Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Thursday, October 21, 2010

والبلوج ده مش بتاعى

بقالى فترة مستمتع بالاغانى الشعبية

هى فترة طويلة يعنى ...من كام سنة كده...وبحكم المنطقة اللى انا عايش فيها فبقيت بسمع الاغانى قبل ما تتسجل او بعد ما تتسجل مش فارقة المهم المصدر الغنائى موجود هنا من زمان

ناس كتير بتسمعهم بتقول يععععععععععع ايه القرف ...وفى الغالب بيعلقوا على صوت المطرب

وهوا الراجل مش غلطان ان الزمن حكم عليه انه يحشش لحد ما صوته غشلق وبقى الصوت حاجه والمنظر حاجه تانية

بس حاولوا تعصروا على نفسكم لمونة كده واسمعوا شوية اغانى ...كلماتها روعة بجد...لو مغنى ليه صوت حلو غناها ...هتكسر الدنيا :D

يعنى مثلا عبد الباسط حمودة ...الراجل بيغنى من زمان ومشهور اوى فى الشارع ...ليه اغنية اسمها ضحكة سلف...الراجل من كتر الزعل والحزن بيدور على ضحكة يستلفها يستمتع بيها شوية

وبردوا اغنية البانجو ده مش بتاعى ...اللى انا كاتب عنوان البوست عليه...فيها معنى انك يوم لو خارج مع اصحابك ولقيتهم معاهم اشولة بانجو...روح واقعد فى بيتكم

وبردوا سلسلة العبد والشيطان...دى اللى بجد من غير هزار ولا تريقة دوروا على كلماتها وشوفوا الحوار اللى الراجل عمله بين الشيطان والعبد...وده بيحصل كتير

يعنى بصوا كده


شيطان وقال للعبد
وريتك الدنيا والوانها وبعت الاخرة علشاني
وبقيت تخاف تخرج منها
ونسيت كمان الصلاة والفرض


مش بتحصل بردوا ...لما بنكسل اننا نصلى ؟؟؟

العبد قال للشيطان
من بعد ما طاوعتك مبقتش عارف اعيش
وديتني لحد النار وهناك معرفتنيش

ودى بردوا !!!

ناصر صقر لما غنى اغنية المحكمة بردوا...جاب كل المواقف اللى بنقراها فى جرنال الحوادث الصبح من عند الراجل بتاع الجرايد اللى قدام هارديز فى التحرير

وطبعا منقدرش ننسى شعبولا مبحبش اسرائيل :D

اينعم بردوا فى اغانى هلس هلس يعنى...بس النسبة الكبيرة منهم بيقولوا حكمة فى الاغنية...اوبيغنوا افلام عربى ...زى محمد رجب لما غنى عن الست المتجوزة واللى كانت بتلف عالشباب وكده

موضوع كبير اوى...بس مشعشع فى راسى بقالى فترة

المهم بس قبل ما انسى

شريط فيروز حلو :D





11 comments:

Antika said...

فعلا صدفة غريبة !!
كنت لسة باحكى ف بوست واتكلمت عن الاغانى وجه ف دماغى الاغانى دى :D

العبد والشيطان لما اخويا يحب يستفزنى يقولى دى اغنية دينية
احسن من الـ بتسمعيه :D

الاجزاء الـ كتبتها منها كويسة فعلا لما الواحد يقراها كدة ومعناها بس الـ يوصله

بس الموسيقى والصوت حاجة سيئة .. فعلا ماتتسمعش
وفيها كلمات تانية مش لطيفة برضو

انا بحب اسمع شعبى جدا
بس المشكلة ان الـ فاكرين نفسهم دلوقتى بيغنوا شعبى
مستواهم مُتدنى جدا عن بتاع زمان

يعنى لما احب اسمع واعمل دماغ بجد :D
مش هافكر تماما ف صوت عبد الباسط حمودة
عشان ده هايعمل صداع مش دماغ :D

والافكار الساذجة الـ ف معظم الاغانى دى
بتشوه ثقافة ناس بسيطة مش فاهمين حاجة

حاجة زى ضحكة سلف الـ حكيت عنها .. انا ماسمعتهاش بس فهمت الفكرة
وانا مش عارفنى والجو ده

ليهم تأثير سئ عاللى بيسمعه عشان بيخلى الواحد يتمادى ف احساس انه مظلوم ف حياته ومش سعيد

ومع ذلك مش ضد ان حد ثقافته بسيطة شوية يعبر عن رأيه بكلمتين ف اغنية
طالما مافيهاش حاجة مُخلة

بس ضد ان الحاجات دى تنتشر اوى كدة وتاخد اكبر من حجمها من غير سبب !

