرموز اللى شدنى + انى بمووووت فى اسكندرية

:)

Unique asked me about : what are the things you consider the most important for normal persons to shape their own image from the inside and the outside ?

هجاوب بالعربى بس عشان مش فاكر اغلب المفردات ..هههههههههههههههههههههههههههههههههههههههههههه
طيب اهم كذا حاجه اللى المفروض تكون الشخصية وتفيد الواحد من جوا ومن برا طريقة التفكير ...انسان عاقل بيفكر بعقله وبيوزن الامور ولا عاطفى بيجرى ورا احساسه فى اى حاجه شغل جواز خروجة ...وات ايفر ...طريقة التعامل مع الناس هى اللى بتحط الصورة بتاعتك الخارجية ازاى انت انسان مستهتر ولا بتقدر اللى قدامك وتحترمه ؟؟؟؟
الداخلية عندك بقى من احترام الذات وتقدير النفس واهم حاجه القناعه ...انك تكونى قنوعه باللى ربنا قسمهولك ...منبصش لغيرنا ومنحاولش نبقى حد تانى غير نفسنا ااه نطور منها لكن منقلدش غيرنا
يارب اكون افدتك..:)

Dr Dead حبيب قلبى

حاسك برغم اي حاجة بتعملها تبسطك انك من جواك حزين مش عارف ده صح ولا لا بس دايما احساسي كده عنك انك حزين وساخط علي حاجات كتير مش شايف انك لسه صغير يا مشمش عشان تبقي حزين من جواك كده ده لو انا اللي شايفه صح؟

بص لكل واحد مننا ظروف وكل واحد ليه حياته واللى بيحصل فيها ....من ناحية ساخط ...لا ابدا ممكن بزعل كتير بس ...بفتقد حاجات كانت فى حياتى ومشيت فيه منهم اصحاب توفاهم الله فى حادثة قدام عينى او اللى تابعته وهوا بيموت كل يوم بمرض ما او اللى تسيبه الصبح بالليل تصلى عليه ...دى يمكن اكتر حاجه ماثره فيا ومخليانى بزعل كتير ...مفتقد وجود ناس كتير فى حياتى اغلبهم سابونى ومشيوا ...ااه اينعم هيجى يوم وهحصلهم تحت :D
ومحدش مننا بيبقى راضى عن حاله 100% لازم بنبص لحاجات تانية...بس لعلمك فيه حاجات كتير بتفرحنى بس بيبقى ناقصها الكريز اللى فوق التورتة ...وانا بقعد ادور عليها مين اكلها ولا مين خباها منى ...يمكن هنا او عالمنتدى بس شفت منى وش واحد ...لكن لسه فيه اكتر منى :D

السؤال التاني مشمش مين هو وعاوز ايه؟

واحد من عباد الله بندور على رضى ربنا ورضى الوالدين فى الدنيا وبحاول امشى فى خط واحد ...مستقيم مش متعرج...عاوز ايه بالظبط دى ؟؟؟؟ عاوز اكون حد كويس وناجح فى شغله ...بس دى مش بالتمنى ...للاسف دى بالشغل ومشمش حاليا كائن كسول لاقصى درجة :$

يارب اكون جاوبتك صح :D

Eman H.H. :

السؤال اللى مقدرشى ارد عليه يا ايمان مواصفات البنت اللى عاوز تتجوزها او شايف نفسك بعد 10 سنين فين

يمكن زمان كنت برد وبكل ثقة ...لكن يوم بعد يوم بنشوف ان الدنيا لسه مخبيالنا كتييييييييييييييييييييييييييييييييييييييييير

Silver eyes رديت على الاسئلة نفسها مع ان كان نفسى اشوف منك سؤال

كرسى اعتراف نورتنى وانا عالكرسى ..هههههههههههههههههههههه بتسأل :

هل اتهمت من قبل بتسفيه أفكار الأخرين؟

بتاع 5 مرات كده ...منهم مرة صح كنت ااقصد اسفه رأيه والاربعه كان تجنى عشان بيهربوا من المناقشة ^_^

دهاء سياسى وعودة بعد غياب واهو انا مش عيان ...عشان مش تتعقدى بس...هههههههههههههههه

المهم :

ايه مواصفات الشخص الى لما تقابله تقول عليه " ده انسان فعلا " ؟؟

طيب....بيحترم الناس ....عنده ذوق واخلاق ودين ...بيعامل ربنا كويس مهما كانت ديانته ايه ...عارف الحق من الباطل ...جدع

