Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Monday, November 28, 2011

Trust

I don't Trust You any More !

Sunday, November 27, 2011

الجو العام لا يدعو للتفاؤل اطلاقا 

انتخابات الناس متوقعة انها هتتزور

نالس بتموت كل يوم

لو مش من البرد يبقى خناقة ولا فى التحرير 

طب الناس اللى بتكنز فلوس ولا طمعانة فى حكم ولا سلطة 

هيعملوا ايه لا ينزلوا تحت وفى كفن 

هيقولوا ايه لربنا 

هتنفعهم يوم الحساب طيب ؟؟؟

ربنا يرحمنا برحمته

ويفك كربنا 

يارب

Saturday, November 26, 2011

رأس السنة الهجرية

كل عام وانتم بخير جميعا 

بمناسبة العام الهجرى الجديد 

1433 

يارب تكون سنة حلوة  علينا

ونقرب لربنا اكتر واكتر 


Thursday, November 24, 2011

ست فلول

من كام يوم نازل الجامعة وراكب الميكروباص بتاع التحرير اخدته من فيصل عندنا 

والعربية اتملت وطلعت وست كبيرة كده بتاع 50 سنة فى الكنبة ورا السواق مرة واحدة فتحت الموضوع والتحرير ومش عارف ايه 

فعادى كل يوم الناس بتتناقش مبركزش ...لحد ما راحت عكت وقالت الثورة دى ربنا اللى عملها اما الشباب دول ولاد كلب ولا يفهموا فى حاجه ...هنا بقى عدد 5 شباب انا منهم دمنا اتحرق واتعدلنا فى قعدتنا ونكلمها 

ودى شغالة مبررات واهية 

المهم واحد بن حلال ورايا دخل فى الموضوع واتكلم معاها وعمال يهاتى ويزعق ودخلنا فى شفيق وعمرو موسى والاخوان وغيره 

هى لقت نفسها بتتزنق رجعت تشتم فينا تانى وبصتلى تقولى انتوا مبتفهموش وعملا وخونة ومخربين ...قولتلها ليه يعنى قالت عشان ثورة ايه وزفت ايه اللى بتعملوه وتقولك فى طلعت حرب طلعوا عليها فى بيتها بسنج ومطاوى وكانوا هيغتصبوها...قولتلها فين فى طلعت حرب تقولى الميدان ااقولها ايوة فين يعنى عمارتك تقولى الميدان اقولها ايوة عند الشرو ولا مدبولى ولا جمب البنك تسكت وتتوه الموضوع 

ما علينا 

لحد ما فى الاخر راحت مزعقالى وتقولى انت بتتكلم ليه انت ايه اللى حشرك فى الموضوع 

رحت مزعق واتحرق دمى الصراحة من الصبح فالقانا وتقولك القانون ومش القانون 

قولتلها القانون اللى فلقتينا بيه من الصبح بيدينى حرية فى اى مكان عام 

انتى لو قاعدة فى بيتك وانا جيت دخلت فى نقاش وقتها من حقك تزعقى كده ...لكن انتى فى مكان عام ومش من حقك او من حق اى حد مهما كان ايه فى ام دى بلد يصادر حقنا اننا نتكلم او نعبر عن رأينا ...قالتلى اتلهى ...قولتلها بتتزنقوا وتجيبوا ورا وتغيروا الموضوع 

بعدين قولتلها يا حجه انا شايف انك بسم الله ما شاء الله عقلك يوزن بلد وبتحبيها عشان كده انا شايف انك ترشحى نفسك رئيس البلد وانا هديكى صوتك ...راحت مشرشحالى ولا اكنى شتمتها ...الناس ضحكت اصلا ...هى مضايقة وتقول لو كنت رئيسة هعمل واسوى وقولتلها خلاص رشحى نفسك وهنصوتلك راحت مش عاجبها وتقولى وانا مستنياكى عشان تدينى صوتك...قولتلها ليكى الشرف والله انى هتفضل وانزل من بيتى واصوتلك عشان اكيد عارفه مصلحتنا اكتر مننا 

وسيبتها ونزلت 

المهم افتكرت انى ركبت معاها شهر 4 وكانت بتشتم فى الثورة لوحدها بس وقتها ولد وبنتين هما اللى تولوا النقاش معاها وفى الاخر شتمتهم ونزلت برضوا :D 

اييييه زمن 


Monday, November 21, 2011

الطرطشة مضربة

اعلن انا السفاح دخولى فى اضراب مفتوح 

واحتجابى عن التدوين

اعتراضا على المعاملة اللانسانية من قوات الامن 

تجاه شعب مصر 


Sunday, November 20, 2011

ليه؟؟؟

طب طالما الناس اللى بتدخل فى حياتنا 

بتكون عندهم النية انهم يمشوا 

ليه بقى بيدخلوا وبيعلقونا بيهم 

ويقولك متزعلش لو انا مشيت 

!!!

