Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Monday, June 18, 2007

صدفة...!!!

مجرد صدفة

حياتنا عبارة عن صدف مع بعضها

مع اختلاف انواع الصدف دى

يعنى ممكن النهاردة تبقى نازل من البيت رايح الشغل

وتقابل حد مش متوقعه...صدفة

بس بتفرق لو كان الحد ده بتحبه...ولا مش بتطيق اهله

فهنا بس هتفرق اذا كانت صدفة حلوة....او وحشة

وكمان الصدف دى....بتأثر فى سير يومنا

يعنى انت بعد ما شفت اخينا اللى بتتخنق منه صدفه

ورحت الشغل لقيت الدنيا معكوكة...

طبعا هتلعن سنسفيل امه ...واللى جابوة..

واليوم اللى مشيت فى الشارع وشفته

لكن لو شفت وجه ملائكى عالصبح كده

طبعا هتروح الشغل وانت مبسووط...

ومزبط مزاجك...وكل حاجه هتبقى السطة

وتدعى ربنا ان كل يوم يرزقك بالصدفة دى

حياتنا بالظبط كده

مش معنى كده انى بلغى القدر...تؤ

بس بتحصل لحظات فارقة معانا ...فى ايامنا

شغلنا...دراستنا...بتأثر فعلا علينا

سواء بالسلب او الايجاب

سواء بالفرح والسعادة...

او بالحزن والكئابة

كام واحد منكم فاكر الصدفة الحلوة بتاعته؟؟

واحد...تلاته...عشرة ممكن...

طب ياترى كانت حلوة ولا وحشة ...

هتقل عليكم...انكم تكتبولى ..

اى صدفة كانت فى حياتكم...وكان تأثيرها ايه

اما بالنسبالى ....فحكاية الصدفة عاوزلها بوست لوحده

يحكى قصة اجمل صدفة حصلتلى فى شهرين ونص ...

على مدار حياتى كلها

بجد احلى صدفة لغاية دلوقتى قابلتها

يلا...مستنيكم..:)

29 comments:

barbie girl said...

صدفة حلوة:لما كنت مشتركة فى منتدى شمساوى جديد
ومكنتش عارفة اى حد فيهم

وفى مرة بعد المحاضرة كنت رايحة اشترى حاجة اشربها فقابلت واحدة صاحبتى فقلتلها هو انتى فلانة اللى على المنتدى ..لاقيت ريرى وداس كلاين ميدشن جايين عليا وريرى بتسألنى هو انتى مين على المنتدى وانا سألتها انتى مين وبعد كدا بقينا اصحاب كلنا وعرفت باقى البناتيت العساسيل على شمساوى

Ana keda said...

بوست جامد هيخلينا نفكر بجد
ونقلب كده فى الذكريات

بالنسبة للصدف الوحشة الاول عشان نختم بالحلوة

اول صدفة كنت فى اعدادى بلطجية شوية وبعدين حصل كزا موقف وكان معانا ولاد وكده فهم كانوا فاكرين النقطة السودا دى المهم كنت فى المبكروباس وقابلت واحد كان معانا وكان الميكروباس فى ناس من كلبتنا ومحمد ده قعد فتح الماضى كله ويقولى فاكرة ويضحك وانا هولع فيه كانت صدفة هباب والله ورحت لقيت الولدين الى معايا فى السكشن يضحكوا ويقولولى انتى مش ممكن وشردولى الله يسامحه محمد ده

فى صدفة تانى اه قابلت برضه واحدة كانت معايا فى درس التاريخ فى 2 ثانوى وانا كنت مع المستر جامد وهو كان بيهزر وكده المهم قابلتها فى الكلية وكان معايا ليدر عليا فى مشروع فى الكلية ودى برضه اشتغلت فاكرة لما مستر محمد قال انك بت مشكلة وفاكرة لما روحتى مجموعة الولاد بس وقعدتى اسبوعين وكنتىالنبت الوحيدة

وطبعا مستر احمد بصلى وقعد يضحك وقالى شكلك مصيبة وانا الى فاكراك طيبة
تشريج علنـــــــى

