TagzzzzzzzzZzzzzzzzzzzzzzz

Special Tagz i received Recently , & I'm already missing these lovely tags by the way :D

O.K the first one from My Lovely friends blog..Spare Time


انت مين بقى ؟

سفاح كرموز..حلو كده

عندك كام سنة

23 وحبة

هل انت متزوج ؟

لع...محصليش الشرف :p

دراستك ايه

حقوق القاهرة..اسانس يعنى

كم طولك وما لون بشرتك

انا اقدر ااقول انى ولا قصير اوى ولا طويل اوى
رحم الله امرىء عرف قدر نفسه

هل تمارس عملا بشهادتك او عمل حر وما هو

ومين بس بيشتغل بالشهادة...صلى عالنبى بس...اغلبها حاجات وقتية

ماذا تفعل بوقت فراغك

بنام...بخرج..بقرا

هل لديك هوايات وهل تمارسها

الكتابة...وكرة اليد...والتأمل..ومش لاقى لوقت الا التأمل فى مخاليق ربنا

هل تشعر برضا ربنا عنك

بص...على حسب اليوم ماشى ازاى

عندما تكون فى موقف اتخاذ القرار..تخالف الجماعه.. ام تشرك معك الاخرين

على حسب الموقف او المكان...لو انا قائد وشايف بحكم الخبرة ان القرار ده صح همشى فيه اكيد

ماهو الشىء الذى فعلته وندمت عليه طول عمرك

حاجه عملتها من كذا سنة وكان نفسى معملهاش بس اتعملت وغيرت حاجات دلوقتى وتاثيرها لسه شغال

هل تصارح غيرك بالحقيقة ام تقول له ما يحب سماعه

بصارحه بس بطريقة كويسة مش تجرحه...وساعات بديها زى ماهى

متى يقسو قلبك

لما اقفل من الشخص اللى قدامى او وقت الانتقام...معنديش غالى فى الحتة دى

من هو اول من قلت له احبك

اكيد ابويا وامى :D

هل يمكن ان تحب احد من المدونين

كل شىء جايز..ممكن اقابل سفاحه فى مهمة اخرى ووقتها الفاس يقع فى راس الضحية ويحصل حاجه :p

ماذا تعنى لك المرأة والرجل

المرأة الحنية...الاهتمام...القلب الكبير يعنى...الراجل ..الحيطة اللى بتتسند عليه فى كل حاجه عامة

فى زمن البحث عن المادة ماذا تبحث انت

الستر والرضا

متى تعرف انك تحب

لما اعرف قبلها انى معجب ولهان..ههههههههههههههههههههه

الشخصية التى اثرت بحياتك

مممم..مش حد معين عامة...ناس كتير...سواء اهلى او اصدقائى...كل حد بيعدى بيسيب بصمة وناس معندهمش صوابع يسيبوا بصمات حلوة ..:)

هل يوجد من تراه سعيدا فى الدنيا ولماذا

اى حد ربنا بيكرمه وهوا بيطيع ربنا كويس ومراعى حق ربنا فى كل حاجه...ده اسعد الناس

ماهى درجة صراحتك

depend

ماهى المواقف التى يمكن ان تكذب فيها

depend also

بس ساعات عشان اطلع من مأزق ما وبتقلب على دماغى بعدين...بس الحمد الله بطلت

هل يتغير الحب بعد الزواج

مسألة نسبية..يا بيعلى اوى واكتر...يا بيقل على حسب اللى اتجوزوا دول بيطيقوا بعض ولا لاء

فيما تفكر الان

بفكر افطر ايه ولا اقعد فى البيت بدل ما انزل فى الحر..ههههههههههههههههههه

لو لم تعش بمدينتك ..فأى مدينة تفضل ان تعيش بها

اسكندرية او روما

من اول من يأتى ببالك لتحكى له اسرارك

ناس كتير بس المهم يكونوا فاضيين او فاتحين موبايلهم

من هو الد اعدائك

اى حد حقود عليا ..وكتير الحمد الله :D

من هو صديقك

وسام اولهم ^_^


ماذا تكره فى الحياة

القرف ودماغ الناس اللى مالهاش لازمة وبيفكروا ازاى يعقدوا الواحد فى حياته

ماذا تحب

بحب اتنين سوا ..هههههههههههههههههه

كيف تواجه ما يضايقك وكيف تتصرف فى المفاجأت

لما بضايق بنزل اتمشى فى الهوا كده وبحاول اركز ...عشان متهورش واعمل تصرفات بندم عليها بعدين

بالنسبة للمفاجأت ...ممم بتفاجىء زى زى غيرى بس مش بيغمن عليا :p

بصوا هوا التاج طويل بافترا :D

انا تعبت الصراحة..فكفاية دول مؤقتا وباقى الاسئلة هعملهم فى تاج تانى ^_^

التاج ده هديه لـ:

