hApPy BiRtHdAy To My TaRtAsHaAaAa

اليوم الاثنين 30 يونيو ...يبقى مر على انشاء مدونة طرطشة افكار ...سنتان بالتمام والكمال

ياااااااااه ...السنين جريت بسرعه اوى ...سنتين...اينعم لسه قليلين بس برضه انجاز ان الواحد لسه بيكتب مملش...كح كح اينعم فى النص لازم نخستع حبة وحبتين ...لكن لسه بنكتب الحمد الله

اول بوست انا فاكره ...عملت المدونة وكان التيمبلت بتاعها الكور المدورة دى...اى بتنجان بقى...وكتبته وكان كل اللى اعرفه عن المدونات زيرو...غير انها مكان بتكتب فيه...

كان اول بوست بإسم مــجــرد تــأمــلات

كان بتاريخ 30 يونيو 2006 الساعه 4 الفجر وبالتحديد كان يوم جمعه ..:)

بس بعد كده ...مكنتش اعرف انى لازم اتجول عند باقى الناس عشان يعرفونى...افتكرت انها زى الهاى 5 والناس هتلاقينى بسهولة...ههههههههه ساذج انت يا سفاح والله :D

كعادتى نسيت ان عندى مدونة...ونسيت ليه...عشان بنسى زى عادتى الايميلز اللى بتتعمل مع نسيان الباسوورد ومش بحب اكتبهم فى ورقة عشان مش اى حد يشوفهم..حريص...فرجعت تانى للكتابة فعليا فى 24 ديسمبر من نفس العام

اول مدون عمل عندى كومنت كان شخص مجهول الهوية كل اللى كتبه لطيف :D

طبعا كان على لسانى كومنت مش هقدر اكتبه عشان الرقابة بس لطيف لطيف...هقوله لاء يعنى ..هههههههههههههه

بس فعليا اللى عنده مدونة ورد عليا...كانت صديقة تدوينية ...اسمها Maha

واثلجت صدرى ان فيه ناس على قيد الحياة وبيردوا عليا...نيهاهاهاها...معلش تخاريف اجازة...

دخلنا فى سنة 2007 ...والسنة دى كانت مؤثرة فى حياتى فى حاجات كتير حصلت ولسه بمر بأثارها لغاية دلوقتى ...بس تعتبر الى حد ما لظيظة

كعادتى نسيت البلوج حبتين تلاته ....ورجعت فى شهر يوليو...بس المرة دى كنت عقدت العزم انى فعلا انتبه للمدونة واكتب...بعد امتلاء منتديات الانترنت بالمخابيل والمعاتيه ..فعلا كان الواحد بيورد عليه ناس من عينة "اللى زيك مش لازم يعيش ليوم الاتنين...ولا التلات كمان " يلا كله فى الغسالة

حاولت انى اطلع احسن بوست...واوحش بوست ...بس الصراحة معرفتش خالص...يمكن لانى معتز...مش سفاح..هههههه كفاية قلش بقى...يمكن عشان بحب كل البوستات ومش كاره او ندمان انى كتبت اى واحد فيهم...تجولوا لو فيكم صحة وممكن تلاقوا احسن بوست فى نظركم

بس هيفضل برضه يوم ما رحت اذاعة حريتنا ...وسجلت الحلقة مع محمد عز الدين ...يوم فاصل فى حياتى...عشان من بعده اتغيرت فى حاجات كتير ...معلش قارفكم بالحلقة دى حبة...بس حصلصتلى حاجات فى حياتى واتعرفت على ناس ...وسبت ناس من بعد اليوم ده...يعنى بأأرخ حياتى بعد اليوم ده...ههههههههههه مش عارف الاقى البوست...اثار النسكافيه :D

المهم...سنة جديدة بتعدى عليا بتيجى معاها ناس جديدة...وناس تانية بتمشى ...وناس غصب عنك بتسيبهم ...وناس غصب عنك بتعرفهم...كمالة عدد يعنى :D

كان نفسى البوست ده يبقى اجمد من كده...بس كعادتى...فى المواقف اللى زى دى مش بلاقى كلام اقوله...والله بقالى 3 ايام البوست ده فى الدرافت بحاول اطلعه فى احلى صورة مش عارف ...بس يلا ....كفاية انكم انتوا اللى هتقروه...فبالنسبالى اى حد هيعمل عليه كومنت او هيقراه هوا اللى هيخلى للطرطشة طعم...

