Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Sunday, December 30, 2007

حبيبتى...من تكون

مش عارف اذا كنت كتبت البوست ده هنا قبل كده ولا لاء

بس مش مشكلة

بما انى "مطحون " فى المذاكرة...

قلت ااخلى ختام السنة دى مسك بأحب حاجه كتبتها لقلبى...

يارب تعجبكم..

اتكتبت بتاريخ: 16 نوفمبر 2005

حبيبتى

يا اغلى شىء عندى فى حياتى

كم احبك

كم اعشقك

كم احب ان اتباهى بك

لذا سأ صفك الى كل من اعرفه

لكى يعرفوا من هى حبيبتى

عيناها مثل حبتى اللؤلؤ

لوناهم مثل لون البحر ازرق

انفها .....صغيرة ورقيقة مثلها

فمها يشبه حبات الكرز فى لونهما

وفى صغرهما

اما وجهها فهو ابيض كالثلج

وبه نور ....نور الايمان

الا تعرفون من هى

انها حبيبتى

فإنها

والـــــــدتـــــــــــــــى

كم احبك

Saturday, December 29, 2007

فى اكياس ولا سايب ..؟؟؟؟

ممممممممممممممممممممممممم

مسحت اول سطرين اكتر من 10 مرات عشان اعرف الاقى مقدمة مش عارف ...فقلت اخليها كده عريانة....

فى الاول بعتذر جدا جدا جدا لاى حد بيعمل كومنت ومش برد عليه....

لان المذاكرة مطلعه عينى ...وبرضه الموود مش متظبط...وعندى فقر ابداعى حبتيين...:)

بس نيجى للموضوع ....

ياترى ايه اللى فى اكياس ولا سايب....

حاجات كتير ....

بس اولهم الذوق اللى اعتقد انه ولا بيتباع سايب ولا حتى فى اكياس...

دى حقن اهالينا بيدهولنا زى الفيتامين من واحنا صغيرين واحنا بعد كده بنتأقلم مع المجتمع...

وحسب طلع عندنا ذوق او ميطلعش...

بس تبقى ناس كبيرة وعدت سن الرشد...وتلاقى "قلة الذوق " بتنقط من بقهم وبتتكلم على ناس فى غيابهم بقلة "ذوق " برضه ....

ده اللى ما ينفعش ....ولازم نفتح محل الاخلاق ونبيعلهم نص كيلو ذوق...اينعم مش هيكفى معاهم....بس عالله يطمر فى اشكالهم ....

وممكن بعد كده نسفرهم برا على نفقة اى واحد "ذوق" يعالجهم فى اى مستشفى بتاعت اخلاق ...:)

لغاية لما نلملهم من السوق ذوق معبى ومغلف عشان يناسب حالتهم ....

ايه تانى ممكن يكون متكييس او سيب....

ااه الاحساس اللى بقى غايب عند معظم الناس ....

او بقى مختفى ومش بقينا نشوفه....

يلا مصلحة كمان ...

يبقى كده عندنا ذوق...وعندنا الاحساس ....

ايه...مين...

سامع صوت حد بيقولى الضمير....

لا يا بابا ...سعادتك الصنف ده انقرض ايام بنى البشر....

ودلوقتى بقوا ماشيين بضمير "بلتى اوت " مش زى الـ"بلتى ان " بتاع زماان ....

اللى بيبوظ منه مالوش قطع غيار ولا اكياس ولا حتى سايب ....

اييييييييييه ...يلا ماهى بقتش تفرق سينا من سونيا ....

اخر حاجه ممكن الفهالكم فى اكياس....

اكوام الرمل الاسود اللى بقالها شهر بتنزلنا من الحنفيات بدل الميه....

على الاقل اللى عاوز يبنى ده رمل بيلبد ومش بيتزق بسهولة وبيمسك نفسه اجمد من اى رمل مبلول....

حسبى الله ونعم الوكيل فى كل ظالم...

وحسبى الله ونعم الوكيل فى كل واحد فاكر انه عنده ذوق....

لكن الحقيقة المفجعة ...ان الذوق اتبرى منه

والكلام ليكوا يا جيراااااااااااااااااااان ;)

Thursday, December 27, 2007

Welcome

ok my dearest people....

i don't know why i decided to travel to other bloggers in different countries...but the thing that i'm sure about ...that it will be a very interesting journey....

& that need some practice on how talkin' & how writtin' in English ...

so i wrote this post to try some thing new...& if any one ...the foreign bloggers that i visited yesterday show up...may be he/she leave a little comment here :)

so welcome everybody in " Tartashet afkar"


Wednesday, December 26, 2007

الموت علينا حق....

فى الاول بعتذر انى "شلحت " البوست اللى فات نظرا لانه نزل بسرعه وقلت اشيله لوقت تانى ....
وكمان بعتذر لـوشــوشـــنـــى انى منزلتش البوست اللى قولتلها عليها...

بس اعتبرى الحتة دى البوست مؤقتا...عشان هى احرجتنى بكلامها ...فقلت لازم اشكرها ...وادعولها يدخل تلفون عندها وعشان النت يرجع بدل ما هى متشردة فى كل مكان تدخل منه عالنت...:)

نيجى بقى لموضوع البوست اللى ممكن ناس تشوفه كئيب ومش حلو ....الموت...طبعا اغلبنا ان مكنش كلنا مؤمنين بربنا وبالموت وان هيجى وقت ونموت ...ونندفن تحت ونسيب كل حد نعرفه غريب ولا حبيب....ومافيش فلوس معانا ...كل زادنا اللى قمنا بيه حسنات واكيد سيئات ....

بس فيه ناس للاسف رغم ايمانها بالحقيقة المسلمة دى ...مش بتبقى عاوزة تموت وتسيب الدنيا ...عارفه انه هيجى يوم وتموت....وساعات بتتمناه ...بس لما بيجيلها ...بيقولوا لاء لسه بدرى علينا ....مش عارف يعنى من ايه هنتمسك اوى بالدنيا او اللى فيها...يمكن الناس اللى تحت او فى البرزخ عايشين احسن مننا ...يمكن عالاقل مافيش ناس بتكره بعض....

زمان كنت بخاف جدا انى اموت ...او انى افارق الناس اللى بحبهم ....بس جت عليا فترة من سنة او سنة ونص ...الواحد بقى عنده ايمان انه ميت ميت...ودى حقيقة مش قابله للنقاش او الجدال ...بس اللى بتكلم عنه الاستعداد للموت ذات نفسه مش موجود عند كل الناس ....ووقت ما جدى توفاه الله ....وحضرت كل حاجه من اول الغسل نهاية بدفنه تحت ....مش عارف حسيت يومها انى بعمل حاجه عادية بعملها كل يوم...والواحد سبحان الله حس براحة حلوة اوى ...اينعم ابتديت ازعل بعدها بيومين ....:D

بس اللى عاوز اوصله ان كل ما الواحد ايمانه بربنا زاد وكل مدى بيؤمن اكتر بالموت وانه فعلا حق علينا ومحدش عارف هيموت امتى ولا ازاى...يخلى الواحد حريص انه ميضيعش ثانية من حياته فى اى حاجه مش مفيدة او مش هتزود الزاد بتاعنا فى الاخرة ....ورغم اننا ...بنى البشر يعنى ...بنفضل نتكلم نتكلم...ونفعل قليل اوى...اقل من اللى بنتكلمه ....بس اتمنى ان المرة دى ...يكون الفعل اكثر من الكلام او الحروف حتى المكتوبة ...

يارب مكنوش كئبتكم ولا حاجه...وفيه انسان ما هيضايق لما يشوف البوست ده .....بس كان محشور فى صوابعى ولازم يطلع.....

نهاية اى حد ليه قريب توفى اى حتى صديق...ما ينسهوش بقى بعد ما يخلص قراية وكومنت...ويقراله الفاتحة..:)


Sunday, December 23, 2007

Tuesday, December 18, 2007

عيد سعييييييييد ..مااااااااااااااااااااااااااااااااء


زوار ورواد الطرطشة الكرام

جائنا هذا الخبر السعيد....

بمناسبة عيد الاضحى المبارك...

اعاده الله على الامة الاسلامية والطرطشية بالمن والبركات

قرر عمو السفاح عدم التضحية بضحية بشرية هذا العام....

والاكتفاء بضحية خرافية ..

واعلان العفو والسماح عن كل السجناء ....

اللى عالناحية الشمال (عاليمين عندى بس عشان القافية )

وليعم الخير والسرور فى كل مكان

كل عام وانتم طيبييييييييييييييييييين
تحدييييييييييييييييييث:
ذو النون المصرى عمل كومنت عندى فى المدونة الاخرى اللى هى قلب يتكلم....وكتب ابيات حلوة حبيت اشاركم بيها

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل

Friday, December 14, 2007

طاير فى الهوا...

يوم السبت اللى فات ...طلعت رحلة استجمامية مع اصحابى ...قبل الامتحانات بقى وقرفها ...رحت ورمت كل همومى ورايا ...وقلت اغير جو....وفعلا غيرت...المكان كان راس سدر...والجو كان تحفة....بس برغم انى طول اليوم...يا اما كنت مع اصحابى فى الرقص ولعب الكورة....او مع جروب تانى بنتمشى عالبحر...يا مع SelfMeaning هى واختها اللى كانوا فى وادى تانىىىىىىى خالص ...مالهمش اى علاقة باللى بيحصل حواليهم...حتى كان اغلب اصحابى بيسألوا هما معانا ولا ركبوا غلط...هههههههههههه ما علينا

المهم ...الهواية بتاعتى برضه مبطلتهاش انى ااقعد اتأمل حبتين تلاته...الجو بقولكم كان خرافة...وكل واحد فى موود وعلى طبيعته ودى اهم حاجه بحبها فى البشر...محبش الناس المصطنعه واللى تبصلك بوش وبعد كده تبقى قاعدة بوش تانى....الشىء اللى يخليك متثقش فى اى حد....

