يوم ...زى اى يوم

صحيت من النوم على رنة موبايل...مش عارف ازاى انا نسيت اعمل الموبايل ده سيلنت امبارح...لقيت حبيبتى بترنلى ...تقريبا فاضية ورايقه وصاحية بدرى ...فقالت ترش رنات عالبشرية تصحيهم...انا ساعات بعمل كده...هههههههههههههههههههه

قمت اخدت الشاور المتين .....وضربت كوباية ليبتون تعدل الطاسة...وطالع البلكونة لابس البنتكور بتاعى...والشبشب الاكتف...وفوطة على كتفى ...وشعرى منعكش وحالتى حالة ....ببص لقيت قدامى ملاك فى العمارة اللى قدامى...ااه نسيت اعرفكم...دى حبيبتى "الرخمة" اللى صحتنى من النوم ...حد يصحى حد 12 الضهر...قولتلها كده...بصتلى بصة بريئة وطلعلتى لسانها وقالتلى يا كسووووول ....

جبت ازازة الميه عشان اسقى المزرعه اللى انا عاملها فى البلكونة...خصوصا زرعاية والله مافاكر اسمها...كانت هدية منها فى عيد ميلادى...هى ماديا رخيصة...ومعنويا عالية اوى...وطبعا ماقدرش اعترض على حزمة الجرجير دى :D

افتكرت انى نازل الجامعه النهاردة....قمت صارووووووخ غيرت هدوماتى وقعدت ادور عالمفتاح بتاع العربية...واخدت المج اللى فيه النسكافية المتين ....ونزلت ...لقيتها واقفه مستنية وبتاعتبنى عشان متأخر كعادتى....ورديت ردى المعتاد...كل تأخيره وفيها خيره :D

ركبت العربية...وشغلت الام بى ثرى كالعادة...بس النهاردة اول مرة ترخم عليا ...وتختار هى الاغانى اللى نسمعها....مردتش اعترض...لالقى نفسى مرمى برا العربية...هههههههههههههه

قاعد بفكر وانا ماشى فى السكة...حد يبقى جمبه القمر ده...وعايش حياته مرتاح ...يبقى عاوز ايه تانى اكتر من كده ....كفاية انك تبقى حاسس بوجودها جمبك ....




































على فكرة...انا ما عنديش عربية...ومافيش بلكونة فى بيتنا الا بلكونة المطبخ وبتطل على منور....

معنديش عربية كمان...معايا رخصة اينعم...ومعنديش بنت جيران كمان :D

دى كانت محاولة تخيلية لحاجه زمااااان كنت بحلم بيها ....بس مش بالاحلام بس نقدر نعيش....

نحاول اننا نخلى الاحلام دى واقع عن طريق حاجات كتير....

يلا ...هنزل الجامعه بقى

Lebanon

Hold On....

قاااااااااااااااااادم

Silent love...

With me silent one....

With Others Good Speaker....

sorry...

guys ..& girls also :p

my pc broken wa ana baktb now mn cyber....

i can't publish any post from cybers....

so i miss u all so much...

but i will try to catch u later ....

pray 4 me ba2a (",)

حلم الرئاسة الامريكية

لما يوم هيثم جه وقالى على النموذج الجديد اللى بيعملوه فى سياسة ...وسالته ان كان ينفع ااقدم...قالى طبعا ...مش عارف ...كنت داخل على تجربه جديدة ...ولازم استعدلها ...الحمد الله عكيت عك رااااااااااااائع فى الانترفيو يومها...وكنت متوتر جدا وقلقان اوى ...واغلب الاسئلة مكنتش عارف اجابتها :D

ويوم لما عرفت انى اتقبلت فى منصب المنسق الدبلوماسى ...قلت لهيثم شكلك بتشتغلنى ...لكن طلع سلامة هوا اللى كان ناوى يشتغلنى...انا فاكر اليوم بالتحديد ...بس مش فاكر التاريخ للاسف...كنا فى محل game over اللى فى التعاون بps

ابتدينا الرحلة ...وكان فيه محاربين...ااقصد زملاء ليا فى الرحلة....هقول اسماء اللى اتفضلوا منهم فى الاخر ...

عدى التدريب...كنا فى الصيف وعز الحر وفى ظروف قاسية بالمعنى...واول مراحل الجد كان الانفو ديسك بتاع اللجنة المنظمة...واللى احنا اللجنة الاكاديمية قدمنالهم الدعم كل يوم من 9 الصبح لغاااية الساعه 3 او 4 يوميا .....

مع انها حاجه مش تبعنا ...بس كنت مؤمن انها حاجه تبع النموذج يبقى تهمنى انها تنجح زى ما تهمهم ...وجت مرحلة الجد...ونزل booth بتاعنا يومها وفكرته كانت مفتكسة جدا جدا كان على شكل البيت الابيض ...وطبعا لون تى شيرت النموذج كان تركواز...كنا عاملين غزو للجامعه وكلية سياسة واقتصاد ...بمعنى كلمة الغزو...

وفاكر اول انترفيو...عملته انا وعبد الرحمن..لواحد كان فى مركز الدراسات الافريقية ....وكان نفسى ااقبله بس كان سنه كبير اوى ...وكان صعب يتأقلم بين الطلبة ....ايام الانترفيو دى كانت لذيذة برضه ...مليئة بمواقف مضحكة...محرجة...صعبة علينا وعلى ناس تانية معانا

عدت بسرعه جدا ...لدرجة انها بعد ما خلصت قلت ياااااااااااه ...لحق 3 شهور يجروا بسرعه كده....امال انا دلوقتى ااقول ايه بس

وجه وقت الاوبننج ...يومها وصلت متأخر...وبندم انى وصلت متأخر يومها...:( لانه كان يوم معدى...وكان بداية التحدى عشان نثبت نفسنا قدام ناس كتير اوى هاجمونا ...بس على مين...

اول session كانت معدية اوىىىىىىىىىىىىىىى والناس كانت مبسوطة بالنموذج

لغاية كده انا عارف اكتب بعد كده مش عارف اكتب اى حاجه

لسبب انى مش فاكر...تؤ...انا فاكر كل حاجه بكل حدث وتفاصيله...

بس صعب انى اكتب واحكى عن حاجه نفسها ترجع تانى واعيش كل لحظة فاتت منى

حلم الرئاسة الامريكية ...اصبح حقيقة...ووصلنا لنجاحات كبيرة جدا ...

داخلين وعارفين اننا لسه صغيرين بس بشغلنا وتعبنا وصورتنا خلت الناس تحطنا مع ناس بقالهم 15 سنة فى المجال ده

حبيت اشكر كل الناس اللى عرفتهم وتعبوا معانا فى النموذج...ودول لازم اكتبهم اسم اسم

وفعلا فخور انى عرفتكم يوم ...:)

هيثم التابعى
احمد سلامة
هبة حسن ياسمينا ايمان غادة مها ممدوح محمد الخطيب احمد ماجد س ونهى اشرف ارة مختار (اجمد واحدة تعملevents فى الدنيا ) دول اسماء الheads & asst
واول اسمين دول اخواتى بجد ...رئيس النموذج ونائبه

دلوقتى اسماء الmembers اللى فعلا علقوا معايا واثروا فيا


دينا محمد
ايمان رأفت
سالى خليل
وديان
لمياء

علاء هانى
منه نهلة منن
وهبة
وسام
وليد
جولى
شيماء
ابو صلاح

فيه اسماء تانية بس انا فاصل وانا بكتب

ناقص بقى اسماء المحاربين حبايبى

سارة ممدوح...بجد استحملتينى كتيييير وانا كنت بسلمك الشغل متأخر ...وضايقتك كتير...بس كنتى اجمد head ac فى الدنيا

الفريق بتاعى ...سما ومصطفى

سما الكتكوتة بتاعت المجلس ...بنبوناية كده ...
مصطفى اللى بقى اكتر من اخويا ...ربنا يخليك ليا يا كبير

باقى المحاربين

جزرة او محمود
اسامة
ريم
ايمان مختار
زوهيلة...او سهيلة :p
محمد صبرى

بجد انا كان ليا الشرف انى اشتغلت معاكم السنة دى...ونفسى تتكرر تانى ان شاء الله

ومش هنسى ال 30 delegate اللى بدماغهم العالية عملوا شغل عالى على مدار 4 ايام ..:)

8 او 9 شهور شغالين فيها ...تدريب...وفرح...وحزن...وتعب...وخناقات...

9 شهور هيفضلوا اجمل 9 شهور قضتهم او عشتهم فى حياتى بجد

احنا فى2008 كنا البداية

و2009 ان شاء الله باقى الطريق

على فكرة...انا نجحت..:)

يا ليت العام كله اضراب

هيييييييييييييييييييييييييييييييييه

الشوارع كانت فاضية وطلعت لسبب واحد...مش اضراب...لع

الناس خايفة تنزل عشان اللى طلع اشاعه وقال ان الناس بتوع الاضراب هيضربوا اى حد هيفتح محل او يمشى فى الشارع

لان جدتى بتقولى امبارح ان الست الصيدلانية اللى بتديها الحقنة مش هتيجى عشان الاضراب وخايفة ليكسرولها الصيدلية

بس سيبكم من كل ده...وسيبكم من الامن المركزى اللى كان اكتر من الناس

الشوارع كانت فاضيةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة

وده فى حد ذاته انجاز ليا عشان انجزن 8 مشاوير فى ساعه واحده

عن يوم الكرامة اتحدث

بيقولوا هيعملوا اضراب فى البلد كلها يوم الاحد 6 ابريل

طب كام سؤال وعاوز اعرفه

مين اللى دعى للاضراب ده

مين اللى اختار اليوم

واصلا اشمعنى 6 ابريل

بصوا انا هبقى سلبى ومش سلبى

لان كذا حاجه دعت ليها المعارضة والناس بتنزل...واللى بيدعوا ليها بينام فى بيته :D

اخرها الحوار بتاع قسم العمرانية

وقفلوا شارع الهرم ومحدش من اللى قال انزلوا راح ..هههههههههههههه

طب ايه الحل؟؟؟

انا كده كده مبحضرش محاضرات...ولا بعمل حاجه...عاطل انا يعنى

يعنى مضرب طبيعى...

بس لسه برضه عند مبدأى..انه مش هتغير حاجه..

should i...?!!