Silver eyes

Self meaning

عمرو فكرى

عصر الجنون

تاج من بعييييييييد نادانى

تاج جالى من هاجر زعبل صاحبة مدونة مشاعر صنعت كلمات

اسمك؟؟

سفاح كرموز او مشمش زى ما اصحابى بينادونى

سنك؟؟

23 الا شهرين ^_^

اسم مدونتك؟؟

طرطشة افكار

مجال دراستك؟؟

القانون

هل فكرت فى اغلاق مدونتك ؟؟ والسبب؟؟

مرة فكرت ولا اتنين عشان ناس اصحابى كانوا بيزعلوا لما بكتب وكل واحد كان عاوز كلام يكون تفصيل ليه...بعد كده اخدت بالى ان دى مساحتى بتاعتى ومحدش منهم ليه حاجه فيها ...بس وغيرت رايى

ايه رد فعلك لو حد قل ادبه عليك فى المدونة؟؟

بضايق وبعدين برجع اخد بالى انه زى الفرخة بيشتم ويجرى وللاسف حصلت كتير عشان كده بقيت احط موديراشن للبوستس بعد 5 ايام عشان لو حد رد فى القديم اعرف

اسوأ مدونة دخلتها؟؟

مش فاكر الاسم بس كانت عاملة زى مقلب الزبالة...خرابة يعنى...وكلنا عارفين من هما اهل الخرابات

هيحصل ايه لايميلك بعد ما تموت؟؟

هيفضل مركون او هبيعه والورثة يتخانقوا على الربح:D

اديت الباسوورد لحد قبل كده؟؟

ااه لحدوود..وندمت بعد كده >_<

السفر بالنسبة لك؟؟

تغيير جلد وجو وجسد وحاجات كتير...بطلع من القمقم اللى عايش فيه وبحس انى بتنفس بكل حرية ....بحب السفر اوى على فكرة

الموود بتاعك ايه؟؟

3 اوض وصالة وتكييف 6 سلندر

بتعمل ايه فى وقت فراغك؟؟

يا بنام يا بخرج مع نفسى فى اى مكان

الاكلات المفضلة؟؟

الكوسة بكل انواعها محشى صينية شوربة بشاميل بعشقها ("v")
الملوخية ...اى حاجه خلقها ربنا بحبها

الصفات اللى اخدتها عن والدك؟؟

العصبية
التسرع احيانا
الراس الناشفة ساعات كتير او العند يعنى


الصفات اللى اخدتها عن والدتك؟؟

الطيبة
الصفاء النفسى
ازاى اعرف ااقرا اللى قدامى
ازاى اسامح
حاجات تانية من جوا
وواخد منها حاجه فى الشكل :D اخواتى بيتغاظوا منها ^_^


اكتر 6 حاجات بتحبهم؟؟

حاليا الاولوية لـ

نهى وياسمين
هيثم وسلامة
والباقى من هنا



اكتر 6 حاجات بتكرههم ؟؟

الكدب
الظلم
العته
الراجل لما بيعيل
البنت لما بتعييل برضه
الهبل
الجنون بزيادة
اسرائيل باليهود
الشارع لما يبقى زحمة وقت لما اكون متأخر ومستعجل
سواق تاكسى زى الزلحوفة وانا مستعجل
محبش حد يحكم عليا من غير ما يعرفنى
الفشل

بس كفاية عليكوا كده

شخصيتك نوعها ايه؟؟

الناس اللى بتدخل هنا هسيبهم يخمنوا ^_^

لماذا دخلت عالم التدوين من الاساس؟؟

حبيت اتكلم محدش يسمعنى ولا يعرفنى

اهمية التعليقات بالنسبة ليك؟؟

الترمومتر اتللى بيقولى انى لسه عايش على الارض ولسه فيه ناس بتسأل وبتهتم بغيرها
رغم ساعات مش بعرف ارد عليهم واحد واحد بس بيبقى غصب عنى..:)

احلى بوست كتبته مع ذكر السبب؟؟

مش عارف...كل بوست ليه ذكرى وكل ذكرى ليها معنى او مغزى...شوفوا انتوا احلى بوست قريتوه هنا كان ايه
وهعمل تحديث واحط اللنكات هنا مع اسم كل واحد اختار

بتكلم جد على فكرة

افضل مدونة قريتها؟؟

كل اللى عاليمين من الريدر او الطرطشات الصديقة

اهمية الانترنت بالنسبالك؟؟

زى الجسر اللى بيوصلنى باصحابى اللى عايشين برا ...او اللى جوا وقت ما بكون مفلس ومش معايا اشحن الموبايل!!