قعدت على حتة طوبة وبصيت للبحر ...والله ما فاكر كان بحر ولا دى قناة السويس...ههههههههه....بس سيبكم من قضية الميه دلوقتى....الشعور اللى بنحس بيه قدام اى مية...اننا مرتاحين وبالنا رايق...ومن جوانا عاوزين نرمى كل حمولنا فى الميه دى ...يمكن نرتاح حبة من الحمل اللى شايلينه على كتافنا بقالنا سنين ....

بس لاول مرة ااقعد قدامه ومقدرش اتكلم....او حتى اعبر...مجرد صمت رهيب ساد المكان...ودمعة عابرة خرجت تشوف الجو ازاى....واتختفت اكنها مكنتش موجودة خالص...يمكن يكون تغيير فى الانسان ولا عشان الواحد بقاله كتير متكلمش فعشان كده جه الاختلاف....ربما..

ركبت مرجيحه...ااه مرجيحة...اينعم من ابتدائى معملتهاش ...ومن ساعة ما طولت بطلت اركب اى حاجه عالية ...عشان رجلى والارض واحد...بس ركبتها وربعت عليها وقعدت اتمرجح...بقيت افكر لو اللى جوانا بيقع مننا وبيتزاح همنا ...كل ما المرجيحة تروح وتيجى...يااااااااااااااااااه مكنش حد غلب...كانت الدنيا كلها مراجيح...اكتر من اللى احنا فيه حتى...قعدت افكر فى مستقبلى...قعدت افكر فى نفسى...قعدت افكر فى اللى حواليا....لغاية لما اكتشفت اكتشاف مهم جدااااا....

احنا اللى شيلنا الهم لنفسنا....بس مش عاوزين نرميه من على ضهرنا تانى ...لاننا بكل بساطة اتعودنا اننا نبقى مهموين ومسئولين عن اى حاجه.....ده اللى يخلينا لما نرتاح حبة ...نبقى مش متأقلمين ولا مرتاحين خالص ....ولد معانا فى اولى لسه...رغم كم المشاكل اللى عنده بس تبصله تشوف براءة الاطفال ...ومتحسش ان عنده اى مشكلة خالص...بالعكس تحس انه مرتاح ومبسوط 24 قيراط....

هوا ده اللى عاوز اوصله...انى ارمى الهم حبة...ومش معنى كده انى مش اابقى مسئول ....بس مسئول بحساب ومش لازم اشيل هموم اكتر من طاقتى....

ايييييييييييييييه...سونيا...محدش عاد شايفها تانى....

ورجعت من الرحلة...دخلت اوضتى...قعدت عالمكتب...طلعت سكينتى وحطتها جمبى...ومسكت قلمى والورقة بتاعتى...وابتديت اكتب....وعاد السفاح لـ......!!

Monday, December 10, 2007

الضحية الاخيرة

ماسك نفسى بالعافية والسكينة قدامى ...مستنى بس حد يسبنى اروح ااقتله واخلص عليه اريح نفسى واريح ناس كتير معايا...عك كتير كان بيحصل وقرف وزهق من شخصية معدتش 166 سم ...ومكملتش 17 سنة بس الناس ساكته وتقول الفضيحة ومش عارف ايه ...بلا تخلف بلا جهل بقى ...الزمن اللى انتوا عايشين فيه دلوقتى غير زمان بكتير ...

ماسك السكينة فى ايدى المرة دى...حطتها فى الشنطة...اخدت قرارى ...هقتله المرة دى ...ومش راجع فى كلامى ....هقتله عشان اخلص واستريح ....

كتب بتاريخ الاثنين 10/12/2007

الساعه التاسعة ونصف ليلا ....

I miss u

مفتقدك انت يا من تكونى حبيبتى

ابحث عنك بين الورق فلا اجدك

وانظر خلف جهازى ...فلا ارى ثيابك

فربما اختبأتى خلف الكرسى

فاعود خائب الرجا ولم اجد طرطشتى

مفتقد الطرطشة بتاعت زمان....

بس اكتشفت ان كله طرطشة فى طرطشة

حتى وانا فى حياتى اليومية بطرطش وانا مش واخد بالى ...نفسى فى لاب توب جديد بدل اللى راح وولى ...عشان اعرف اخده معايا فى كل مكان واكتب زى ما كنت بكتب...بس تقريبا المشكلة مش فى الجهاز ولا الكيبورد...المشكلة فى صوابع احبطت فمش عاوزة تكتب...

اول مرة اشوف العقل بيدى اوامر للاصابع فترفض وتقوله لاء مش عاوزة اكتب...مش عارف ايه الحل ولا المشكلة فين بس...ولما ربنا فتحها وهداها وكتبت النور قطع...يخى **** ....بجد اعمل ايه تانى...

هوا تقريبا عشان بقيت سفاح طيب ومش بدبح حد....يبقى لازم اعور الناس واجرحهم واقتلهم عشان صوابعى ترجع تكتب من تانى ....سأعود بعد قليل لما الاقى الضحية بتاعتى اللى هتبقى زى القربان...ولو حد عاوز يضحى فى سبيل عودة اصابعى البردانه واللى مش راضية تتدفى بكتابتى...يقول وانا اجيله فورااااااااااااااا


Friday, December 07, 2007


ياترى واخدنى ورايح بيا على فين ؟!!

Wednesday, December 05, 2007

كانت اخر كلماته لها

سأتذكرك..

ودفن ...

وورى جثمانه التراب..

ولكن اخر كلماتها له ...

سأجعل عقلى يمحوك للابد...




Tuesday, December 04, 2007

Wednesday, November 28, 2007

وكانت النهاية


وكانت النهاية ...

حلم مات فى اول الطريق

ورجعت قاعد تانى لوحدى

بفكر تانى فى البداية

واحاول ابعدها حبة عن طريق النهاية

عشان مرجعش ااقعد قعدة زى دى تانى

واقول لنفسى

وكانت دى النهاية

Tuesday, November 27, 2007

Wednesday, November 21, 2007

جولة نظـــر

فىجولة من جولاتى المكوكية المعتادة ...للبحث عن ضحايا جدد اتسلى بقتلهم...هع هع ...بس المرة دى غيرت رايى ...قلت لما ااقف فى اشهر ميدان فيكى يا مصر واتأمل الناس حبة...بقالى كتير جدا مقعدتش ابص فى اللى رايح واللى جاى...يمكن عشان انشغلت باللى انا فيه ونسيت هواية من هواياتى ...المهم ...قعدت اكتر من ساعتين قاعد فى مكانى اشوف كل واحد رايح فين ...مين بيعمل ايه

تعرفوا بجد حاجه حلوة انك تقعد تراقب الناس اللى هى فى الاصل بتراقبك وبتشوف قاعد هنا ليه...وليه بتبصلها كده ...ووسط الهوا الساقع بتاع النهاردة...يااااااااااااااااااااااااااه على دى متعة ...وميوزك عمر خيرت شغاله فى ودنك ...يا سيدى عالمزااج الرايق يا سفحفح

قعدت عالسور وجمبى راجل بيبيع البلاستيك بتاع البطايق ...وكان شغال بيقول بنص جنيه ...بنص جنيه ...جه واحد كبير يشترى منه واحده وجه يديله ربع ...البياع قاله لاء بنص جنيه ...الراجل رجعله الحاجه بس البياع ادهاله برضه بربع جنيه ...يعنى رضخ للامر الواقع ...تخيلوا معايا ان واحده ست عجوزة وقفت تفاصله فى الربع جنيه وتقوله 15 قرش ...سبحان الله على ده شعب ...مبيحبش ياخد بنفس السعر حتى لو فاصل وجاب سعر ااقل شلن...بالنسباله انتصار على ارادة التسعيرة والبياع

ابص على واحد قاعد عالارض وبيعرض قدامه لعب اطفال بسيطة ...يمكن متكونش غالية ومش مكلفه فى الخامة بس بالنسبة لناس كتير غالية على قلوبهم ومحببة ليهم اوى....راجل كبير فى الخمسينات معاه مراته زيه ...اللون الابيض استولى على نص راسه ان مكانتش كلها ...ومعاهم عيل صغير ...وبيضحك بالقطر اللى بيلف حوالين نفسه ..الضحكة بتاعته دى بتخليهم يضحكوا من قلوبهم...متبقاش عارف ظروفهم ايه ...بس الاكيد انهم اغنياء جداااااااااااااااا بابنهم ده وضحكته المسمعه فى الكون كله

بنات ثانوى طالعين من المدرسة وواقفين جمب المترو ....مستنين ممكن ولد يقع فى المصيدة ويبقى حب العمر ...بستغرب اوى من الناس دى ...يعنى ناس تقف تستنى المترو...وناس تقف تستنى الحب اللى بيبقوا عاوزينه ينزل من كل عربية مترو ...وينتشلهم من اللى هما فيه

عسكرى غلبان واقف بينظم المرور وهوا بيحشر سندوتش طعمية جوا بقه والباشا بيزعقله وهوا بيضحك...كل ده فى حركة واحده ...بس تبصله وهوا بيبوس ايده وش وضهر وراضى عن نفسه وحياته واللى بيعمله ...غلابة والله

وواحد زى العبيط ...هوا فعلا عبيط ماشى بكشكول وورقة وقلم ومخلى الناس تقلدله الرسمة اللى فى الورقة ...ولما تعملها غلط تلاقيه افتكر الكتابة مرة واحده ويصلحهالك...بحمد ربنا انه صعب عليا لان كان معايا واحد خلاص كان هيوديه القسم

وفى الاخر ...واحد قاعد عالسور ...حاطط سماعة فى ودنه...لابس نص كم فى عز البرد والناس متكتكة من السقعه....وبيبص للناس ...وعلى شفته ابتسامة خفيفة...جوا عينيه امل ...وان لسه ياما هنشوف وبكرة احسن من النهاردة...ورافع راسه للسما يبص للطير اللى طاير والسحاب والشمس وهى بتغرب ..عارفين مين؟؟؟

فكروا انتوا بقى ..:)

Tuesday, November 20, 2007

الطرطشة التى تقرأها غير متاحة حاليا

مكنتش ناوى انزل بوست جديد ....دلوقتى

بس كل ما احاول ادخل على اى مدونة تطلعلى رسالة مستفزة

فعاوز ااعرف لو ظهرتلكم ...وعرفتوا انكم مش هتدخلوا على بلوجتكم تانى وضد رغبتكم هتعملوا ايه

خصوصا لو عطل فنىلا ضييييع كل مجهود السنيني من كتابة؟؟؟

انظر الصورة ودوس عليها عشان تكبر





Sunday, November 18, 2007

هــروب...