انا مضايق

صوتى مش موجود

التهاب حاد فى الاحبال الصوتيه

شربت حاجه سخنة وكنت ناسى ...فزورى وصوتى باظوا فى اهم ايام حياتى بمعنى الكلمة اللى محتاج صوتى فيهم

زائد ان الدكتور قالى اى زعيق صوتك مش هيرجع الا بعملية..:(

بجد مش متخيلين كمية الاحباط اللى فيا...:(

تانى حاجه

المؤتمر اللى انا فيه قرب يخلص ومش عاوزة يخلص...

8 شهور بنحضرله ...وحاجات كتييييييييييييييييييير

هتخلص مع يوم الخميس..:(

واخر خبر امتحاناتى 26/5 ...والنتيجة مطلعتش...وكمان مذاكرتش

اهىء

دمـــاء..و..ســكــيــن

حبيبى...هل يمكننى قتلك؟!!!

shall we dance?!

اقف الان ...منتظر ان اراها...

لم اراها منذ زمن طويل...لا اعلم كيف وافقت عقلى على البقاء بعيدا عنها كل هذه المدة الطويلة....اشعر بقلبى يخفق خفقات عديدة...اشعر وكأنه سينخلع من مكانه ...ان لم يكن قد طار وسبقنى اليها...

اشعر بالتوتر...وكأننى فى مقابلة عمل انتظر جلادى لكى يأتى...ولكننى هنا انتظر ملاكى حتى تأتى الى...

ياااه...اخيرا...

شعرت بشىء ما لا يمكننى وصفه هنا...ولكن كل ما استطيع قوله...انى احبها فعلا...

بحبك

---------------------------------

فيه مدونة نونو ...فتحتها قريب...

فى محاولة يائسة انى ارجع اكتب من تانى...

واحتمال حد ينضم الى فيها...

زورونا فى

Words...just words

I gtg

ازيكم يا جماعه..

للاسف الطرطشة مغلقة مؤقتا...

لكذا سبب هقولكم عليه..

اول سبب ان الناس القريبة منى بتزعل بسبب كلامى...وبيجرحهم...

وده اكبر عيب فيا واللى لسه بندم عليه...انى خليت شخصية السفاح معروفة...كان المفروض تكون مجهولة...

تانى سبب..انى مفحووت بمعنى الكلمة فى شغل النموذج...بجانب انى ابتديت اذاكر والم نفسى حبة...فمش لاقى وقت حتى اشوف اهل البيت اللى بقيت اجى انام واخد دش بس فيه...

بعتذرلكم تانى...حبة كده بس ارتب اوراقى...واحاول اظبط وقتى...وارجعلكم تانى...

اضافة انى بضايق كل ما بدخل والاقى نفسى عاوز اكتب بس ببقى خايف على شعور اللى حواليا...

للاسف هقفل الكومنتس هنا عالبوست ده عشان مضعفش وارد وابوظ اللى انا محتاجله...

عامل خطة عشان اروق اعصابى حبتين الكام اسبوع دول...لانى بجد محتاج ارجع ربع شخصية زمان

متنسونيش فى الدعاء...

زى مانا بدعى لكل اللى اعرفهم فى كل صلاة...

بسا منؤقتا

حاجات كتير مالهاش تفسير...

وحاجات ليها تفسيرات كتيييييييييييير ...بس مين اللى يفسر ...

الناس كلها بتقولى اكتب...وفتحت الطرطشة تانى بعد ما كانت خلصت رسميا ...ومبقاش فيه تانى..

البير اتقفل ومعدش فيه تانى...وده غصب عنى اكيد..

البوست ده من غير عنوان...لانى مش هلاقيله عنوان خالص مهما عملت ...

اوقات كتيرة كنت بتمنى ان شخصيتى تفضل سرية ومافيش اى حد من اصحابى يعرف انى انا فلان...على الاقل والواحد بيكتب كان هيبقى مستريح حبة...ومحدش يقول لاء متحكيش عنى..لاء خاف على مشاعرى...الخ ....وهما فى الاصل مش بيحافظوا عالمشاعر ولا يعرفوها

من كام يوم قابلت حد من اصدقائى المفضلين...وبقالى شهور مش شفته...ورغم سعادتى بأنى شفته اليوم ده...بس احبطنى احباط راااااااااااااااااااااااااااااااااااااااااااااائع جدا....مش عارف ازاى اشكره...وحقه لان كل واحد بيفكر من منطلق معين...وان كان تفكيره عملى حبتين تلاته ...

وممكن الاحباط ده هيغير حاجات هتحصل مستقبليا....

فيه ناس كانت زمان قريبة منى بعدوا معرفش ليه....بس شكلهم لسه من العهد البائد اللى يستنوا الولد يقوم بالخطوة الاولى ...وكل خطوة لازم الولد يبقى سابقهم بيها...والبنت متاخدش خطوة عشان هى بنت ....ميلزمنيش....

اى علاقة بتبقى تبادلية بتوصل مرحلة انها طرف واحد يبقى بناقص...:)

حاجه مهمة...مش اى انسان ننخدع بمظهره من برا ...لان يا ما فى الجراب يا حاوى.....

بقالى كام يوم دمى محروق من مشاكل فى الشغل...وللاسف الفريق مش بيقدر وفيه ناس فاكرنا بنلعب ...لكن خلاص وقت اللعب خلص واللى مش عاجبه الباب يفوت قافلة جمال...مش جمل واحد....

نفسى اروح مكان فيه بحر بيتحرك...وهوا ساقع...وكوباية شاى...واى حاجه فى ودنى...واقعد هناك كده فترة لوحدى...هانت خلاص...

النهاردة الجمعه 29 فبراير ممكن اعلنه يوم الاستفزاز العالمى وحرق الدم بجداااااااااااااااااارة

يوم من اوله زبااااااااااااااااااااااالة ...بمعنى الكلمة وكذا حاجه اتفركشت...ووصلت لدرجة الانفجار...وعشان مخسرش حد قضيتها فى البيت احسن...

للاسف انا كنز بيضيع نفسه بنفسه....حقيقة ..

بس كده...لو عرفتم تحطوا للبوست ده عنوان...اكتبوه..

مش فارقة اوى

Useless

........

Wadi El-Natrun

السبت 23 فبراير ان شاء الله

فيه رحلة طالعه الى وادى النطرون
مكان اسمه

نبع الحمره

الرحلة دى تبع نموذج الرئاسة الامريكية

وده اللى فى سياسة واقتصاد جامعة القاهرة ...

هتكون الرحلة ب 65 جنيه شاملة الانتقالات والفطار والغدا...واللى هيكون بوفيه مفتوح

طبعا هناك المكان هيبقى زى استجمام...ومنها تغيير جو ظريف

الصحبة احلى طبعا...

فقلت لو حد من اللى بيقرا هنا عاوز يروح

يكلمنى على موبايلى...

او يكتب هنا...

عشان اعرف اتفق معاه واقابله واخد المصارى

واعرفه باقى الحوار

وشكرنززززز

موبايبلى:

0106377328

aah...i forget it

if any one in Face Book...

he/she can join us in our event there

on this link:

http://www.facebook.com/event.php?eid=10454171873

I won't say thank u.....

هوا انا مش هقول شكرا...

لانها مش هتكفى الناس اللى ردت وخلتنى غصب عنى ارجع للكتابة من تانى....

بس نبعت رسايل صغننه...

بخل بقى معيش رصيد عالموبايل :D

Self meaning:

سعادتك عارفه غلاوتك...ومش هعرف ااقولك ايه بجد...بس كفاية رد فعلك لما قولتلك انى فتحته تانى

Ocean eyes:

على فكرة بحب تفاؤلك وحبك للحياة كده بابتسامة دايما..:)

البنت الشلبية :

الابتسامة دايما برضه...بس بحكمة ورزانة جميلة...

3araby:

من اكثر الناس احتراما قابلتهم فى حياتى...واكثر الناس انا بفتخر بانهم من اصدقائى...بجد...رغم انه قلب عليا الترابيزة فى الكومنتس...بس بحبك يابنى بجد...ابنى...المفروض ااقولك يا عمو :D

Raspoutine :

الراجل ده احرجنى بجد بجد....وقت ما هو اختفى قلبت عليه الدنيا عشان اعرف ليه قفل مدونته واختفى...والحمد الله رجع بعدها واطمنت...فافتكرت كده لما شت اسمه وتعليقه...مش عارف ااقولك ايه بجد..:)

Anonymous :

انا بخمن مين...بس مش عارف خمنت صح ولا غلط....الرد بتاعك..مضحك حبتين...بس يدى حبة امل...:)

وبعدين فيه ناس برضه هشكرهم...باقى اللى ردوا...ومش معنى انى مبعتش مسج يبقى معزتكم مش هى ...تؤ...الرصيد خلص...هههههههههههههه

الستة بتوع صيدلة .....عاليا حليم.....Keda sponsor .....Bota......زى الهواا.....R.O.U.R.O.U. ...... عابرةالسبيل.....Cleopatra ....

Merci lekom begad...

& el fatra el gya will see an big change her...:)

Prout to be EGYPTIAN...

hwa tweel 7aba...but it deserve...

punish ur people because of ur system

حاليا...بيتم معاقبة الشعوب ...وذلك لمجرد انهم شعب دولة ما نظامها فاسد....


وهذا الحال فى فلسطين الا...فشعب القطاع...قطاع غزة يتم معاقبته من قبل اسرائيل عشان حماس مش عاوزه تعترف باسرائيل ووجودها...ورغم ان ناس كتير لا يعترفوا بوجود اسرائيل...بس كدولة احنا معترفين بيها لمجرد ان بينا وبينهم معاهدة موجودة....

بقالى فترة عاوز اتكلم عن ازمة المعبر بس ساكت....قلت اتفرج الناس اللى حواليا هتتعامل ازاى معاها...فبالنسبة للمصرين جزء رحب بيهم بس رافض طريقة دخولهم...وجزء رافض فكرة انهم يدخلوا اصلا ...وجزء قاعد فى حاله مراقب للوضع...

