Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Monday, January 23, 2012

خربتوا البلد بقى

انتوا خربتوا البلد ثورة ايه وهباب ايه ما كنا عايشين وبناكل وبنشرب وبنقبض 

ده بقى كلام اغلب الناس ابتدوها العواجيز واتبعها الشباب 

فحبيت اجى اعدد مميزات مصر قبل الثورة 

اولا مهزلة التوقيت الصيفى والشتوى يوم ما يتعدل عشان البهوات ميصموش ساعة زيادة فى رمضان ويعرفوا يفطروا ويتسحروا بدرى بدرى وبعد رمضان اتغير ...ماهى عزبتهم 

المرتبات الهزيلة اللى الناس كانت بتاخدها وكانت بتكفى بالعافية 

الواسطة اللى فى اى حاجه ...يا راجل ده عشان نركب عداد ميه جبنا 5 واسطات واتنين زيهم عشاهن العداد يركب ...غير كده كنا دفعنا فلوس وغرامات ملناش ادنى ذنب فيها 

الكهربا اللى قعدت على مدار 11 شهر تتسرق والفولت اللى بيعلى بعد 12 بالليل لحد الساعه 6 الصبح كل يوم على مدار الشهور دى ...وتبلغ يقولك مفيش حاجه 

الشرطة اللى كانت فى خدمة الحكم والواسطة بردوا ...يجوا يشيلوا السوق عشان حد مهم سكن عندنا ومش عاجبه صوت الراجل بتاع الخيار تحت عمارته 

عواميد النور اللى منظر بس 

توفير الكهربا المنطق الغريب اللى كان بيحصل وتمشى عالدائرى بالليل تلاقيه كحل وتصحى الصبح تلاقى العمود بيطلع لسانه ومنور وبيغيظك 

مبدأ انا محدش هيحاسبنى اللى كان سائد ده مبقاش موجود 

فعلا احنا خربنا البلد لما حاولنا نرجع للعيال الصغيرة جزء الانتماء 

انك تخليه يفخر انه من البلد دى فعلا 

خربناها لما حاسبنا اللى قعدوا سنين طويلة بياخدوا من لحم الغلبان الحى 

خربناها لما كشفنا كم الفساد اللى فى البلد حتى اللى كان شكله ابن ناس طلع ابن كلب 

خربناها لما بطلنا نسكت عالاهانة

خربناها لما ابتدينا نحقق العدل 

وخربناها اكتر لما سكتنا وصدقنا وعد اللى ملوش امان 

خربناها اننا سيبنا الناس تصدق ان التغيير هيحصل فى يوم وليلة 

بس لاء مش احنا اللى خربناها 

انتوا اللى خربتوها بسلبيتكم وصمتكم الدائم من منطلق ادينا عايشين 

سيبونا احنا بقى نعيشها 


5 comments:

Unknown said...

مصـر ستبقى رغمـ كيدهم
منصورة بإذنه تعالى
يومين ويمر عام الثورة الأول

نيللي علي said...

كل اللى هقولوا اللى بيحارب الثوار وبيقول عليهم خربواااا هو إنسان جبااااان وبيعشق الذل والمهانة

Unknown said...

ليس علي الجاهل والمرتشي والحرامي والفلول حرج

faroukfahmy said...

طيب انتى قلتى كل السلبيات
انتى بقى الحل ايه فى نظرك
سهل قوى الواحد يعدد السلبيات وصعب قوى يعدد الحلول للوصول الى الايجابيات بتفس الحماس كملى لان كلامك حاسس هيطلع منه حاجة مفيدة منتظرنها

safa7_karmooz said...

@Farouk

انا ولد والله العظيم مش بنت !