فيه مدونتين كنت عملتهم فى النص فى محاولة فاشلة انى انمى هواية الكتابة عندى للاحسن...

اول واحده كانت

قــلــب يــتـكــلــم

بس باءت بالفشل بعد موقف حصلى مع اعز اصحابى...والصراحة قرفت ادخلها تانى
نفسى انسدت بعد ما كتبت اخر حاجه وحسيت انى كل ما بدخلها قلبى بيتقبض

بعد كده اخر واحده...وسميتها

Words...just words

دى مشتركة مع

Catroz

المدونة دى عرفت اطلع فيها حبة من اللى جوايا...يارب تستمر ومش اقفلها قريب :D


لسه جاى من عند

Epitaph

ولقيت برضه عيد ميلاد مدونتها...

بس لقتها حطت سؤال فى الاخر...احب اسأله برضه...

ممكن بعد مرور خمس سنوات هندخل النت ...لو بلوجر لسه عايش...ونلاقى سفاح كرموز مازال يطرطش هنا؟؟؟


طولت عليكم...ولا مطولتش...براحتى يعنى :p


كل سنة وانتى طيبة يا طرطشتى العزيزة...

كل سنة وانا بطرطش زى مانا عاوز

كل سنة والواحد عاقل لسه بعقله ...هههههههههه

كل سنة وانا سفاح...وانتم الضحايا :D

related topics:

عيد ميلاد الطرطشة الاولانى

Egyptian Food Bank

رسالة من بنك الطعام المصري للمتطوعين القدامى والجدد:

شركاءنا في الخير , أعزائنا المتطوعين , نود أولآ أن نشكركم كثيرآ لمساهمتكم ومعاونتكم على مدار السنة الماضية.
ويسعدنا أن ندعوكم للإنضمام إلينا بمخازن البنك لتعبئة الصناديق الشهرية وصناديق رمضان للأسر المستحقة.

مواعيدنا بالمخازن: -
يونيو كل يوم سبت وأثنين وأربعاء من 10 ص : 7 م .
يوليو كل يوم سبت وأثنين وأربعاء من 10 ص : 5 م و أحد وثلاثاء وخميس من 3 م : 10 م .
أغسطس كل يوم من 10 ص : 10 م ويوم الجمعة من 2 م : 10 م .

عنوان المخازن : -
مخازن بنك الطعام بجوار مبنى أولمبك جروب – إمتداد رمسيس - مدينة نصر.
في حالة وجود أي إستفسار عن طريقة الوصول يمكن الاتصال بـ 16060.

مكان البنك

في مدينة نصر ,, هو بالظبط من عند نادي السكة يمين نفضل ماشين لغاية مانلاقي شركة اوليمبك جرووب على يمنا هو جنبها على طووول
أو
لو من عند مصطفى النحاس بنفضل ماشين فيه لغاية مانعدي على الحي السادس وقسم مدينة نصر برضوا هنلاقي شركة اوليبمك في وشنا

ya reet ya gam3a elly ykon fady wa mosh la2y 7aga ye3mlha... yro7lohom...coz homa fe3lan me7tageen nas henak ... ana el first time kanet da last year wa kan sho3'l 7elw awy ..wa kona fy ramadan kman ... dy tagroba 7elwa really ya3ny ...:)

N0o0o0o0o0or

بداية كده اللى بيحب المسلسل ده يقعد على جمب حبة عشان انا مبقوق منه بجد...مش عشان مدبلخ او غيران من الممثل التركى اللى مش عارف انطق اسمه او اى حاجه....بس عشان الكلام اللى سمعته من الناس اللى بيحبوه

سألت واحده صديقة...هى مخطوبة بالمناسبة...وخطيبها راجل راجل...وعنده شنب يقف عليه قبيلة صقور...مش صقر واحد...ما علينا...قالتلى بتحبه عشان طريقة مهند فى التعامل مع نور ...طريقة كلامه ...اللى بيقوله...واللى بيعمله...الخ....قولتلها يعنى لو جالك او عرفتيه...قالتلى طبعا هسيب فلان اللى هى مخطوباله....هههههههه...بالشفا ^_^

واحده تانية قالتلى عشان هوا قمووووور اوى....