بس السخرية فى الامر ان الجزء الاولانى فيه ناس كتير بتتهم بالخيانة والعمالة وانه مش بيناصر القضية ولا الوطن عشان ممجرد انه عارض فى طريقة دخولهم لبلده...عشان الناس التانية شايفه انه اصلا المفروض ميكونش فيه حدود بين الدول العربية

ده غير الجزء الاول ...فيه جزء تانى شايف ان مبارك اتزنق وفتح المعبر غصبن عنه...انا شايف ده غلط لان اعتقد كلنا عارفين انه مش لعبة ولو عاوز يطربقها عاللى جابوهم هيعملها ...سهلة اوى...بس هوا فتح المعبر او بالاصح ادى الامان ان محدش من الجنود يعتدى عاللى داخلين...ومش فاكر قال ايه بالظبط...بس تقريبا هوا الزعيم العربى الوحيد اللى اتحرك...

الفلسطينين دخلوا وظبطوا حالهم واخدوا كل شىء فى رفح والعريش ورجعوا وفيه اللى برطع وتقريبا كان جاى يتفسح...وفيه اللى مزقوق اصلا من اسرائيل كان رايح يخربها...الخ من الانواع دى

فالحكومة بتاعتنا قطعت الامدادات عن لاررفح والعريش عشان الناس تبطل تدخل وترجع بيوتها ...عشان يعرفوا يدخلوا المساعدات وميحصلش هرج ومرج ويتهجم عالقوافل اللى جايلهم غزة...بس انت بتكلم مين...الامخاخ الجزمة لازم تفسر كل شىء على هواها...واننا بنطردهم....

حاجه كمان قرفانى...اسلوب المعاملة من الفلسطينين فهم يروا ان من حقهم الدخول وده على عينى وعلى راسى من فووق...بس بالذوق...مش بلطجة هى...اضافة لكده ان فيه ناس محسوبين عالعرب للاسف غلط...وابتدوا يلسنوا على مصر ...كعادتهم...وللاسف بلادهم لم تقدم 1% من اللى مصر قدمته فى حياتها لفلسطين من ناس ومساعدات

لذا فى الاخر....هما كلمتين حلوين....

لا تكون التعاطف او تأييد القضية بالصور ورفع الشموع فى المدونات ...بل تكون بالقلب ايضا ومش لازم ااحط شعارات عشان الناس تعرف انى مناصرهم..
الشىء التانى ان اى كلب ...شايف نفسه...وهيجى يوم يتخبط فى عقله ويتطاول على بلدى...او يحاول يمس كرامة ابناءه...او يفكر انه يقول حاجه وحشة عنها...تحت جزمتى ...وده التصرف الطبيعى اللى بنعمله للكلاب الضالة

عاشت فلسطين حرة...وكما قال الشاعر الفلسطينى الصامد....لن تمروا...على جسدى...لن تمروا ...

Abu Treka is Our Wizard.....

عدناااااااااااااااااااااااااااااااااااااااااااااااااااا

نعتذر عن هذا الغياب الغريب...

بس انا من يوم السبت اللى فات لغاية امبارح نايم فى السرير بسبب نزلة شعبية حادة

والحرارة عندى كانت بتلعب فى ارقام غريبة لو كنت جبت الارقام دى فى الثانوية كان زمانى دخلت طب ..هههههههه

طبعا انا واخد ادوية بالعبيط تفتح صيدلية لوحدها ههههههههههههههههههههههه

بس افتكروا كل يوم الناس اللى بتدعى ربنا تدعى عالراجل اللى اخترع الحقن .....عاللى صنعهم

ما علينا برضه......صحيت من النوم كانوا فجروا بيروت كالعادة يعنى

وفى غزة كالعادة برضوا بيقتلوا فيهم...ايه الجديد يعنى...بففففففففف...عاتى

واخر حاجه انهم كسروا الحدود ما بينا ودخلوا اشتروا الحاجه وروحوا تانى....

طبعا اللى كان قافل المعابر اسرائيل والحلوة بتاعت الفلسطينيين اللى مسكاهم...

يلا ما علينا

المهم يوم ماتش مصر والكاميرون انا كنت بتفرج عليه من منازلهم...او بالاصح من سرايرهم

والحرارة فى اليوم ده سجلت اعلى مستوياتها ...كانت 41 تقريبا....

امبارح برضه كنت حاسس ان الحرارة هتعلى بالشلل اللى كنا بنلعب بيها...وقاعد وساكت ومش عارف انفعل خاالص...لان ابويا قاعد جمبى وجوايا شتايم بالجملة للاعيبة بتوع الاسودان اللى نزلوا يضربونا مش يلعبوا معانا....

ما علينا ....انا بس بقالى كتير ما عملتش لوك لوك مع اى حد وموبايلى مقفول وحالتى النفساوية كرب حبتين فاستحملونى معلش

نيجى لبقية الرغى ان لسه فيه ناس شايفه ان رايها بس اللى صح واللى معارض ليهم هوا الغلط.....

الناس دوول ااقولهم
طظظظظظظظظظظظظظظظظظظظظظظظظظظظظظظظظظظظظظظظظظظظظظظظظ

كبيرة كده وتخزى عين اللى ما يصلى عالنبى

هههههههههههههههههههههههههه

انا بقيت كده ليه...قعدة البيت بتأثر عليا فعلا

قووم ايه ابو تريكة لما جاب الجون التانى والاولانى ليه رفع الفننة بتاعت وكان تحتها تى شيرت عن غزة عالله يطمر بس فيهم....ناس تاكل وتنسى يوم ما السادات مات وعرفات رقص ...ما علينا...احنا برضه شعب اصيل ...وناس بتعرف الاصول

كفاية عك كده مؤقتا...ونراكم فى نشرة الرابعة مساءا على خير ان شاء الله


كان معكم عمو السفاح من سريره الكائن بحجرته...

يتحدث اليكم مباشرة من اللب توب اللى مالهووش صاحب

بسا

ذكري تؤلمنى....

جلست لاكتب ما بداخلى ...

فلم اقو على هذا

جلست لافكر فى ما انا

لم اقو على هذا

جلست لابكى على حالى

وجدت الدموع تنهال من عيناى

جلست لاحزن على ما حدث لى

فوجدت القطرات تنهال من عيناى

اخذت ابحث عن قلب يحتوينى

ففشلت ...وعدت خائبا ..صفر اليدين

ذهبت لابحث عن حضن يضمنى

وجدتهم بحاجه لمن يضمهم ...ويحتويهم

احسست اننى بمفردى فى هذه الحياة

احسست اننى فى الكون بمفردى ...

ارى من حولى سعداء

واراهم يبتسمون من قلوبهم

كم اتمنى ساعة واحده

بل دقيقة

وربما ثانية

ابتسم فيها بحق

ابتسم من قلبى

قلبى الذى قمت بدفنه

قلبى الذى قمت بازاحته بعيدا عنى

حتى استطيع الحياة

بعدما قام من قام

بنزع السكين من موضعه

ووضعه فى قلبى ...دون اى تحذير

دون شفقة او رحمة

قام بطعنى ...مرة

واثنان

وثلاث

لا يهم

فهذا ليس قلبه

لا ارى امامى من دموعى

ذهبت الى الليل اشكو له همى

واقول له هل انت ايضا هكذا

وجدته وقد تعاطف معى

ووجدت السماء تمطر دموعها

وجدتها تفرغ جعبتها من الدموع

وكأنما لسان حالها يقول

لست وحدك من يموت وهو حى

لست وحدك من يغرق وهو على الارض

لست وحدك الذى لا يرى امامه

وفى لحظة تلك

يسألوننى اين وضعت قلبى ...

اجبتهم بكل برود...

وضعته حيث توضع الذكريات المهملة ...

وضعته حيث مكانه مع الماضى المنسى ...

وضعته فى مكان لا يمكن ان يعود منه مجددا

ومازلت لا ارى امامى ...

وابحث عن عيناى

بين بحور الدموع تلك ...

فأصبحت ذكرى تؤلمنى


وكلمة تقتلنى

تحدييث

البتاعه دى كتبتها من سنتينن

انا بقي عندى 21 يا سوعاااااد

سن الرشد....المرحلة اللى بتخليك مسئول عن تصرفاتك...كاااامل الاهلية ...سن المسئولية ..

دول تقريبا التعريفات اللى جت فى دماغى عشان ااعرف العمر اللى انا وصلتله وهوا ...21

ياااااااااااااااااااااااااااه....هوا عمر مختلف بكتيييييييييييييير عن اى عمر ...

مش عارف ليه...بحسه اسبشيل كده ....

ومبيجيش كل يوم...

خلاص دى قراراتى اللى هعملها السنة دى ان شااااء الله ...

انى هبطل جنان..

















واتجنن ازيد... :D

مش متخيل نفسى متجوز وعندى عيال وشغل بشتغله وورايا بيت ومسئوليات

واحده صديقة ...ان لم تكن كأختى دلوقتى قالتلى مرة انها مش عارفة تتخيلنى انى اب او متجوز وعندى اسرة... :D

الصراحة عندها حق....

واحد اغلب الوقت مجنون...عنده بروود عجيب...افكار متناقضه ساعات....

عنده فكرة للعالم المثالى...يعانى من حاجات كتير مضيقااه...

وهوا مش واثق انه هيتلافى الحاجات دى فى المستقبل بتاعه وبتاع الناس اللى هيشاركووه حياته

فيه واحد زى اخويا التانى ....معجب بتفكيره جدا...هوا عملى...طموح...مافيش سقف للافكار عنده...ناجح...وبياكل الجاتوة فى بيته بمناسبة عيد ميلادى...هههههههههههههههههه

بحاول اابقى كده....مش باكل جاتوه..ههههههههههههههه....لاء قصدى فى التفكير...وازاى اخطط وبنجح...

بس طالما فيه ناس بحكم انهم اهلك وحاطين نفسهم فى موقف المخطط وعمرهم ما حطوا ثقتهم فيك انك انت تخطط وتجرب وتفشل وتنجح....ودايما اى ناجح محسوب ليهم والفشل انت دايما السبب....يبقى عمرى ماهعرف ااحلم واخطط كويس...:)

دوشت راسكم...كفاية كده...

خلينا عايشين لبكرة احسن ...

كل سنة والسفاح طيب...

كل سنة وهوا بيقتل ناس زى عادته

كل سنة وربنا رازقه باصحاب واخوات كتيييييييييييييييييييييييييييير عوضووه عن ناس نو كومنت عليهم....