اهروب هو ...ام اسراع نحو المجهول؟!

Saturday, November 17, 2007

عندما تعشق ....

عندما تعشق انسان...

فأنت تتمسك بالحياة من اجله

وعندما تحب شيئا ما ....

فأنت ترفض ان تتنازل عنه لغيرك

وعندما تعشق حياة....

فتبذل الغالى والنفيس كى تظل بها

ولكن

ماذا ستفعل ان عشقت حياة...

واغرمت بانسان

ليس له وجود

الا فى حياة اخرى

هل ستترك الحياة

وتقدم كل يوم التنازلات

لكى تذهب ورائه

ام ستظل فى مكانك

تفعل ما تفعله كل يوم

تأكل وتشرب كأنما ليس هناك اى شىء

بالطبع

فأنت لست عاشق له

ولكن فى النهاية

نظل نخالف انفسنا

عندما نقول كلا

ولن نفعل ما كنا نفعل

ولكن عندما نعشق.......

Tuesday, November 13, 2007

مغلق للتحسينات

حـــالــة احباط وعدم اتزان بمر بيها بقالى اكتر من اسبوعين

عاوز حبة لوحدى ...وهرجعلكم تانى احسن من الاول ان شاء الله

بس فى الفترة دى اللى هغيبها عاوز اسمع ارائكم ومقترحاتكم عن الطرطشة عامله ايه لغاية دلوقتى

العيوب والمميزات

..:)

هتوحشووونى فى اليومين اللى هغيبهم


Monday, November 05, 2007

كـــ** ام الناس

فى الاول كده اللى هيحس ان البوست مش هيعجبه او مكسوف منه بليييز مش يكمل قرايته ويقفل الصفحة واهى طرطشة وهتعدى

معلش اصل مرارتى جابت جااااز ومكنتش ناوى انزل بوست لانى اصلا مشغول ومش عارف انام بقالى يومين بس نعمل ايه فى مخاليق ربنا

مناقشة بريئة على احد المنتديات الطلابية ...واحده بتتكلم عن البنطلون الساقط بتاع الولاد والبنات ...والحاجات دى

انا مش همشى على كل واحد وااقوله البس كذا ومتلبسش كذا ...مش ابوهم ولا وصى عليهم

فكتبت رد ان كل واحد حر يلبس اللى يلبسه

دخل واحد كلامى حرق مؤخرته اوى ومعرفش يقعد الا لما يرد بمثل مستفز زى اللى جابوه

بالنسبة للأخ Meshmesh أحب اقولك كلمة الكل بيسمعها وبيقولها وبيتحجج بيها

( كل اللي يعجبك .. وإلبس اللى يعجب الناس ) .. ايه رأيك بقي في المثل دا ؟!!!
سورى المثل ده مايخشش بذمتى بتعريفة ....لانه لا ينطوى على حرية

والحرية اللى عندى اعمل اللى انا عاوزة بس متمسش دين ولا حرية انسان اخر

رد هوا عليا رد اكتر استفزاز لما قولتله اعملك ايه

والله يا اخ مشمش ... انا شايف ان بكلامك دا يبقي انتا سوري في اللفظ يعني

عايز تقول طز في الناس .. وان الناس ماتهمنيش

واني ممكن امشي في الشارع مش لابس حاجة .. عااااادي جدا

بقي بذمتك انتا نفسك اما بتمشي في الشارع وشوفت حد مثلا شاذ في لبسه

مابتعلقش ؟ .. ادفعلك 100 جنيه كاش .. لو قولتلي لا

انا الصراحة مش همشى ابص على كل واحد ماشى فى الشارع سواء ولد ولا بنت عشان افصص لبس اهله او اللى نازل بيه الصبح

سورى فى اللفظ اللى كاتبه العنوان ما كــ** امه عالللبس اللى لابسه ينزل عريان ...ينزل لابس الجزمة فى ايده مش مشكلة اهلى

بس المشكلة دلوقتى اننا خلصنا كل مشاكلنا ودخلنا عالهدوم ...وخلاص هى دى اللى موقفه حال البلد

مشكلتنا تكمن فى ثقافة الاختلاف فى الرأى اللى انا بخالفها فعلا بالبوست بتاعى ده

انا اهوة مش بعترف ولا بحترم رايه اصلا

عشان هوا محترمش رأيى فى الاصل واستهفأه

امال ايه لازمة المقولة بتاعت الاختلاف فى الرأى لا يفسد للود قضية

ايه لازمة اصلا اننا نتكلم ونتناقش اذا كان فيه ناس لا تقبل الرأى الاخر بتاتا وعاوزه رأيها هوا الصح دايما

عايزة تبقى هى ام المصلحة الاجتماعية للبلد وهما الملايكة واحنا الشياطين الكفرة اللى بنخرب فيها

سبحان الله بجد ...وبعد كده يقولك الناس مش بتحترم بعضها ليه

هى كل حاجه مرتبطة بالحاجه التانية ....بمعنى

لما واحد بن @#$%&^*..يفعص رجلك وانت واقف عالرصيف وياخد فى وشه ومش يعتذر او يبصلك ويشتمك

عشان حطيت رجلك قدام مسار رجله الكريمة ...حد بالمنظر ده هيولد عدائية عندك انت...والمرة الجاية حد هيدوس على رجلك

هتشنيره اصلا قبل ما يفكر يعتذر او العكس هتدوس على رجل حد عشن تنتقم .

هى كلمة واحده بسيطة اتقالت خلاص بخ

نفس النظام لثقافة الحوار او الاختلاف ....دلوقتى محدش عاجبه رد يجيب ربع ايه ويفسرها على مزاجه

كمثال لما تتكلم عن الصداقة يقولك كلمتين ولا متخذات اخذان فى حين لو رجعت لتفسير الاة ككل هتلاقى ان ربنا بيتكلم عن الزنا ...الخ

هما كده بالظبط ...مجرد انه رافض يقبل رأى تانى ده لوحده علامة على فشله اجتماعيا وثقافيا ان لم يكن جاهل اساسا فى حياته ومش دريان لان من حوله ناس بتقول امين يا شيخ حسيين

يلا هنقوول ايه اهو كله طرطشة فى البهيصة

اللى اضايق من اى كلمة فى البوست...مش مسئول عن اى طرطشة جت عليه

او يمسحها فى الحيطة وهوا خارج

بســـا


Wednesday, October 31, 2007

ليلة قتل عباس

سمع اصوات خافتة فى الصالة

قام من نومه عشان يعرف مين اللى بيمشى قدامه

لقى شخص ما يسمى عبااس

طلع يجرى وراه ...مسك عصاية المقشة ...وهات يا ضرب

طاخ يمين طرااخ شمال ...طك فوق ...اى ...خبط فى الحيطة

وفلت عباس المرة دى ...جرررررررررررررررررررررر

لازم ااحط حد ليك يا عباس

وعمل فى تانى يوم مصيدة وخ9طة محكمة عشان عباس يتقفش ويعرف يقبض عليه

لكن عباس سهى السفاح وجرى منه وباظت فكرة المصيدة

بس لاء ...هوا انا هفضل جبان لحد امتى

لازم ااقف وابقى شجاع واحارب عباس

لاء وفين ...فى عقر داره

مسكت عصاية المقشة...وسكينتى المفضلة

واخدت الاحتياطات وفتحت باب شقة عباس وهوب تيك....فتحت الباب

ودخلت جوا ...وابتديت ااقلبهله الشقة رأسا على عقب

مش رأس بتاعت تربتت تىىى

رأس تانية دى

وفجأة قام عباس من نومه

اينعم ركبى خبطت على جيران الجيران

بس فى النهاية استجمعت قواى

وطااااااااااااااااااااااااااااااااااااااااااااااااااااخ

فى ضربة واحد قضيت على عباس

اخيرا

خوفى راح
هتستغربوا وانت ازاى تخاف منه يا عباس

هقولكم ببساطة عشان مش بحب الفيران

وعباس ده فار اسود فى ابيض محتل الشقة بقاله يومين :D


Monday, October 29, 2007

الجاهلين

اذا خاطبهم الجاهلون قالوا سلاما
اغلب الناس كده

تلاقى انها مش عارفه ترد الا بقلة ادب...