فى صدفة كمان برضه لن انساها كان معايا واحد فى سنة اولى كلية وكان واد رخم اوووووووى وكنت مبطيقوش ووصله كلام انى بقو ل عليه رخم وكده المهم ركبنا سوا وانا عمالة نفسى مش واخدة بالى راح قالى انتى مش شايفانى ولا ايه قلتله اهلا ازيك وليك وحشة قالى اه جدا فى كلام وصل وكده صدف منيلة والله


الصدف الحلوة بقى

فى واحدة الى هيا انتيمتى واختى وكل حاجة وهى ساكنة جنبى وانا مكنتش معاها اوى من زمان كان فى موقف متاخد منى وهى فكرتها كانت زفت عنى وبعدين قابلتها برضه فى المترو واتكلمنا كتير وبعدها واحنا اجمد اصحاب لحد دلوقتى

وفى مرة كان نفسى اشوف شخص معين من فترة لانى سمعت انه كان تعبان اوى ومكنش ينفع اقول سلامتك او اى حاجة المهم قابلته صدفة وهو سلم عليا والحمد لله بقى كويس كنت فرحانة اوى يومها
من الاخر الصدفة حاجة حلوة جدا بس منيلة جدا
تحياتى

تخاريف خاصه! said...

ايه البوست الجامد ده...
امممممممم
احلى صدفه...

حصلتلى من شهر تقريبا..
كنت مخلصه امتحان ونازله ع السلم لقيت واحده صحبتى جدا..من ايام ابتدائى..وكنت من زمان ماشفتهاش..
وكل مانرتب معاد عشان نتقابل..يحصل حاجه ويتفركش...
سبحان الله شفتها وقعدت معاها ما يقرب من تلات ساعات...
من غييييييييييير معاد...
:)
فعلا اللقا نصيب...
...............
سمعت انا اسم منتدى شمساوى هنا...
:)
الشموسات منورييين يا
Barbie girl
:)

نفسنا said...

ندعوكم لمشاهدة العدد الثانى من مجلة نفسنا

NeRmeeN said...

احم احم حقيقى يا اخ سفاح ان حصلتلى قبل كده صدفة ماعتقدش انها ممكن تتكرر كتير ..عاملة زى الافلام العربى ..غير مقنعة...بس اهى حصلت...بس مع كل آسف مش هقدر اقولها:p

غير صالحة للنشر (حلو الساسبنس ده)

مستنينك بقى تقول الصدفة بتاعتك...وحسك عينك تطلع زى الصدفة بتاعتى :p

تحياتى وعلى فكرة.. فكرة البوست لذيذة:)

^-^ LoNeLy ^-^ said...

كان يوم حبك اجمل صدفة .. لما قابلتك كانت صدفة

ياللى جمالك يا مشمش اجمل صدفة هههههههههههههههه

FloNa said...

دحكتني اوي حكاية تقابل حد مش بتحبه فتلاقي اليوم متعكنن عليك

احنا اللي ينخلق الحاجات دي لنفسنا والله زي ما حضرتك قلت !!

اما عن صدفة حصلت في حياتي فكانت يمكن لما قابلت انتيمتي

قابلتها صدفة وانا واقفة في الشارع بوقف تاكسي للكلية التاكسي وقفلي وقلتله كلية صيدلة

لقيتها هيه بتقول معايا بنفس الرنة كلية صيدلة

فخدنا احنا الاتنين واتعرفنا في التاكسي عادي


سبحان الله الدنيا مشيت واحتجتها في كذا حاجة لانها ساكنة جنبي ودلوقتي هيه اعز صديقاتي تماما :)


بقولها اقول للناس اتعرفت عليكي ازاي

في التاكسي -_-

يادي الفضايح :d

Noony said...

أنا مش بؤمن بالصدف

أنا أؤمن بالقضاء والقدر

:)
نوني

smraa alnil said...