لان هما لو مش لاقيين الـ يشجعهم ويسمعهم .. اكيد هايسكتوا .. او صوتهم هايبقى اقل شوية

Antika said...

فيروز دى جميلة بجد !! حاجة ادمان كدة زيها زى القهوة :)

Mona space said...

فى اغانى كتير مش ضرورى تكون شعبيه او غيرها بيبقى صوت المطرب لا يطاق بس الكلمات والالحان (اللى هى المفروض الحاجه الوحيده اللى بتضمن التزامه ب الرتم)
هى اللى بتشد وبتخلينى اسمع الاغنيه مره واتنين وتلاته

همسات وبحــ الحياه ــر said...

ههههه
انا مبحبش اى اغانى شعبى خالص
بس مرة كنت فى الميكروباص والسواق كان مشغل اغانى كان من الطبيعى انك تسمع وتركز فلقيت كلمات الاغانى جميله
وليها معانى
بس المشكله ان الاغانى دى مش بيسمعها غير السواقين وغيرهم لكن تفتكر كدا ان فيه واحد مثقف يسمع الاغانى دى
لا بيسمع اليسا وتامر وعمر :) هههههه
دمت بكل خير

Ramy said...

عارف انا متفق معاك جدا فى حكاية ان الأغانى الشعبية كتير منها كلماته جامدة جدا

اول من عرفنى على الأغانى دى كان ابن عمى هو أكبر منى بس زى صحبى تمام

سمعنى كذا حد و فضل يشرح لى زى ما انت عامل فى البوست تمام

و شريط فيروز جامد

(:

كبر دماغك said...

بجد الكلام عن الاغانى دى رااااائعه وهى وجهه نظر

عمرو فكرى said...

وبقيت تلعب بوكر .. وبتشرب جون ووكر


لسة واحد معدى من تحت ف الشارع دلوقتى ومشغلها حالا وانا بقرا الكلام

Lady E said...

يعني تبدأها بشعبي وتنهيها بفيروز :)

الأغاني العادية بتاعت المطربين العاديين هي اصلا اغاني شعبية لأن ليها شعبيه
popوبتتصنف تحت مسمى الأغاني ال
ودي اختصار لكلمة
popular

اما الأغاني الشعبية اللي تقصدها ففي منها أغاني فعلا كلماتها جميلة جدا بس الأغلب لا صوت ولا لحن ولا كلمات وبعدين لو تقارن الشعبي ايام محمد عدوية بالشعبي بتاع دلوقتي هتلاقي ان شعبي زمان مكنتش شعبي بمقاييس دلوقتي

البانجو مش بتاعي كنت بسمعها ايام الجامعة ومكنتش عارفة بتاعت مين وعرفت دلوقتي انها بتاعت عبدالباسط :)

simply me said...

انا اللى بيعجبنى فى الاغانى دى انها بطلت تتكلم فى الحب والاحضان
مش مهم بقى حشيش ولا غيره
بس يكون كلام لايخدش الحياء

Amr Awwad said...

لا يا راجل اغانى شعبى مين

والله لو نطقت وقالتلى اسمعنى .. انا ودنى عزيزة عليا

كلها تخبيط ورقع ومحدش فاهم حاجة .. واللحن مش مع الكلام .. ومعظم الكلام مسف وتافه ... والصراحة ولا واحد صوته يتسمع

الصراحة انا مبسمعهاش تحت اى ظرف ..

Anonymous said...

بس حاولوا تعصروا على نفسكم لمونة كده واسمعوا شوية اغانى ...كلماتها روعة بجد...لو مغنى ليه صوت حلو غناها ...هتكسر الدنيا :D

انت جبت مالاخر ..

انا كنت بشمئز من الاغاني دي عشان دايما صوت المطرب بيبقي حقير والالحان بتوجعلي دماغي وكمان كنت بحسها اغاني محبطه درجه اولي :D

بس فعلا اكتشفت ان معظم الاغاني دي لو الواحد ركن كل حاجه علي جمب وركز في الكلمات هيكتشف ان اللي كتب الكلمات دي برنس والله :)))


بس بعيدا عن كل ده ،
البوم فيروز معدي :)
وجاي في وقته :)