تحب تنسحب من المناقشة

تكتب ام الكلمة اللى الشعب المصرى كله حافظه


Thursday, October 25, 2007

قلشة تفوت ولا حد يموت


بما ان سعادتى السفاح حفظنى الله ورعانى بقالى فترة مش ضحكت وفيه كومناتا كتيرة متأخرة وخايف للناس تفتكر انى منفض

فقولت نقلش حبة عشان ااعرف اكمل بقى

يلازززز











عندك حق لازم نفرمل الاطفال ...فكرونى كده





ممنوع الشرب او التفكير...للعرض بس


تلميذى...يتحدى الملل




اظن لو حد قال الخمورجية مش واخدين حقوقهم يبقى كداب

عشان تعرفوا بس فايدة الواسطة...ومالعالم الا شارع صغنن



ومن حق الكبير يدلع...ترلم

لا تعليق بجد

:D





Monday, October 22, 2007

انـا لله وانا اليه راجعــون


توفت الى رحمة الله تعالى بالامس

والدة المدونة ريـــــرى

صاحبة بلوج

فـــضــفـــضــه عـــالمــــاشـــــــى

ندعو الله ان يسكنها فسيح جناته

وان يجعل قبرها روضة من رياض الجنة ان شاء الله

مش عارف ااكتب ايه اكتر من كده

بس ادعولها يا جماعه كتييييييييييير على قد ما تقدروا

المتوفى دائما بيبقى فى امس الحاجه لدعوة واحده حتى


Friday, October 19, 2007

السفاح لسه صغير

ااه لسه صغير وعنده 20 سنة

ااه مش من حقى انى اطلب ايد واحده

عشان انا لسه صغير وعندى 20 سنة

هههههههههههههههههههههههههههههههههههههههه

بهزر قبل كده مع واحده اعرفها ....

فهى اخدت الكلام بجد

وقالتلى ان هى هترفضنى من قبل ما باباها يرفضنى


عشان انا اصغر منها بسنة

وعندى 20 سنة

طب المفروض الناس تتجوز وهى كام سنة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سبحان الله

قاعد فى سياسة واقتصاد بيتى التانى...وجه واحد ظريف بنتكلم فعرف انى 20 سنة...وهوا كان 23 سنة

فقالى ياااااااااااه انت لسه صغير ...نرفزنى الصراحة وخلانى ااقوله ياما ناس سنها 20 وعقلها عقل ناس فى ال40

وناس عندها 23 وعقلها عقل ناس عندها 10 سنيين

بس حاجه مستفزة...طب انا اا حسبتها بالطبيعى والسنة اللى دبلرتها ...كان زمانى خلاص اتخرجت السنة اللى فاتت ...

طب اوك ولنفترض معايا شقة ورحت اتقدمت لوحده بس اكبر منى بسنه....ابوها هيقولى امشى مش بجوز بناتى لعيال

اصله الصراحة فكر متخلف جدا جدا جدا انك تقيم حد بعمره

زى انت ماشى فى الشارع وشفت واحده مش محجبة وقلت عليها ****...ده اسمه الغباء بعينة

معلش حاجه استفزتنى ...بس بالمرة

احب اهتى صديق الكفاح التدوينى...والمنتديات

عــمـــرو فـــكـــرى

على خطوبته النهاردة

مبرووووك

وعقبالى كده لما"اكبر" ويبقى عندى 50 سنة واروح اخطب واتجوز


Monday, October 15, 2007

امتى هنتعلم

امتى هنتعلم اننا لما بنمشى فى الشارع مش بيبقى ملكنا لوحدنا

امتى هنتعلم لما نكون ماشيين عالرصيف ونقف زى الخازوق مرة واحده ونراعى ان فيه ناس ماشيه ورانا مش ماشيين لوحدنا

امتى هنتعلم ان لما نكون راكبين مواصلة وفيه ناس تانية راكبين معانا نراعى شعورهم ومش نضايقهم

امتى هنتعلم اننا منحرقش دم الناس التانية

امتى هنتعلم اننا ممكن نخلف اكتر من 6 بس يكون فيه فرق سنى ما بينهم مش فرق شهر ونص مابين كل واحد

امتى هنتعلم اننا لما نخلفهم برضه نراعيهم ومنقارش زمنهم بالزمن بتاعنا

امتى هنتعلم اننا لما نعيش فى عمارة فيه سكان غيرنا وطالما مش عمارة ابونا يبقى نتعامل كويس

امتى هنتعلم اننا لما نقول كلمة ونتفق على حاجه نبقى قدها

امتى هنتعلم نبقى حقانيين ومش نصابين

امتى هنتعلم اننا نبطل نصب عالخلق الصغير قبل الكبير

امتى هتعلم انى ااقتل او اضرب اللى يخنقنى ومش امسك نفسى وابقى بارد كده


Sunday, October 14, 2007

انا مدمن فى حبك

حاجه بمناسبة العيد...

نعم...انا اعترف

ادمنت حبك سيدتى

ولا اقدر على الاقلاع عنه

ادمنت حبك سيدتى

ولا استطيع ان اشفى منه

فحبك مثل المسحوق

الذى اشتمه صباحا

حتى استطيع الصمود ليلا

ادمنت حبك يا حبيبتى

وبدونه لا استطيع العيش

حاولت ان اقلع عنه يوما

فوجدت اثار الانسحاب ظهرت على

ولم اصمد امام حبك الجارف

فوجدت نفسى تهفو مجددا الى قلبك

ووجدت قدمى بدون وعى تسير الى حبك

وبدون ان ادرى نطق لسانى بكلمة احبك يا قدرى

وها انا ذا

مدمن حبك

ولا استطيع ان اقلع عنه

ادمنت حبك يا قمرى

فبدونه لا استطيع العيش يوما

وحاولت يوما ان اجلب غيره

فوجدت انفى ترفض وتشكو

وتقول غير عطرك لا اهفو

ووجدت قلبى يبكى ويتألم

ويقول اين ذهب نصفى الاخر المتيم

ادمنت حبك يا ملاكى

وبدونه لا استطيع تخيل حياتى

فهل تمنيين على ...

وتعطيننى فرصة

كى اذوب اكثر فى هواكى؟؟؟


Friday, October 12, 2007

كل كحكاية وانتم مطرطشييييين

كل سنة وانتم مرتاحين وطيبين

وبالكحك شبعانين

والكوفرته متغطين

ومع السفاح خايفين

وبالعيدية فرحانيييييييييييين

يلا

هسيبلكم عيدية

بس مش تتعودوا على كده


Wednesday, October 10, 2007

ذهب رمضان


ها قد ذهبت يا رمضان

انتهيت كما ينتهى اى شهر

ولكنك شهر الرحمة والمغفرة

فكيف تنتهى بتلك السرعه

الا تستطيع ان تجلس قليلا معنا

مازلت لدينا ذنوب لم تغفر

وسيئات لم تمحى

وحسنات تريد ان تكتب

ارى المحرومين يبكون ندما على ضياع الشهر

اراهم يعضون اصابعهم على كل وقت قضوه بعيدا عن ربى

اراهم يبكون ندما وحزنا من تكاسلهم عن اداء الصلاة

ذاهب انت يا شهر الصيام

وتارك وراءك البشر

ما بين فرح...ومابين حزن

ذاهب انت يا شهر الرحمة

وتارك وراءك طالبوها

ما بين الحيرة ...والتأكيد

ومن اليوم ندعو الله ان يبلغنا رمضان القادم

لا ادرى ان كنت سأكون على قيد الحياة ام لا

ولكننى سأدعو الله

ليت العام كله رمضان

وداعــــا يـــا رمــــضــــان



Monday, October 08, 2007

هالووز عليكوا


بقالى فترة عندى حالة قرف كتابى

يمعنى الابداع كل ما ااجى اطرطشه يطلع خازوووووووووق فى النص يخلى حبل الافكار يتقطع

وموانع الطرطشة الفكرية كتييييييييييييييير

اولهم الحجه الوالدة....لما تنادى عليا اجيبلها حاجه من تحت محتاجها الاسبوع الجاى

او السيد الوالد...لما يحتاج يكلمنى ...مش عارف يبقى بوزى فى بوزه ليل نهار ومرة واحده يفتكر موضوع ما

يعنى اهوة دلوقتى افتكر حاجه وقطع ام حبل الافكار اللى كنت بنشره

او ممكن تلفون غتت ...او مسنجر

سبحان الله الناس مش بتفهم لما تعمل مشغول وتكتب متنيل على عين اهلى مشغول...وتلاقيهم بيكلموك برضه...

ولا اكنك كاتب حاجه...ماهم المصريين كده ....واحد هيقولى ما تعمله اوف لاين...لاء بيتكلموا برضه...

لذا بولع فيه وبقفله خالص

ااااااااااااااايييييييييييييه تانى بيقطع الافكار....

لما النور بيقطع...ما هى السنة 365 يوم مش بتحبك الا فى الوقت اللى بكتب فيه ...

بصوا تعددت الاسباب والنتيجة واحده

قطع واعتراض سبيل الطرطشة الفكرية بتاعتى

لذا ادعولى ان ربنا يفرجها ومحدش يقاطعنى ...عشان ارجع من تانى احسن...ومش ااصورلكم قتيل على باب المدونة

يوووووووووووووووووووووووووووووووووووووووووة

انتوا كمان بتقاطعونى؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Friday, October 05, 2007

هطرطش واقول ايه

هوا سؤال فعلا...

هطرطش واقول ايه

بس الصراحة مردتش اكسف حد غالى عندى اوى لما قالى مكتبتش ليه

والغاليه اوى دى هى selfmeaning

بس انا مبحبش ااسلق البوست

بمعنى مكتبتش وانا زعلان عشان ممكن فى لحظة جنان اولع فى المدونة

طب حد من بعيييييييييييييييييييييييييييييد هيسألنى...وانت زعلان ليه

ااقول ايه ولا ايه

زعلان من ناااااااااااس كتير

وزعلان من نفسى

ايوة نفسى

عشان هى اللى وصلتنى لحالتى دلوقتى

وزعلان من اللى حواليا

محدش بيهتم الا لو كان ليه مصلحة هوا عاوزها

وغير كده لاء

ما ينفعش تقول ايه اللى بتحبه

وماينفعش تقول عملت ايه النهاردة

كل اللى ينفع انك تقعد ساكت وتسمع كلامه وبس

لكن غلط وعيب انك تقول حاجه انت بتحبها

غلط لما تبقى قاعد مع ناس ويحصل موقف وعاوز تمشى بأدب...ويجوا الناس دول بعد كده مش عاجبهم انك مشيت

فى حين لو قعدت ممكن المشكلة تكبر اكتر...ورغم كده مش فاهمين...يتفلقوا

معلش

ماليش نفس اكتب حاجه فى البوست ده

وشكلى هعمل زى ما بيوتى قالتلى

اكتب اسمها وانى كتبت البوست عشان هى طلبت كده

وبخ


Saturday, September 29, 2007

سنة كاملة من الطرطشة

يوم 20 يونيه بدأت فى التدوين...او بالاصح عملت المدونة وحطيت فيه ااكئب موضوع حد يبتدى بيه اى كتابة ...يوم 20 يونيه انا ابتديت اطرطش ...واستنيت لغاية لما ااكمل البوست رقم 100 عشان تبقى ذكرتين مع بعض ...

