طراطيش مبعثرة

بنتغير كل دقيقة ...كل ثانية...كل لحظة فى اليوم
بس المهم اننا نتغير للأحسن...مش للوحش
ونعرف نستغل التغيير ده

**************************

ساعات كتير بحن للماضى وارجع افتكر الذكريات واعتاب نفسى واعاتب ناس تانية
بس برجع وافتكر ان الذكريات اتعملت عشان نفتكر الحلو وبس

**************************

ذنب اهالينا الوحيد انهم جاوبنا للدنيا
باقى الحدوتة احنا بنتحمل الذنب سواء فى المعاملة او فى التعامل مع اى نفسنا حتى مش مع الناس
الذنب ذنبنا احنا ...مش ذنبهم

*************************

انت مجنون

اتقالتلى وبتتقالى كل يوم ...بفرح لما بسمعها...بحس انى لسه شباب وفيه طاقة وحيوية لسه جوا ...وساعات بضايق لما بسمعها ...بحس ان الطاقة انطفت ...والموتور عاوز يريح ...قولتلى عندك كام سنة؟!!

**************************

كل يوم بيثبتلى المسئول فى مصر انه موجود عشان يعذب اللى تحتيه او اللى بيتعامل معاهم

وكل يوم الروتين بيثبتلى قد ايه الموظفين بياخدوا شتايم ودعوات عليهم من العك اللى هما فيهم...ونسأل نفسنا هوا احنا ليه مش بنتقدم لقدام وبنرجع لورا ؟؟
**************************

لو حد بيحب حد بجد ...مهما كان بينهم حدود ...اى حاجه عاوز يقولهاله او يسأله عنها ...هيروح ويسأله...مش هيتكسف...مهما كان

**************************

لما ايدى توجعنى فى الشتا او ابقى تعبان ومكسل اعمل اى حاجه واحس انى اشقى واحد فى الكرة الارضية ...ابص حواليا الاقى ناس بتتعب اكتر منى وظروفها اوحش منى...بس بيحفروا فى الصخر بمعنى الكلمة

هبة من ضمن الناس دى ..:)

زوروها

http://hebahopes.blogspot.com/

***************************

كل يوم بتأكد اننا زى العيلة الصغيرة ...مع بعض فى الحلوة والمرة بجد

ربنا يخليكوا ليا ااقرب اتنين ليا

نونى ونونا

***************************

كل يوم قبل ما انام اصلى وادعى ربنا يكرمنا سوا

ويخليكى ليا

بجد حتى الان

احلى حاجه حصلت فى حياتى الجديدة

بحبك

السنة الهجرية الجديدة

كل عام وانتم بخير

وكل عام وانتم الى الله اقرب

سنة هجرية سعيدة علينا كلنا ان شاء الله

Love was made for me and you

L is for the way you look at me
O is for the only one I see
V is very, very extraordinary
E is even more than anyone that you adore can

waiting ...

سيجارة وكوباية شاى ساعة عصرية

وهفضل مستنى

عيد اضحى سعيد

Mistake

This time is the end ...

because it's Fatal Mistake !

Congratulations...

الحمد الله

حرقوا دمنا وهنلعب الماتش الفاصل


مبروووووك لمصر




وعاوز ابارك لاتنين من المدونين

اصحاب مدونة اوقات فراغ

The Rock

&

Barbie girl

كتب كتابهم بكرة يا جماعه ان شاء الله

والفرح التلات

Algeria Merda

كل الناس بتقول يارب

تعمل ايه لو ابنك تعب...تروح تدفنه طبعاً!!!!!

عندك عيل صغير ؟؟؟؟

طب هوا اكيد كويس؟؟

طب مفكرتش يوم لما يتعب او تحصله حادثة - لا قدر الله - ومحتاج تنفس صناعى عارف هتروح بيه فين؟؟

لو مش عارف انا اقولك

خدها من قصيرها ورتب الدفن بتاعه وترتيبات العزا والصلاة عليه اسهل بكتير من انك تستنى فى مستشفى او مع عربية الاسعاف وتشوف ابنك بيموت قدامك عشان مش لاقيين جهاز بتاع التنفس الصناعى ...او لقيته فى مستشفى بس مديرها مش راضى يدخله رغم انك واقف بتبوس رجله ...وكل اللى انت طالبه منه تنفس صناعى لحد الصبح بس ...مجرد نفس...مش نفس سيجارة حشيش ولا سيجارة بانجو او حتى كليوباترا...نفس هوا ...عشان يعيش على امل