تالته قالتلى عشان جان ...

طب معلش انا مقتنع انى غلط عشا شعب مصر كله بيحب المسلسل معرفش على ايه...ولا قصة ولا مضمون ولا حتى لغة...كانوا سابوه مترجم بالعربى احسن من الدبلجة...عالاقل كنا فهمنا

بس من كلام اللى سألتهم حسيت ان فيه نقص فى حاجات كتير هما مفتقدينها...

مشاعر معينة ...ممكن

كام واحد خاطب او متجوز جاب لمراته او خطيبته ورد او افتكرها بهدية لذيذة كده ترجع الحب اللى ما بينهم

كام واحد فضل متجوز 20 سنة ولسه بيعامل مراته بحب...مافييييييييييييش...هههههههههههه...تحت وطأة المصاريف والضغوط النفسية يتحول الزواج بقدرة قادر الى مجرد عبث او بالاصح اتنين اصحاب قاعدين مع بعض فى شقة واحده...وبعد كده بتقولوا ليه الناس بتتطلق او ليه سعاد خلعت عباس

الاسباب قدامنا...والحلول برضه...بس بنفضل نلف وندور...ومنتكلمش بصراحة...

لسه بكره مسلس نووور برضه...ومش هحبه ...حتى لو حبيبتى بتحبه....لاسباب كتيرة ذكرت منهم اتنين هنا

مستنى طرطشتكم

تحديث
MBC 4...

at 8 pm i think..

and at thursday the repeat all the series

or what came all da week in one day ...

at 1:00 am

love hurt ...

Thinkin'

mmmm

3awww

بــــــــــــــــخ

بعد البوست اللى فات ...قلت اقلبها تهييس حبة ...

وقلت ابتديها بالكلمة المعتادة

بـــــــــــــــــــــــخ

طويب...لزوار الطرطشة الكرام..

عالونج اليمين هتلاقوا بانر لذيذ فيه اسمى...ياريت اللى مسمعش الحلقة بتاعتى مع محمد عز واذاعة حريتنا يدوس عالصورة

تانى حاجه انا حاطط اغنية ريحانه ...وعجبانى موووت...بس ناوى اغيرها ان شاء الله

فاللى يحب يسمع اغنية معينة ممكن اظبطلكم بلاى ليست معتبرى لظيظة يعنى

خامس حاجه مختلفة عن سابع حاجه طبعا

والله نسيتها...

بس لغاية لما افتكرها

الكومنتس دى بتاعتكم...واللى عنده اى حاجه عاوز يقولها...يتفنضل يقولها

وبس

بسا

let's change...

تحذير...البوست ده طوييييييييييييييييييييل

الموضوع ده متردد بقالى كتير انى اكتبه ...بس قلت لازم اكتبه واطلع اللى جوايا عشان اابقى مرتاح

الانسان طول ماهو فى الحياة...كل يوم بيعدى فى اختبار ...والاختبار ده ليه حلين...يا تنجح فيه يا تسقط فيه....وكل يوم الواحد بيكبر عن اليوم اللى قبله وتفكيره بيكبر برضه عن الوقت اللى فات ...ويعرف ازاى يتصرف...بس ساعات الواحد ممكن يعمل غلطة صغيرة ...ممكن يقعد 3 سنين عقبال ما يعرف يحلها من تانى ....