اشطة عليك يا سفحفح

اديها صدف
وعيش

قولي الاخبار بسرعه
من ورايا يا خاين

عامة الصدف دي برضه احلي حاجة حصلتلي

مانت عارف الباقي بقي
:)

مستنين البست بتاع التفاصيل
نقول مبروك ولا ايه

An Author said...

يااااااااااه ، حياتى فيها صدف كتير جدا و اغلبها وحشة للأسف
انا مثلا بقالى من شهر اربعة متنكدة و تعبانة بسبب صدفة واحدة !

موقف وحش جدا حصلى من حوالى تلات سنين وبحاول انسى فيه طول التلات سنين دول
و أفاجئ بطرف الموقف قدامى
افتكرت كل اللى كنت نسيته و اللى بحاول انساه و رجعت اتعذب تانى من اول و جديد عشان حتة صدفة و نظرة واحدة للشخصية دى

catroz said...

بجد بجد يعنى فكره البوست جاامده يا مشمش

بص بقى هو فى صدف كتير بغباء فى حياتى..بش مش هقول كله..هقول كام واحده كده بس يعنى..و طبعا مستنيين الصدف بتاعتك
المهم من الصدف الحلوه اوووووى انى شفت اختى الكبيره فاتحه سعدووون و فاتحه موضوع لعبه الصراحه...
الموضوع عجبنى و عملت عضويه و بقيت اادخل على المنتدى
يعنى من الاخر كل حياتى على النت دى كانت صدف
صدفه لما حطيت اميلى فى الملف بتاعى و شخص معين عملى اد و حصلت حاجات كتييييييييييييييييير بعد كده
..:D
صدفه لما انا و كوكى دخلنا نفس القسم و اضطرينا نحتاج بعض فى حاجات كتيره اوى و هى دلوقتى ااعز اصدقائى
و لما عرفتك انت كمان يا عمو السفااح..كانت صدفه..مش كده ولا ايه
:D
...................
صدفه وحشه بقى..لما سافرت السنه اللى فاتت..المصيفو و حصلت حاجه كده
معرفش بقى هقدر احطها فى بند الصدف ولا تؤ
بس هو بسببها انا الحمدلله لسه عايشه
و شخص عزيز على جداا اتوفى..:(


عاجبك كده..البوست جامد بغباء...بس ادينى بعيط
:(:(:(

safa7_karmooz said...

barbie girl:

ههههههههههههههههههههههههه...حلوة الصدفة دى يا باربى ....لسبب ...انهم اصحابك اللى كملتوا مع بعض ...وقاعده فى مكان حاسه بألفه شوية مع اللى فيه ...:)

انا لسه حصلالى امبارح صدفه...بس منيلة ...وعلى منتدى ....هحكى بعديييييييييين

safa7_karmooz said...

ana keda:

نوووو كومنت بجد ....ده انتى عاوزالك بوست بحاله ااعلق على صدفك ...

بس باين من كلامك انك كنتى زعيمة المدرسة....انا كنت تفل تيب....بسوس من تحت لتحت....يعنى جناح تنظيمى بس بوجه حمل ...ههههههههههههههه

نسيب الحاجات الوحشة ونبص لصدفك الحلوة
ايه حكاية الافكار الوحشة عندك...ههههههههههههههههههه

المهم انكوا مع بعض دلوقتى انتى وصابحتك...ربنا يخليكوا لبعض ....

وكونيص انك اطمنتى على ;)

safa7_karmooz said...

تخاريف:

منورة ...بقالك كتير مش هنا...تعرفى الصدفة بتاعتك شبه صدفتى كده...بس مع اختلاف حبة تفاصيل كتير...بعدين بعدين ااحكى

safa7_karmooz said...

نفسنا:

تمت المشاهده....

--------------------

نرميين:


طب ايه البعته دى بقى ...وانا داخل وبقول هلاقى كومنت هيبزلزل الزلازييل ...الاقيكى كاتبه مش هينفع ...ممممممممم

سيدى العضو هذا غير وارد :D

الصدفة بتاعتى؟!!!!