بس لاء ...لازم نقول لاء ...عشان سمعة مستشفى ...ممكن

عشان احنا مبنهتمش غير بابناء الناس المهمة...ممكن

عشان اللى مالوش واسطة مالوش ضهر ...ممكن برضه

امبارح الساعه 9 بالليل وقع طفل صغير عنده سنتين الا شهرين من شباك شقته من الدور السادس على الرصيف تحت ...اتنقل مستشفى الهرم وقتها عالطول كان هناك الساعه 9 وربع تقريبا واتشخصت حالته ...كسر فى الجمجمة ، ارتشاح فى المخ ونزيف فى المخ ...طب ايه المطلوب دلوقتى يا جماعه ؟؟؟

جهاز تنفس صناعى للاطفال الصغيرين ...طب ده مش عندكم...لاء ماعندناش ...بس عربيات الاسعاف الطائر فيها..بس مش هينفع تقعدوه فيها لحد الصبح ...شوفوا مستشفى يكون فيها الجهاز...

القصر العينى الفرنساوى فيها بس مافيش مكان وفيه ناس عالانتظار كمان
سوزان مبارك التخصصى للاطفال للاسف مفيهاش ومعرفشى ازاى ...مين اللى عنده؟؟؟

مستشفى كيدز فى المهندسين ...بنتحايل عالراجل ساعه الا ربع مدير المستشفى يعنى

عربية الاسعاف واقفة معانا فى مستشفى الهرم اكتر من ساعه ونص ...والمفروض تمشى فيه حالات تانية ...

عدى ساعة ...ونص...ساعتين ...ونص

البقاء لله يا جماعه...الولد اتوفى وبقى عند ربنا خلاص

فى خلال الساعتين ونص دول...بندور على مستشفى فيها الجهاز بتاع الاطفال ده

وبنتحايل على بتاع كيدز يقبل الولد...مجرد نفس مش عاوزين عمليات والصبح هننقله

لاء...اليوم واقف على 2500 ...معانا فلوس...طب لازم يكون معاه الاشعات ونفحصها بعدين نقرر...طب يكون معاه دكتور...لاء اصل احنا مش بنقبل حوادث ...طب انا ايه يضمنى انكم تعرفوا مدير مستشفى سوزان مبارك...انا هكلمه اتأكد منه ...طب مش عارف ايه تانى

حجج ورا حجج

طب اهله والاهمال ...وفاة الولد اعتقد عقاب من ربنا ليهم ...وابتلاء كمان ليهم ...وممكن يكون سبب انهم يدخلوا الجنة

طب الدكاترة دول؟؟؟؟

والمستشفيات دى؟؟؟؟

طب دلوقتى اللى عنده عيل صغير يروح فين لما يتعب او تحصله حادثة...نطلع عالمدافن احسن ...ولا نتفرج عليه وهوا جمنبنا بيموت؟؟؟

حسبى الله ونعم الوكيل


عارفين اللى يخنق ايه اكتر؟

اننا كان معانا وسايط امبارح

:S

تاج من بعييييييييد نادانى

تاج جالى من هاجر زعبل صاحبة مدونة مشاعر صنعت كلمات

اسمك؟؟

سفاح كرموز او مشمش زى ما اصحابى بينادونى

سنك؟؟

23 الا شهرين ^_^

اسم مدونتك؟؟

طرطشة افكار

مجال دراستك؟؟

القانون

هل فكرت فى اغلاق مدونتك ؟؟ والسبب؟؟

مرة فكرت ولا اتنين عشان ناس اصحابى كانوا بيزعلوا لما بكتب وكل واحد كان عاوز كلام يكون تفصيل ليه...بعد كده اخدت بالى ان دى مساحتى بتاعتى ومحدش منهم ليه حاجه فيها ...بس وغيرت رايى