كل سنة وانا هنا فى طرطشتى ومعاكم وبطرطش كمان وكمان

كل سنة والفيس بووك بيعيد عليا زى الصورة اللى هحطهالكم ناااو...

يلا هقووم ااقطع التورتة اللى لسه موصلتش :D

طراطيش مختلفة...ودار الكتب...

البوست ده انا بكتب نصه...وفيه واحد تانى كتب الباقى ...

الحمد الله ايدى تحسنت بشكل غريب...سبحان الله....هوا فيها مرض بيخليها تورم فى الشتا...واحنا فى امتحانات...يلا الحمد الله بركات دعواتكم...

المهم...رحت النهاردة مكتبة البلد...وطبعا عشان اعرف اروح...كان لازم اابقى قبلها فى الشارع...فتقريبا شفت افلام كتير توداى...

انا وصلت الساعه 6 بالظبط..كان فيه ناس كتيرة...

منهم وائل عباس....واحمد الحداد ...ومحمد مفيد...واحمد مبرمج حر...وواحد بلوجر زميل اسمه لطفى من ايام التجمع بتاع الاوبرا ...اللى كانت منظماه ياسمين ...طبعا وينكى مش شفتها واللى قالت جاية...انا عشان امتحاناتى يادوب هى ساعه وكنت فى الخلعوون...

وقناة او تى فى كانت بتصور...معرفش تبع انهى برنامج....هههههههههههههههههههههههههههههههه

بس كان يوم حلو رغم الوقت الصغنن اللى قعدته...

وان شاء الله الفكرة بتاعت صاحب البوابة تكبر واللى هى موقع دار الكتب....

ومع انى متعرفتش عليه...بس بباركله وطبعا يومك يا باشا عشان الموقع وتدشينه وكده...

مممممممممممممممممممممممممممممممممممممممممممممم

بس كده ...يلا هقوم اكمل دح... :D

ااه انا معجبنيش الشكل اللى غيرته بتاع الطرطشة

فرجعتها سودا من برا...بيضا طبعا من جوا ;)

اخبار الطرطشة...

ازيكم ايها الضحايا الاعزاء...يارب تكونوا بخير...

نعتذر عن عدم الرد عالبوست اللى فات عشان ايدى اليمين بايظة حبتين وبكتب بالشمال بالعافية...

بس حبيت انوه عن كذا حاجه....

اولا صاحب البوابة...بكرة ان شاء الله هيدشن موقع دار الكتب ...معلش مش عارف ااكتب القصة وكنت هرغى كتيييير بس ايدى ضايعه ومخنووق وانا بكتب كده..:(

المهم ...ده كلامه:

لذلك أدعوكم يا أحبائي يوم الخميس القادم الساعة 6 مساءا في مكتبه البلد لكي نقص سوياً شريط افتتاح الموقع ونوقد شراره انطلاقه نحو خدمه كل المثقفين والمهتمين بالقراءة

عنوان حفل الإفتتاح / مكتبه البلد - ميدان التحرير بوسط البلد - 31 ش محمد محمود أمام الجامعة الأمريكيه

تليفون مكتبه البلد / 27922768

انا هكون موجود بكرة ان شاء الله ...ياريت ااقابل حد من زوار طرطشتى...وان كنت حاسس انه هيبقى صعب..مش عارف ليه...

تانى حاجه....البوست بتاع فى اكياس ولا سايب اللى تحت ببوستين....نفسه ااكييس منه 5 اكياس وابعته لـ5 اشخاص...فوور فرىىى يعنى مجانا...عشان اتضح انهم عاوزين منه بجد وضرورى...وكفاية كده عشان مقبحش على حد ميستاهلش..:)

تالت حاجه...ادعولى اتعافى بسرعه وارجعلكم...:)

واختفت ملهمتى....

استيقظت فزعا من نومى...بمجرد رؤيتى لكابوس ما وانا نائم فى سبات عميق...استعذت من الشيطان ...ونظرت حولى ...فوجدت اننى مازلت فى منزلى...بداخل غرفتى...لم استطع معاودة النوم...بعد ما رأيته او شعرت به بالاصح...انتظرت حتى الصباح ....رغم مرور الساعات كالسنوات الطوال....حتى جائت الساعه السابعة صباحا...لم استطع ان اقاوم ...وقفزت الى هاتفى النقال لكى اتصل بها واطمئن عليها...ولكننى وجدت هاتفها مغلق...

هممت بأن القى بالهاتف بعيدا كى لا اسمع تلك الرسالة المستفزة...ولكننى تراجعت لان اذا كسر لن استطيع ان اصل اليها...جررررر...ولكننى بالفعل لا استطيع ان اطمئن عليها...هاتفتها ثانية وثالثة ورابعه ولكن دون جدوى...تلك السيدة التى لا تمل ولا تكل وتردد تلك الرسالة المستفزة...ربما اذا علمت كم الشتائم والسباب التى تكيل اليها كل يوم وبسبب ما تفعله بصوتها ...لما سجلت او عملت اصلا فى هذه الشركة..

فتحت حاسبى المحمول...ورغم اننى لا ااخذه معى الى اى مكان..ولكننى قمت بفعل ما لا افعله يوما...وكل دقيقة احاول ان ارى ان كانت دخلت على صفحتها الشخصية ولكن دون جدوى....احسست بالاحباط....شعرت وكأن من يعطينى السبب لكى اعيش اختفى...حتى جاءت الى بادرة امل عندما وجدت رسالة منها...ولكن يالخيبة الامل....كانت من اختها تخبرنى بخالتها النفسية السيئة...وانها فى عزلة اجتماعية وتريد منا ان نبتعد عنها ونتركها فى حالها الى ان تعود مجددا مفعمة بالنشاط والحيوية...

صراحة فى بادىء الامر احترمت تلك الرغبة...ولكننى الان ارفضها تماما...فهى التى كانت بالامس ترانى عابس الوجه...تحاول ان تجعلنى اضحك...تحاول ان تجعلنى انسى همى...وتسرى عنى...دائما بجوارى انا وباقى الاصدقاء....شعرت انها قلب صاف ...يتأثر بخيانات الاخرون له ...قلب برىء كل ذنبه انه ظن ان العالم للملائكة فقط...ولم تعى انه للشياطين ايضا مكان بيننا....

اختفت ملهمتى ...اختفت من تجعلنى ارى الحياة وردية...وهاهى تراها سوداء قاتمة ...ترفض حتى ان تحدثنا بصوتها وتقول لنا انها بخير....اختفت من كانت تعطينى السعادة...برغم اختفاء هذا المصطلح من حياتى منذ سنوات عديدة....اختفت ملهمتى ...والتى بدونها اختفت معها الكلمات واختبأت المعانى وابت المشاعر ان تتحدث وتخرج هنا فى طرطشتى المتواضعه....

لذا...جئت اليوم ...اناشدكم...اناشد كل شخص يعرفها...اناشد كل من يكن لها حبا...ان يجعلها تعود مجددا لنا...ان تعود وتعطينا ما كانت تعطيه لنا كل يوم...ان تعود وتلهمنا الامل والصبر مجددا فى زمن اختفى فيه الطيب خلف قناع الشرير....ان تعود وتترك لنا ابتسامتها التى تعودنا ان نراها فى كلماتها او حتى فى صوتها ....

اختفت ملهمتى...ولكننى لن ابقى فى مكانى واكتفى بالولولة عليها وعلى ضياعها...بل سأذهب وابحث عنها...حتى تعود مجددا ...وتلهمنى مثل السابق...

ليت الزمان يعود يوما....

ايام ولت...وذكريات بقيت ...

عندما يتحادث الطرش...

تخيلوا لو اثنين سمعهم ثقيل وتكلموا مع بعض!! .اية الي هايحصل؟
تعالوا نشوف اثنين من دول واقفين على محطة البـاص ودار بينهم الحوار دة

الأول : الاتوبيس ده بيروح مــصر الجديدة؟

الثاني : على الحديدة !!... ليه انت طالب احسان

الأول : بذرة الكتان !! لا ..دي تلاقيها عند العطار

الثاني : جزار!! اه ...قوللي كده .. عايز تشتري لحمة

الأول : معك حق.. الدنيا زحمة ..علشان ده ميعاد خروج الموظفين

الثاني : نور الدين !! لا والله .. ماعرفوهش

الأول : ما بتشربوش!! ليه ..كفا الله الشر

الثاني : رأس البر !!! ...ده مــصيف هادي

الأول .: عايز تركب للمعادي... دي منطقة جميلة

الثاني : بليلة !! انت شكلك كده جعان

الأول : عيان!!! أي والله .انت باين عليك عيان ..طيب ما تروح للدكتور

الثاني: الحنطور!! ده احسن من الأتوبيس ، وبيوصلني لحد الباب

الأول : هبــــاب !!! وانا اللي كنت فاكرك محترم

الثاني : اتخـرم !! هو مين ؟؟

الأول : عاوز اسـبرين ! ليه انت عندك صداع ؟

الثاني : قراع !!! ينهار اسود . ده مرض خطير

الأول : لا والله مش عايز. وبعدين مش بأحب الفطير. تقيل على المعدة وتمنه غالي

الثاني: خالي.. انت تعرف خالي ؟ ده راجل كبير في السن

الأول : الجن .. نهارك مش فايت ..انت عليك عفريت .!؟

الثاني : لا والله ..ممعاييش.. انت عايز الكبريت ليه . عايز تولع؟


الأول : أدلع ! أدلع عليك انت!؟ انت ما تملاش عنيا

الثاني :يقبضوا عليا !! ليه !؟

الأول : انت غريب يا راجل انت..شكلك شحات ، (يدفعه من القميص) روح اشتغل شغلة تاكل منها عيش

الثاني : خيش!! والله ده صوف انجليزي

الأول: بنتك زيزي!!! ربنا يخلي...

الثاني : أنتاج محلي .!!!! ده مستورد


يمر شاويش من بتوعنا ... يلفت انتباه الحوار، : بتعمل ايه يا جدع منك له!!!

الاتنين: ايوة يا شاويش ...احنا مستنين الأتوبيس


الشاويش :! نهاركم مش فايت .... جواسيس !!! قدامي على القسم

نزهة فى بحر الماضى...

حاجه جربت اكتبها عشان صوابعى متنساش التأليف...