ناس كتير تبقى فاكرة الزمان والوقت بالتحديد اللى ابتدوا يدونوا فيه ...بس انا لاء ...انا افتكرته بالصدفه ..لما محمد عز فى برنامج مدونة عالهوا...قالى ...سفاح انت ابتديت تدوين فى يوم كذا ...شهر يونيه....وقولتله ااه...وانا قاعد معاه سرحت ياااه ده عدى سنة ...وانا مش واخد بالى ...يمكن عشان مش حطيت الحكايات دى فى راسى خالص ومش مركز ...او يمكن عشان الهدف بتاع الكتابة اختلف من وقت للتانى ...ربما

بدايدخولى التدوين كانت بالصدفه ...ان فيه مدونتين وقعت فيهم بالصدفه ...كانت مدونة مكسوفة...ومدونة المزة المصرية ...اهو الواحد كان بيتسلى...ومدونة المزة المصرية مش شدتنى خاالص ...بس اللى بقيت اتابعها لغاية دلوقتى هى مدونة مكسوفة ...اينعم اغلب بوستتاتها جريئة...والمعنى مش زى اسمها ...بس بحس انها بتمس حاجه الواحد بيشوفها كل يوم...فقررت انى اعمل مدونة واكتب اى كلام ...وفعلا كان الكلام...

بعد كده قعدت مستنى زى اى حد بيعمل مدونة ان حد يعبره بس اكتشفت انى لازم اروح واتمشى واسأل عند الناس عشان يعرفونى ....وابتديت اتمشى...وكان فيه ناس كتير عجبونى فى الاول ...وحبيت الكلام معاهم جدا...واغلبهم مشى ومش بقى يدون تانى L ...رغم انى شايف ان التدوين بقى فى دمى ...ان مدونتش يوم او مقرتش يوم اى مدونة من اللى بحبهم ...بحس ان فيه حاجه غلط ...بحس ان حاجه نقصانى ...

المدونة ابتدت يوم بعد يوم تكبر ...واكتسب صداقات جديدة ...لغاية لما جه شهر مارس وده كان نقطة تحول كبيرة...انى عرفت ناس اكتر لما روحت لقاء المدونيين...بجد عرفت ناس جامده جدا وافكار عالية اوى..يومها وقفت عشان اتكلم...وجه الدور عليا...مكنتش عارف هقوم ااقول ايه ومش محضر كلام....او ايه اللى خلانى ااقف واتكلم معاهم ...بس حسيت انى بقيت حتة منهم خلاص...ومش ينفع اافضل قاعد فى مكانى ...حسيت انى لازم ااقوم واقول حتى لو قولت ازيكم واقعد تانى بس ااقوم واقول...قمت واتكلمت وكان كلام كبير جدا ...اغلبه مش فاكره بس اللى افتكره انى وانا بكلم كان فيه انصات غير عادى...وخلصت كلام لقيتهم بيسقفوا وباهتمام كمان...خلانى احس انى قلت حاجه مهمة ...والنبى يا جدعان اللى كان موجود يومها يقولى :p

100 بوست...وسنة و3 اشهر تدوين ....مممممممم....وصلت لايه ؟؟؟....وصلت لحاجات كتير ...وصلت انى احتكيت بعقول تانية اول مرة ااشوفها...عرفت ان الانسان مش بكلامه بس...وعرفت ان زى مافيه الحلو...فيه الاوحش منه واكتر من الوحش...عرفت ازاى ارفع فيديو عالبلووج يا جدعااااااااااااااااااااااااان :D

عرفت ازاى ااخاف على طرطشتى ....عرفت ازاى انى مش افكر يوم ااقفلها وامشى وكأنى ماعملت حاجه ولا علقت ناس بيا...عرفت انها بقت مسئولية ...مش ااقدر اتخلى عنها...عرفت ان المدمن لما بيبتدى ادمان ويوصل لدرجة ان التدوين بقى الهوا بتاعه ...وميقدرش يبطله عشان لو وقف هيموت....

عرفت حاجات كتير ...واتعلمت من ناس كتير ...بس اللى بحاول ااعلمه لكل مدون ااشوفه بيقفل الدكان وبينسحب ...احاول اعلمه انه مبقاش لوحده ...ودى مش مدونته لوحده اينعمهوا اللى بيكتب بس يراعى الناس اللى بتقراله وتتابعه يوميا وتستنى بلهفة البوست الجديد بتاعه ....ااعرفه ان محدش بينسحب من اى اسرة بكل سهولة ...وللاسف بيفتكر انه كسب...بس فى رايى انه خسر كتير ....خسر ناس كانت معاه ...حتى لو فضل يتابعهم من بعيد ...

شكلى طولت اوى فى البوست ده ....بس فى النهاية...كنت بحاول اوصل فكرة ...اتكونت عندى على مر سنة وحبة كمان ...وللطرطشة بقية..:) ...حمد الله عالسلامة يا راسبوتين

Thursday, September 20, 2007

Search in da wrong way

عندما تحتاج شيئا ما فانك تذهب للبحث عنه

ولكن عندما تكتشف انك تبحث عن الشىء الخطأ

وربما فى المكان الخطأ

وربما ايضا بطريقة خطأ جدا

لذا فلم ابحث عنه اصلا

هوا ده اللى توصلت اليه بعد سلسلة من البحث الفاشل المتواصل يا جماعه

مش هدووووووووووووووووووووووووووووووووور عليه

ومش عاوزه ...:)

انا كده احسن فعلا

لغاية لما نصلح الخطأ التانى

ونبقى نبص على باقى الحاجه

البوست الجاى ان شاء الله مفاجئة

مش هقول ليه هوا مفاجأة

اخليكم تخمنوا السبب :D

Monday, September 17, 2007

نشرة اخبار الطرطشة

جوود مورننج عليكم جميعا

وعلى القاطنين خارج الطرطشة مراعاة فروق التوقيت

معكم عمو السفاح من داخل مبنى الاذاعه السفاحية

ونبث اليكم هذه النشرة الاخبارية

طبعا رمضان كرييييييييييم

وبلا يا جماعه تعملوا معارك ضارية فى الفطار عشان وانتوا نازلين تصلوا تبقوا

وفى السحور بقى نفس النظام

وبلاش نعمل نفسنا ناسييين ونشرب ميه :D

بس ان شاء الله صوما مقبولا وافطار شهيا ...

تانى خبر النهاردة فى الاذاعه

اذاعة حريتنا

دى اذاعه جامده جدا

وبرامجها مميزة

وطبعا فاكرين لما استضافونى ...وعز باشا

فى برنامج مدونة عالهواء

الحلقة العاشرة

المهم

فيه برنامج جاااامد جدا بيتذاع الصبح اسمه

صباحك حرية

التيم كله بتاع حريتنا بيشترك فيه لازم تسمعووه

ومش تنسوا

عالسحور


برنامج جامد مع محمد عز الدين واحمد سعيد

كل يوم خلال شهر رمضان

من الساعه 1 الصبح لغاية الساعه 2.30

يا جماعه بجد مش تفوتوا البرنامج

وكلموهم على 27950706

وقولوا كل طلباتكم

مممممممممممممممممممم

تالت خبر

هوا لو حد عاوز يعمل خير

محتاجينكم لو فاضيين

فى بنك الطعام

جمب اوليمبك جرووب فى مدينة نصر ورا نادى السكة الحديد

بنعبى شنط رمضاان ...

لو انت فاضى الصبح او بالليل

عدى علينا وتعال ساعد

الشغل كبييييييييييييييييييير اوى

والناس قليله ..:(

اى وقت تنوروونا

تعبوا معانا الشنط بتاعت رمضان

ثواب اهوة :D

ممممممممممممم

بس كده...ده مؤؤقتا عشان مش اطول عليكوا

يلا

بسا

وتذكروا

قناة السفاح

مش هتقدر تنام لوحدك :D


Thursday, September 13, 2007

رمضااان كرييييييييييييم


كل سنة وانتم طيبين بمناسبة حلول شهر رمضان المبارك عاوزين نستغله بأحسن شكل ممكن ان شاء الله :) ااه والنت رجع لى تانى :D
تحدييث:

فيه واحد شغال معايا فى نموذج طلابى فى كلية سياسة واقتصاد

قالى اخر مرة ان فيه واحده بتسلم عليا
بس الكلام اخدنا وتهنا ومعرفتش اعرف منه مين الواحده دى

فمن مكانى هنا ...بوجه سلامى للشخصية المجهولة واقولها كل سنة وهى طيبة

وبوجه سلامى لكل اصدقاء الطرطشة
سواء بيكتبوا كومنت

او بيكتفوا بالقراية

او حاطين اللنك بس فى مدوناتهم

كل رمضان وانتم طيبييييييييييين

:)

Tuesday, September 11, 2007

يا دبلة الخطووووبة عقبالنا كلنا

يا اهالى المدونات الكراااااااااااااااااااااااااااااااااااااااام

نزف اليكم هذا الخبر الهااااااااااااااااااااام

تمت اليوم الاثنين الموافق 10 سبتمبر لعام 2007

خطبة المدونيين

Barbe girl & The Rock

صاحبى المدونة المتميزة

اوقــــات فـــراغ

يلا بقى هنوووووووووووووووووووووووووهم بقى

عايز اسمع الزغاريط من مدينة نصر بكرة

لولولىلللللللللللللللللىىىىىىىىىىىىىىىىىىىىىىىىىىى


Monday, September 10, 2007

وفات اسبوع ونص

طب كفاية فرح واقلبها كئابة

الاول بوجه شكر كبيييييييييييييييييييير

للمدونة كاتروز...والمدون عمرو فكرى عاللى كتبوه عندهم فى المدونات بجد

وبشكر كل واحد عزانى ودعا لجدى رحمه الله ...ورفعوا حبتين من روحى المعنوية...