اهداء التاج :

just beauty

عقل مهوى

حكايات من القلب

The lost princess

مفروسة

اميرة على كوكب مهجور

My lost world

فضفضة

واللى عاوز ياخده مش ممانع

^_^

Ask Me Answers

طيب انا سبت البوست بتاع 5 ايام على اساس حد ممكن يضيف اى حاجه بس محدش اضاف :D



فيه سؤال مشترك الاول ما بين كذا حد هوا سبب اختيارى لاسم سفاح كرموز

السؤال ده اللى ساله :

mimi & واحدة مفروسة

طيب هوا كل الموضوع بينقسم لنصين...اول نص انى زمان لقيت اسم مشمش محجوز فاكتفيت انه يكون فى اللينك بس بتاع البلوج...عشان انا عملتها زمان ونسيتها بتاع فترة طويلة لحد ما رجعتلها
السبب التانى ان كذا حد اعرفه قالى انت سفاح ..ههههههههههه او فيا حاجات من السفاحين ...من ضمنها الهدوء مثلا فى التعامل مع كذا حاجه او كذا شخص وطريقة التعامل معاهم...فقررت اسمى نفسى كده...فعشان الناس تيجى لحد عندى...لازم يكون اسم يشد الناس ...فاكيد مش هسمى نفسى سفاح اسكندرية ...فمافيش غير سفاح كرموز اللى شدنى + انى بمووووت فى اسكندرية

:)

Unique asked me about : what are the things you consider the most important for normal persons to shape their own image from the inside and the outside ?

هجاوب بالعربى بس عشان مش فاكر اغلب المفردات ..هههههههههههههههههههههههههههههههههههههههههههه
طيب اهم كذا حاجه اللى المفروض تكون الشخصية وتفيد الواحد من جوا ومن برا طريقة التفكير ...انسان عاقل بيفكر بعقله وبيوزن الامور ولا عاطفى بيجرى ورا احساسه فى اى حاجه شغل جواز خروجة ...وات ايفر ...طريقة التعامل مع الناس هى اللى بتحط الصورة بتاعتك الخارجية ازاى انت انسان مستهتر ولا بتقدر اللى قدامك وتحترمه ؟؟؟؟
الداخلية عندك بقى من احترام الذات وتقدير النفس واهم حاجه القناعه ...انك تكونى قنوعه باللى ربنا قسمهولك ...منبصش لغيرنا ومنحاولش نبقى حد تانى غير نفسنا ااه نطور منها لكن منقلدش غيرنا
يارب اكون افدتك..:)

Dr Dead حبيب قلبى

حاسك برغم اي حاجة بتعملها تبسطك انك من جواك حزين مش عارف ده صح ولا لا بس دايما احساسي كده عنك انك حزين وساخط علي حاجات كتير مش شايف انك لسه صغير يا مشمش عشان تبقي حزين من جواك كده ده لو انا اللي شايفه صح؟

بص لكل واحد مننا ظروف وكل واحد ليه حياته واللى بيحصل فيها ....من ناحية ساخط ...لا ابدا ممكن بزعل كتير بس ...بفتقد حاجات كانت فى حياتى ومشيت فيه منهم اصحاب توفاهم الله فى حادثة قدام عينى او اللى تابعته وهوا بيموت كل يوم بمرض ما او اللى تسيبه الصبح بالليل تصلى عليه ...دى يمكن اكتر حاجه ماثره فيا ومخليانى بزعل كتير ...مفتقد وجود ناس كتير فى حياتى اغلبهم سابونى ومشيوا ...ااه اينعم هيجى يوم وهحصلهم تحت :D
ومحدش مننا بيبقى راضى عن حاله 100% لازم بنبص لحاجات تانية...بس لعلمك فيه حاجات كتير بتفرحنى بس بيبقى ناقصها الكريز اللى فوق التورتة ...وانا بقعد ادور عليها مين اكلها ولا مين خباها منى ...يمكن هنا او عالمنتدى بس شفت منى وش واحد ...لكن لسه فيه اكتر منى :D

السؤال التاني مشمش مين هو وعاوز ايه؟

واحد من عباد الله بندور على رضى ربنا ورضى الوالدين فى الدنيا وبحاول امشى فى خط واحد ...مستقيم مش متعرج...عاوز ايه بالظبط دى ؟؟؟؟ عاوز اكون حد كويس وناجح فى شغله ...بس دى مش بالتمنى ...للاسف دى بالشغل ومشمش حاليا كائن كسول لاقصى درجة :$

يارب اكون جاوبتك صح :D

Eman H.H. :

السؤال اللى مقدرشى ارد عليه يا ايمان مواصفات البنت اللى عاوز تتجوزها او شايف نفسك بعد 10 سنين فين

يمكن زمان كنت برد وبكل ثقة ...لكن يوم بعد يوم بنشوف ان الدنيا لسه مخبيالنا كتييييييييييييييييييييييييييييييييييييييييير

Silver eyes رديت على الاسئلة نفسها مع ان كان نفسى اشوف منك سؤال

كرسى اعتراف نورتنى وانا عالكرسى ..هههههههههههههههههههههه بتسأل :