بداية حياتى كانت لذيذة...وكنت انسان مميز من وانا صغير...مش هقول كانت طفولة سعيدة او اى افتكاسات من اللى بنقراها ...بس الميزة عشان طفولتى كانت كلها مستشفيات وادوية...ومش شايف انها حاجه وحضة...المؤمن مبتلى ...وانا كنت زى الابتلاء بتاعهم وانا صغير ...الحمد الله على كل شىء ...فيه حاجات حصلت وانا صغير شكلت تكوينى الحالى ونظرتى لحاجات كتير...الحاجات اللى مريت بيها وانا صغير تخلينى لو شفت حاجه تانية دلوقتى ااقول عادى وقليلة ...مش هطول بس ابسط مثال ان والدتى قالتلى مرة كنت خلاص جبت لون الازرق ده ...وجسمى بقى بارد ومش بتنفس ومافيش نبض...فتخيلوا لو ام كل يوم عايشه فى كابوس انها هتصحى الصبح هتلاقى ابنها عايش ولا لاء ...ده خلاها حتى لما كبرت لسه بتخاف عليا جدا ...ربنا يخليهالى

المقدمة دى مش هطول فيها ...بس بطبيعة العيشة عندى...الثقه منعدمة...دايما مش عارف مصلحتى ...وده حصل لما قررت ادخل علمى...والبيت كله قام ووقف وقال لاء انت هتدخل ادبى ...وبكل بساطة سكت ومتكلمتش لانى متعودتش ااقول رأيى...المدرس ده بيشرح حلو...ااه...بيشرح...مع انى مكنتش بفهم حاجه منه...بس لما بتكلم بيعتبروا لسه صغير ومش فاهم حاجه احنا ادرى منك ومالكش دعوة...بعدها النتيجة تطلع ليه مش قلت انك مش بتفهم منه ...هنعضك يعنى...هههههههههه سبحان الله ...عشان كده لغاية الجامعه مكنتش بتكلم وبريح دماغى...

افتكر فى تانية ثانوى جبت ملحق فى التفاضل وحساب المثلثات...حسسونى وقتها انى اغتصبت او سرقت او قتلت ...او حتى سرقت...كمية الذنب اللى شلتها ولسه شايلها لحد دلوقتى وكلام نودى وشنا فينا من ولاد عمك وخالك ومش عارف ايه من الفضيحة...والدتى وقتها كانت عاوزة تحولى لنظام منازل عشان اقعد واذاكر فى البيت بس تراجعت مش عشان مصلحتى...لاء عشان كانوا مخططين انى ادخل حربية او شرطة فلو قعدت منازل مش هينفع ااقدم...سبحان الله

عدى الملحق وكنت مقفل المادة وجايب الدرجة النهائية بالمعنى بس باخد النص للاسف ...بس فضل زى النقطة السودا فى حياتى

جت تالته ثانوى مجموعى كان 79.9% ...وده كان اخر المرحلة التانية...مش ربعها حتى

بصولى بقرف وقالوا طيب....

جهزوا نفسهم انى خلاص نجحت فى اختبارات الشرطة او الحربية ....ولما سقطت زى ما كنت متوقع اصابوا بخيبة امل ان خطتهم مش مشيت كويس....تصحى من نومك الساعه 3 تصلى الفجر فى السكة وتنزل تقف فى ام طابور عساكر تشتمك وتنطط على اللى جابوك...مش هكدب وهقول ان الواسطة رحمتنى من كل الطوابير...

جت الجامعه والزفت التنسيق...وطبعا مافيش قدامى غير حقوق بكل المحافظات من اول القاهرة حتى اسوان...وتجارة خارجية حلوان...اهلى متخرجين من تجارة اصلا ...وحبوا انى اكمل...ولقيت وقتها والدى بيكتب الرغبات...قولتله لاء...حقوق ...يومها اتخانق معايا واتنرفز وقعدت مش نكلم بعض اسبوع تقريبا ....انا كان نفسى ادخل تجارة...يمكن عشان كنت بحب المسائل اوى...بس عندت عشان ااقول لاء لو مرة واحده...

