Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Friday, September 25, 2009

الكبير والصغير

وحشتونى وبقالى فترة طويلة مطرطشتش حاجه واصدعكم ...بس رمضان مكنش الواحد ملاحق على حاجه

كنت فى اسكندرية انا الوقفه والعيد ...كان الجو تحفة وكنت هنزل بيه بوست بس بعدين بقى عشان فيه حاجه شغلانى بقالها فترة

من زمان واول ما دخلت الجامعه احتكيت بناس اكبر منى بكتير ...انا كنت وقتها 16 سنة ودلوقتى 22 وفاضلى كام شهر والحق ال 23 سنة

المهم ناس عقولها نضيفة ...وانت طالع لفوق اى سن ...تتكلم معاه بذوق وادب حتى لو مختلفين وبينكم تار بايت ...لكن دلوقتى سبحان الله فيه مبدأ ماشى فى البلد ان الكبير يقل ادبه ويغلط فى الصغير لكن الصغير مش من حقه كده ...الصغير يسمع ويسكت عشان اللى قدامه كبير ...مش بتكلم على فرق 4 سنة من السن والخبرة الحياتية ...بتكلم على نموذج فى التلاتينات من عمره ...زياما قابلت ناس فى نفس الفئة العمرية دى مدونون وناس حتى فى اشد الخلاف الكلام ما بينا ذوق ....لكن للاسف فيه ناس بتاخدها ذريعه انها كبيرة ومن حقها تغلط فى اى حد ولما تعرف سن اللى قدامك لو اكبر منك بعشر سنوات مثلا هتلاقى نفسك تكلمه بادب رغم قبلها مكنتش بتكلمه كده ....طب ليه

ليه الذوق بقى مقرون بكبير وصغير ...مش المفروض فيه مساواة فى المعاملة والاخلاق؟؟؟
مش المفروض فيه دين اسمه الاسلام بيتك عالنقطة دى ....واكيد يوم القيامة مش هيبقى فيه فرق بين حد عنده 20 سنة وحد عنده 30 سنة !!!!

مش مبرر انك كبير وعندك 30 سنة وتقل ذوقك على اللى اصغر منك ويبقى مبررك الوحيد انك كبير والكبير يغلط فى الصغير لكن الغصير مينفعش يرد الاساءة لانه كبير

وده فى حد ذاته تخلف فى المجتمع وقصور فى التربية اللى المجتمع من زمان اتعود عليها ان الطرفين يحترموا بعضهم البعض مش طرف يحترم التانى لمجرد السن

ما ياما ناس عندها بتاع 50 سنة ولسانها متبرى منها ولا عنده ذوق لكبير ولا لصغير

وناس اصغر مننا من "مواليد التسعينات" بيحرجوا الواحد بذوقهم وادبهم لما يجوا يتكلموا معاك

لكن انك تحجر على رأى الناس لمجرد انهم بيقولوا الحق ولمجرد انك شايف ان ده بيتعدى عليك يبقى ده اسمه هبل

يبقى المفروض الحكومة تقبض على كل مواطن بيدعى عليها وعلى الريس او بيفكر فى كده من باب الحجر على الرأى

او نمشى نطاطى لكل اللى اكبر مننا ونقولهم دوسوا علينا وهزقونا واعملوا اللى انتوا عاوزينه والمبرر انكم اكبر مننا وكنتوا مش طايقين حياتكم وجيتوا بس تطلعوه فينا على اساس اننا صغار وزى عروسة الفضفضة بتاعت المسلسل القديم جيران الهنا !!!!!

ده مش منطق ده اسمه عك وتخلف لما ده يحصل

مش مبرر انك انسان كبير وتغلط فى الاصغر منك لسبب ما فى حياتك الشخصية ...انت لو فى شغل وعملت كده فى مديرك سورى فى اللفظ هيحطهولك وهتقفل بقك وهتسكت لانك ممكن تكون مسئول عن اسرة وعن عيال لازم تجيب القرش وتاكلهم الاكل فى اخر الشهر وتصرف مصاريف علاج ودراسة ومسئولية ...فمش هينفع انك تعترض بالطريقة دى...كون انك وجهت النرفزة دى او الفقع لمكان تانى مش مشكلتنا خالص !!!