تقريبا دى المقومات بتاعت الانسان ...اعرف حد كده على فكرة :D

من هو الانسان من وجهة نظرك؟

ههههههههههههههههههههههههههههههههههههه صباح اللف يعنى

ممممممممممممممممممممممممممممممممم
هوا هوا البنى ادم -_-


عمرو فكرى ...كنت مستنى سؤاله كل ده :D

لو قررت تغير شخصيتك مع حد .. تغيرها مع مين؟

طب لو هاتختار حد مننا ع المنتدى .. تختار مين؟

مش عارف والله ...ده ممكن ارد على ايمان واقولها اصعب سؤالين حتى الان ...بس ممكن اغيرها
مع نهى اخد منها شخصيتها واديها شخصيتى ...على الاقل هتكبر راسها اكتر منى :p

بس ممكن اضيف من عندى عليها حبة بهارات يعنى ^_^

بقالى ساعه الا ربع برد عالاسئلة ..ههههههههههه يا موسهل

نيجى للاوستاذة هاجر زعبل اللى سبتها للاخر اللى اتوصت بسم الله ما شاء الله يعنى

11 سؤال :p

يا تري نفسك تعيش في بلد تانيه غير مصر؟ لو اه .. فين وليه ، ولو لأ لأ ليه ؟؟


بلدين ...فرنسا ...اغلب اصحابى هناك من زمان عايشين ومتجوزين وبيشتغلوا هناك ، كان المفروض اهاجر معاهم زمان بس فى البيت رفضوا
او الامارات بحسها البلد العربية الوحيدة اللى بتحترم شعبها فعلا ومقدرااه

ايه المقوله اللي حاططها دايما قدام عينيك ومؤمن بيها ؟؟

اذا دعتك قدرتك على ظلم الناس فتذكر قدرة الله عليك
دايما قدامى ...ودايما عندى فرصة او وسيلة انتقم من اللى ظلمنى او داس لى على طرف...بس بهدى وبفتكرها فبسكت وبسامح او مسامحش ...بس مبديش للامر اهمية وبدعى ربنا اللهم عليك بمن ظلمنى

لو باءيدك تدي جايزه نوبل لحد هتديها لمين وليه ؟؟

هديها لكل ام فى الدنيا تعبت وشقيت وربت ولادها عشان يكبروا ويردولها جزء صغير من اللى عملته ...اكتر ناس بيتعبوا والله وبيستحملونا مهما عملنا ..:)
بس فيه امهات ما تستحقش على فكرة

السفاح ممكن يحب ولا بيعشق حياة السفاحين ؟؟

زمان ااه ...كان ممكن ...دلوقتى لاء...الوحدة افضل نوعا ما من ان الواحد يبقى مع شخص فى اى وقت ممكن يجرحه ...ونقعد نجرح بعض طول الطريق ونعند سوا ...ااه وجهة نظر قاصرة حبتين تلاته بس حاليا فى اجازة طويلة...وممكن نقول لسه مجتش اللى تقدر تخطف قلبى من مكانه :p

ليه دايما انا كمان بحس ان جواك حزن عميق بتحاول تداريه بضحكه عاليه لزمتها في لحظتها ؟؟ وياتري لو في حزن ليه محاولتش تكسره ؟؟ ولو مفيش تفتكر ليه احنا بنحس بكده ؟؟

:)

احسن سلاح لمواجهة اى حزن او ضيق...انك تضحكى...وبصوت عالى اوى...يعنى من حبة جالى خبر حرق دمى ونرفزنى بس ضحكت زى المجانين ...عجباً من اللى حصل يعنى ....ساعات بعرف اكسر الحزن ده...وساعات مش بعرف عشان الفاس اللى بيكسره مش بيكون معايا ...بيكون مع حد تانى...والحد التانى ده مبقاش موجود...فبيفضل الحزن ده جوا قاعد فى مكانه مستنى صاحب الفاس يرجع يكسره تانى
بنحس بكده عشان دايما بندور على اى حاجه ناقصانا...تعرفى فيه ناس اغنيا من كتر ما هما سعداء بيبكوا ...مفتقدين شعور الحزن او الاحتياج...اغلبنا كده ...فيه ناس بتحزن عشان تعوض حاجه ...او تستدر شفقة اللى قدامها

