ابتسامة حائرة

طفل بيجرى فى الزحمة

وعلى وشه ابتسامة مرسومة

بنت بتجرى من اللخمة

وبتفكر امتى هتبقى عروسة

ست كبيرة وعجوزة

قاعدة وجمبها برواز صورة

صورة مكان قديم

كان فى يوم جواه حلم قديم

قلب بينده على احبابه

وقلب تانى مجروح من اصحابه

وقلب تالت واقف وسط الزحمة

الناس بتدوس عليه فى طريقها من غير رحمة

وقلب رابع واقف فى حاله

من كتر المشاكل مبقاش عارف ماله

وقلب غيرهم لسه جديد

فى الدنيا ولسه سعيد

الابيض عنده مش اسود

والحياة لسه بخيرها معاه

بس بكرها هتلعن سنسفيله هوا واللى خلاه

يجى فى الدنيا الغريبة دى

يقف وسط الطوابير الطويلة دى

يحاول يلاقى لقمة عيش

فى مكان اصلا مش فيه عيش

بيحاول انه يشم هوا نضيف

فى مكان اختفى منه النضيف

بيحاول انه يشق طريقه

ويعافر ويزق خليله

عشان يعرف يوصل الاول

وياخد حقه اول باول

وميبقاش زى اللى قبليه

امن كل واحد للى جمبيه

وفى الاخر الكل باع حبايبه

بس اهم...فى النهاية مدفونين

فى مقابر السيدة راضين

قلب بيدور على نور

فى طبق بنور

تفتكروا هيعرف يلاقيه ؟؟؟

ولا هينضم للى تحتيه ؟؟

او القطر هيدوسه

زى ما داس اللى قبليه؟