نفق الظلام

جربت مرة تنزل وتمشى فى الشارع لوحدك؟؟

تبص للناس حواليك ...تفكر ..تتأمل

جربت تمشى وسط الضلمة لوحدك؟؟

من غير ما تمسك شمعة واحده فى ايدك

جربت تمشى على الحبل من غير ما تمسك عصاية تظبط اتزانك؟؟

ولا حتى تمرجح ايدك عشان متقعش

جربت تعيش لوحدك بمعنى الكلمة ؟؟

ولا حتى تبات مع حد بتحبه

جربت تجرى غصب عنك؟؟

او حتى تهرب من حاجه

اعتقد اننا كلنا بنعمل كده

بنهرب من الدنيا جوا النفق الضلمة ده

بنجرى منها ساعات

ونجرى وراها بردوا ساعات

وساعات بنجرى معاها

يا اما لوحدنا

يا اما معانا ناس

ناس بنكرههم وبنحبهم

ومهما عملنا مش هنعرف ننقى الدنيا ونخلى فيها اللى بنحبهم بس

ومهما عملنا بردوا النفق ده مش هينور لوحده واحنا واقفين فيه

جربت تخاف ؟؟

تخاف من اى حاجه ...مستقبل ...ماضى...او حاضر عايشه

جربت مرة واحده متهربش وتقف وتواجه ؟؟

وتقول لاء ...انا اقدر ...وانت متقدرشى

النفق هيفضل ضلمة

واحنا هنفضل نجرى

وهنفضل نخاف

وهنفضل نستنى

ومش هنبادر اننا نواجه الخوف

ونخليه يجرى مننا

واحنا ماسكين شمعه كبيرة عشان تنور النفق ده كله

كل انسان فينا مهما كان شخصيته ازاى ...فيه جانب مظلم محدش بيقرب منه ...الجانب ده محتاج حبة نور ..محتاج النفق يرجع تانى لطبيعته

بس كل واحد وسيلته مختلفة عن غيره

وفيه ناس بترضى بالواقع وتسيبه زى ماهو

منطقة ممنوع الاقتراب او التصوير