ايه بقى ...ااه عدى اسبوع ونص

انا فاكر كويس اكنه اتوفى امبارح...

بكل التفاصيل الصغيرة والكبيرة ...

اليوم اللى اتوفى فيه...والدتى صحتنى الصبح الساعه 9.30 كده...كنت نازل هعمل مشاوير لبابا بعدها اطلع الجامعه كان عندى تدريب

حتى اختى الكبيرة هى اللى كانت هتحاضر يومها

بس ولقيت ماما بطريقة هادية تقولى جدك توفاه الله الساعه 8 الصبح

انا طبعا اتنرفزت انها سيبانى نايم وعارفه...واضايقت جدا

كتبت الخبر عالبلوج ...واخدت كوباية الشاى ونزلت روحت لوالدى المستشفى

لقيتهم بيغسلوا جدى

بعدها دخلت انا وعمى ووالدى واتنين تانيين مش فاكر مين

شلناه وهوا ملفوف فى الكفن وحطيناه فى اللحد وشلنا اللحد وحطيناه فى العربية

لغاية الحتة دى وانا حاسس انى بحلم وده كابوس هفوق منه اول ما اصحى من النووم...بس تقريبا كان واقع

شايف عمى بيعيط جاامد...عشان هوا الصغير...وبابا ساكت بس حاسس انه من جواه زعلان جدا ...

رحنا المهم جامع الكواكبى اللى فى الدقى عشان نصلى عليه بعد صلاة الضهر...

طبعا كانت الساعه لسه 11 يعنى هنستنى ساعتين تقريبا

فى الساعتين دوول سبحان الله ختمت المصحف وانا قاعد جمب اللحد ...مش عارف ختمته ازاى لغاية دلوقتى فى الوقت ده

صلينا عليه....ابتدينا نتحرك عشان نروح المدافن وكده عشان ندفنه

اخته كانت بتعيط جدااااااااااااااااااااااااااا

ابن عمى مستحملش منظرها وساب دموعه

لغاية دلوقتى ولا دمعه نزلت من عينى ...عشان لسه مستغرب الحكاية

واحنا فى الطريق للمدافن كان معايا ابن عمى وبنت عمى وخطيبها

هى حبة تعيط...وحبة نفتكر حاجات جدو كان بيعملها معانا ...ولما كنا بنروحله البلد...

ونضحك...ونرجع نسكت...وتعيط تانى

وصلنا المدافن...والدى واخواته وناس تانيه شالوا جدى من اللحد ونزلوا تحت ...

معجبتنيش الوقفه برا انا وابن عمى

رحنا قلعنا الكوتشيات ونزلنا تحت معاهم...

حوار تانى خاااالص تحت يا جماعه...شفته وهوا بيدفن...ووالدى قاعد يقرا ادعية ...وانا واقف لا اراديا بردد الشهادتين

طلعنا من تحت...التربجى قفل البتاعه خلاص وبيحط الرمل

الشيخ جه وابتدى يدعى واحنا وراه نأمن

فى اللحظة دى بس حسيت انى فقدت حد غالى عليا

فى اللحظة دى بس عينيا ابتدت تفتكر ان من وظيفتها انها تعيط

فى اللحظة دى بس مقدرتش اابقى قوى عالطوول

دموعى موقفتش خاالص ...مقدرتش ااقف

وكنا فى عز الشمس

ومن جوايا بدعى ادعية فوق الادعية بتاعت الشيخ

الناس كلها بتعيط...حتىواحد صاحبى كان معايا ...عييط...الموقف محدش ومعتقدش حد ممكن يستحمله

خلصنا ...وجه وقت اننا نروح...مش مصدق برضه انه مات

ببص فى الساعه كانت 4.30 العصر

يااااااااااااااااه...الوقت جرى جدا جدا

مش حسيت بيه

عايز ااقولكم انى ابتديت ااحس باللى كنت مفروض احسه يومها

بس بعدها بيومين تلاته

ابتديت ازعل..

ابتديت انى اعيط

ابتديت احس انه وحشنى

هوا فى المستشفى من فترة طويلة

بس كنت كل يوم هناك مع بابا وعمى بنزوره

ماعدا اخر اسبوع انشغلت جدا ومعرفتش اروحله وكنت هروحله يوم ما اتوفى

حتى انا الصبح او الفجر مكنش جايلى نووم لاغم التعب على غير العاده وقلبى مقبووض جدا

رحمك الله يا جدو

يوم الجمعه اللى فات ده ...رحنا كلنا انا وبابا واخواته هناك نزوره

واخدنا معانا زرع نزرعه هناك

طريقة الزرع اللى بابا واخواته بيحطوها والمعاملة ولا اكنهم بيزينوا بيت ليهم

وقفت فوق وقريت الفاتحه وسورة يس كذا مرة

وطبعا الريحة بتاعت تحلل الجثمان كانت موجودة

بينى وبينكم لما شميتها خفت اكتر ....

دموعى نزلت جاامد قوى وانا واقف على اول السلم اللى مردوم بالرمل

وقاعد اقرا سورة يس


وصلت لدرجة لسانى وقف ومش قادر انطق حرف واحد...كملت بعينى قرايه

انا عارف انى طولت عليكم....بس بقالى فترة شايل كلام كتير جوايا ونفسى اطرطشه حبة

استفدت كتيير ولسه بستفيد من اللى بيحصل

بس خسرت حاجه غالية اوى فى حياتى

كنت فاكر نفسى بعيد عنه

بس طلع انى كنت قريب اوىىى

:)

Sunday, September 09, 2007

الصحبجية ...تالت ورابع


فالكرينها ولا نسيتوها

معتقدش ان حد ينساها

عاوز نبقى مع محمد وفرقته اليوم ده ان شاء الله

خلونا نعملها تجمع بلوجرى كبيييييير

على انغام فرقة الصحبجية

يوم الاتنين بقى

الساعه 8 بالليل

محدش ينسىىىىىىىىىىىىىىىىىىىىىىىىىىىىىىىىىىىى

ادى لنك كمان افعصوا عليه هتوصلوا لمدونة محم بسهولة وتعرفوا تفاصيل اكتر

http://m-rashed.blogspot.com/2007/09/blog-post.html

وادعولى النت لسه مش رجع ...:(


Thursday, September 06, 2007

وجاتلى فى الحلم

هوا حلم جميل ...معنديش غيره انى احلم بيه كل يوم...هتقولوا روتين..ممكن ...بس حلم جميل عمرى ما حسيت بالملل منه ...بشوفها كل يوم فى الحلم ده ...بس فى مكان شكل...بس سبحان الله بنفس الطريقة ...موعد غير دبر...اكون فى مكان...وفجأة الاقيها قدامى
ده اللى حصلى من فترة ...كنت فى فرح قرايبنا ولقتها هناك...طلعت من القرايب بس من بعيييييد زى المسافه ما بين القاهرة والسودان ..مش عارف بقى ايه لازمة الحلم بتاع كل يوم ده ...فى كل بنت بشوفها ...بشوف وشها الملائكى...مش قادر انساها خاالص...
بس ياترى هى عاملة ايه دلوقتى ...كويسة مطرح ماهى موجودة...ولا برضه بتفكر زى مانا بفكر...يمكن تكون بعيده جدا عنى ...فيه سور بقى بينا ....بس برضه عقلى رفض كلام قلبى ولسه بيحلم بيها..لسه بيحلم بالعقل اللى ملكه والقلب اللى قلب كيانه
هترجع تانى ....ولا هتفضلى بعيدة...هتيجى وتقولى الكلام...ولا هتفضل بعيدة...فى الغالب هتفضل بعيدة ومش هنعرف نقرب لبعض تانى...عارفين ليه؟؟
لانها مجرد حــــلــــم

Wednesday, August 29, 2007

البقاء لله

توفى الى رحمة الله اليوم فى الثامنة صباحا بالعناية المركزة

جدى..والد والدى...عن عمر يناهز ال سابعه والثمانون

برغم اننا لم نكن قريبين من بعضنا البعض

ولكن فى الفترة الاخيرة افتقدته كثيرا

خاصة فى مرحلة مرضه الاخيرة والتى تجاوزت الشهران ...:(

رحمك الله يا جدى ..:(

Monday, August 27, 2007

كونوا ابـــاء...كــى نــكون ابــــنــــاء

العنوان غريب بعض الشىء ايها السادة....ولكنها للاسف الحقيقة التى نعيشها هذه الايام....فالبعض يطلب مننا نحن الابناء ان نكون ابناء...ولكنهم ليسوا بأباء...وانا اليوم ساطلب منهم هذا

بالطبع مع كامل احترامى لكل اب وام ....لا اقصد ان اجرح شعورهم بهذه الكلمات ...ولكنه للاسف واقع ....فهم باستطاعتهم ..الخارقة ...بأن يحددوا من نصادق ومن لا نصادق ...اى كلية نلتحق ...اى مكان نذهب اليه ...وفى الاخر من يستحق التدليل ومن لا يستحق ...