ايه اكتر موقف صدمك في حياتك ؟؟

غير انى سقطت فى الكلية اول ما دخلتها ...ممممممم

واحد صاحبى مات قدامى

ايه اللي محدش يعرفه عن السفاح ؟؟

حياتى عاملة ازاى ...او انا ايه بعمل ايه بدرس ولا لاء ...اصحابى ...حاجات كتييير يعنى :D

نفسك توصل لايه ؟؟ وايه اللي وصلتله من احلامك ؟؟

نفسى اوصل لفووووووووووووووووووووووق اوى كده ...نفسى ابقى ناجح فى حياتى من كل ناحية ...افيد الناس اكتر واكتر
وصلت لنسبة 30% انى غيرت شخصيتى بـ360 درجة وانى بحقق كل يوم جزء صغير من اللى انا بعمله

ايه رأيك في الاسئله اللي اتوجهت ليك في البوست ده ؟؟

اسئلة مرهقة اوى...هههههههههههههههههههه:D

لاء حلوة ...بس كنت مستنى اسئلة اكتر واكتر
بس الاسئلة دى طلعت حبة من اللى جوايا...ساعات كتير بنبقى عاوزين نتكلم وبس...حد يسمعنا ولو شوية الاسئلة دى حققت حتة من السمع

بتحب دراستك ولا لا ؟؟ وانت صغير كنت بتحلم تبقي ايه ؟؟

لاء ...بكره الحقوق واللى عملوها ...بس فى نفس الوقت مكنتش عاوز تجارة ..:S

كنت عاوز اكاديمية اخبار اليوم او سياسة واقتصاد بس ربنا ما ارادش بس المصلحة من حقوق انى عرفت بلاوى فى القانون بستغلها وبستخدمها كل يوم :D

على فكرة انا استمتعت جدا باسئلتك

وباسئلة كل اللى ردوا عليا

بشكركم جداااااااااااااااا ...ساعدتم حبة انى اطلع من الموود + بحب اوى انى اتسال معرفشى ليه ...لو كانوا عملوا النجاح فى الجامعات بالشفوى والله كنت اتخرجت فى سنتين مش اربعه :p

who care !!!!

who cares ?!!!

******************************************************************************

Amr Fekry....

Please Come Back ....

Your "Family" Missing You !

قتل موظفة المانية بالقاهرة

الموظفة كانت ماشية فى امان الله فى احد الشوارع المصرية الامنة الساعه الثانية صباحاً منذ اسبوع تقريبا

مواطن شرير سولت له نفسه بأن ينظر الى قطعة الدوناتس وكانز البيبسى التى كانت تحملها فى يدها وطلب منها ان تعطيه قطعه ...ولكنها رفضت وردت علي طلبه باقذع السباب والاتهامات ...فما كان من المواطن الشرير الا ان كان غزها بمطواة قرن غزال كان يحملها بين طيات ملابسه

ليتركها فى دمائها ويفر هارباً ويترك مسرح الجريمة بلا اى شهود سوى الله عز وجل

فى اليوم الثانى تعلن السلطات عن القبض على هذا السفاح قاتل النساء الالمانيات فى ارض المحروسة ، ليتم اعلان هذا فى احد المؤتمرات الصحفية وظهر فى نفس المؤتمر وزير الخارجية والداخلية والمشربية كمان بيعتذر للجالية الالمانية والشعب الالمانى والمنتخب الالمانى كمان على هذا الحادث

اليوم اللى بعده بعد محاكمة عاجلة...قاتل الموظفة حكم عليه بالاعدام شنقا مع الحكم والنفاذ والقرار غير قابل للطعن او النقض لان مافيش محامى راجل رضى يدافع عنه معللين انها قضية خاسرة من كل النواحى

اهل الضحية غير راضيين ورفعوا ضية تعويض على مصر والشعب بزبليون مليار بتنجان يورو واتحكم لصالحهم والمفروض ان مصر هتدفع بقى لعيلتهم اللى الـتييييييييت هديت وبردت عندهم بالتعويض والفلوس اللى هياخدوها

الخبر ده متفبرك ...ومحصلش...يمكن حصل بالعكس مع اختلاف الظروف والاحداث والاماكن

بس كنت بحاول اتخيل لو د/ مروة الشربينى مانت المانية واتقتلت فى مصر بنفس الظروف كان هيحصل ايه ...

مش كان جايز يحصل العن من اللى انا تخيلته

مش بعيد يدخلوا المصريين المانيا عراة فى المطار عشان يتأكدوا اذا كان معاهم سلاح ولا دول همج ولا دول ايه

حسبى الله ونعم الوكيل
لنا الله

ورحمك الله يا دكتورة