دى فيلم عربى وهندى ...واجنبى...بس مظنش انها هتكرر تانى ..:(

ومبسوط ان البوست عجبك

safa7_karmooz said...

lonely:

حمبى الاولانى والاخرانى

يابنى انت عارف معزتك وفرختك عندى قد ايه

---------------------------------

Flona:

هههههههههههههههههههههههههههههههههههه

مش عارف ليه افتكرت اغنية سيمون بتاعت تاكسى ...هههههههههههههه

طب كويس ...عشان يبقى المكان ليه ذكرى خاصة ....بس كان المفروض تاخدوا نمرة العربية او رقم موبايله

عشان تحتفلوا باليوبيل الذهبى او الفضى فى التاكسى نفسه...

طبعا هتقولى هوا هيبقى عايش...ااقولك طبعا...مصر ام الدنيا ..زواحنا مبنقطعش عيش حد...ولازم نخلل العربيات...:D

ربنا يخليكوا لبعض

safa7_karmooz said...

Noony:


ولا انا ....

وكلنا لازم نبقى مؤمنين بالقضاء والقدر...بس ما يمنعش من اننا نعيش لحظة معينة

---------------------

سمراء النيل:

شايفة ...مزبطكم والله ....:D

الصدفة بتاعتك....معروفة ...وربنا يكملها دايما بخير كده عالطوول...:)

صدفتى ...!!!!!..ههههههههههههه

مش عارف...ممكن تبقى حلوة ووحشة...بس شايف انها فى النص

متستعجليش على رزقك :D

safa7_karmooz said...

جيداء:

ليه بس كده ؟.

معنى انك افتكرتى الموقف ...او عايشاه تانى ...ده معناه انك مش نسيتيه ...

لان لما الواحد بينسى وبيفتكر عمره ما يزعل على اى حاجه كده

ان شاء الله تطلعى من الموود الوحش ده ...

:)

safa7_karmooz said...

catroz:

مممممممممممممممممممممم

حلوة الصدف الحلوة...حتى ااعرف واحده منها .....

الصدفة الوحشة ...اولا محناش عارفين الغيب عشان نعرف اذا كنا هنبقى عايشين ولا تؤ....او هنبقى كويسين ولا تؤ...دى اقدار ...فى الاول والاخر...:)

امسحى دموعك يا امال...عمو السفاح هيجبلك غسالة جى ام سىىىىىى

MAKSOFA said...

أحلي الصدف موش الصدف العابرة للي بتخليك تفرح لأ احلي الصدف اللي بتحصل لك وماكنتش علي البال ولا الخاطر وتبقي قدر من عند ربنا تتغير فيها حياتك
زي العمل
الحب
الزواج
المكسب في اي مشروع
فلوس تهبط عليك فجأه
كده يعني

Anonymous said...

فكرة البلوج حلوة أوووووووووووووووووى ... انا مش عارفة مدونتك ديه هتبقى احلى من كده ايه ... المهم ( وش متنرفز ) انا حصلتلى صدف كتير اوى .. بس اول ماقريت البوست ده جيه فى بالى على طول صدفة جمية جدا .. كنت طالعة على سلم المترو وشايلة ورق الامتحان فى ايدى وكنت بجد مخنوقة لدرجة متتخيلهاااااااش .. مكنش فى ساعتها حاجة حلوة فى حياتى كله زفت وقرف ... والدموع فى عينى الله ينور ... فوانا طالعة على السلم لقيت جمبى ام وشاية ابنها ... الام شكلها بسيط جدا ومستواها الاجتماعى عادى جدا وطبعا ابنها نفس الحال .. وانا اصلا مش بحب البنات اللى تقعد تعاكس البيبيهات .. ياختى كميلة والفراغ ده والمترو كله يقعد يتفرج عليها .. بس بجد هو اللى شدنى جدا لقيته بيبصلى وانا ساعتها كنت مدمعة تقريبا وراح ضحكلى .. نفضتله لقيته بيبصلى تانى وبيضحكلى كانه مصمم يلعب معايا رحت ضحكتله من غير نفس راح مسك الورق اللى معايا وقعد يلعب بيه .. وراح ضحك حتة ضحكة سكر .. النغزتين على خدوده وسنانه الصغيورة .. بجد خلانى نسيت الدنيا كلها ... كانت احلى صدفة حصلتلى من وقت قريب
معلش طولت . .بس بجد مدونتك حلوة بغباء وانا بحقد

تــسنيـم said...