ايه رد فعلك لو حد قل ادبه عليك فى المدونة؟؟

بضايق وبعدين برجع اخد بالى انه زى الفرخة بيشتم ويجرى وللاسف حصلت كتير عشان كده بقيت احط موديراشن للبوستس بعد 5 ايام عشان لو حد رد فى القديم اعرف

اسوأ مدونة دخلتها؟؟

مش فاكر الاسم بس كانت عاملة زى مقلب الزبالة...خرابة يعنى...وكلنا عارفين من هما اهل الخرابات

هيحصل ايه لايميلك بعد ما تموت؟؟

هيفضل مركون او هبيعه والورثة يتخانقوا على الربح:D

اديت الباسوورد لحد قبل كده؟؟

ااه لحدوود..وندمت بعد كده >_<

السفر بالنسبة لك؟؟

تغيير جلد وجو وجسد وحاجات كتير...بطلع من القمقم اللى عايش فيه وبحس انى بتنفس بكل حرية ....بحب السفر اوى على فكرة

الموود بتاعك ايه؟؟

3 اوض وصالة وتكييف 6 سلندر

بتعمل ايه فى وقت فراغك؟؟

يا بنام يا بخرج مع نفسى فى اى مكان

الاكلات المفضلة؟؟

الكوسة بكل انواعها محشى صينية شوربة بشاميل بعشقها ("v")
الملوخية ...اى حاجه خلقها ربنا بحبها

الصفات اللى اخدتها عن والدك؟؟

العصبية
التسرع احيانا
الراس الناشفة ساعات كتير او العند يعنى


الصفات اللى اخدتها عن والدتك؟؟

الطيبة
الصفاء النفسى
ازاى اعرف ااقرا اللى قدامى
ازاى اسامح
حاجات تانية من جوا
وواخد منها حاجه فى الشكل :D اخواتى بيتغاظوا منها ^_^


اكتر 6 حاجات بتحبهم؟؟

حاليا الاولوية لـ

نهى وياسمين
هيثم وسلامة
والباقى من هنا



اكتر 6 حاجات بتكرههم ؟؟

الكدب
الظلم
العته
الراجل لما بيعيل
البنت لما بتعييل برضه
الهبل
الجنون بزيادة
اسرائيل باليهود
الشارع لما يبقى زحمة وقت لما اكون متأخر ومستعجل
سواق تاكسى زى الزلحوفة وانا مستعجل
محبش حد يحكم عليا من غير ما يعرفنى
الفشل

بس كفاية عليكوا كده

شخصيتك نوعها ايه؟؟

الناس اللى بتدخل هنا هسيبهم يخمنوا ^_^

لماذا دخلت عالم التدوين من الاساس؟؟

حبيت اتكلم محدش يسمعنى ولا يعرفنى

اهمية التعليقات بالنسبة ليك؟؟

الترمومتر اتللى بيقولى انى لسه عايش على الارض ولسه فيه ناس بتسأل وبتهتم بغيرها
رغم ساعات مش بعرف ارد عليهم واحد واحد بس بيبقى غصب عنى..:)

احلى بوست كتبته مع ذكر السبب؟؟

مش عارف...كل بوست ليه ذكرى وكل ذكرى ليها معنى او مغزى...شوفوا انتوا احلى بوست قريتوه هنا كان ايه
وهعمل تحديث واحط اللنكات هنا مع اسم كل واحد اختار

بتكلم جد على فكرة

افضل مدونة قريتها؟؟

كل اللى عاليمين من الريدر او الطرطشات الصديقة

اهمية الانترنت بالنسبالك؟؟

زى الجسر اللى بيوصلنى باصحابى اللى عايشين برا ...او اللى جوا وقت ما بكون مفلس ومش معايا اشحن الموبايل!!