هل اتهمت من قبل بتسفيه أفكار الأخرين؟

بتاع 5 مرات كده ...منهم مرة صح كنت ااقصد اسفه رأيه والاربعه كان تجنى عشان بيهربوا من المناقشة ^_^

دهاء سياسى وعودة بعد غياب واهو انا مش عيان ...عشان مش تتعقدى بس...هههههههههههههههه

المهم :

ايه مواصفات الشخص الى لما تقابله تقول عليه " ده انسان فعلا " ؟؟

طيب....بيحترم الناس ....عنده ذوق واخلاق ودين ...بيعامل ربنا كويس مهما كانت ديانته ايه ...عارف الحق من الباطل ...جدع

تقريبا دى المقومات بتاعت الانسان ...اعرف حد كده على فكرة :D

من هو الانسان من وجهة نظرك؟

ههههههههههههههههههههههههههههههههههههه صباح اللف يعنى

ممممممممممممممممممممممممممممممممم
هوا هوا البنى ادم -_-


عمرو فكرى ...كنت مستنى سؤاله كل ده :D

لو قررت تغير شخصيتك مع حد .. تغيرها مع مين؟

طب لو هاتختار حد مننا ع المنتدى .. تختار مين؟

مش عارف والله ...ده ممكن ارد على ايمان واقولها اصعب سؤالين حتى الان ...بس ممكن اغيرها
مع نهى اخد منها شخصيتها واديها شخصيتى ...على الاقل هتكبر راسها اكتر منى :p

بس ممكن اضيف من عندى عليها حبة بهارات يعنى ^_^

بقالى ساعه الا ربع برد عالاسئلة ..ههههههههههه يا موسهل

نيجى للاوستاذة هاجر زعبل اللى سبتها للاخر اللى اتوصت بسم الله ما شاء الله يعنى

11 سؤال :p

يا تري نفسك تعيش في بلد تانيه غير مصر؟ لو اه .. فين وليه ، ولو لأ لأ ليه ؟؟


بلدين ...فرنسا ...اغلب اصحابى هناك من زمان عايشين ومتجوزين وبيشتغلوا هناك ، كان المفروض اهاجر معاهم زمان بس فى البيت رفضوا
او الامارات بحسها البلد العربية الوحيدة اللى بتحترم شعبها فعلا ومقدرااه

ايه المقوله اللي حاططها دايما قدام عينيك ومؤمن بيها ؟؟

اذا دعتك قدرتك على ظلم الناس فتذكر قدرة الله عليك
دايما قدامى ...ودايما عندى فرصة او وسيلة انتقم من اللى ظلمنى او داس لى على طرف...بس بهدى وبفتكرها فبسكت وبسامح او مسامحش ...بس مبديش للامر اهمية وبدعى ربنا اللهم عليك بمن ظلمنى

لو باءيدك تدي جايزه نوبل لحد هتديها لمين وليه ؟؟

هديها لكل ام فى الدنيا تعبت وشقيت وربت ولادها عشان يكبروا ويردولها جزء صغير من اللى عملته ...اكتر ناس بيتعبوا والله وبيستحملونا مهما عملنا ..:)
بس فيه امهات ما تستحقش على فكرة

السفاح ممكن يحب ولا بيعشق حياة السفاحين ؟؟

زمان ااه ...كان ممكن ...دلوقتى لاء...الوحدة افضل نوعا ما من ان الواحد يبقى مع شخص فى اى وقت ممكن يجرحه ...ونقعد نجرح بعض طول الطريق ونعند سوا ...ااه وجهة نظر قاصرة حبتين تلاته بس حاليا فى اجازة طويلة...وممكن نقول لسه مجتش اللى تقدر تخطف قلبى من مكانه :p

ليه دايما انا كمان بحس ان جواك حزن عميق بتحاول تداريه بضحكه عاليه لزمتها في لحظتها ؟؟ وياتري لو في حزن ليه محاولتش تكسره ؟؟ ولو مفيش تفتكر ليه احنا بنحس بكده ؟؟

:)

احسن سلاح لمواجهة اى حزن او ضيق...انك تضحكى...وبصوت عالى اوى...يعنى من حبة جالى خبر حرق دمى ونرفزنى بس ضحكت زى المجانين ...عجباً من اللى حصل يعنى ....ساعات بعرف اكسر الحزن ده...وساعات مش بعرف عشان الفاس اللى بيكسره مش بيكون معايا ...بيكون مع حد تانى...والحد التانى ده مبقاش موجود...فبيفضل الحزن ده جوا قاعد فى مكانه مستنى صاحب الفاس يرجع يكسره تانى
بنحس بكده عشان دايما بندور على اى حاجه ناقصانا...تعرفى فيه ناس اغنيا من كتر ما هما سعداء بيبكوا ...مفتقدين شعور الحزن او الاحتياج...اغلبنا كده ...فيه ناس بتحزن عشان تعوض حاجه ...او تستدر شفقة اللى قدامها