وشغلت الاغنية اللى هتلاقوها على يمينكم...

وابتدى الكلام يتكتب....

يارب تعجبكم..:)

فى نزهة معتادة على شاطىء البحر ...ينظر اليه مليا ...يفكر فى ماضيه...والذى مات ودفن معه العديد من المشاعر ...وبرغم انه مع قلب اخر الان...ولكن هذا لم يمنعه من ان يفكر بها ...كيف كانت ...

قرأت كتابة لشخص ما ...ويتسائل هل من الممكن ان ينسى الانسان حبيبه فى يوم من الايام...؟؟ ولكننى اضيف عليها...هل يظل متذكر كل تلك اللحظات الجميلة برغم ان حبيبه قد نساه ووضع صفحته بداخل كتاب الماضى واصبحت طى النسيان...

اكمل نزهته على شاطىء البحر....ووقف ينظر اليه مجددا ...ولم يعبأ بأمواجه المتلاطمة والتى كانت تضرب الصخور بقوة ...وهذا الهواء البارد يلفح وجهه...ولكنه ظل ينظر ...ويفكر...فى هذه الجميلة...كما كان يحلو له ان يطلق عليها ...

ااه يا زمن فيما....

"ماذا تفعل فى تلك الساعة سيدى؟؟"

هكذا انطلق السؤال من فم هذا الشرطى وهو يسأله فيما يفعله فى تلك الساعه المتأخرة من الليل على شاطىء البحر...فنظر الى الشرطى وود ان يهم بضربه لانه اخرجه من حالة تفكير عميقه...ولكن فى نفس الوقت اراد ان يشكره لانه انقذه من اوهام ما كادت ان تغرقه داخل بحرها الثائر...

"سيدى...هل انت بخير ؟"

هكذا نطقها الشرطى مجددا ...عندما لم يجد استجابة منه او رد...

فرد عليه قائلا...نعم ...انا بخير ..اعذرنى...ودس يديه داخل معطفه...وسار مبتعدا عن البحر...الذى يحمل اسرار كل المحبين...ولكنه لم ينس ان يودعه بنظرة خاطفة...ثم امسك بهاتفه...وطلب رقم حبيبته ...وقال لها "احبك" ...

حبيبتى...من تكون

مش عارف اذا كنت كتبت البوست ده هنا قبل كده ولا لاء

بس مش مشكلة

بما انى "مطحون " فى المذاكرة...

قلت ااخلى ختام السنة دى مسك بأحب حاجه كتبتها لقلبى...

يارب تعجبكم..

اتكتبت بتاريخ: 16 نوفمبر 2005

حبيبتى

يا اغلى شىء عندى فى حياتى

كم احبك

كم اعشقك

كم احب ان اتباهى بك

لذا سأ صفك الى كل من اعرفه

لكى يعرفوا من هى حبيبتى

عيناها مثل حبتى اللؤلؤ

لوناهم مثل لون البحر ازرق

انفها .....صغيرة ورقيقة مثلها

فمها يشبه حبات الكرز فى لونهما

وفى صغرهما

اما وجهها فهو ابيض كالثلج

وبه نور ....نور الايمان

الا تعرفون من هى

انها حبيبتى

فإنها

والـــــــدتـــــــــــــــى

كم احبك

فى اكياس ولا سايب ..؟؟؟؟

ممممممممممممممممممممممممم

مسحت اول سطرين اكتر من 10 مرات عشان اعرف الاقى مقدمة مش عارف ...فقلت اخليها كده عريانة....

فى الاول بعتذر جدا جدا جدا لاى حد بيعمل كومنت ومش برد عليه....

لان المذاكرة مطلعه عينى ...وبرضه الموود مش متظبط...وعندى فقر ابداعى حبتيين...:)

بس نيجى للموضوع ....

ياترى ايه اللى فى اكياس ولا سايب....

حاجات كتير ....

بس اولهم الذوق اللى اعتقد انه ولا بيتباع سايب ولا حتى فى اكياس...

دى حقن اهالينا بيدهولنا زى الفيتامين من واحنا صغيرين واحنا بعد كده بنتأقلم مع المجتمع...

وحسب طلع عندنا ذوق او ميطلعش...

بس تبقى ناس كبيرة وعدت سن الرشد...وتلاقى "قلة الذوق " بتنقط من بقهم وبتتكلم على ناس فى غيابهم بقلة "ذوق " برضه ....

ده اللى ما ينفعش ....ولازم نفتح محل الاخلاق ونبيعلهم نص كيلو ذوق...اينعم مش هيكفى معاهم....بس عالله يطمر فى اشكالهم ....

وممكن بعد كده نسفرهم برا على نفقة اى واحد "ذوق" يعالجهم فى اى مستشفى بتاعت اخلاق ...:)

لغاية لما نلملهم من السوق ذوق معبى ومغلف عشان يناسب حالتهم ....

ايه تانى ممكن يكون متكييس او سيب....

ااه الاحساس اللى بقى غايب عند معظم الناس ....

او بقى مختفى ومش بقينا نشوفه....

يلا مصلحة كمان ...

يبقى كده عندنا ذوق...وعندنا الاحساس ....

ايه...مين...

سامع صوت حد بيقولى الضمير....

لا يا بابا ...سعادتك الصنف ده انقرض ايام بنى البشر....

ودلوقتى بقوا ماشيين بضمير "بلتى اوت " مش زى الـ"بلتى ان " بتاع زماان ....

اللى بيبوظ منه مالوش قطع غيار ولا اكياس ولا حتى سايب ....

اييييييييييه ...يلا ماهى بقتش تفرق سينا من سونيا ....

اخر حاجه ممكن الفهالكم فى اكياس....

اكوام الرمل الاسود اللى بقالها شهر بتنزلنا من الحنفيات بدل الميه....

على الاقل اللى عاوز يبنى ده رمل بيلبد ومش بيتزق بسهولة وبيمسك نفسه اجمد من اى رمل مبلول....

حسبى الله ونعم الوكيل فى كل ظالم...

وحسبى الله ونعم الوكيل فى كل واحد فاكر انه عنده ذوق....

لكن الحقيقة المفجعة ...ان الذوق اتبرى منه

والكلام ليكوا يا جيراااااااااااااااااااان ;)

Welcome

ok my dearest people....

i don't know why i decided to travel to other bloggers in different countries...but the thing that i'm sure about ...that it will be a very interesting journey....

& that need some practice on how talkin' & how writtin' in English ...

so i wrote this post to try some thing new...& if any one ...the foreign bloggers that i visited yesterday show up...may be he/she leave a little comment here :)

so welcome everybody in " Tartashet afkar"

الموت علينا حق....

فى الاول بعتذر انى "شلحت " البوست اللى فات نظرا لانه نزل بسرعه وقلت اشيله لوقت تانى ....
وكمان بعتذر لـوشــوشـــنـــى انى منزلتش البوست اللى قولتلها عليها...

بس اعتبرى الحتة دى البوست مؤقتا...عشان هى احرجتنى بكلامها ...فقلت لازم اشكرها ...وادعولها يدخل تلفون عندها وعشان النت يرجع بدل ما هى متشردة فى كل مكان تدخل منه عالنت...:)

نيجى بقى لموضوع البوست اللى ممكن ناس تشوفه كئيب ومش حلو ....الموت...طبعا اغلبنا ان مكنش كلنا مؤمنين بربنا وبالموت وان هيجى وقت ونموت ...ونندفن تحت ونسيب كل حد نعرفه غريب ولا حبيب....ومافيش فلوس معانا ...كل زادنا اللى قمنا بيه حسنات واكيد سيئات ....

بس فيه ناس للاسف رغم ايمانها بالحقيقة المسلمة دى ...مش بتبقى عاوزة تموت وتسيب الدنيا ...عارفه انه هيجى يوم وتموت....وساعات بتتمناه ...بس لما بيجيلها ...بيقولوا لاء لسه بدرى علينا ....مش عارف يعنى من ايه هنتمسك اوى بالدنيا او اللى فيها...يمكن الناس اللى تحت او فى البرزخ عايشين احسن مننا ...يمكن عالاقل مافيش ناس بتكره بعض....

زمان كنت بخاف جدا انى اموت ...او انى افارق الناس اللى بحبهم ....بس جت عليا فترة من سنة او سنة ونص ...الواحد بقى عنده ايمان انه ميت ميت...ودى حقيقة مش قابله للنقاش او الجدال ...بس اللى بتكلم عنه الاستعداد للموت ذات نفسه مش موجود عند كل الناس ....ووقت ما جدى توفاه الله ....وحضرت كل حاجه من اول الغسل نهاية بدفنه تحت ....مش عارف حسيت يومها انى بعمل حاجه عادية بعملها كل يوم...والواحد سبحان الله حس براحة حلوة اوى ...اينعم ابتديت ازعل بعدها بيومين ....:D

بس اللى عاوز اوصله ان كل ما الواحد ايمانه بربنا زاد وكل مدى بيؤمن اكتر بالموت وانه فعلا حق علينا ومحدش عارف هيموت امتى ولا ازاى...يخلى الواحد حريص انه ميضيعش ثانية من حياته فى اى حاجه مش مفيدة او مش هتزود الزاد بتاعنا فى الاخرة ....ورغم اننا ...بنى البشر يعنى ...بنفضل نتكلم نتكلم...ونفعل قليل اوى...اقل من اللى بنتكلمه ....بس اتمنى ان المرة دى ...يكون الفعل اكثر من الكلام او الحروف حتى المكتوبة ...

يارب مكنوش كئبتكم ولا حاجه...وفيه انسان ما هيضايق لما يشوف البوست ده .....بس كان محشور فى صوابعى ولازم يطلع.....

نهاية اى حد ليه قريب توفى اى حتى صديق...ما ينسهوش بقى بعد ما يخلص قراية وكومنت...ويقراله الفاتحة..:)

.

I nEeD yOu

عيد سعييييييييد ..مااااااااااااااااااااااااااااااااء

زوار ورواد الطرطشة الكرام

جائنا هذا الخبر السعيد....

بمناسبة عيد الاضحى المبارك...

اعاده الله على الامة الاسلامية والطرطشية بالمن والبركات

قرر عمو السفاح عدم التضحية بضحية بشرية هذا العام....

والاكتفاء بضحية خرافية ..

