لا مؤاخذة يا اوبرا

اول امبارح اوبرا عملت حلقة تتكلم فيها عن الزواج والستات حول العالم ...وطبعا مصر اخدت لها من الاهتمام نصيب

بس تيجى للاستفزاز اللى حصل ان اللى بتقود او اللى عملت الجولة فى مصر واحده من الدنمارك اسمها نانا ...وجابت 3 نساء

واحده اسمه هبة شنبو مصممة معرفش مصممة ايه ...والصحفية انجى الكاشف والدكتورة هبة قطب

لحد هنا كويس...

بس بعد كده الكلام اللى دار عن الاسلام والحجاب والكبت الجنسى اللى فى مصر والست واخده حقوقها ولا لاء ...الخ من الكلام ده

اى حد يشوف الحلقة يحس فيه تحامل كبير على مصر وفيه حاجات مش بتحصل اتقالت اكنها حصلت ...وكعادة اى برنامج اعلامى لازم يبقى فيه مونتاج
امبارح الاربعاء محمود سعد فى البيت بيتك استضاف الدكتورة هبة قطب والصراحة اللى كانت احسن واحده فى موضوع اوبرا ...قالت ان كان ليها كلام كتير بس اتمنتج ومطلعش...
وكل اللى طلع من اللى اسمها هبة ان مفيش حرية للستات فى مصر ...فيه كبت للستات وقمع فكرى ومجتمعى ...وان الطلاق بالنسبة للراجل سهل جدا لكن الست صعب عليها وتتشحطط فى المحاكم وكلام كتير عن الحجاب والعلاقات الحميمية قبل الجواز

بس اللى يفرس اكتر فى اخر الحلقة اوبرا قالت الحمد الله انهم فى امريكا !!!!!!!!!!!!!!!!!!!!!!!!!!!!!!!

المطلوب انها عاوزة توصل ان امريكا حلوة ودول العالم التالت كخة كخة

بس دى تعتبر السقطة التانية للاعلامية الامريكية الكبيرة انها حكمت على دولة او شعب او فئة معينة من كلام واحده مش عارف جابوها منين...منزلتش سألت اصلا فى البلد...وازاى تاخد برأى واحده مش من البلد ...

يعنى اروح مصر واجيب حد من الدنمارك يشرحلى طبيعة البلد ازاى والكلام ده كله؟؟ الكيد ده اسمه عبط فى عبط

غير كده ان الحلقة او الفقرة تحولت بين المقارنة بين الاسلام والمسيحية
والعدل فى الاسلام وعك كتير كتير يعنى فى النص ...ومحدش علق الا اليوم السابع ومحمود سعد ومشفتش اى حد كتب عن الموضوع

تقريبا مش مهم ...رأى واتقال او اتعرف عننا او حاجه واتقالت عن الحجاب وعدت زيها زى غيرها

لا مؤاخذة يا اوبرا انتى غلطتى ...وغلطك كبير

ومعتقدش ان حتى زيارتك لما تيجى مصر هتمسح اللى حصل

لان اكيد هتيجى تشوفى مصر من عين الزوار ...او الناس اللى فوق

عمرك ما هتشوفيها من نظرة الناس اللى تحت

اللى عاوز لينكات :

اليوم السابع

http://www.youm7.com/News.asp?NewsID=182169

موقع اوبرا ...واللى الناس الصراحة عاملين عمل حلو فى الكومنتات

http://www.oprah.com/oprahshow/What-Marriage-Means-Around-the-World/2

وفى الاخر اللى ميعرفش

يقول اوبرا
!