حد يقنعنى بالعك اللى المجتمع بقى ماشى فيه الفترة اللى فاتت واللى جاية

انا مش مقتنع عشان انت كبير يبقى تغلط فى اللى اصغر منك ولو بكام...فيه حاجه اسمها ذوق وادب واحترام ...فيه حاجه اسمها انك تكون شجاع وتكلم اللى قدامك وتناقشه مش تهرب من المواجهة ...لان النموذج اللى بتكلم عنه ده للاسف طلع من النوع المحارب الجبار ماسك الماوس ومستخبى وراء شاشته الال سى دى ويخشى مواجهة الواقع

ويأتى السؤال فى الاخر

هل فارق السن ولو سنتين يدوا الحق للكبير انه يقل ادبه عالصغير ؟؟؟؟؟


11 comments:

عابرة السبيل = ام بقلظ باشا said...

السلام عليكم
----------
اخيرا اول تعليق

عابرة السبيل = ام بقلظ باشا said...

سلام عليكم تانى
--------------
بص بقى
هو بيبقى احساس داخلى كده انى لانى اكبر منك ولو بيوم يبقى من حقى اغلط فيك ...لا هو مش من حقى قوى لكن هغلط فيك بمزاجى انا الاكبر ...يبقى انا اعرف اكتر منك يبقى اتكلم واغلط فيك عادى لانى اكيد مش بغلط ساعتها قد ما بفهمك واعرفك الصح من الغلط حتى ولو كان بالشتيمة

لكن الصح بيقول : الاحترام للكل والغلط بيجيب غلط
انا مثلا لو حد كبير غلط فيا هغلط فيه بس فى حدود تربيتى برضه

من الاخر المتربى عمره مايغلط لا فى كبير ولا فى صغير

وبعدين الرسول صلى الله عليه وسلم قال :ليس منا من لم يرحم صغيرنا ويوقر كبيرنا

سلام عليكم

واحدة مفروسة said...

لا حول ولا قوة الا بلله
ده سلوك بقى متفشي فى المجتمع
مع ان ديننا بيقول نحترم الصغير
و الصغير لازم يحترم الكبير
ياخراااااابي يا سفاح
ده انا لما كنت فى الشغل و اللهه ما كنت بطلب من الساعى حاجة غير لما اقواه منفضلك و لو سمحت
و الراجل كان بيستغرب
الله يرحمه مات
يظهر ما استحملشي انالناس تعامله بزوق و احترام
ان شاء الله الناس حتفوق من الغيبوبة
تحياتي

εïз Semsema εïз said...

كلام صح جدا ..
حاجة بتنرفز جدا لما اكون بتكلم مع حد اكبر مني

في اي قضية الاقيهم واخدين الموضوع هزار .. لمجرد اني اصغر منهم ب 3 سنين ولا حاجة

..

او لو بكلم حد ع النت بدون ما يعرفوا سني
المعاملة بتتفير بعد ما اقول اني 16 سنة

..

بس بردو في ناس بيكونوا اكبر مني بحوالي 7 سنين
وبيكون في احترام

..

حضرتك دخلت الجامعة 16 سنة يا بختك .. انا قربت على 17 أهو ولسة بعاني في الثانوية :(

Silver Eyes said...

اولا: بحييك ع الموضوع الجامد دا.
ثانيا : فعلا المثل اللى بيقول (اكبر منك بيوم يعرف عنك بسنة).
معظم الناس ماشية بالمثل دا
لما تلاقى حد صغير وبيتكلم ف موضوع معين مثلا وبيقول وجهة نظره .. ولما ما تعجبش الكبير.. يبدا ينتقده وانو لسه صغير ودا بيوصل للغلط وقلة الذوق ف الاخر..
مع عدم الاحترام لا للصغير ولا لنفسه اصلا
ولا مراعاة لفرق السن او التربية او الاخلاق.

وفعلا زى ما بتقول بيبقى مبرره الوحيد انو كبير ومفيش اكبر منه ويغلط براحته ف الاصغر منه ..

تحياتى ليك

همس الارواح !! said...