اهداء التاج :

just beauty

عقل مهوى

حكايات من القلب

The lost princess

مفروسة

اميرة على كوكب مهجور

My lost world

فضفضة

واللى عاوز ياخده مش ممانع

^_^

10 Things ....

عشرة اشياء ...فكرة جت فى راسى وقلت هنفذها

كل يوم بنقابل ناس انواع واشكال جديدة

جربت تصنفهم من واحد لعشرة ؟؟؟

طيب كل يوم لازم يحصلك موقف او تشوف حاجه فى الشارع ...جربت تصنف اللى بتشوفه من 1 لعشرة؟؟

على اعتبار واحد ااقل حاجه وعشرة الاقوى؟؟؟

طيب اصحابك بتوع الشغل او الدراسة او من زمان ...جربت تحط مين ااقرب عشرة ليك ؟؟؟؟

ممم معتقدش انكم جربتوا

طب جربتوا تحطوا عشر عيوب فيكم؟؟؟

للاسف لاء عشان احنا بنؤمن اننا ملايكة ومش بنشوف الا عيب واتنين ونخبى الـتمانية الفاضلين جوانا عشان منباش ضعفاء قدام عامة الشعب :D

مش هقولكم جربتوا تعدوا عشر مميزات عشان هلاقى معلقات ورسائل تدخل موسوعة جينس بسبب طولها ومدحها

طب حد عارف اول عشر رؤساء للولايات المتحدة؟؟؟ طب العشرة اللى فى الاخر؟؟؟

كنت هسأل عن مصر او دولة عربية بس نسيت الواقع فنفضت -_-

طيب جربت تشوف عشر حاجات فى البيت بيضايقوك او معجب بيهم

جربوا كده بس ولو مرة واحدة

خلوا اسبوعكم كله عد فى عد

عدوا العربيات اللى حروفها شبه بعض او الماركة الواحده ...عدوا فى بيتكم فى شغلكم فى المواصلات او عربيتكم حتى

جرب بس تعد عشر حاجات انت بتحبها

طب كام حاجه منهم انت لسه بتعملها ؟؟؟؟

جربوا ومش هتخسروا

عشر حاجات بس

Ask Me Answers

طيب انا سبت البوست بتاع 5 ايام على اساس حد ممكن يضيف اى حاجه بس محدش اضاف :D



فيه سؤال مشترك الاول ما بين كذا حد هوا سبب اختيارى لاسم سفاح كرموز

السؤال ده اللى ساله :

mimi & واحدة مفروسة

طيب هوا كل الموضوع بينقسم لنصين...اول نص انى زمان لقيت اسم مشمش محجوز فاكتفيت انه يكون فى اللينك بس بتاع البلوج...عشان انا عملتها زمان ونسيتها بتاع فترة طويلة لحد ما رجعتلها
السبب التانى ان كذا حد اعرفه قالى انت سفاح ..ههههههههههه او فيا حاجات من السفاحين ...من ضمنها الهدوء مثلا فى التعامل مع كذا حاجه او كذا شخص وطريقة التعامل معاهم...فقررت اسمى نفسى كده...فعشان الناس تيجى لحد عندى...لازم يكون اسم يشد الناس ...فاكيد مش هسمى نفسى سفاح اسكندرية ...فمافيش غير سفاح كرموز اللى شدنى + انى بمووووت فى اسكندرية

:)

Unique asked me about : what are the things you consider the most important for normal persons to shape their own image from the inside and the outside ?

هجاوب بالعربى بس عشان مش فاكر اغلب المفردات ..هههههههههههههههههههههههههههههههههههههههههههه
طيب اهم كذا حاجه اللى المفروض تكون الشخصية وتفيد الواحد من جوا ومن برا طريقة التفكير ...انسان عاقل بيفكر بعقله وبيوزن الامور ولا عاطفى بيجرى ورا احساسه فى اى حاجه شغل جواز خروجة ...وات ايفر ...طريقة التعامل مع الناس هى اللى بتحط الصورة بتاعتك الخارجية ازاى انت انسان مستهتر ولا بتقدر اللى قدامك وتحترمه ؟؟؟؟
الداخلية عندك بقى من احترام الذات وتقدير النفس واهم حاجه القناعه ...انك تكونى قنوعه باللى ربنا قسمهولك ...منبصش لغيرنا ومنحاولش نبقى حد تانى غير نفسنا ااه نطور منها لكن منقلدش غيرنا
يارب اكون افدتك..:)

Dr Dead حبيب قلبى

حاسك برغم اي حاجة بتعملها تبسطك انك من جواك حزين مش عارف ده صح ولا لا بس دايما احساسي كده عنك انك حزين وساخط علي حاجات كتير مش شايف انك لسه صغير يا مشمش عشان تبقي حزين من جواك كده ده لو انا اللي شايفه صح؟