ايه اكتر موقف صدمك في حياتك ؟؟

غير انى سقطت فى الكلية اول ما دخلتها ...ممممممم

واحد صاحبى مات قدامى

ايه اللي محدش يعرفه عن السفاح ؟؟

حياتى عاملة ازاى ...او انا ايه بعمل ايه بدرس ولا لاء ...اصحابى ...حاجات كتييير يعنى :D

نفسك توصل لايه ؟؟ وايه اللي وصلتله من احلامك ؟؟

نفسى اوصل لفووووووووووووووووووووووق اوى كده ...نفسى ابقى ناجح فى حياتى من كل ناحية ...افيد الناس اكتر واكتر
وصلت لنسبة 30% انى غيرت شخصيتى بـ360 درجة وانى بحقق كل يوم جزء صغير من اللى انا بعمله

ايه رأيك في الاسئله اللي اتوجهت ليك في البوست ده ؟؟

اسئلة مرهقة اوى...هههههههههههههههههههه:D

لاء حلوة ...بس كنت مستنى اسئلة اكتر واكتر
بس الاسئلة دى طلعت حبة من اللى جوايا...ساعات كتير بنبقى عاوزين نتكلم وبس...حد يسمعنا ولو شوية الاسئلة دى حققت حتة من السمع

بتحب دراستك ولا لا ؟؟ وانت صغير كنت بتحلم تبقي ايه ؟؟

لاء ...بكره الحقوق واللى عملوها ...بس فى نفس الوقت مكنتش عاوز تجارة ..:S

كنت عاوز اكاديمية اخبار اليوم او سياسة واقتصاد بس ربنا ما ارادش بس المصلحة من حقوق انى عرفت بلاوى فى القانون بستغلها وبستخدمها كل يوم :D

على فكرة انا استمتعت جدا باسئلتك

وباسئلة كل اللى ردوا عليا

بشكركم جداااااااااااااااا ...ساعدتم حبة انى اطلع من الموود + بحب اوى انى اتسال معرفشى ليه ...لو كانوا عملوا النجاح فى الجامعات بالشفوى والله كنت اتخرجت فى سنتين مش اربعه :p

تاجونى وماس ولولى ^_^

من أنت ؟

انسان عادى يسمى قدراً بالسفاح

ما الذى تفعله هنا ؟

قاعد بلعب...هههههههههههههههههه

هكون بعمل ايه يعنى...بطرطش يا اوستاذ ^_^

إسرائيل تقصف كل جنوب ممكن بحثاً عنك أى شمال تقصد ؟

مكة المكرمة

أنت مكلف بحذف حرف من حروف اللغة العربية أيها ستختار ولماذا ؟

حرف "لاء" عشان محدش يقولى تؤ او لاء تانى

لو قدر لك أن تدخل السجن فما هى القضية التى تتمنى أن تدخل بها إليه ؟

قتل مع سبق الاصرار والترصد والتعمد


منذ متى اكتشفت نفسك ؟

من كذا سنة ...بس لسه ...

ياما جوا الجراب يا حاوى

على مفترق طريق الإفتتان اليمنى تقول ( إلى حلمك ) واليسرى تقول ( إلى ما لم يحلم به البشر ) أى الطرق ستسلك ؟

همشى طوااااااااااااااااااااالى

نحن لا نعيش حياتنا بل نتعلم فيها كيف نعيش ما تعليقك ؟

احنا الاتنين ...حبة بنتعلم وحبة بنعلم وحبة بيتعلم علينا كمان

بجملة واحدة فقط اكتب تعريفاً لكل كلمة من الكلمات التاليه :

الوطن : غريب فى بيتى

الأم : وطنى حبيبى

الليل : ماهما طال اهو ليل وهيجى من بعده صباح

الحب : هو ذلك الشىء الكبير الذى لا يسعه اكبر عقل ولكن يسعه اصغر قلب

أمريكا : عمى وعم عيالى

المرأه : وراء كل عظيم ..امرأة...ووراء كل مصيبة ...امرأة برضه

الصمت : احسن سلاح

الإنترنت : ادمااااااااااااااااااااااان ياعم الحاج

اخترمنصباً واتخذ قراراً ؟

هكون وزير البيئة وهلغى الاسواق العشوائية واقفل كل محلات الفراخ اللى جايبالنا الكافية دى :@



قيس ، عنتره ، جميل هم الذين يقولون شعراً ، وليلى وعبله وعزه " صموت " لماذا هذا التغييب للمرأه ؟

عشان صوت المرأة عورة :p


أن تكون مطلوباً لإرتكابك جريمة خير لك من ألا تكون مطلوباً مطلقاً ؟ هل تتفق مع هذه العبارة ؟ علل ؟