واعلان العفو والسماح عن كل السجناء ....

اللى عالناحية الشمال (عاليمين عندى بس عشان القافية )

وليعم الخير والسرور فى كل مكان

كل عام وانتم طيبييييييييييييييييييين
تحدييييييييييييييييييث:
ذو النون المصرى عمل كومنت عندى فى المدونة الاخرى اللى هى قلب يتكلم....وكتب ابيات حلوة حبيت اشاركم بيها

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل

طاير فى الهوا...

يوم السبت اللى فات ...طلعت رحلة استجمامية مع اصحابى ...قبل الامتحانات بقى وقرفها ...رحت ورمت كل همومى ورايا ...وقلت اغير جو....وفعلا غيرت...المكان كان راس سدر...والجو كان تحفة....بس برغم انى طول اليوم...يا اما كنت مع اصحابى فى الرقص ولعب الكورة....او مع جروب تانى بنتمشى عالبحر...يا مع SelfMeaning هى واختها اللى كانوا فى وادى تانىىىىىىى خالص ...مالهمش اى علاقة باللى بيحصل حواليهم...حتى كان اغلب اصحابى بيسألوا هما معانا ولا ركبوا غلط...هههههههههههه ما علينا

المهم ...الهواية بتاعتى برضه مبطلتهاش انى ااقعد اتأمل حبتين تلاته...الجو بقولكم كان خرافة...وكل واحد فى موود وعلى طبيعته ودى اهم حاجه بحبها فى البشر...محبش الناس المصطنعه واللى تبصلك بوش وبعد كده تبقى قاعدة بوش تانى....الشىء اللى يخليك متثقش فى اى حد....

قعدت على حتة طوبة وبصيت للبحر ...والله ما فاكر كان بحر ولا دى قناة السويس...ههههههههه....بس سيبكم من قضية الميه دلوقتى....الشعور اللى بنحس بيه قدام اى مية...اننا مرتاحين وبالنا رايق...ومن جوانا عاوزين نرمى كل حمولنا فى الميه دى ...يمكن نرتاح حبة من الحمل اللى شايلينه على كتافنا بقالنا سنين ....

بس لاول مرة ااقعد قدامه ومقدرش اتكلم....او حتى اعبر...مجرد صمت رهيب ساد المكان...ودمعة عابرة خرجت تشوف الجو ازاى....واتختفت اكنها مكنتش موجودة خالص...يمكن يكون تغيير فى الانسان ولا عشان الواحد بقاله كتير متكلمش فعشان كده جه الاختلاف....ربما..

ركبت مرجيحه...ااه مرجيحة...اينعم من ابتدائى معملتهاش ...ومن ساعة ما طولت بطلت اركب اى حاجه عالية ...عشان رجلى والارض واحد...بس ركبتها وربعت عليها وقعدت اتمرجح...بقيت افكر لو اللى جوانا بيقع مننا وبيتزاح همنا ...كل ما المرجيحة تروح وتيجى...يااااااااااااااااااه مكنش حد غلب...كانت الدنيا كلها مراجيح...اكتر من اللى احنا فيه حتى...قعدت افكر فى مستقبلى...قعدت افكر فى نفسى...قعدت افكر فى اللى حواليا....لغاية لما اكتشفت اكتشاف مهم جدااااا....

احنا اللى شيلنا الهم لنفسنا....بس مش عاوزين نرميه من على ضهرنا تانى ...لاننا بكل بساطة اتعودنا اننا نبقى مهموين ومسئولين عن اى حاجه.....ده اللى يخلينا لما نرتاح حبة ...نبقى مش متأقلمين ولا مرتاحين خالص ....ولد معانا فى اولى لسه...رغم كم المشاكل اللى عنده بس تبصله تشوف براءة الاطفال ...ومتحسش ان عنده اى مشكلة خالص...بالعكس تحس انه مرتاح ومبسوط 24 قيراط....

هوا ده اللى عاوز اوصله...انى ارمى الهم حبة...ومش معنى كده انى مش اابقى مسئول ....بس مسئول بحساب ومش لازم اشيل هموم اكتر من طاقتى....

ايييييييييييييييه...سونيا...محدش عاد شايفها تانى....

ورجعت من الرحلة...دخلت اوضتى...قعدت عالمكتب...طلعت سكينتى وحطتها جمبى...ومسكت قلمى والورقة بتاعتى...وابتديت اكتب....وعاد السفاح لـ......!!

الضحية الاخيرة

ماسك نفسى بالعافية والسكينة قدامى ...مستنى بس حد يسبنى اروح ااقتله واخلص عليه اريح نفسى واريح ناس كتير معايا...عك كتير كان بيحصل وقرف وزهق من شخصية معدتش 166 سم ...ومكملتش 17 سنة بس الناس ساكته وتقول الفضيحة ومش عارف ايه ...بلا تخلف بلا جهل بقى ...الزمن اللى انتوا عايشين فيه دلوقتى غير زمان بكتير ...

ماسك السكينة فى ايدى المرة دى...حطتها فى الشنطة...اخدت قرارى ...هقتله المرة دى ...ومش راجع فى كلامى ....هقتله عشان اخلص واستريح ....

كتب بتاريخ الاثنين 10/12/2007

الساعه التاسعة ونصف ليلا ....

I miss u

مفتقدك انت يا من تكونى حبيبتى

ابحث عنك بين الورق فلا اجدك

وانظر خلف جهازى ...فلا ارى ثيابك

فربما اختبأتى خلف الكرسى

فاعود خائب الرجا ولم اجد طرطشتى

مفتقد الطرطشة بتاعت زمان....

بس اكتشفت ان كله طرطشة فى طرطشة

حتى وانا فى حياتى اليومية بطرطش وانا مش واخد بالى ...نفسى فى لاب توب جديد بدل اللى راح وولى ...عشان اعرف اخده معايا فى كل مكان واكتب زى ما كنت بكتب...بس تقريبا المشكلة مش فى الجهاز ولا الكيبورد...المشكلة فى صوابع احبطت فمش عاوزة تكتب...

اول مرة اشوف العقل بيدى اوامر للاصابع فترفض وتقوله لاء مش عاوزة اكتب...مش عارف ايه الحل ولا المشكلة فين بس...ولما ربنا فتحها وهداها وكتبت النور قطع...يخى **** ....بجد اعمل ايه تانى...

هوا تقريبا عشان بقيت سفاح طيب ومش بدبح حد....يبقى لازم اعور الناس واجرحهم واقتلهم عشان صوابعى ترجع تكتب من تانى ....سأعود بعد قليل لما الاقى الضحية بتاعتى اللى هتبقى زى القربان...ولو حد عاوز يضحى فى سبيل عودة اصابعى البردانه واللى مش راضية تتدفى بكتابتى...يقول وانا اجيله فورااااااااااااااا

ياترى واخدنى ورايح بيا على فين ؟!!

كانت اخر كلماته لها

سأتذكرك..

ودفن ...

وورى جثمانه التراب..

ولكن اخر كلماتها له ...

سأجعل عقلى يمحوك للابد...

World is mine

وكانت النهاية

وكانت النهاية ...

حلم مات فى اول الطريق

ورجعت قاعد تانى لوحدى

بفكر تانى فى البداية

واحاول ابعدها حبة عن طريق النهاية

عشان مرجعش ااقعد قعدة زى دى تانى

واقول لنفسى

وكانت دى النهاية

ثـــم.....

.

.

.

ش .ش. ش

.

.

.

ِ

جولة نظـــر

فىجولة من جولاتى المكوكية المعتادة ...للبحث عن ضحايا جدد اتسلى بقتلهم...هع هع ...بس المرة دى غيرت رايى ...قلت لما ااقف فى اشهر ميدان فيكى يا مصر واتأمل الناس حبة...بقالى كتير جدا مقعدتش ابص فى اللى رايح واللى جاى...يمكن عشان انشغلت باللى انا فيه ونسيت هواية من هواياتى ...المهم ...قعدت اكتر من ساعتين قاعد فى مكانى اشوف كل واحد رايح فين ...مين بيعمل ايه

تعرفوا بجد حاجه حلوة انك تقعد تراقب الناس اللى هى فى الاصل بتراقبك وبتشوف قاعد هنا ليه...وليه بتبصلها كده ...ووسط الهوا الساقع بتاع النهاردة...يااااااااااااااااااااااااااه على دى متعة ...وميوزك عمر خيرت شغاله فى ودنك ...يا سيدى عالمزااج الرايق يا سفحفح

قعدت عالسور وجمبى راجل بيبيع البلاستيك بتاع البطايق ...وكان شغال بيقول بنص جنيه ...بنص جنيه ...جه واحد كبير يشترى منه واحده وجه يديله ربع ...البياع قاله لاء بنص جنيه ...الراجل رجعله الحاجه بس البياع ادهاله برضه بربع جنيه ...يعنى رضخ للامر الواقع ...تخيلوا معايا ان واحده ست عجوزة وقفت تفاصله فى الربع جنيه وتقوله 15 قرش ...سبحان الله على ده شعب ...مبيحبش ياخد بنفس السعر حتى لو فاصل وجاب سعر ااقل شلن...بالنسباله انتصار على ارادة التسعيرة والبياع

ابص على واحد قاعد عالارض وبيعرض قدامه لعب اطفال بسيطة ...يمكن متكونش غالية ومش مكلفه فى الخامة بس بالنسبة لناس كتير غالية على قلوبهم ومحببة ليهم اوى....راجل كبير فى الخمسينات معاه مراته زيه ...اللون الابيض استولى على نص راسه ان مكانتش كلها ...ومعاهم عيل صغير ...وبيضحك بالقطر اللى بيلف حوالين نفسه ..الضحكة بتاعته دى بتخليهم يضحكوا من قلوبهم...متبقاش عارف ظروفهم ايه ...بس الاكيد انهم اغنياء جداااااااااااااااا بابنهم ده وضحكته المسمعه فى الكون كله

بنات ثانوى طالعين من المدرسة وواقفين جمب المترو ....مستنين ممكن ولد يقع فى المصيدة ويبقى حب العمر ...بستغرب اوى من الناس دى ...يعنى ناس تقف تستنى المترو...وناس تقف تستنى الحب اللى بيبقوا عاوزينه ينزل من كل عربية مترو ...وينتشلهم من اللى هما فيه