بص لكل واحد مننا ظروف وكل واحد ليه حياته واللى بيحصل فيها ....من ناحية ساخط ...لا ابدا ممكن بزعل كتير بس ...بفتقد حاجات كانت فى حياتى ومشيت فيه منهم اصحاب توفاهم الله فى حادثة قدام عينى او اللى تابعته وهوا بيموت كل يوم بمرض ما او اللى تسيبه الصبح بالليل تصلى عليه ...دى يمكن اكتر حاجه ماثره فيا ومخليانى بزعل كتير ...مفتقد وجود ناس كتير فى حياتى اغلبهم سابونى ومشيوا ...ااه اينعم هيجى يوم وهحصلهم تحت :D
ومحدش مننا بيبقى راضى عن حاله 100% لازم بنبص لحاجات تانية...بس لعلمك فيه حاجات كتير بتفرحنى بس بيبقى ناقصها الكريز اللى فوق التورتة ...وانا بقعد ادور عليها مين اكلها ولا مين خباها منى ...يمكن هنا او عالمنتدى بس شفت منى وش واحد ...لكن لسه فيه اكتر منى :D

السؤال التاني مشمش مين هو وعاوز ايه؟

واحد من عباد الله بندور على رضى ربنا ورضى الوالدين فى الدنيا وبحاول امشى فى خط واحد ...مستقيم مش متعرج...عاوز ايه بالظبط دى ؟؟؟؟ عاوز اكون حد كويس وناجح فى شغله ...بس دى مش بالتمنى ...للاسف دى بالشغل ومشمش حاليا كائن كسول لاقصى درجة :$

يارب اكون جاوبتك صح :D

Eman H.H. :

السؤال اللى مقدرشى ارد عليه يا ايمان مواصفات البنت اللى عاوز تتجوزها او شايف نفسك بعد 10 سنين فين

يمكن زمان كنت برد وبكل ثقة ...لكن يوم بعد يوم بنشوف ان الدنيا لسه مخبيالنا كتييييييييييييييييييييييييييييييييييييييييير

Silver eyes رديت على الاسئلة نفسها مع ان كان نفسى اشوف منك سؤال

كرسى اعتراف نورتنى وانا عالكرسى ..هههههههههههههههههههههه بتسأل :

هل اتهمت من قبل بتسفيه أفكار الأخرين؟

بتاع 5 مرات كده ...منهم مرة صح كنت ااقصد اسفه رأيه والاربعه كان تجنى عشان بيهربوا من المناقشة ^_^

دهاء سياسى وعودة بعد غياب واهو انا مش عيان ...عشان مش تتعقدى بس...هههههههههههههههه

المهم :

ايه مواصفات الشخص الى لما تقابله تقول عليه " ده انسان فعلا " ؟؟

طيب....بيحترم الناس ....عنده ذوق واخلاق ودين ...بيعامل ربنا كويس مهما كانت ديانته ايه ...عارف الحق من الباطل ...جدع

تقريبا دى المقومات بتاعت الانسان ...اعرف حد كده على فكرة :D

من هو الانسان من وجهة نظرك؟

ههههههههههههههههههههههههههههههههههههه صباح اللف يعنى

ممممممممممممممممممممممممممممممممم
هوا هوا البنى ادم -_-


عمرو فكرى ...كنت مستنى سؤاله كل ده :D

لو قررت تغير شخصيتك مع حد .. تغيرها مع مين؟

طب لو هاتختار حد مننا ع المنتدى .. تختار مين؟

مش عارف والله ...ده ممكن ارد على ايمان واقولها اصعب سؤالين حتى الان ...بس ممكن اغيرها
مع نهى اخد منها شخصيتها واديها شخصيتى ...على الاقل هتكبر راسها اكتر منى :p

بس ممكن اضيف من عندى عليها حبة بهارات يعنى ^_^

بقالى ساعه الا ربع برد عالاسئلة ..ههههههههههه يا موسهل

نيجى للاوستاذة هاجر زعبل اللى سبتها للاخر اللى اتوصت بسم الله ما شاء الله يعنى

11 سؤال :p

يا تري نفسك تعيش في بلد تانيه غير مصر؟ لو اه .. فين وليه ، ولو لأ لأ ليه ؟؟


بلدين ...فرنسا ...اغلب اصحابى هناك من زمان عايشين ومتجوزين وبيشتغلوا هناك ، كان المفروض اهاجر معاهم زمان بس فى البيت رفضوا
او الامارات بحسها البلد العربية الوحيدة اللى بتحترم شعبها فعلا ومقدرااه