عشان يعنى احس انى مهم وكل البلد بتجرى ورايا عشان تمسكنى وتاخد المكافأة ؟!! وعلى ايه منا مشهور خلقة ^_^

إلى أين تمضى كلمات الحب بعد أن نقولها ؟

فى مكان لا يريد العقل ان يتذكر اين وضعها خصوصا فى اوقات الخلافات

هل تجد علاقة بشكل أو بآخر بين المرأة وقطاع الطرق ؟

ههههههههههههههههههههههه

علاقة طردية...هههههههههههههههههه

هذا فراق بينى وبينك متى ولمن تقولها ؟

لأى واحد هيفكر يغدر بيا او يجرحنى معايا

كيف هو غداً ؟

جاف على السواحل الشمالية ...حار على وسط الدلتا والقاهرة واليكم بيان بدرجات الحرارة


لمن تمرر التاج ؟

انا دايما الناس بتكسفنى ومحدش بيعمل التاج ...

فاللى معملش التاج ياريت يجبر بخاطرى وبعمله ^_^

التاج ينادينى

اولا بعتذر عن الغياب ده ...بس بلووجر كان بيستهبل بقاله اسبوع ولا عارف اعمل كومنت ولا حتى بوست هنا

والاول لازم اعمل تاج السبعات بتاع الستة بتوع صيدلة

سبع حاجات نفسى اعملهم

1-نفسى احج او اعمل عمرة
2-عاوز اتخرج واشتغل شغلانة لا تقل مرتبها عن خمسة الاف
3-اللى بحبها اتجوزها...ودى امنية صعبة فى الناحيتين...ههههههه
4- عاوز اسافر واسيب مصر...يا اروح فرنسا يا اروح الامارات
5- انى اروح فى اى ميعاد ليا بدرى
6- ابطل كسل فى حياتى عموما
7- انى اعمل الست حاجات اللى فاتوا

:D

سبع حاجات معرفتش اعملهم

1-انى اتخرج
2- ابقى ناجح فى حياتى على المستوى الدراسى
3- انى اعرف البنات بيفكروا ازاى
4- انى اروح احج او اعمل عمرة
5- انى اشتغل شغلانة تستمر معايا وانا فى الجامعه
6- انى اشترى عربية
7- انى افرح بناس كتيييييييييييييييييير

سبع حاجات بقولهم دايما

1- عادى...عادى
2-بالشفا
3- مش عيب
4-نفسى اناااااااااااااام
5-اوبجيكشن
:D
6- يا جميل
7- بحبك....ههههههههههههههه

سبع مشاكل الفلوس تحلها

1- انى اتجوز
2- انى اتخرج
3- انى احج او اعمل عمرة
4- اشترى عربية
5-اعرف اطفش برا مصر
6- اقضى يومى صرمحه..ههههه
7-اى حاجه تانية معملتهاش

سبع اماكن بحب اروحها

1- الارض الطاهرة...شارع الهرم
2- كورنيس النيل
3- المقطم
4- الاسكندرية ككل
5- سيناء
6-مصر الجديدة
7- فلوكة

سبع اشخاص بحبهم غير بابا و ماما و اخواتى اللى بحبهم جدا

1-رامى...صديق الطفولة بقالنا 17 سنة تقريبا نعرف بعض
2-احمد سلامة
3- هيثم التابعى
دوول ااقرب اتنين ليا بجد دلوقتى
4-self Meaning
5-Yasmine
6-Shimaa
7-some one i won't say WHO...but he/she know .

سبع حاجات بحبهم اوى

1-ماونتن ديو...بعشقها
2-شيكولاتة جالكسى فلوتس
3- الكوسة بكل طرق طبخها
4-عصاير طبيعية خصوصا الفراولة والموز والجوافة
5-اللون الموف
6-قلب
7-كلية سياسة واقتصاد


سبع بلوجات بفتحها اول ما ابقى اونلاين

الستة بتوع صيدلة

اوقات فراغ

Self Meaning

I'm ur mind

Te3bt bgad

انا الشعب


بس كده....