ادى طريق من الطرق اللى تختار يا تمشى شمال يا تكمل يمين ...مافيش اختيار تالت

دخلت حقوق ...وسقطت اول سنة...وحسيت بفرحة طاغية عند ناس معينة منهم اهلى...وقرروا انى احول لاحد المعاهد جمب البيت...اعترضت تانى ومردتش احول

تانى مرة تيجى عند مفترق الطرق....وبرضه مافيش اختيار تالت

هحتفظ بباقى التفاصيل لنفسى...بس الطريق مكنش حلو خالص....اسوء فترة بمر بيها بجد هى ال5 سنوات اللى فى الجامعه...من اول ما دخلت...نسيت ااقولكم ان والدى قاطعنى وقت ما سقطت 5 شهور كاملين مش بيكلمنى ولا بكلمه ولما بس جدتى والدة ماما ادخلت ...رضى يكلمنى لسبب واحد...منظر العيلة قدام قرايب ماما وبابا ...مش عشان انه يسامحنى...ما علينا

5 سنين بجد بمعنى الكلمة اسوء سنوات عمرى ...لاسباب كتيرة ....اولهم انى دخلت الكلية دى

وتانيهم ان فيه غلطة عملتها من 3 سنين مش عارف اتراجع عنها او اصلحها وكل يوم بتتعك اكتر واكتر لحد ما بقت كلكوعه كبيرة الحل بتاعها صعب جدا ...بس لازم اعمله ....بس بعترف انى معنديش الشجاعه عشان اعمله

اللى عاوز اوصله لحد دلوقتى انى اخترت ما بين اختيارين...حياة اجتماعية ...وحياة دراسية...

انا اخترت الاجتماعية...

من كام يوم كنت بفكر...لو كنت حولت معهد...مكنتش عرفت حاجات كتير جوايا...مكنتش اتعرفت عالناس اللى عارفهم وبفتخر بيهم ...مكنتش مريت بتجارب قاسية بس بتعلم الواحد وتخليه جامد ...مكنتش اكتشفت حاجات جوايا انا ذات نفسى كنت اشك انى عندى ربعها...

بس فى مصر انت ليك الشهادة وبسس...باقى الحاجات مش بيفرق معانا...مهارات ...كتابة اى بتنجان لاء...شهادتك وبس ...وده اللى بيخلى الواحد محبط دايما ان سقف طموحاتك مش ممكن يعلى لاسباب كتيييرة اوى فى مجتمعنا او حتى العائلة بتاعتك

نسيت اذكر ان اهلى حطوا الخطة انى اتعين فى النيابة وماما خلاص ظبطت فى راسها انى هبقى فى مجلس الدولة ان شاء الله

وكل ما اتكلم اسمع كلام لذيذ مفاده انى صغير ومعرفش مصلحتى

مصلحتى انى اعمل اللى انا عاوزه مش اللى هما عاوزينه...ومصلحتى انى معندش معاهم...عارف عاوزنى اابقى كويس ...والخ من الكلام اللى الناس كلها بتقولوا....بس فيه احتمال لكل حد .....

لو كان والدى بيؤمن بالحوار وانه يتناقش بهدوء...كنت قعدت معاه وكلمته ....

لو كانت والدتى ترضى برأى حد تانى كنت اقنعتها برأيى

لو كان الناس يردوا يبصولك كشخصك...مش كشهادتك...كانت حاجات كتيرة هتتغير

مفاد الكلام...ان الانسان مسير ومخير ...بس اللى بنختاره مش بينفع نرجع عنه...واى حاجه زى ما ليها مميزات...ليها عيوب

كان نفسى ان سفاح كرموز يفضل مجهول ومافيش اى حد يعرفنى...لسبب واحد...انى اكتب الموضوع ده بقلب جامد واخد رأى الناس...

لكن شاء القدر انى ابقى معروف ل90% من قراء وزوار المدونة

لذا بطلب من اى انسان يعرفنى على ارض الواقع وبيكلمنى...انه لما يقرا البوست ده يرد هنا ...لكن يكلمنى عنه فى التلفون عالنت مسنجر او حتى وجها لوجه...اسف مش هفيده خالص...وبتكلم جد واللى اقصدهم عارفين نفسهم

هستأذنكم...انى مش هرد عالبوست ده الا للضرورة لو فيه حاجه مش واضحه....

