بفكر بصوت عالى

بقالى فترة عندى اكتئاب تدوينى حاد ...ماليش مزاج اكتب هنا ولا حتى كومنت مش عارف ليه :( :( :(

*****************

هوا ليه فيه ناس بتصر انها تحرج نفسها وتقلل من شكلها قدام ناس تاينة

جت فترة كده مسحت ناس كتير من حياتى ومش شايف لهم فايدة او اى بتنجان فى حياتى وانا حر طبعا

تلاقى ناس مصرة انها تبقى عندى وتتكلم ...مش بالعافية يا بابا

سلكوا ودانكم بلييييييز

*****************

اغلب اللاعيبة فى مصر مش بيحبوا كرسى الاحتياطى ولازم يلعبوا اساسين

الحياة زى الملعب بالظبط...فيه احتياطى وفيه اساسى

جت عليا فترة كنت مبسوط انى احتياطى ...ومرتاح...بس اتضح انى كنت غلط

اللعب اساسى هو شرطى فى اى حاجه اعملها

مش هرضى انى اكون صف ثانى :)

******************

انا فعلا سفاح على فكرة

ومش شرط السفاح يكون بيقتل بجد

لاء فيه انواع كتير للقتل دون اراقة نقطة دم واحده

واظن اننا كلنا نعرف ايه هما

:)

******************

ساعات كتير بفكر انى متجوزش عشان مجبش عيال اطلع فيهم العقد اللى طلعت علينا

بس برجع وبفكر ان اكيد فيه حكمة لكده..

اننا نحاول نصلح العقد دى ونغيرها واحنا بنربيهم

يمكن انا شفت حاجه بتتغير فى عيلة ما فى الابن الرابع والاخير..

غيروا طريقة التربية تماما مقارنة بالتلاتة اللى قبله

يمكن

*****************

لما كنت بروح لجدى الله يرحمه

كنت بستغرب ليه محدش من ولاد اعمامى بيروح يزوره زيى؟؟

بعدين لما بروح لجدتى...وبستغرب ان اللى بيهتم بيها قلة...ومن احفادها وميكملوش 3 بس

وابنائها بنتين بس اكتر اللى بيروحوا وولد..والباقى فى الطناش

يمكن مش من حقى اتكلم واقول

كل واحد عنده ظروف

لكن بقت سمة الدنيا اننا نكبر وننسى اهالينا

زى كل يوم نقرا وفاة عجوز منذ اسبوع والجيران يبلغوا الشرطة عشان الريحة كريهة...ويكتشف ان عياله مش بيسألوا عليه الا فين وفين

يااااه هيجى يوم وولادى يعملوا فيا كده؟؟؟

*******************

حريتى تنتهى عند حرية الاخرين...ياريت تفكروا فى الكلمة دى كويس

:)