Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Tuesday, September 20, 2011

هما واحنا

من كام يوم ركبت ميكروباص التحرير اللذيذ وكده من عندنا...عندنا فين مش فارقة 

المهم طلع ركب ولد وبنت معانا وست كده بتاع حاجه واربعين سنة ...وراجل عجوز قاعد جمب السواق 

وانا مأنتخ فى مكانى ورا والسماعات على ودانى بسمع ديفيد جيتا وعايش حياتى 

المهم بدأت خناقة نقاشية ما بينهم معرفش ايه اللى بدأها المهم كانوا بيرغوا فى قانون الطوارىء 

بغض النظر عن موضوع النقاش والطريقة...بس الست من الاول تقولوهم انتوا يوم ما عملتوا الثورة وقفنا جمبكم وانتوا كسرتوا وانتوا عملتوا ...وبعدين تقول بس احنا واحنا وهما 

ثوانى مش فاهم دلوقتى ...انتى جنسيتك ايه يا حجه معلش ؟؟ تقولك مصرية ..طب ليه دلوقتى بنفرق ما بين الجنسيات بكلمة احنا وهما ؟؟

اصل كلنا فى نفس المركب محدش يعنى راكب لنش لوحده وهيروح مكان ماهو عاوز 

يجى بقى عمو اللى قدام يقولك السيئة تعم ...فأنا اضايقت مبدأ السيئة تعم بتاع المدارس لما الفصل ينضرب عشان حتة عيل ولا مؤاخذة لبس الفصل كله ومعملش واجب فنتعاقب معاه !!

فأنا قولتله دلوقتى انا حرامى وقتال قتلة ...يبقى كده كل اللى معايا فى الميكروباص قتالين وحرامية ولاد تيييت ...طبعا قالك لاء وازاى انا راجل محترم...فقللتله ده نفس مبدأ حضرتك بتاع السيئة تعم...ماهو دلوقتى السيئة عمت الميكروباص كله ينفع ولا لاء...قالى لاء طبعا...قولتله يبقى مينفعش نعمم على ضابط الشرطة...عالثوار عالشعب ذات نفسه 

الناس مضايقة من البلطجة والسرقة والقتل والنهب  هوا ايه الفرق بين زمان ودلوقتى ؟؟؟

زمان كان سرقة مقننة وبمساعدة ناس من الاقسام ودلوقتى مبقوش يحموهم وممكن يقبضوا عليهم ...رغم ان اغلب الشرطة بتكسل نوعا ما عشان هيحتاجوهم قدام 

بس هى هى نفس الظروف...بس عشان احنا مسلطين عليها الضوء وبقينا نركز معاها اكتر من الاول ...فحسينا انها كترت 

بعدين اللى بيسرق ده من الناس المحتاجة ...وصل لمرحلة لازم يسرق عشان يعيش..انا مش بحلل السرقة ولا الغلط بس انا بشرح ليه ناس كتيرة محتاجه قامت تسرق وتنهب وشايفة ناس سرقانا بأم القانون 30 سنة واكتر ومحدش بيحاسبهم ...يبقى من حق الناس تضايق وتتنرفز 

بعدين واحد قالها حكمة فى مرة 

الشعب المصرى اشترى حريته جديد ...بس مش معاه الكتالوج فعشان كده بيقلب فى الزراير كلها :) 

عاوز اوصل بس فى الاخر مفيش فرق بين احنا وهما 

كلنا نفس الشخص ...وكلنا فى نفس المركب ونفس البلد 

اخترت انك تهاجر وتسيبها ...مترجعش تانى تشكيلها وتضايق من اللى فيها 

عشان انت فى يوم ما كان فى ايدك انك تصلحها ...قررت تسيبها 

!

4 comments:

safa7_karmooz said...

Merci =)

rona ali said...

الشعب المصرى اشترى حريته جديد ...بس مش معاه الكتالوج فعشان كده بيقلب فى الزراير كلها

جميله الحته دى اوى علي فكرة اسلوب انتم واحنا دة قديم دة بقي في انتم بتوع التحرير والثورة وانتم بتوع روكسي بقي كله وشارعه تقريبا ههههههههه

اقولك علي حاجه اغرب من ان اللي بيحصل هو نفس اللي حاصل من زمان من بلضجه وسرقه ان حتى كلام الشعب هو نفس الكلام والاسلوب والطريقه بتاعت ال 30 سنه اللي فاتو حتى اسلوب المجلس العسكرى هو حسنى بس بهداوة ولطافه وبذكاء اكبر عادى يعنى

هى ملهاش حل ان البلد دى توصل انها تنقلب راسا علي عقب الا لما تحرق العقول القديمه وتنسخ كميه جديدة نسخه احدث و متطورة :)
والله معنا

ممكن ملحوظه واسفه لتطويل الكود دة بتاع التعليق مضايقنى اوى مش ممكن الكومنت يبقي من غيره :)

Bent Men ElZman Da !! said...

"الشعب المصرى اشترى حريته جديد ...بس مش معاه الكتالوج فعشان كده بيقلب فى الزراير كلها"

ده فعلا بالظبط اللى احنا عايشينه
كتير مننا مش قادرين يستوعبوا اصلا اللى احنا فيه
ومش متخيلين ومش عندهم امل ان فى يوم من الايام مصر هتبقى احسن
بالعكس بيقولوا اننا هنفضل زى ما احنا
صعب اللى حصل فى كل السنين اللى فاتت واللى اتزرع جوه بعض الناس
اللى منهم بقى شايف انه من حقه يسرق عشان كان شايف غيره بيسرق بالقانون
فا مش هنيجى نقوله لا ده عيب والناس اللى فهمتك كده وحشين واتحبسوا
محتاجين وقت عشان كلنا نستوعب وننضف من جوانا شويه
وطول ما كل واحد شايف غيره غلطان وبيشاور عليه ويقول اللى بيحصل بسببك انت
يبقى مش هنقدر نتغير مع بعض
كل واحد هيبقى على مزاجه

نيللي علي said...

اولا سعيده باننى زورت مدونتك

ثانيا معلش اعذر الناس فى فهمهم لسه متلخبطين ..وبيسمعوا ميت راى وميت كلام من التلفزيون
عندك واحد ذى توفيق عكاشه المفروض يترجم بالزلط ..عمال يقول حاجات عشان يموت الثوره ويفسد بلدنا ..

الشعب مصرى شعب اصيل بس محتاج شويه وعى لا كتير وعى ..ذى ماانت عملت كدا بالضبط ..