ايه المقوله اللي حاططها دايما قدام عينيك ومؤمن بيها ؟؟

اذا دعتك قدرتك على ظلم الناس فتذكر قدرة الله عليك
دايما قدامى ...ودايما عندى فرصة او وسيلة انتقم من اللى ظلمنى او داس لى على طرف...بس بهدى وبفتكرها فبسكت وبسامح او مسامحش ...بس مبديش للامر اهمية وبدعى ربنا اللهم عليك بمن ظلمنى

لو باءيدك تدي جايزه نوبل لحد هتديها لمين وليه ؟؟

هديها لكل ام فى الدنيا تعبت وشقيت وربت ولادها عشان يكبروا ويردولها جزء صغير من اللى عملته ...اكتر ناس بيتعبوا والله وبيستحملونا مهما عملنا ..:)
بس فيه امهات ما تستحقش على فكرة

السفاح ممكن يحب ولا بيعشق حياة السفاحين ؟؟

زمان ااه ...كان ممكن ...دلوقتى لاء...الوحدة افضل نوعا ما من ان الواحد يبقى مع شخص فى اى وقت ممكن يجرحه ...ونقعد نجرح بعض طول الطريق ونعند سوا ...ااه وجهة نظر قاصرة حبتين تلاته بس حاليا فى اجازة طويلة...وممكن نقول لسه مجتش اللى تقدر تخطف قلبى من مكانه :p

ليه دايما انا كمان بحس ان جواك حزن عميق بتحاول تداريه بضحكه عاليه لزمتها في لحظتها ؟؟ وياتري لو في حزن ليه محاولتش تكسره ؟؟ ولو مفيش تفتكر ليه احنا بنحس بكده ؟؟

:)

احسن سلاح لمواجهة اى حزن او ضيق...انك تضحكى...وبصوت عالى اوى...يعنى من حبة جالى خبر حرق دمى ونرفزنى بس ضحكت زى المجانين ...عجباً من اللى حصل يعنى ....ساعات بعرف اكسر الحزن ده...وساعات مش بعرف عشان الفاس اللى بيكسره مش بيكون معايا ...بيكون مع حد تانى...والحد التانى ده مبقاش موجود...فبيفضل الحزن ده جوا قاعد فى مكانه مستنى صاحب الفاس يرجع يكسره تانى
بنحس بكده عشان دايما بندور على اى حاجه ناقصانا...تعرفى فيه ناس اغنيا من كتر ما هما سعداء بيبكوا ...مفتقدين شعور الحزن او الاحتياج...اغلبنا كده ...فيه ناس بتحزن عشان تعوض حاجه ...او تستدر شفقة اللى قدامها

ايه اكتر موقف صدمك في حياتك ؟؟

غير انى سقطت فى الكلية اول ما دخلتها ...ممممممم

واحد صاحبى مات قدامى

ايه اللي محدش يعرفه عن السفاح ؟؟

حياتى عاملة ازاى ...او انا ايه بعمل ايه بدرس ولا لاء ...اصحابى ...حاجات كتييير يعنى :D

نفسك توصل لايه ؟؟ وايه اللي وصلتله من احلامك ؟؟

نفسى اوصل لفووووووووووووووووووووووق اوى كده ...نفسى ابقى ناجح فى حياتى من كل ناحية ...افيد الناس اكتر واكتر
وصلت لنسبة 30% انى غيرت شخصيتى بـ360 درجة وانى بحقق كل يوم جزء صغير من اللى انا بعمله

ايه رأيك في الاسئله اللي اتوجهت ليك في البوست ده ؟؟

اسئلة مرهقة اوى...هههههههههههههههههههه:D

لاء حلوة ...بس كنت مستنى اسئلة اكتر واكتر
بس الاسئلة دى طلعت حبة من اللى جوايا...ساعات كتير بنبقى عاوزين نتكلم وبس...حد يسمعنا ولو شوية الاسئلة دى حققت حتة من السمع

