واحد اتنين احباط

جربت قبل كده الشعور بالاحباط ؟؟

طيب عارف قد ايه هوا بيوجع ؟؟

طب جربت قبل كده انك تنقل لحد الشعور بالاحباط ده قبل كده ؟؟

طب عرفت انك لما تنقله الشعور هتحس انك مبسوط ومبقتش لوحدك فى الاحباط؟؟

انا هعلمكم ان شاء الله ازاى تحبطوا اكتر واحد يكون عنده ثقة وتفاؤل وهبل فى الجبل حتى

^_^

طبعا الخطوات عاوزه حبة تركيز وحبة احباط هيعملوااجمد شغل

نبتدى برقم واحد :

لو رايح شغل جديد انترفيو لسه يعنى...وعاوز تتأكد انك الوحيد اللى هتقبل فيه ...لو مكان الانتظار مفتوح وممكن تتمشى فيه ...تقدر تميل على كل متقدم وتتعرف عليه وتشاركه همومه ...وفى لحظة ما يطمنلك هوب بحقنة الاحباط فى قلبه وقوله اصلهم اختاروا الموظف وعاملين الاعلان بس عشان يقولوا فيه شفافية فى البلد

روح عالتانى وقوله اصل انت شكلك مش قد المستوى ...متزعلش منى اصلى انا بس بقولك كده عشان هما ممكن يقولولك جوا انقح من كده

اصل الشغلانة دى لازم تشتغل بواسطة....انا معايا واسطة وكل اصحابى اشتغلوا هنا بواسطة

وبخ كده وادى دقنى لو الناس دى مبقتش محبطة اخر واول حاجه فى الحياة ^_^

رقم اتنين :

اتعود وانت فى اى مكان اى حد فرحان لازم تكئبه ...لو حب وخطب بنت جديدة والعكس احبط امه وقوله انت كده زنقت نفسك وسبت الحرية وبكرة تلعن سنسفيل اليوم اللى شفتوا بعض من الطلبات اللى هتسمعها منهم

لو حد اشتغل جديد قوله فى ازمة اقتصادية فى البلد وانت معرض فى اى وقت تتفصل من الشركة ولا البنك ...فانت لازم تاكل بايدك وسنانك اى حد حواليك وتمصلح عليهم

تالت حاجه واخر واهم حاجه فى الاحباط :

متسمعش نفسك لانك لو سمعت نفسك انت ذات نفسك هيجلك احباط من اللى بتعمله ..

وبالهنا والشفا يا جماعه فى طرق كيف تحبط مواطنا غلبانا سعيدا

ونظرا لان الجنون عادى عندى

فاللى انا قولته ده شفت العن منه يوم الاربعاء وكنت بقدم فى مكان ما وجمبى شعلة احباط مركزة

بس مش عالسفاح خالص

هوا يقولى يمين وانا ااقوله شمال

يقولى عندنا ازمة بطالة وانا ااقوله انه كسلان

يقولى الناس بقت كئيبة وانا ااقوله انه عنده ضحكة غريبة

وتقريبا لما ياس انه يحبطنى

تحول لمواطن غلبان اخر

وللاسف نجح انه يحبطه

فأنا من موقعى هنا على السرير ومعايا لابتوبى المتقلب من مواطن اخر لذيذ

ان الحكومة تنزلنا كورسات احباط اكتر واكتر عشان نعرف نحبط باقى ال 80 مليون مواطن الفاضلين فى البلد

وكل عام وانت محبطين

^_^

مع تحيات عبدو احباط!!!!!!