عسكرى غلبان واقف بينظم المرور وهوا بيحشر سندوتش طعمية جوا بقه والباشا بيزعقله وهوا بيضحك...كل ده فى حركة واحده ...بس تبصله وهوا بيبوس ايده وش وضهر وراضى عن نفسه وحياته واللى بيعمله ...غلابة والله

وواحد زى العبيط ...هوا فعلا عبيط ماشى بكشكول وورقة وقلم ومخلى الناس تقلدله الرسمة اللى فى الورقة ...ولما تعملها غلط تلاقيه افتكر الكتابة مرة واحده ويصلحهالك...بحمد ربنا انه صعب عليا لان كان معايا واحد خلاص كان هيوديه القسم

وفى الاخر ...واحد قاعد عالسور ...حاطط سماعة فى ودنه...لابس نص كم فى عز البرد والناس متكتكة من السقعه....وبيبص للناس ...وعلى شفته ابتسامة خفيفة...جوا عينيه امل ...وان لسه ياما هنشوف وبكرة احسن من النهاردة...ورافع راسه للسما يبص للطير اللى طاير والسحاب والشمس وهى بتغرب ..عارفين مين؟؟؟

فكروا انتوا بقى ..:)

الطرطشة التى تقرأها غير متاحة حاليا

مكنتش ناوى انزل بوست جديد ....دلوقتى

بس كل ما احاول ادخل على اى مدونة تطلعلى رسالة مستفزة

فعاوز ااعرف لو ظهرتلكم ...وعرفتوا انكم مش هتدخلوا على بلوجتكم تانى وضد رغبتكم هتعملوا ايه

خصوصا لو عطل فنىلا ضييييع كل مجهود السنيني من كتابة؟؟؟

انظر الصورة ودوس عليها عشان تكبر

هــروب...

اهروب هو ...ام اسراع نحو المجهول؟!

عندما تعشق ....

عندما تعشق انسان...

فأنت تتمسك بالحياة من اجله

وعندما تحب شيئا ما ....

فأنت ترفض ان تتنازل عنه لغيرك

وعندما تعشق حياة....

فتبذل الغالى والنفيس كى تظل بها

ولكن

ماذا ستفعل ان عشقت حياة...

واغرمت بانسان

ليس له وجود

الا فى حياة اخرى

هل ستترك الحياة

وتقدم كل يوم التنازلات

لكى تذهب ورائه

ام ستظل فى مكانك

تفعل ما تفعله كل يوم

تأكل وتشرب كأنما ليس هناك اى شىء

بالطبع

فأنت لست عاشق له

ولكن فى النهاية

نظل نخالف انفسنا

عندما نقول كلا

ولن نفعل ما كنا نفعل

ولكن عندما نعشق.......

مغلق للتحسينات

حـــالــة احباط وعدم اتزان بمر بيها بقالى اكتر من اسبوعين

عاوز حبة لوحدى ...وهرجعلكم تانى احسن من الاول ان شاء الله

بس فى الفترة دى اللى هغيبها عاوز اسمع ارائكم ومقترحاتكم عن الطرطشة عامله ايه لغاية دلوقتى

العيوب والمميزات

..:)

هتوحشووونى فى اليومين اللى هغيبهم

كـــ** ام الناس

فى الاول كده اللى هيحس ان البوست مش هيعجبه او مكسوف منه بليييز مش يكمل قرايته ويقفل الصفحة واهى طرطشة وهتعدى

معلش اصل مرارتى جابت جااااز ومكنتش ناوى انزل بوست لانى اصلا مشغول ومش عارف انام بقالى يومين بس نعمل ايه فى مخاليق ربنا

مناقشة بريئة على احد المنتديات الطلابية ...واحده بتتكلم عن البنطلون الساقط بتاع الولاد والبنات ...والحاجات دى

انا مش همشى على كل واحد وااقوله البس كذا ومتلبسش كذا ...مش ابوهم ولا وصى عليهم

فكتبت رد ان كل واحد حر يلبس اللى يلبسه

دخل واحد كلامى حرق مؤخرته اوى ومعرفش يقعد الا لما يرد بمثل مستفز زى اللى جابوه

بالنسبة للأخ Meshmesh أحب اقولك كلمة الكل بيسمعها وبيقولها وبيتحجج بيها

( كل اللي يعجبك .. وإلبس اللى يعجب الناس ) .. ايه رأيك بقي في المثل دا ؟!!!

سورى المثل ده مايخشش بذمتى بتعريفة ....لانه لا ينطوى على حرية

والحرية اللى عندى اعمل اللى انا عاوزة بس متمسش دين ولا حرية انسان اخر

رد هوا عليا رد اكتر استفزاز لما قولتله اعملك ايه

والله يا اخ مشمش ... انا شايف ان بكلامك دا يبقي انتا سوري في اللفظ يعني

عايز تقول طز في الناس .. وان الناس ماتهمنيش

واني ممكن امشي في الشارع مش لابس حاجة .. عااااادي جدا

بقي بذمتك انتا نفسك اما بتمشي في الشارع وشوفت حد مثلا شاذ في لبسه

مابتعلقش ؟ .. ادفعلك 100 جنيه كاش .. لو قولتلي لا

انا الصراحة مش همشى ابص على كل واحد ماشى فى الشارع سواء ولد ولا بنت عشان افصص لبس اهله او اللى نازل بيه الصبح

سورى فى اللفظ اللى كاتبه العنوان ما كــ** امه عالللبس اللى لابسه ينزل عريان ...ينزل لابس الجزمة فى ايده مش مشكلة اهلى

بس المشكلة دلوقتى اننا خلصنا كل مشاكلنا ودخلنا عالهدوم ...وخلاص هى دى اللى موقفه حال البلد

مشكلتنا تكمن فى ثقافة الاختلاف فى الرأى اللى انا بخالفها فعلا بالبوست بتاعى ده

انا اهوة مش بعترف ولا بحترم رايه اصلا

عشان هوا محترمش رأيى فى الاصل واستهفأه

امال ايه لازمة المقولة بتاعت الاختلاف فى الرأى لا يفسد للود قضية

ايه لازمة اصلا اننا نتكلم ونتناقش اذا كان فيه ناس لا تقبل الرأى الاخر بتاتا وعاوزه رأيها هوا الصح دايما

عايزة تبقى هى ام المصلحة الاجتماعية للبلد وهما الملايكة واحنا الشياطين الكفرة اللى بنخرب فيها

سبحان الله بجد ...وبعد كده يقولك الناس مش بتحترم بعضها ليه

هى كل حاجه مرتبطة بالحاجه التانية ....بمعنى

لما واحد بن @#$%&^*..يفعص رجلك وانت واقف عالرصيف وياخد فى وشه ومش يعتذر او يبصلك ويشتمك

عشان حطيت رجلك قدام مسار رجله الكريمة ...حد بالمنظر ده هيولد عدائية عندك انت...والمرة الجاية حد هيدوس على رجلك

هتشنيره اصلا قبل ما يفكر يعتذر او العكس هتدوس على رجل حد عشن تنتقم .

هى كلمة واحده بسيطة اتقالت خلاص بخ

نفس النظام لثقافة الحوار او الاختلاف ....دلوقتى محدش عاجبه رد يجيب ربع ايه ويفسرها على مزاجه

كمثال لما تتكلم عن الصداقة يقولك كلمتين ولا متخذات اخذان فى حين لو رجعت لتفسير الاة ككل هتلاقى ان ربنا بيتكلم عن الزنا ...الخ

هما كده بالظبط ...مجرد انه رافض يقبل رأى تانى ده لوحده علامة على فشله اجتماعيا وثقافيا ان لم يكن جاهل اساسا فى حياته ومش دريان لان من حوله ناس بتقول امين يا شيخ حسيين

يلا هنقوول ايه اهو كله طرطشة فى البهيصة

اللى اضايق من اى كلمة فى البوست...مش مسئول عن اى طرطشة جت عليه

او يمسحها فى الحيطة وهوا خارج

بســـا

ليلة قتل عباس

سمع اصوات خافتة فى الصالة

قام من نومه عشان يعرف مين اللى بيمشى قدامه

لقى شخص ما يسمى عبااس

طلع يجرى وراه ...مسك عصاية المقشة ...وهات يا ضرب

طاخ يمين طرااخ شمال ...طك فوق ...اى ...خبط فى الحيطة

وفلت عباس المرة دى ...جرررررررررررررررررررررر

لازم ااحط حد ليك يا عباس

وعمل فى تانى يوم مصيدة وخ9طة محكمة عشان عباس يتقفش ويعرف يقبض عليه

لكن عباس سهى السفاح وجرى منه وباظت فكرة المصيدة

بس لاء ...هوا انا هفضل جبان لحد امتى

لازم ااقف وابقى شجاع واحارب عباس

لاء وفين ...فى عقر داره

مسكت عصاية المقشة...وسكينتى المفضلة

واخدت الاحتياطات وفتحت باب شقة عباس وهوب تيك....فتحت الباب

ودخلت جوا ...وابتديت ااقلبهله الشقة رأسا على عقب

مش رأس بتاعت تربتت تىىى

رأس تانية دى

وفجأة قام عباس من نومه

اينعم ركبى خبطت على جيران الجيران

بس فى النهاية استجمعت قواى

وطااااااااااااااااااااااااااااااااااااااااااااااااااااخ

فى ضربة واحد قضيت على عباس

اخيرا

خوفى راح
هتستغربوا وانت ازاى تخاف منه يا عباس

هقولكم ببساطة عشان مش بحب الفيران

وعباس ده فار اسود فى ابيض محتل الشقة بقاله يومين :D

الجاهلين

اذا خاطبهم الجاهلون قالوا سلاما

اغلب الناس كده

تلاقى انها مش عارفه ترد الا بقلة ادب...