بتحب دراستك ولا لا ؟؟ وانت صغير كنت بتحلم تبقي ايه ؟؟

لاء ...بكره الحقوق واللى عملوها ...بس فى نفس الوقت مكنتش عاوز تجارة ..:S

كنت عاوز اكاديمية اخبار اليوم او سياسة واقتصاد بس ربنا ما ارادش بس المصلحة من حقوق انى عرفت بلاوى فى القانون بستغلها وبستخدمها كل يوم :D

على فكرة انا استمتعت جدا باسئلتك

وباسئلة كل اللى ردوا عليا

بشكركم جداااااااااااااااا ...ساعدتم حبة انى اطلع من الموود + بحب اوى انى اتسال معرفشى ليه ...لو كانوا عملوا النجاح فى الجامعات بالشفوى والله كنت اتخرجت فى سنتين مش اربعه :p

Ask Me

Open post ...

Just ask me any question in your mind & i will answer in another post after it ..

so this is your chance people..

ASK ME !

Nothing at all

مش عارف مضايق على فرحان على زعلان

مش قادر اخش هنا حتى

بس كل اللى فيه مركز مع الهوا الساقع اللى حواليا

ومعالصورة دى اللى صورتها فى العيد الفجر فى اسكندرية

وبس

Nothing at all

الكبير والصغير

وحشتونى وبقالى فترة طويلة مطرطشتش حاجه واصدعكم ...بس رمضان مكنش الواحد ملاحق على حاجه

كنت فى اسكندرية انا الوقفه والعيد ...كان الجو تحفة وكنت هنزل بيه بوست بس بعدين بقى عشان فيه حاجه شغلانى بقالها فترة

من زمان واول ما دخلت الجامعه احتكيت بناس اكبر منى بكتير ...انا كنت وقتها 16 سنة ودلوقتى 22 وفاضلى كام شهر والحق ال 23 سنة

المهم ناس عقولها نضيفة ...وانت طالع لفوق اى سن ...تتكلم معاه بذوق وادب حتى لو مختلفين وبينكم تار بايت ...لكن دلوقتى سبحان الله فيه مبدأ ماشى فى البلد ان الكبير يقل ادبه ويغلط فى الصغير لكن الصغير مش من حقه كده ...الصغير يسمع ويسكت عشان اللى قدامه كبير ...مش بتكلم على فرق 4 سنة من السن والخبرة الحياتية ...بتكلم على نموذج فى التلاتينات من عمره ...زياما قابلت ناس فى نفس الفئة العمرية دى مدونون وناس حتى فى اشد الخلاف الكلام ما بينا ذوق ....لكن للاسف فيه ناس بتاخدها ذريعه انها كبيرة ومن حقها تغلط فى اى حد ولما تعرف سن اللى قدامك لو اكبر منك بعشر سنوات مثلا هتلاقى نفسك تكلمه بادب رغم قبلها مكنتش بتكلمه كده ....طب ليه

ليه الذوق بقى مقرون بكبير وصغير ...مش المفروض فيه مساواة فى المعاملة والاخلاق؟؟؟
مش المفروض فيه دين اسمه الاسلام بيتك عالنقطة دى ....واكيد يوم القيامة مش هيبقى فيه فرق بين حد عنده 20 سنة وحد عنده 30 سنة !!!!

مش مبرر انك كبير وعندك 30 سنة وتقل ذوقك على اللى اصغر منك ويبقى مبررك الوحيد انك كبير والكبير يغلط فى الصغير لكن الغصير مينفعش يرد الاساءة لانه كبير

وده فى حد ذاته تخلف فى المجتمع وقصور فى التربية اللى المجتمع من زمان اتعود عليها ان الطرفين يحترموا بعضهم البعض مش طرف يحترم التانى لمجرد السن

ما ياما ناس عندها بتاع 50 سنة ولسانها متبرى منها ولا عنده ذوق لكبير ولا لصغير

وناس اصغر مننا من "مواليد التسعينات" بيحرجوا الواحد بذوقهم وادبهم لما يجوا يتكلموا معاك

لكن انك تحجر على رأى الناس لمجرد انهم بيقولوا الحق ولمجرد انك شايف ان ده بيتعدى عليك يبقى ده اسمه هبل

يبقى المفروض الحكومة تقبض على كل مواطن بيدعى عليها وعلى الريس او بيفكر فى كده من باب الحجر على الرأى

او نمشى نطاطى لكل اللى اكبر مننا ونقولهم دوسوا علينا وهزقونا واعملوا اللى انتوا عاوزينه والمبرر انكم اكبر مننا وكنتوا مش طايقين حياتكم وجيتوا بس تطلعوه فينا على اساس اننا صغار وزى عروسة الفضفضة بتاعت المسلسل القديم جيران الهنا !!!!!