Saturday, November 19, 2011

Friday, November 18, 2011

about love !


Love doesn't need to be equal or be fair, it only needs to be REAL !!

Thursday, November 17, 2011

الخميس السرى 37




الاسبوع ده هيكون مميز طبعا 

عشان الخميس ده جى فى حملة التدوين اليومى اللى انا اشتركت فيها 

عموما الناس الجديدة الفكرة كالتالى 

يوم مخصص للاسرار 

كل واحد عنده سر او يحب يفضفض هنا يجى ويكتبه فى الكومنتس 

بالاكونت بتاع بلوجر او يحب يكون مجهول 

زى ما يحب 

لو حد حب ينقل الفكرة يقول بس عشان نبقى نيجى نشاركه الاسرار :)

لو عاوزين تشوفوا ال36 بوست اللى قبل دول دوسوا عالهاش تاج اللى تحت البوست 

happy weekend every one 
=)

Wednesday, November 16, 2011

Winter Whisper




نفسى اعمل زيها كده 

بس يكون الجو برد...انا بعشق حاجه اسمها شتا 

بستناه بفارغ الصبر

بعشق الهواء المتلج اوى ده...شعور انك ماشى ايدك فى جيب بنطلونك ولا الجاكيت والهوا بيخبط فى وشك وتحس بمناخيرك بتتجمد من السقعة ...وتبقى ماشى فرحان اوى بالشعور ده 

زى اما تاكل ايس كريم بسرعة اوى تحس مخك بيتجمد وقشعريرة فى جسمك حلوة كده

ويا سلام لو بتتمشى على شط اسكندرية وهوا اسكندرية فى الشتا متعة احلى من القاهرة بكتير 

تحس انك نخلة والهوا بيزقك يمين وشمال ...هوا متلج اكتر بردوا

وياسلام بقى لو الدنيا مطرت وتمشى تحت المطر وتبقى مبلول من اولك لاخرك كده 

جربوا مرة كده الدنيا تمطر جامد انزل اقف فى الشارع وافتح دراعك اكنك بتحضن السما وبص لفوق وهتلاقى نفسك بتضحك

يا من عبطك يا هتضحك لما تحس باحساس جديد غير احساس انك هتلبس برد السنين :D

الاحساس ده جربه وانت بتنط فى البسين او البحر ...بس بلاش  ارتفاعات عشان الكرباج وكده ^^

جرب تسيب نفسك للهوا يزقك شوية 

احساس انك طاير مش بمزاجك ده بيخليك تسترخى اكتر 

بالظبط زى الصورة دى

مسترخية على وش الميه 

مفيش حاجه على بالها
وممكن تكون بتفكر فى حد او اتنين

بس الاهم هتكون مبسوطة اوى 

مبسوطة عشان حد من اللى على بالها بيخليها تضحك عالطوول 

بيخليها تنسى الدنيا ولو لثوانى
بينقلها لعالم تانى عالاقل 

ودى ميزة الشتا عندى

مليان ذكريات حلوة ووحشة 

بس الحلوة بتفضل عالبال عالطوول 

بفتقد الانسان اللى كان ذكرياتى معاه 

بس الابتسامة على قد ما بقدر ااخليها تدوم 

المهم بردوا نرجع لمرجوعنا 

الشتا كنت عاوز ااقوله

حمد الله بسا يا برنجى 

=D 





Tuesday, November 15, 2011

:(

تليفون المنزل بعافية هوا والنت 

من كام يوم كنت بتبطر عالنعمة

طارت النعمة يا ولداه 

محدثكم من الهاتف الجوال

سفاح 

:(

Monday, November 14, 2011







You are responsible for your own happiness. If you expect others to make you happy, you’ll always end up disappointed =)

Sunday, November 13, 2011

وجع السنان





ونظرا لأنى دايما ذكرياتى سيئة مع اطباء الاسنان 

وقلما لما برجع من عند واحد ومشتموش هنا او ادعى عليه

اقر انا سفاح كرموز ...[ان دكتور النهاردة ليس له اى ذنب فيما اقترفه زملاء مهنته من اساءة اليها 

والراجل يشكر موجعنيش بتاتا :D 

ودى حاجه تخلينى اتشجع واروحله تانى

وشكرا :D 


Saturday, November 12, 2011

سحقا للانترنت



التكنولوجيا رغم فوايدها الكتيرة ومنقدرش ننكرها 

بس هى بوظت حياتنا الاجتماعية 

 زمان قبل الفيس كان اخرنا الاى سى كيو وكانت اللى بتعبرنى وقتها ليندا ودى اشهر سبام ليه وقتها 

بعدين الياهو والالعاب بتاعته

بس كنت ااقابل اصحابى وننزل ونروح ونيجى 

الفيس انا دخلته فى 2008 

كل مدى الحياة بتتقلص وتنحصر عليه

يعنى لو مستنى حد تحت بيته اسهل حاجه تبعتله على الوول ...ولو مش قاعد البلاك بيرى هيدى رنة معينة تقوله حد كتب حاجه عنده 

عيد الميلاد عليه ...الوفاة حتى الناس بتعزى اونلاين بدل ما تتصل او تروح 

تحجز المطاعم السينما وكمان الجيم تجدد اشتراكك من عليه

وتلعب وتجرى وتنطط زى ما بيقولوا 

وفيه ناس بتتجوز من مسافات بعيدة بسببه !!