لانى انا اللى محتاج مساعده...ومحتاج اسمع رأى كل واحد...بس قبل ما تعمل كومنت...خليك فاكر اللى ايده فى الميه ...غير اللى ايده فى البطانية

التاج التاج...موعدة ياللى لابسه التاج

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

الوردة الاولى هديها لوالدتى...اعتقد هى اكتر انسانه تستحقها...مع ان وردة واحده قليلة عليها

الوردة التانية هديها لواحده زميلتى زى اختى الكبيرة ...عشان تستحقها برضه

الوردة التالته هديها لانسانه مش هذكر ايه هى ولا عايشة ولا مش عايشة...مجرد انسانه..:)


لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

هكتب 3 كلمات بس

ماشى...فى ...نور الله

ما هو هدفك فى الحياة ؟؟

هدفى انى ارجع زى زمان...او نقول انى ابقى حاجه كويسة...حاجه لسه ليها طموح وحلم معين تحققه...مش حاجه مكسورة مالهاش اى هدف من كتر اللى بيحصل حواليها

ممكن يكون ده هدفى


إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

ومنصدقش ليه...اصل اللى قالها كان اول يوم فيه تراب وحر وقرف...تانى يوم وقع بعربيته فى بحيرة متجمده...ميه سقعه يعنى...يبقى عنده حق :D

أجمل مقولة سمعتها فى حياتك ؟؟

هى مش مقولة...هوا دعاء

لا اله الا انت سبحانك انى كنت من الظالمين


من المغنى اللى بتحبه أوى و إيه أحلى أغنية ليه بتحبها ؟؟

عمرو دياب ...واغنية وهى عاملة ايه دلوقت


لو تزوجت و أنجبت بنتين و ولدين أى الأسماء تختار لهم ؟؟


ههههههههههههههههههههههههههههههههههههههههههههه

حسب المدام بقى :D

لاء بس ممكن اختار اسم من هنا واسم من هنا

يعنى لو بنت اسميها ياسمين...

ولو ولد هسـميه يوسف

لو أتعرض عليك رشوة كبيرة و انت فى زنقة ماليه هتعمل إيه ؟؟

هقبلها وبيها هشترى حشيش واعزم على كل اصحابى

قول 3 صفات ب 3 كلمات بس توصف بيهم شخصيتك (يعني كريم طيب خدوم كده )؟؟

غامض - كسول - مستفز

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه؟؟

اكبر مرتب اخدته كان 1000 جنيه...واخدته لنفسى...ههههههههههههههه

بس لو بعد كده واشتغلت ان شاء الله هشترى لكل حد فى البيت حاجه بيحبها او الاحسن هديلهم الفلوس كده ليهم افيد ..:)

برضه بكلمة واحدة ايه اهم صفة عايزها في شريك حياتك؟؟

بما ان الحب لوحده لا يكفى...تكون مخلصة ليا...والاخلاص ده يتضمن انه تكون بتسمع الكلام وتنفذه عشان عارفه انى عارف مصلحتها...مش هتفكر فيه وتقتنع بيه او لاء...

طب دلوقتى حالا ايه المكان اللى نفسك تكون فيه

على اى شط واى بحر...والشمس بتغرب...والام بى ثرى فى ودنى

يا سلااااااااااااااااااااااااااااااااااام

تمرر التاج لمين؟

هفكر بعدين ارد...

او اقولكم ...اول 5 يردوا عليه ياخدوه :D

على شاطىء الذكريات

بكل هدوء....جلس على الشاطىء ...فى نفس المكان المعتاد

مدد قدميه امامه...ونظر الى المياه...وترك رأسه للهواء

ياااه كم هو رائع الشعور كأنك تعوم على سحابة تنطلق بك فى ارجاء السماء

وانت مستلقى تارك لها حرية التصرف فى كل شىء

ينظر بجواره وهو مستلقى هكذا...يتذكرها..