الناس اللى مجاوبتش عالتاج مشكورين يردوا عليه

والا هدبس الناس :D

التاج التاج...موعدة ياللى لابسه التاج

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

الوردة الاولى هديها لوالدتى...اعتقد هى اكتر انسانه تستحقها...مع ان وردة واحده قليلة عليها

الوردة التانية هديها لواحده زميلتى زى اختى الكبيرة ...عشان تستحقها برضه

الوردة التالته هديها لانسانه مش هذكر ايه هى ولا عايشة ولا مش عايشة...مجرد انسانه..:)


لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

هكتب 3 كلمات بس

ماشى...فى ...نور الله

ما هو هدفك فى الحياة ؟؟

هدفى انى ارجع زى زمان...او نقول انى ابقى حاجه كويسة...حاجه لسه ليها طموح وحلم معين تحققه...مش حاجه مكسورة مالهاش اى هدف من كتر اللى بيحصل حواليها

ممكن يكون ده هدفى


إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

ومنصدقش ليه...اصل اللى قالها كان اول يوم فيه تراب وحر وقرف...تانى يوم وقع بعربيته فى بحيرة متجمده...ميه سقعه يعنى...يبقى عنده حق :D

أجمل مقولة سمعتها فى حياتك ؟؟

هى مش مقولة...هوا دعاء

لا اله الا انت سبحانك انى كنت من الظالمين


من المغنى اللى بتحبه أوى و إيه أحلى أغنية ليه بتحبها ؟؟

عمرو دياب ...واغنية وهى عاملة ايه دلوقت


لو تزوجت و أنجبت بنتين و ولدين أى الأسماء تختار لهم ؟؟


ههههههههههههههههههههههههههههههههههههههههههههه

حسب المدام بقى :D

لاء بس ممكن اختار اسم من هنا واسم من هنا

يعنى لو بنت اسميها ياسمين...

ولو ولد هسـميه يوسف

لو أتعرض عليك رشوة كبيرة و انت فى زنقة ماليه هتعمل إيه ؟؟

هقبلها وبيها هشترى حشيش واعزم على كل اصحابى

قول 3 صفات ب 3 كلمات بس توصف بيهم شخصيتك (يعني كريم طيب خدوم كده )؟؟

غامض - كسول - مستفز

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه؟؟

اكبر مرتب اخدته كان 1000 جنيه...واخدته لنفسى...ههههههههههههههه

بس لو بعد كده واشتغلت ان شاء الله هشترى لكل حد فى البيت حاجه بيحبها او الاحسن هديلهم الفلوس كده ليهم افيد ..:)

برضه بكلمة واحدة ايه اهم صفة عايزها في شريك حياتك؟؟

بما ان الحب لوحده لا يكفى...تكون مخلصة ليا...والاخلاص ده يتضمن انه تكون بتسمع الكلام وتنفذه عشان عارفه انى عارف مصلحتها...مش هتفكر فيه وتقتنع بيه او لاء...

طب دلوقتى حالا ايه المكان اللى نفسك تكون فيه

على اى شط واى بحر...والشمس بتغرب...والام بى ثرى فى ودنى

يا سلااااااااااااااااااااااااااااااااااام

تمرر التاج لمين؟

هفكر بعدين ارد...

او اقولكم ...اول 5 يردوا عليه ياخدوه :D

تاجونى وماس ولولى

لقيت عندى ملل تدوينى معتاد

قلت ارمى نفسى عالمر واجاوب تاج ...

فرحت مدونة اوقات فراغ

ولطشت تاج من عندهم


ادكر 10 أشياء عن نفسك؟

1-غامض

2- محب للحياة

3- مجنون نوعا ما

4- مش بستسلم بسرعه

5- طموح

6- اجتماعى جدااااااااااااااا

7- بحب الكتابة...بس هى مش بتحبنى

8- نفسى اعمل حاجات كتير بس مش بيبقى فى ايدى اللى يخلينى احققه

9- كسول وممكن اسيب حاجه عشان كسلى ده

10- بكره الكدب...مع انى ساعات بكدب

بس كده....

اللى عاوز يجاوب التاج اللظيظ ده ممكن ياخده

او هعمل تحديث بكرة بالليل...واقول مين هياخده :D

جابولى تـــــاج ولولى

جالك التاج يا تارك البلوج

هع هع هع

تاج

من المدونة الرقيقة

الوردة البيضاء....باتريسيا

انت مين ؟؟

سفاح كرموز....بيدور على قلب معين ...يخطفه ويخليه عنده...ومش هيقتله...بالعكس هيرويه بدماء اعدائه

مين اكتر ست اشخاص بتحبهم ؟؟؟

فلان وعلان وترتان وبتنجان وسحلان وشحلان
هههههههههههههههههههههههه
6 مش يكفوا حبايبى ..:)

هل انت سعيد ؟؟

هوا طالما عايش مستور الحمد الله ....يبقى سعيد...بغض النظر عن العك اليومى بتاع الحياة

لو اجتمعت مع حسنى مبارك فى مكان واحد هتعمل ايه ؟

هقعد ااقرا قرءان فى ركن لواحدى ....واشوف لو معاه سيجارة ااقضى بيها الوقت

لو معايا مليون و نص اعمل ايه ؟؟؟

اشمعزة يعنى ؟؟؟؟....بس يلا اهو رضا ...هاخدلى نص ...واسيب الباقى لعيلتى ...يتصرفوا بيه ...ومع انى كنت عاوز ااديهالهم كلها بس الطمع بقى ولازم اضمن حقى :D