حلوة فكرة البوست استنى أدور وأرجعلك

وشوشني said...

الموضوع جامد جدا جدا
بس صدفه حلوة دي
خليك معاي شويه افكر
.....
لما اتعرفت على صاحبتي الانتيم من وانا عندي سبع سنين تقريبا ماكنش في اي صدفه حلوة بعديها عادي يعني مابتفرقش حلوة من وحشه معاي
............
انا خلصت امتحانات يا استاذ ادعيلي بقا عشان النتيجه كده

Ana keda said...

انا زعيمة مدرسة
تؤ تؤ خاللللللللص على فكرة انت خلتنى افتكر ايام المدرسة وكتبت عليها لانى ليا مواقف مسخرة بجد مش صدف بس

لا انا كنت شقية جدا ومكنتش بسوس بقول علطول وياما خدت مواقف على كده بس بجد كانت احلى ايام
تشكر يا سفاح فكرتنى بالذى مضى

أسوور said...

اوعدنا يا رب بصدفة زى اللى حصلتلك

مش عارفة ليه حاسة انك اللقاء القادم هتغنيلنا
كان يوم حبك أجمل صدفة
لما قابلتك مرة صدفة

تحياتى

زى الهوا said...

بوست حلو اوى فى انتظار الصدفة الغريبة الفظيعة المشينة بتاعتك ، الصدفة بتاعتى بقى إنى لما كنت فى اولى ثانوى وباكتب الرغبات بتاعت تانية كتبت فرنساوى لأن اخواتى الاتنين كانوا واخدين المانى وانا كنت كرهاه ، بعد لما سلمنا الورق راحت بنت معايا فى الفصل قعدت تعيط وتقول للميس انا عايزة اغير الفرنسى لألمانى ، المدرسة قعدت تزعق اوى وتقول دى اخر مرة واللى عايز يغير بعد كدة يروح الادارة ويجيب طابع مش عارف ايه ويدفع فلوس كتير كدة وحاجات بالهبل ، وفعلا الميس راحت واخدة ورقة البنت دى اللى اسمها سهام وصلحتها لألمانى وبعد لما خلصت قرأت الاسم تانى من على الورقة اللى غيرت فيها وقالتلها انتى اسمك سماح صح؟؟ ،البنت قالتلها لأ سهام , اتارى الميس طلعت صلحت بتاعتى انا لألمانى بدل سهام واتنرفزت اوى وقالتلى ابقى روحى صلحيها هناك فى الادارة وماصلحتش حاجة تانى ومشيت ، طبعاحسيت بشدة الظلم و كسلت اروح اصلحها ووافقت على الامر الواقع ( الألمانى) وحبيته جدا واول مادخلت الكلية فكرت اكتب فرنسى لقيته لازم يبقى الطالب من مدارس فرينش وبالتالى دخلت ألمانى واصبح الألمانى جزء لا يتجزء من حياتى وشخصيتى , جايز يكون دا من ترتيب القدر بس الصدفة فى انه يتفرض عليا مرتين بغير رغبتى

Anonymous said...

جميل اوى البوست دا يا مشمش

خصوصا انى بحب الصدف جدا

لانها بتبقى جميلة جدا جدا جدا

J.B. :)

Anonymous said...

لذيذ البوست يا مشمش خصوصا

انى بحب الصدف جدا لان الحمد لله

كلها بتبقى جميلة جدا جدا

يعنى بتمنها كل يوم

J.B. :)

hamosha said...

أجمل صدفه فى حياتى هى اللى عكرت عليا الدنيا وخلتنى مش طايق اى حاجه - الحب من غير أمل - hamosha_hamosha@yahoo,hotmail.com