يتذكر حبيبته عندما جاءوا هنا للمرة الاولى

يتذكر كيف كان وجهها يشع بالنور الملائكى

يتذكر كيف كانت ترتسم على وجهها ابتسامة وهى نائمة

يتذكر كيف كان يرى فيها براءة الاطفال

يتذكر كيف كانت تقلده وهو نائم

فيكذبها ويتظاهر بأنها اخطأت الشخص

مع انه يعلم انه بالفعل هكذا

يتذكر كيف كانت تتحدث معه عن مشاكلها بالعمل

فينصت اليها ويبتسم

رغم انها مشاكل صغيرة فى نظره ولكنها كبيرة فى نظرها

يتذكر ويتذكر...ويظل يتذكر كيف كانت هى

ثم تنهيدة طويلة ...تطلق لساقيها العنان

حتى تخرج من قلبه مبتعده

تتبعها دمعه ...تريد ان تذهب لبر الامان

تتلوها اهة ...كانت مكتومة لسنوات طوال

ويصرخ فى صديقه البحر

ويستنجد به ...كى يزيل همه قليلا عنه

و يـــقـــول

اين حبيبتى الان يا بحر

اين ملاكى الان يا بحر

اختطفتها من بين احضانى

وتركت لى الوحدة

جالسة بين يدى

تنظر الى كل يوم

وتخرج لى لسانها قائلة

ليس لك الا انا مهما فعلت

ولن تقضى على مهما احببت

فأنا اصبحت حبيبتك

بدلا من التى قتلت

ولن يفيدك حزن او كره

مهما فعلت

فلترضى بنصيبك يا حبيبى

فلن تجد لك رفيقا الا غيرى

فعادت تلك التنهيدة مرة اخرى

تسبقها تلك الاهة

يعقبها نهرا من الدموع

خرج من عين

قــلــب مــجــروح

قالك متخلف...

محمد سعد فى فيلم كركر ...طلع تربنتيين الخدام عشان بس قاله مانت ...كلمة بسيطة...اسمها مانت الواد اضرب هوا وسنسفيل اللى جابوه عشان مانت دى ...نص ساعه ضرب وشتيمة...قال مانت قال

من كام يوم فى مجلس الشعب اترقينا وبقينا زى دول العالم المتقدم الصين واليابان والنواب اتخانقوا وضربوا بعض...سيبك من دى ...سبب الخناقة ان احمد عز قال عالقانون الجديد من ضمن قوانين من هدفها تحويل الشعب المتخلف لشعب بيفهم

اسكت يا لسانى...اتقفل يا بقى

نفسى اعرف اصول الناس اللى بتقول علينا متخلفين كانوا ايه بالظبط؟؟؟

قال متخلف قال ...سحقا بالملبن

طب بما اننا شعب متخلف ومش بنفهم...وسايبنله وامثاله انهم يفهمونا...ايه السبيل لكى نرتقى ؟؟؟ونكون زى الغرب المتحضر

وبمناسبة الغرب...الاهرام وقت 6 ابريل وحملة التشهير بالفيس بوك كتبوا جملة خلتنى اضحك....ان الغرب بيستخدموا النت احسن استخدام ...واحنا لاء...طبعا مش شعب متخلف

طب كان نفسى والله ابعتلهم ايميل ااقولهم ان الغرب المتحضر هوا السبب فى اغلب البلاوى عالنت ان مكنتش كلها....

صناعة افلام البورنو لوحدها فى امريكا بتجيب ثروة...الارباح يعنى بالملايين ...رغم انها بتتكلف ملاليم فى ظل المكسب اللى بيجنوه...

عمليات التجسس والهكرز هما اللى بيصدروها لينا...ممممممممممم

الاخلاق المنحلة هما سببها ...بيسألوا الشباب ماله وزمان ومش عارف ايه...قال يعنى دول مكنوش شباب ...سحقا بالملبن تانى

نهايتو...اايه وقاصد اكتبها بالواو....

نهايتو يعنى ...بما ان الشعب طلع متخلف ولا يفقه شىء....فنرجو من الله ان يرزقنا العلم الكافى ...ويرزقنا العقل والصبر اهم حاجه ...والستر وراحة البال

وسمعنى سلام سلامتها ام سحس

ماونتن ديووو...جمد قلبك...اخراج مصرى

وا مصيبتااااااه

حبيت الاقى عنوان يبقى احسن...ملقيتش احسن واعبر من كده

فيه نصيحة واجعه زورى ونفسى ااقولها ...هى صلاة الجمعه...ناس كتير هتقولى خليك فى حالك وانصح نفسك...وانا فعلا كده...ممكن اكون ساعات حاجات بتقع منى فى النص...بس فى صلاة الجمعه مواظب عليها دايما...بس تقريبا اللى اغلب المصريين نسيوه...ان الصلاة من غير خطبة متنفعش...يعنى من الاخر كده اللى بيبقى مأنتخ فى بيته فوق ونايم ومستنى الشيخ يخلص الخطبة...ويقولك بلا وجع دماغ...منا سماعها اهوة...ولما يقيم هنزل اصلى...طب وجاى على نفسك ليه متكملها فوق وتقف فى البلكونة وتصلى جماعه ...اصل مش هنتفضل على ربنا استغفر الله العظيم...