حتى بقينا بنكسل نكمل الحروف 

Okay =ok=k 

Happy birthday = HBD 

be right back = brb

take your time = tyt 

والى اخره 

مش عارف ايه الحل ...بس عامة دى ضريبة التقدم التكنولوجى

لان زى ما ليه مميزات عيوبه موجودة

بس المهم نعرف نستغل المميزات صح ازاى

فى حاجه تفيدنا مش تضرنا 

:)

Friday, November 11, 2011

Your Future




Don’t sit around and try to change your past, when you have your entire future to look forward to !

Thursday, November 10, 2011

الخميس السرى 36






زى كل خميس ميعادنا مع الخميس السرى 

تعال شاركنا سر من اسراك او فضفض هنا

بالاكاونت بتاعك او ممكن تحب تكون مجهول 

لو عاوز تنقل الفكرة اوك براحتك بس قول عشان نيجى عندك بردوا

يارب تكون اجازة سعيدة عليكم جميعا 
=)

Wednesday, November 09, 2011

حملة التدوين لشهر نوفمبر 11-11-2011


دعوة انك تدون لمدة شهر 

وهنبتدى من يوم مميز جدا ان شاء الله 

وياحبذا لو لحقت الساعه 

11:11 

:D 

any way 

اللى عاوز يشارك معانا يدوس على اسم البوست هنا هيوصله على طوووول على الايفنت :) 


Sunday, November 06, 2011


Cup of Tea 

Your Best Friends 

& The Nile 

;)

Saturday, November 05, 2011

Friday, November 04, 2011

كل عام وأنتم بخير


كل سنة وانتم طيبين جميعا 

عيد أضحى سعيد 

=)

اسف حبيبتى !

Thursday, November 03, 2011

الخميس السرى 35



الميعاد الاسبوعى بتاعنى 

ويكيليكس البلوجرز  :D 

الموضوع ببساطة زى فضفضة او تقول سر عندك

قوله بالاكاونت بتاعك او ممكن تكون مجهول 

مفيش رقابة عالكومنتات براحتك 

عاوز تنقل الفكرة براحتك بردوا بس قولنا عشان نيجى نزورك بردوا 

يارب تكون نهاية اسبوع حلوة عليكم 

:)

Wednesday, November 02, 2011

جمعة الشوان






أحمد محمد الهوان 

1937 -2011 

رحمك الله يا بطل 

Tuesday, November 01, 2011

حقائق واشياء اخرى

اللى يقولك انا صاحبك وحبيبك ...حطه فى بند المتسلقين لانه فى الغالب عاوز مصلحة منك 

صاحبك وحبيبك عامة مش هيقولهالك...وممكن كمان ما تلاحظهوش الا كل فين وفين ...عشان اللى عاوز مصلحتك مش هيستنى منك تيجى تشكره ولا تعزمه على كوباية شاى عالقهوة فى يوم 

**********



لو عاوز تخلى حد يفضل موجود فى حياتك وميمشيش الا لما يموت بعد الشر  ، خليه يمضى ويبصم ومش بعيد يوقع بالدم على عقد صحوبية او امتلاك ولا حتى حاجه بسيطة انه يحافظ على وعده ليك مدى الحياة ...بس المهم تعرف عنوانه عشان هتبعتله محضر بالقضية بتاعتك لما يخل ببنود العقد ان شاء الله 


***********

الحياة فيها حاجات كتير حلوة من انك تحب حد وتتحب وتتجوز وتخلف وتربى وتكبر وتعلم وتجوزهم ...فيه حاجات تانية قيمة ...ومتستناش حد يقولك عليهم لانك لازم انت اللى تكتشفهم بنفسك 

***********

ويوم لما تكتشف حاجه مهمة فى حياتك ...فكرة حتى عبقرية...احتفظ بيها لنفسك ...وبلاش تشاركها مع حد...او لو حصل وشاركتها ياريت يبقى حد مميز اوى...وحد هيفضل معاك لان لو الكلام اتحقق كل ما تفتكر انت عملت ايه هتفتكر الانسان اللى حكتله ولا عملت الحاجه الحلوة دى معاه ...لو موجود هتبتسم لو مش موجود هتبتسم بردوا بس ابتسامة بوجع 

***********

اخر حاجه

كل يوم بفتح الصفحة اكتب بوست وبكتبه وبمسحه وبقفل الصفحة وبقوم انام 

ده انجاز ان البوست ده هيتنشر 

:)