ربما تكون بعضا مما ذكرت من كامل اختصاصاتهم ومن حقهم ....ولكن ليس من حقهم ان يتجاهلونا فى فترة ما ثم يعودوا الينا ويقولون ان ما نفعله خطأ...اين كنتم حينما تعلمنا هذا ...اين كنتم منشغلين ...هل بعمل ام بلهو ام بماذا ....

انا واحد من هؤلاء الاطفال الذى لم يجد وهو فى طور النمو والتعلم من يعلمه كيف يقرأ التشهد او باقى تفاصيل الصلاة الصغيرة ...او حتى كيفية التسبيح...ثم تجد اذا حدث شيئا ...يغضب ويثور ويقول هل انا علمتك هذا....

وانظر اليه ببراءة واقول له انت لم تعلمنى شيئا....فيغضب ويثور اكثر...سبحانك ربى ...

هذه الايام فعلا تجد اشياء عجيبة ...فهاهى عائلة اخرى فرحة لنجاح طفلهم الصغير او كما يقال "اخر العنقود" ولكن عندما ينجح الكبير...طيب مبروك...والصغير تجد الهدايا تنهال عليه من كل صوب وحدة....

الكبير يخطىء: انت بتستعبط ...انت مش عارف ايه ...وعقابات بالجملة اولها منع من الخروج...الصغير يخطىء...غلط كده...متعملش كده تانى ...وبخ ..

تفرقة فى المعاملة بين الابناء وهذا سىء جدا جدا ...لاسباب عديدة اولهما :

1- جعل العائلة ارض خصبة لنمو الحسد والحقد بين الاشقاء

2- تفضيل ابن على اخر يجعل الاخر خارج دائرة الضوء منبوذا وهذا يأثر على نفسيته

ايضا العديد من ابائنا لا يقتنعون بما يسمى الصحة النفسية ...فتجد اذا صرح ابن انه يريد زيارة طبيب نفسى فيتهم بانه مجنون ويحاول فضح العائلة وما الى ذلك....

مع ان البلاد الاوروبية والامريكية هناك بعضهم يشترطون قبل التقدم لاى عمل العرض على طبيب نفسى للتقييم ....وكل مواطن هناك لديه طبيبه النفسى ...والذى يذهب اليه عند حدوث اى مشكلة ما يتعرض اليها

اشياء كثيرة تجعل الانسان يريد ان يموت او يقتل ...وربما يهرب من المنزل....

ورغم ذلك....تجد الاب يعود من منزله ليلا...يجد العائلة من ابناء وامهم يبتسمون ينظرون للتلفاز ...فيبتسم ويرتشف رشفة من كوب الماء ويقول ...العيال بخيير

فهل هناك من امل ان نجدهم بجوارنا قليلا ..

هل هناك من امل ان نجدهم يساعدوننا...ام يكتفوا فقط

بنظرة الرضا...والذهاب للنوم بعد كوب الماء؟؟


Friday, August 24, 2007

اللهم تقبل توبتنا

بداية اعتذر انى مش عارف ارد عالناس عالبوستات اللى فاتت ...بس افوق وارد عشان حالتى لا تسر...
الكلام اللى فى البوست ده كتبته يوم 13 يونيو 2007 ...فحبيت احطه هنا عشان محتاجه جدا الايم دى...:)

-------------------------------------------------------------------------

جلست وانا حزين ...

اشعر وكأن كتفاى تحملان جبلا ...

وبالفعل تحملان جبلا...

ولكنه جبل من الذونب

احسست بأن الدنيا قد ضاقت بى

بحثت من حولى ...

لم اجد صديق او حتى رفيق يخفف عنى حملى ...

اخذت اصرخ اين انتم ...لما تركتمونى وحيدا ؟؟

اين الوفاء الذى تدعون ؟؟

اين الشهامة التى كنتم تصطنعون ؟

اين الاصدقاء التى كنتم تكونون؟؟

لم اجد شيئا ...ولا حتى مخلوق ...

فوجدت هاتف بداخلى يقول :

" اتبحث عن المخلوق ...ونسيت الخالق ...الذى خلق هذا المخلوق الذى انت تبحث عنه

تركت الباقى ....وجلست تبحث عن الفانى ...

تركت التواب ....وجلست تبحث عن من لم يتوب

قم الى ربك ....قم الى خالقك ....قم الى من جعل منك بشرا ونفخ فيك روحا ..."

يا ويلتى ....

كم كنت غبيا ....

تركتك يا مولاى ...وظللت ابحث عن مخلوق لكى يسرى وحدتى

قمت من فورى ...

توضأت ...ونويت ان اصلى صلاة الفجر

ووقفت بين يديه ...

اجد جسدى بأكمله يرتعش ....

واشعر بأن صدرى ينقبض ...

واحس ان عيناى ستنفجر من كثرة الدموع ...

احس بأن قدماى لا تقوى على حملى ...وحمل الذنوب التى احملها على كتفى

اشعر ببرودة شديدة ...

ااشعر بخوف شديد

قلبى منقبض ....خائف ان اقف بين يديه ...

وانا فى قمة ذنوبى وخطاياى ...

اخاف ان اانظر اليه وانا عاصى له ...

اخاف ان اطلب منه فيردنى خائبا ....

يا الله ...يا من خلقتنى ...يا من بعثتنى ...يامن جعلتنى بشرا ...يا من جعلتنى روحا

اغفر لى ذنوبى يا غافر الذنوب

اغفر لى ذنوبى يا غافر الذنوب

اغفر لى ذنوبى يا غافر الذنوب

جئتك ياربى خاضعا ذليلا ...اطلب منك العفو والرحمة يا ارحم الراحمين

جئتك اليوم خاضعا ذليلا اطلب منك العفو والرحمة يا ارحم الراحمين

لا اقوى على رفع بصرى للسماء ...

لا اقوى ان اختلس نظرة حتى للسماء

لا اقوى وانا عاصى لربى

لا اقوى وانا عاصى لربى

لا اقوى وانا عاصى لربى

البرودة تشتد....

والدموع تسيل من عيناى ...

واشعر كأن قلبى ينخلع من مكانه ...

ادعو الله ان يتوب على

يااارب ...ياااارب ...اقبل توبتى ...

يارب عبدك مهموم ...حزين ....

جاء اليك اليوم ..

جاء اليك اليوم ذليلا ..خاضعا لك...

يطلب رحمتك وعفوك ومغفرتك ....

ياااارب .....

يا حى يا قيوم برحمتك استغيث

يا حى يا قيوم برحمتك استغيث

يا حى يا قيوم برحمتك استغيث

اتذكر ذنوبى التى قمت بها ...

اتذكر لسانى وهو يكذب

اتذكر عينى وهى تنظر

اتذكر يداى وهى تفعل

اتذكر قدماى وهى تسير

وانظر الى اخرتى ...فأجد مكانى فى نار ...


ناار ليست كأى نار

فارفع يداى الى السماء ...واطلب من الله ان يعفو عنى

اللهم اعفو عنى

اللهم اعفو عنى

اللهم اعفو عنى

اللهم اعفو عنى

يتوقف لسانى عن الكلام ....

ولكن لا يتوقف قلبى عن ذكر الله

اشعر بأن قلبى يردد : اشهد ان لا اله الا الله ...واشهد ان محمد رسول الله

يتوقف لسانى عن الكلام....

ولكن الدموع من عينى لا تتوقف

يتوقف لسانى عن الكلام....

ولكن نفسى لا تتوقف عن الدعاء

يارب .....جئتك اليوم ...وانا حزين ...مهموم...عاصى ....للذنب حليف ...

اطلب ...وارجوك....ان تعفو عنى

ان تغفر لى ذنوبى

ان تتقبل توبتى

ان تدخلنى جنتك

ان تحشرنى مع احبابك يا الله

ان ترزقنى صحبة حبيبك...وحبيبى ...محمد صلى الله عليه وسلم

ان تهدينى يارب

ان تجعل القرءان ربيع قلبى

ان تجعلنى سببا فى ازدهار الاسلام

اللهم استخدمنى فى خيرك

يارب

....

افقت ...وانا ساجد....

لا ادرى لكم من الوقت ...

والمصلية من تحتى مبتلة بدموعى ...

لا اعرف لكم من الوقت ...

وقلبى بدأ يهدأ ....

واشعر بهواء جميل ...

لم اشعر بمثله قط....

هل تقبل الله توبتى ....

لا اعلم

فهو وحده العالم بكل غيب

هل سأتوقف عن مناجاته ...

كلا والف كلا

فلن اتوقف ...عن مناجاة ربى ...حتى يقبض الله روحى ...

Wednesday, August 22, 2007

يخرب بييييييييييييييييييييييييييييييييته

قولوا امين الاول....واقف ليه ساكت يابنى...قووول...

افتكرت الكلمة دى وانا فى فرح امبارح ...ولابس البدلة...بس ماردتش البس كرافته لانى كده كنت هولع فى المصانع كلها بتاعت البدل...

فالفتكرت بوست بتاع نونى لما كانت بتدعى عاللى اخترع الكعب العالى

فانا فى العنوان بدعى عاللى اخترع ام البدلة...

وكمان انا خسيت ....فبقيت اكنهم عبونى فى شوال بطاطس...

مش عاجبانى وكانت مبوظة الموود بتاعى لانى لما احب البس هدوم احب تكون حلوة وشيك وكده

طب اخترعووها ليه بقى ...مش عارف

ايه يعنى لما تنزل بنك ولا شغلك كاجوال

والله افتكرت السيد الوالد ...لما بيقولى فيه سفاح محترم ينزل بالجينز الشغل والكوتشى

فيها ايه يعنى ...عالم غريبة يا جدع

طويب ايه بقى ....

