ممكن تحضنى؟؟

يوم 21 يناير كان اليوم العالمى للاحضان

ايون

انا قررت ان يوم 25 يبقى العيد المحلى لمصر ومدونة طرطشة افكار
هقتبس كلام حد اعرفه فى الموضوع ده:

اسمح لي أسألك وأكتم على نفسك : آخر مرة حضنت فيها أمك امتى ؟؟ آخر مرة اترميت في حضن أبوك كان من كام شهر ؟؟ إحنا بنقول أننا ما بنحضنش أهلنا عشان عندنا مشاكل معاهم.. لكن العكس هو الصحيح : إحنا عندنا مشاكل معاهم عشان ما بنحضنهمش..

كام واحد بياخد أخته الصغيرة في حضنه وينصحها بدل ما ينكد عليها عيشتها ويشغلها خدامة لحسابه..؟؟ كام شاب ارتمى في حضن أمه أو أخته الكبيرة وبكى وهو بيحكيلها على مشاكله ومعاناته..؟؟

أما عن السؤال الأكثر مأساوية فهو : كام واحد متجوز بيحضن زوجته حضن خالص كده لله في لله..؟! من الإحصائيات المؤسفة استبيان عن العلاقة بين الأزواج كان معمول على أحد المواقع الشهيرة وكانت نتيجة الاستبيان أن 20% فقط من المتزوجين اللي مر على زواجهم أكتر من سنتين هم اللي لسة بيبادلوا بعض مشاعر الحب المجردة بعيداً عن العلاقة الجسدية..

إحنا بقى عندنا حالة غريبة من الجفاء تجاه بعضنا البعض .. يمكن عشان المعاناة والحالة الصعبة اللي احنا عايشين فيها.. أو يمكن عشان الجمود اللي أصاب العلاقات البشرية في عصرنا الحالي وسيطرة المادة على كل شيء.. لكن المشكلة أن الجفاء ده بيزود الطينة بلة وبيخلينا مخنوقين أكتر من العيشة واللي عايشينها..

إيه رأيكم لو نبدأ من النهاردة كل واحد يحضن 3 أشخاص مثلاً كل يوم من أهله أو قرايبه أو أصحابه .. حضن عميق كده وخالص لوجه الله.. وننشر الفكرة دي وسط الناس واكيد هنحس بالفرق..

فيه فيديو واحد عمله وهو جون مان .. الشاب اللي كان مسافر بره بلده ، وفي صالة الوصول كان كل الركاب ليهم قرايب وأصحاب مستينهم إلا هو محدش اهتم بيه ولا عبّره.. شعر جون مان بمدى الغربة اللي أصبحت بين البشر لمجرد أنهم ما يعرفوش بعض ، وقرر يكرس وقته لإعادة الحياة إلى لعلاقات البشرية النبيلة.. وكان الفيديو ده هو بداية انتشارهذه الحملة الفريدة

الفيديو اهوة