ده فرض ولازم نؤديه صح....وحاجه تانية...تلاقى ناس قاعده والشيخ بيقول الخطبة شغالين رغى..طب اصبر وخلص الصلاة وارغى....اخر جمعه اللى فاتت دى...الشيخ مطاقش نفسه واحرج اتنين كانوا بيلكوا كتييير ....فى الاول والاخر دى عبادة ولازم نهتم بيها اكتر من كده عشان ربنا يكرمنا...

*************************************************************************************************

فيه حاجه عندنا فى المجتمع المصرى اسمها الاصول...وساعات الاصول دى بتخالف شرع ربنا...بس احنا لاء...احنا نخالف شرع ربنا ...ومنخالفش الاصول...ااه انتوا عاوزين اللى يسوى واللى ميسواش يتكلم علينا ؟؟؟

*************************************************************************************************

نفسى اللى ميفهمش فى مجال ميتكلمش فيه ....الكومبيوتر المكسين فى البيت ميت ...وكل ما اجيب حد يصلحه والدى يتهمنى انى انا اللى مبوظه...وايه السبب ...عباقرة تصليح -الشبكات- بيفتوا بالعبييييييييييييييييييييط...واحد يقولك اسطوانة الويندوز بايظة...والتانى يقولك اصل الهارد مهزووز..والراع النهاردة قالى اصلك مبتعرفش...متفهموش غلط...مبعرفش اسطب وندوز....فاستكمالا للفتى ...هبعت الهارد بكرة لكبير الفتايين ...وكل ده عشان والدى مستيخل حبة انه يجيب هارد جديد ومش مقتنع ان الحاجه تبوظ بدون خطأ بشرى...او سفاحى حتى

************************************************************************************************

سبحان الله فى دى بلد ...وعلى دى بشر....

لما واحد يخون مراته او حبيبته ...ويتكلم مع بنت تبقى الجريمة الكبرى وانه اذنب ...ومش من حقه يطلب السماح منها ...ولو طلب لازم يجى ورجله فوق رقبته ويبوس تراب رجلها عشان ترضى انها بس تفكر انهم يرجعوا لبعض ولا لاء

ولكن لما البنت هى اللى تبقى غلطانه وغلطها اكبر من غلط الولد...يبقى مش من حق الولد ان يسبها لانه كده هيظلمها ومش عارف ايه ...

عالم غريبة بجد...واحد صاحبى قالى فكك ياعم وقضيها...لكن لو هنمشى فى حياتنا بمبدا قضيها مش هنروح فى حتة وكل حاجه هتبقى فكك

*************************************************************************************************

الفشل امر غير طبيعى فى حياة الانسان...لكن النجاح هو الاساس ...ولاو فشلت يوم فأنت عار على المجتمع ومتستحقش اى مميزات اضافية....

اوقات كنت بتمنى انى اتولدت برا ...او ابويا كان ميت..عالاقل كنت هعرف احقق المعادلة الصعبة وافشل وانجح فى نفس الوقت ...من غير ما يعلقلى حبل المشنقة المعتاد

انجح...ويبتسم ابتسامة فى وشى ويبعتلى 50 جنيه رصيد...اسقط ميكلمنيش سنين ويقولى انى خيبت امله...ااه امله عشان ممشتش عالخطة اللى هوا رسمها لحياتى...

السنة دى هسقط عند ان شاء الله لعيونك والدى العزيز

***************************************************************************************************

تدوينة جديدة كتبتها فى الفرع المهجور للطرطشة...

Words....just words

الجزء التانى من مغامرات يوم الاستقلال قريب لما الجهاز يرجع