بتحب مصر ؟؟

كل يوم بصحى الفجر ااصلى ...وادعى لاهلى واصحابى ونفسى وبلدى ....وانزل اتمشى عالكورنيش اابص لنيلها ...واقول لسه بحبك يا مصر

مين اكتر شخصية متقدرش تستغنى عنها ؟؟؟

انسان بحبه جدا....زى اخويا ...لو حصله حاجه مش هستحمل تانى

ايه اكتر موقف محرج ؟؟-

نزلت ومتأخر ولحقت المترو...ودخلت قعدت بقى ...وبرحرح وبمسح العرق بمنديل وببص فى الساعه ...وسامع همهمة ...ابص الاقيها عربية ستات ...ههههههههههههههههههههههههههه...وقاعد جمبهم كمان ...والاقى الست بتبصلى بقرف وتقولى ايه يا استاذ....قولتلها متقلقيش ...انا مرتبط ...ومش هاكلكم ولا اخطفكم....واول ما المحطة اللى بعدها جت عالطوول غيرت ....ودخلت عربية الستات اللى بعدها :D

كان يوم ما يعلم بيه ربنا

الامنية اللى اتمنا تحقيقها ؟؟

رضى ربنا عنى ...واهلى....والاقى القلب اللى كنت بتكلم عنه

التاج باه يتمرر لمين ؟؟؟؟

التااااااااااااااااج ده اجبارى لكل واحد هيدخل ويرد عليه :D

وياريت حد يعبرنى ويعمله ...ولو مرة واحده ...:(

تاجونى ومحدش سمى عليا

ههههههههههههههههههه
باين ان التاجات بالموسم فعلا

وجايلى 3 تاج

واحد من عند شادى فايد...والباقى من عند مها...و وشوشنى كمان

يعنى الناس متوصية بيا وقبل الامتحانات كمان ....اشطززز

هنبتدى بتاج شادى فايد الاول ...

وتاج ده برضه من عند سها ...وات ايفر

أحب شخص لقلبك فى الدنيا؟

قلبى انا

انسان مستعد تضحي بحياتك – ركز فى كلمة حياتك - عشانه؟

ممم...فى حياتى...ممكن حد من اصحابى يستاهل كده

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

دكتور سقطنى سنة ظلم

ما هو:اسم أجمل كتاب كتبه بشر قرأته ومحتفظ به حتى الان؟

اسم كتاب -كتبه بشر برضة- انت متعلق بيه وبتقرأه كل فترة؟

البداية والنهاية لشيخ الاسلام: الامام :
عماد الدين ابى الفداء اسماعيل بن عمر بن كثير القرشى الدمشقى

اهم جهاز منزلى انت متعلق بيه او بتستخدمه كتير؟

مكان تحس بالراحة عندما تدخله؟

الكمبيوتر بتاعى

شىء تحس بالراحة النفسية عندما تنظر اليه؟

السما وقت الليل او وقت الفجر كده

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
لما بقعد قدام اى مكان فيه ميه ..ماعدا الترع والمصارف :p

اجمل مدينة زرتها داخل مصر ؟

لغاية دلوقتى ...الغردقه...واسكندرية..

أجمل مكان طبيعي رأيته داخل مصر ؟

الشعاب المرجانية

شخصية كارتونية بتحبها؟

كونان

نوع هاتفك المحمول؟
Nokia 6610i

سرعة بروسيسور جهازك؟

3Ghz,

حجم ذاكرة –هارد- جهازك؟
200G

المساحة التى تشغلها المواد الاسلامية على جهازك؟

مش كتير اوى

أهم هدف انت واضعه لحياتك الآن؟
للاسف اتغيرت الاهداف انى اتخرج...بعد كده احب اى ملاك واتجوزها ..:)

مواصفات فتاة الأحلام بالنسبة لك؟

مش حاطط مواصفات صعبة...انها تكون انسانه...رومانسية...لاسعه ...عندها القدرة عالابداع ...جميلة ...
وتكون اهلاوية :D
واهم حاجه تكون بتعرف تحب الناس

صف ما يأتى:

شعورك لما بتسمع كلمة مصر ؟

بالفخر

شعورك لما بتسمع كلام عن اليهود؟

بالقرف

شعورك لما بتشوف ظابط شرطة؟

يارب يفضل كويس

شعورك لما بتشوف الكناس العجوز فى الطريق؟

فين ولادك؟!!

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
عاتى مواطن وماشى فى الشارع

احساس يراودك فى اشارة مرور مغلقة بسبب مسئول كبير؟

فرصة للدعاء عليه والضحك ان يوم القيامة مش هيلاقى السكة سالكة كده..:)

اللى عاوز يعمل التاج يعمله....عشان مافيش ولا واحد من الخونة اللى مررلتهم تاج زمان عملوة...فقتلتهم