السلام عليكم

بجد البوست جميل طبعا

والانسان اللى بيحترم بيحترم نفسه بغض النظر عن السن والكلام ده .... ومفيش اى حاجه تخلى واحد يغلط فى حد سواء اكبر او اصغر منه

وللاسف اقولك ان سلوكيات الانسان دلوقتى بقت حاجه غريبه ... اتغيرت جدا من كبير لصغير
الاحترام فى حد ذاته بقى مش موجود

هنقول ايه غير ربنا يستر علينا كلنا

شكرا ليك على البوست وزيارتك لمدونتى

تحياتى

lonely girl said...

كلام سليم جدااااااا ومعاك فيه
وبرضه متفقه معاك فى ان الاكثر استفزاز من المبدأ ده هما المؤيدين ومصفقين ليه على طول المشوار زى اللى حصل فى المنتدى
التراجع عن الموقف وعن رأى قلته بس لمجرد فرق سن بينى وبين الشخص اللى قدامى لما اكتشفته صدفه
بس للاصف ده واقع موجود مش هيتغير
الا فى حاله ان كل واحد يدافع عن وجهه نظره باستماته مع تمسكه برضه بذوقه واخلاقه اللى اتعود عليها
فى فتره التربيه العملى بتاعتى السنه اللى فاتت
مدرسه تقريبا برضه كانت تفوقنى فى السن ب 10 ولا حتى 13 سنه تقريبا
وسمحت لنفسها تتطور المناقشه لخناقه وتعدى عليا بالشتيمه والاهانه
لمجرد انى برد عليها
وانا اصغر منها
فى حين ان كان ردى دفاعا عن حقى ومجرد رفض للاهانه اللى اتوجهتلى
الاغرب بقى ان وقتها الكل غلطنى ان وزمايلى واتحول الموضوع للاداره التعليميه وكنت على وشك اعيد السنه بسبب الموقف ده
بس مع كل ده اصريت على موقفى ومهمنيش غير انى صح بغض النظر عن العواقب
اهم حاجه صدق الانسان مع نفسه وعدم الازدواجيه فى النظر للامور
معلش بقى
كتبت تعليق طويل اوى
بس لانها بقت قاعده مستفزه وعامه بين المعظم دلوقتى

Eman.H.H. said...

عمر الشخص بعقله مش بسنه
وبجد الناس اللي بيقللوا من شخص علشان أصغر منهم سنا
أدني من أننا حتي نبوصلهم :D

Utopia said...

في برنامج خواطر من اليابان بتاع احمد الشقيري

كان في حلقة عن المدارس في اليابان واللي بيحصل فيها .. وان التلميذ وهو لسه داخل سنة اولى ابتدائي المدرس ينادي عليه استاذ فلان

يعني من أول يوم في المدرسة التلميذ بيتعلم بشكل تطبيقي ان اللي اكبر منه بيحترمه .. حتى لو كان الاكبر منه ده المدرس بتاعه او الميس بتاعته

للاسف مجتمعنا اختلطت فيه معايير كتير جدا

hager za3bal said...

حلو اوي اننا نحتك بناس كبيره .. بنبقي صغيرين وبنكبر عنهم بدماغنا ودماغهم .. بنتعلم ونستفيد ..

لكن الناس اللي انت اتكلمت عنهم دول كبار السن اطفال العقل :))

هل فارق السن ولو سنتين يدوا الحق للكبير انه يقل ادبه عالصغير ؟؟؟؟؟

من السؤال ده يا مشمش هدخلك عالموضوع كله
يعني ايه قلة ادب اصلا ؟!

اللي اعرفه ان في حاجه اسمها تربيه .. حتي لو انا معترضه عن شئ برضو هقوله بأدب .. ممكن اتنرفذ اتعصب بس برضو يكون في حدود ..
لكن مينفعش حد يستغل انه كبير لانه كبير علي نفسه .. الكبر مش بالسن .. الناس السطحيه بس هي اللي بتحسبها كده ..

الكبير ده المفروض عاقل وعارف يعني ايه احترام
وعارف انه لازم يحترم اي سن وكل بني آدم مهما كانت قدراته افكاره
الكبير ده المفروض انه ناضج ونضوجه ده المفروض يخليه ازاي يكون عنده دبلوماسيه في التعامل ..


سيبك انت
متخنقش نفسك .. افتكر اسكندريه ;l)

كل سنه وانت طيب :)

zoom said...

حلو اوى اختيارك لكلماتك