ده مش منطق ده اسمه عك وتخلف لما ده يحصل

مش مبرر انك انسان كبير وتغلط فى الاصغر منك لسبب ما فى حياتك الشخصية ...انت لو فى شغل وعملت كده فى مديرك سورى فى اللفظ هيحطهولك وهتقفل بقك وهتسكت لانك ممكن تكون مسئول عن اسرة وعن عيال لازم تجيب القرش وتاكلهم الاكل فى اخر الشهر وتصرف مصاريف علاج ودراسة ومسئولية ...فمش هينفع انك تعترض بالطريقة دى...كون انك وجهت النرفزة دى او الفقع لمكان تانى مش مشكلتنا خالص !!!

حد يقنعنى بالعك اللى المجتمع بقى ماشى فيه الفترة اللى فاتت واللى جاية

انا مش مقتنع عشان انت كبير يبقى تغلط فى اللى اصغر منك ولو بكام...فيه حاجه اسمها ذوق وادب واحترام ...فيه حاجه اسمها انك تكون شجاع وتكلم اللى قدامك وتناقشه مش تهرب من المواجهة ...لان النموذج اللى بتكلم عنه ده للاسف طلع من النوع المحارب الجبار ماسك الماوس ومستخبى وراء شاشته الال سى دى ويخشى مواجهة الواقع

ويأتى السؤال فى الاخر

هل فارق السن ولو سنتين يدوا الحق للكبير انه يقل ادبه عالصغير ؟؟؟؟؟

Happy Feast

ده كحك مستورد

بس كل سنة وانتم طيبين

ويبقى عيد سعيد عليكم دايما ياااارب د

P.S

New post here :

What I love

ليلة القدر

حث النبي صلى الله عليه وسلم على قيام ليلة القدر إيماناً واحتساباً ، فعن أبي هريرة رضي الله عنه عن النبي صلى الله عليه وسلم أنه قال : ( من قام ليلة القدر إيماناً واحتساباً غفر له ما تقدم من ذنبه ) متفق عليه ، وهذا الحديث يدل على مشروعية إحيائها بالقيام .



من أفضل الأدعية التي تقال في ليلة القدر ما علمه النبي صلى الله عليه وسلم عائشة رضي الله عنها ، فروى الترمذي وصححه عن عائشة رضي الله عنها قالت : ( قلت يا رسول الله أرأيت إن علمت أي ليلة ليلة القدر ما أقول فيها ؟ ) قال: ( قولي : اللهم إنك عفو تحب العفو فاعف عني ) .

واخره عتق من النار

اللهم حرم اجسادنا على النار

اللهم ارحمنا برحمتك

يا غافر الذنب اغفر ذنوبنا

يا الله

ندعوك ونرجوك ان تحرم اجسادنا على النار

اللهم اغفر لنا ذنوبنا ...وتقبل صيامنا

وتقبل اللهم صلاتنا وقيامنا

يا حنان يا منان اغفر ذنوبنا وتقبل صيامنا

واعتقنا من النار

يارب ارزقنا بحج بيتك الحرام

وزيارة حبيبك ...ونبيك ومصطفانا عليه افضل الصلاة والسلام

ها أنا عبدك ...اعود اليك ...اطلب منك مغفرتك...ورحمتك

فلا تردنى خائبا وتقبل دعائى

يا الله

الله اكبر ...الله اكبر

حى على الصلاة

حى على الصلاة

اوسطه مغفرة

اللهم اغفر لنا ذنوبنا

اللهم ارحمنا برحمتك

اللهم حرم النار على اجسادنا

وارزقنا جنتك

امين