تحب تنسحب من المناقشة

تكتب ام الكلمة اللى الشعب المصرى كله حافظه

قلشة تفوت ولا حد يموت

بما ان سعادتى السفاح حفظنى الله ورعانى بقالى فترة مش ضحكت وفيه كومناتا كتيرة متأخرة وخايف للناس تفتكر انى منفض

فقولت نقلش حبة عشان ااعرف اكمل بقى

يلازززز

عندك حق لازم نفرمل الاطفال ...فكرونى كده





ممنوع الشرب او التفكير...للعرض بس


تلميذى...يتحدى الملل




اظن لو حد قال الخمورجية مش واخدين حقوقهم يبقى كداب

عشان تعرفوا بس فايدة الواسطة...ومالعالم الا شارع صغنن



ومن حق الكبير يدلع...ترلم

لا تعليق بجد

:D

انـا لله وانا اليه راجعــون

توفت الى رحمة الله تعالى بالامس

والدة المدونة ريـــــرى

صاحبة بلوج

فـــضــفـــضــه عـــالمــــاشـــــــى

ندعو الله ان يسكنها فسيح جناته

وان يجعل قبرها روضة من رياض الجنة ان شاء الله

مش عارف ااكتب ايه اكتر من كده

بس ادعولها يا جماعه كتييييييييييير على قد ما تقدروا

المتوفى دائما بيبقى فى امس الحاجه لدعوة واحده حتى

السفاح لسه صغير

ااه لسه صغير وعنده 20 سنة

ااه مش من حقى انى اطلب ايد واحده

عشان انا لسه صغير وعندى 20 سنة

هههههههههههههههههههههههههههههههههههههههه

بهزر قبل كده مع واحده اعرفها ....

فهى اخدت الكلام بجد

وقالتلى ان هى هترفضنى من قبل ما باباها يرفضنى


عشان انا اصغر منها بسنة

وعندى 20 سنة

طب المفروض الناس تتجوز وهى كام سنة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سبحان الله

قاعد فى سياسة واقتصاد بيتى التانى...وجه واحد ظريف بنتكلم فعرف انى 20 سنة...وهوا كان 23 سنة

فقالى ياااااااااااه انت لسه صغير ...نرفزنى الصراحة وخلانى ااقوله ياما ناس سنها 20 وعقلها عقل ناس فى ال40

وناس عندها 23 وعقلها عقل ناس عندها 10 سنيين

بس حاجه مستفزة...طب انا اا حسبتها بالطبيعى والسنة اللى دبلرتها ...كان زمانى خلاص اتخرجت السنة اللى فاتت ...

طب اوك ولنفترض معايا شقة ورحت اتقدمت لوحده بس اكبر منى بسنه....ابوها هيقولى امشى مش بجوز بناتى لعيال

اصله الصراحة فكر متخلف جدا جدا جدا انك تقيم حد بعمره

زى انت ماشى فى الشارع وشفت واحده مش محجبة وقلت عليها ****...ده اسمه الغباء بعينة

معلش حاجه استفزتنى ...بس بالمرة

احب اهتى صديق الكفاح التدوينى...والمنتديات

عــمـــرو فـــكـــرى

على خطوبته النهاردة

مبرووووك

وعقبالى كده لما"اكبر" ويبقى عندى 50 سنة واروح اخطب واتجوز

امتى هنتعلم

امتى هنتعلم اننا لما بنمشى فى الشارع مش بيبقى ملكنا لوحدنا

امتى هنتعلم لما نكون ماشيين عالرصيف ونقف زى الخازوق مرة واحده ونراعى ان فيه ناس ماشيه ورانا مش ماشيين لوحدنا

امتى هنتعلم ان لما نكون راكبين مواصلة وفيه ناس تانية راكبين معانا نراعى شعورهم ومش نضايقهم

امتى هنتعلم اننا منحرقش دم الناس التانية

امتى هنتعلم اننا ممكن نخلف اكتر من 6 بس يكون فيه فرق سنى ما بينهم مش فرق شهر ونص مابين كل واحد

امتى هنتعلم اننا لما نخلفهم برضه نراعيهم ومنقارش زمنهم بالزمن بتاعنا

امتى هنتعلم اننا لما نعيش فى عمارة فيه سكان غيرنا وطالما مش عمارة ابونا يبقى نتعامل كويس

امتى هنتعلم اننا لما نقول كلمة ونتفق على حاجه نبقى قدها

امتى هنتعلم نبقى حقانيين ومش نصابين

امتى هنتعلم اننا نبطل نصب عالخلق الصغير قبل الكبير

امتى هتعلم انى ااقتل او اضرب اللى يخنقنى ومش امسك نفسى وابقى بارد كده

انا مدمن فى حبك

حاجه بمناسبة العيد...

نعم...انا اعترف

ادمنت حبك سيدتى

ولا اقدر على الاقلاع عنه

ادمنت حبك سيدتى

ولا استطيع ان اشفى منه

فحبك مثل المسحوق

الذى اشتمه صباحا

حتى استطيع الصمود ليلا

ادمنت حبك يا حبيبتى

وبدونه لا استطيع العيش

حاولت ان اقلع عنه يوما

فوجدت اثار الانسحاب ظهرت على

ولم اصمد امام حبك الجارف

فوجدت نفسى تهفو مجددا الى قلبك

ووجدت قدمى بدون وعى تسير الى حبك

وبدون ان ادرى نطق لسانى بكلمة احبك يا قدرى

وها انا ذا

مدمن حبك

ولا استطيع ان اقلع عنه

ادمنت حبك يا قمرى

فبدونه لا استطيع العيش يوما

وحاولت يوما ان اجلب غيره

فوجدت انفى ترفض وتشكو

وتقول غير عطرك لا اهفو

ووجدت قلبى يبكى ويتألم

ويقول اين ذهب نصفى الاخر المتيم

ادمنت حبك يا ملاكى

وبدونه لا استطيع تخيل حياتى

فهل تمنيين على ...

وتعطيننى فرصة

كى اذوب اكثر فى هواكى؟؟؟

كل كحكاية وانتم مطرطشييييين

كل سنة وانتم مرتاحين وطيبين

وبالكحك شبعانين

والكوفرته متغطين

ومع السفاح خايفين

وبالعيدية فرحانيييييييييييين

يلا

هسيبلكم عيدية

بس مش تتعودوا على كده

ذهب رمضان

ها قد ذهبت يا رمضان

انتهيت كما ينتهى اى شهر

ولكنك شهر الرحمة والمغفرة

فكيف تنتهى بتلك السرعه

الا تستطيع ان تجلس قليلا معنا

مازلت لدينا ذنوب لم تغفر

وسيئات لم تمحى

وحسنات تريد ان تكتب

ارى المحرومين يبكون ندما على ضياع الشهر

اراهم يعضون اصابعهم على كل وقت قضوه بعيدا عن ربى

اراهم يبكون ندما وحزنا من تكاسلهم عن اداء الصلاة

ذاهب انت يا شهر الصيام

وتارك وراءك البشر

ما بين فرح...ومابين حزن

ذاهب انت يا شهر الرحمة

وتارك وراءك طالبوها

ما بين الحيرة ...والتأكيد

ومن اليوم ندعو الله ان يبلغنا رمضان القادم

لا ادرى ان كنت سأكون على قيد الحياة ام لا

ولكننى سأدعو الله

ليت العام كله رمضان

وداعــــا يـــا رمــــضــــان

هالووز عليكوا


بقالى فترة عندى حالة قرف كتابى

يمعنى الابداع كل ما ااجى اطرطشه يطلع خازوووووووووق فى النص يخلى حبل الافكار يتقطع

وموانع الطرطشة الفكرية كتييييييييييييييير

اولهم الحجه الوالدة....لما تنادى عليا اجيبلها حاجه من تحت محتاجها الاسبوع الجاى

او السيد الوالد...لما يحتاج يكلمنى ...مش عارف يبقى بوزى فى بوزه ليل نهار ومرة واحده يفتكر موضوع ما

يعنى اهوة دلوقتى افتكر حاجه وقطع ام حبل الافكار اللى كنت بنشره

او ممكن تلفون غتت ...او مسنجر

سبحان الله الناس مش بتفهم لما تعمل مشغول وتكتب متنيل على عين اهلى مشغول...وتلاقيهم بيكلموك برضه...

ولا اكنك كاتب حاجه...ماهم المصريين كده ....واحد هيقولى ما تعمله اوف لاين...لاء بيتكلموا برضه...

لذا بولع فيه وبقفله خالص

ااااااااااااااايييييييييييييه تانى بيقطع الافكار....

لما النور بيقطع...ما هى السنة 365 يوم مش بتحبك الا فى الوقت اللى بكتب فيه ...

بصوا تعددت الاسباب والنتيجة واحده

قطع واعتراض سبيل الطرطشة الفكرية بتاعتى

لذا ادعولى ان ربنا يفرجها ومحدش يقاطعنى ...عشان ارجع من تانى احسن...ومش ااصورلكم قتيل على باب المدونة

يوووووووووووووووووووووووووووووووووووووووووة

انتوا كمان بتقاطعونى؟؟؟؟؟؟؟؟؟؟؟؟؟؟؟؟؟؟؟؟؟؟؟؟

هطرطش واقول ايه

هوا سؤال فعلا...

هطرطش واقول ايه

بس الصراحة مردتش اكسف حد غالى عندى اوى لما قالى مكتبتش ليه

والغاليه اوى دى هى selfmeaning

بس انا مبحبش ااسلق البوست

بمعنى مكتبتش وانا زعلان عشان ممكن فى لحظة جنان اولع فى المدونة

طب حد من بعيييييييييييييييييييييييييييييد هيسألنى...وانت زعلان ليه

ااقول ايه ولا ايه

زعلان من ناااااااااااس كتير

وزعلان من نفسى

ايوة نفسى

عشان هى اللى وصلتنى لحالتى دلوقتى

وزعلان من اللى حواليا

محدش بيهتم الا لو كان ليه مصلحة هوا عاوزها

وغير كده لاء

ما ينفعش تقول ايه اللى بتحبه

وماينفعش تقول عملت ايه النهاردة

كل اللى ينفع انك تقعد ساكت وتسمع كلامه وبس

لكن غلط وعيب انك تقول حاجه انت بتحبها

غلط لما تبقى قاعد مع ناس ويحصل موقف وعاوز تمشى بأدب...ويجوا الناس دول بعد كده مش عاجبهم انك مشيت

فى حين لو قعدت ممكن المشكلة تكبر اكتر...ورغم كده مش فاهمين...يتفلقوا

معلش

ماليش نفس اكتب حاجه فى البوست ده

وشكلى هعمل زى ما بيوتى قالتلى

اكتب اسمها وانى كتبت البوست عشان هى طلبت كده

وبخ