دعينا عالراجل واتخرب بيته خلاص

عندى حالة كونفيووووسد :D

بصوا هرجع بالليل واقرر هكتب ايه

بس ادعوا بذمة كل ما تدخلوا عليه ان ربنا ياخده

ده لو كان لسه عايش يعنى :D

قال بدلة قال


Sunday, August 19, 2007

الفصل الثالث: عبور المجهول

وبعدما انزاح الحائط...

ودخل الاصدقاء الثلاثة فى هذه الفجوة الجديدة....شعروا برعشة تسرى فى اجسادهم ....وفجأة...لطمتهم رياح شديدة البرودة على وجوههم...مما افقدهم توازنهم ...وسقطوا مغشيا عليهم

ومر فترة من الوقت ...كانوا هم فى غيبوبتهم...وعندما استفاقوا....احسوا فقط بموضع تلك اللطمة الغريبة...وتعجبوا مما حدث ...ولكن اين العجب فى الامر ...ومنذ باية الحادث وهم فى عجب مستمر ...

وذهبوا ليستكملوا طريقهم ...وهم يتحسسون الطريق نظرا للظلمة التى فيها ...واخيرا وجدوا شعاعا خفيفا من نور الشمس ...ذهبوا اليه ...وابراهيم يحث احمد وعلى لكى يحفروا كى يتخلصوا من تلك الظلمة ....ولكن ربما كانوا يتمنون بداخلهم الا يفعلوا هذا

لانه بمجرد انتهائهم ...وجودا نفسهم فى مكان مختلف كليا عن زمنهم ...او بالصح عادوا 100 سنة للخلف ...ووجدوا مصر القديمة فعلا ...كما درسوها فى كتبهم فى المدارس وهم اطفال ...

على: فليقرصنى احدكم او ليلطمنى على وجهى كى اتأكد اننى لا احلم
ابراهيم: ياليتنى نمت فى فراشى الدافىء والوثير بدلا من هذا الكابوس العجيب
احمد: تبا...يبدو اننا قد عدنا للوراء ايها الاصدقاء

هكذا عبر الثلاثة عن تأثير تلك المفاجأة عليهم ....وقرروا ان يمضوا فى الطريق وليروا مالذى يخبئه القدر لهم...نظرا لان نسبة العودة للخلف ضئيلة ان لم تكن معدومة

ساروا فى الطريق ...والناس تنظر اليهم بخوف ملىء باستغراب من هيئتهم وملابسهم ....والبعض دفعه فضوله الى ان يقترب منهم ويحاول سؤالهم من يكونوا ومن اين اتوا بتلك الملابس البهلوانية

حتى قرر احمد ان يقطع فترة الصمت تلك ...ويسأل احد الباعه : اين نحن الان وفى اى عام
فتعجب منه الرجل ...ولكنه خاف من مظهرهم فأجابهم كيلا يفعلوا شيئا به ...فقال له نحن فى مصر ونحن فى العصر العباسى

وكانت الصدمة!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ذهبوا سنوات عديدة للخلف ...حتى وصلوا لعصر كانت مصر فيه مازالت مملوكة للدولة العباسية

مازال الاصدقاء فى دهشتهم وصدمتهم ....ولم يقطع تلك الصدمة الا رجل على حصان مر بجوارهم سريعا ...واختطف ابراهيم من مكانه واختفى ....

ابراهيييييييييييييييييييييييم.......

-----------------------

بخ كده بقى عشان مش عارف اكتب تانى ...او مش فى الموود ...

الدور عالشنكوتى الكبير ...يلا يا باشا ورينا الهمة

الفصل الاول من القصه

الفصل الثانى من القصة


Tuesday, August 14, 2007

المتحف المصرى....مطلعش مصرى يا جدعاااان







الصوووور يا جماعه بتاعت المتحف...طبعا من برا...وحاططلها لنك تحتتتتت
الاول بصبح وبمسى عليكو...واجدعها سلام للست ام فتحى عشان بنتها اتطلقت امبارح لولولوللىىىىىىىىىىىىىىىىى

ااه ...وانا نجحت الحمد الله ...ميهمش سنة كام ولا ايه...بس المهم عمو السفاح نجح وعايز ادخل بعد كده الاقى الدم مطرطش فى كل مكان احتفالا بتلك المناسبة التعيسة...نيهاااااااااااااااااع
المهم فى يوم لظيظ كده ....انا وعمو The Rock احمد الكاتبين فى المدونة اللى عملتلها احتفال تحت دى

رحنا المتحف المصرى...طبعا هى الخروجة مش مترتبلها والا كان فيه تصرف تانى ...بس نقول جت بظروفها ...وبينى وبينكم اول مرة ليا ادخل المتحف فى حياااااتى :$....رغم المرات اللى بلغت ملايين ...واللى هى عدد المرات اللى بعدى جمبه...

ماعلينا يعنى ...رحنا زى القمامير ...بس طبعا احنا مصريين والمصرى لازم يبقى خفيف الدم بطبعه ...فمن اول بتاع الامن الظريف اللى عالباب ....لازم يستخف دمه حبتين ويحسسك انك داخل الجنه مش داخل امه متحف يعنى ولا كان ابوه اشتراه بفلوسه...ماعلينا برضه

فى التفتيش احلى حاجه الراجل بيقول لروك طلع كل حاجه وبنحطها فى الجهاز ابو ستاير ده...الواد بكل تلقائية طلعله كل حاجه من ضمنها الام بى ثرى والمناديل ...هى هى هى

دخلنا بقى عمو المتحف .....يا سيدى احساس تحفه بجد ...الواحد قدامه حاجات بتاعت اجداده ومهارات رووووعه بجد....الاول جتلنا انسه ظريفه قمورة تقولنا ان فيه خدمة مجانية عشان تبقى المرشدة بتاعتنا بس كان معايا واحد المتحف ده بيته التانى ...ههههههههههههههههه...فاعتذرنالها..

بس ابتدينا نتمشى تحت ...اعذرنى يا سمسم مش فاكر احنا لفينا فين ورحنا ايه ...السن بقى ...كح كح كح....بس هكتب عن الحاجات اللى شدت انتباهى اكترها

طبعا العنوان ناس هتسألنى ايوة مش بتاعنا...ده بتاع الاجانب...من الرحرحة بتاعتهم فيها وبيتهيقلى لو واحده مصرية نامت على رجل جوزها جوا فى استراحه هيلبسوهم كلبشات...ما علينا يعنى ....كفاية الهدوووووم يا جدعان...طب بلاش دى

فيه تماثيل وسام ورهالى اغلبها او شكلها مش الطابع الفرعونى خالص ...تقريبا الاشورية او شيئا من هذا القبيل...

وبرضه كمية الدقه الفظيييييييييييييييييييييييييييعه بتاعت النحاتين بيهتموا او اهتموا بأدق التفاصيل فعلا ...بطريقة غبية...سبحان الله عليهم يعنى والذمة اللى انقرضت من عندنا

عمو توت عنخ امون ...الباشا بتاعهم...بجد انا اتوهمت بكمية الصناديق والبلاوى بتاعته ...اييييييييييييييييييييييه كل ده ....انا بيتهيقلى لو كنا بعناهم كنا اكلنا الشعب واللى حوالينا 100 سنة قدام

المومياوات ...اغلبها كلها الملووك يعنى ...مناخيرهم معقوفة زى بتاعت اليهود...مش عارف بقى الله اعلم الفراعنه اصلهم ايه ...

التوابيييييييييييييت ولاد الذين كانوا بيشلوها ازاى...البتاع ضخم جدااااااااااااااااااااااااااااااااااااااااااااااا...مش عارف بقى

فرعون موسى ...كما يقال او رمسيس التانى حكم مصر 67 سنة...ولا تعليق ...باقى العيلة كانت ماشيه زييه برضه ...بالسنيين...الظاهر ان الغرا هوا هوا ...

مافيش سلة قمامة او زبالة جوا المتحف الا نادرا...مش عارف هنرمى الزبالة فين ....دى جنينة الحيوانات الباساكت بتاعت الزبالة اكتر....

العساكر بيفطروا جوا عالارض او على جمب والسياح بيتصوروا معاهم ....

اغلب المرشدين الكلام حافظينه والناس بتمل منهم جدااااااااااااااااااااااااااااااااااااا

العرب فاكرين اننا بننصب عليهم....خليجين سألونا دخلنا او قطعنا تذكرة المومياوات بكام...فقولنا هى بـ10 جنييه...بس احنا دفعنا 5 جند عشان طلبة....فكملوا المسيرة يا سواقيين التاكسيات وباقى الناس اللى بتخليهم يشكوا فينا

اخر حاجه...اكتشفت ان الذوق فى المصريين هناك معدووم ...خصوصا اللى برا المتحف ...تلاقى اجانب بيتصوروا او مصريين تلاقى لا مبالاة ويعدوا فى نص الصورة ولا اكن فيه ناس بتتصور....والله ست اجنبيه عادت الصورة 3 مرات عشان الحركة دى...اخر مرة لما عيلة بأكملها عدت نفضت واتخنقنت ومشيت ....

حصلنا نفس الموقف الظريف بصور وسام لقيت واحد خفيف الظل بيعدى ...يابن الـغتت

بينما الاجانب بيحترموا شوية الناس يعنى ...:)

بس كان يوم جااامد جدا ...ومعايا واحد زى العسل ربنا يخليه ليا ومش يحرمه منى او منه والعكس صحييح :p

وتكرر ان شاء الله ...:)

------------------------------------

تحدييث مهم : البوست ده عقبال ما افكر ازاى هكمل اللعبة بتاعت كده سبونسر وكويين

تحدييث تانى

الصور تقيلة مووز...فبعد اذنكم اللى عايز يشوفها يفعص عاللنك ده ...وهيلاقيها فى نص الصور....اللى هى بتاعت المتحف...بعتذر مجددا
الصور تالت صفحه عاللنك ده
http://www.facebook.com/album.php?aid=20498&l=50815&id=701720380