مش عارف
بقالى فترة طويلة فى حيرة
بس تقريبا الكل اجمع ان سفاح بتاع دلوقتى غير سفاح بتاع زمان
والناس عمالة تقنعنى ان محدش بيتغير وسهل اوى تفضل واقف فى مكانك بنفس شخصيتك
بس انا مش لاقى الشخصية القديمة
فى اى موقع انترنت كل وقت معين بياخدوا نسخة احتياطية من الموقع
لو كنت اعرف انى هبقى كده دلوقتى كنت اخدت نسخة احتياطية من شخصيتى
وكنت رفعتها عالهارد عندى وصطبتها وقت ما الناس بتدور عليها
وارجع تانى وافضل واقف مكانى محتار
انهى سلم يا جدعان
بيطلع الدور الصح؟؟!!!
11 comments:
"لو كنت اعرف انى هبقى كده دلوقتى كنت اخدت نسخة احتياطية من شخصيتى
وكنت رفعتها عالهارد عندى وصطبتها"
لو مكنش كل حد فينا يمتلك الاحساس كان هيبقى صح اوى تعمل اللى انت بتقوله ده ..
لكن لاننا بنى ادمين بتحكمنا مشاعر مش زراير وبنتأثر بظروف واحداث لازم نتغير .
مش للمهم للاسوء ولا للاحسن ..
لان التغير مش بيدوم علشان هيلحقه تغير جديد ..
وحتى لو مقدرناش مره نوجه احنا التغير ده هنقدر نوجه المره اللى بعدها ..
وبعدين ليه متقولش ان سفاح دلوقتى فى مرحله انتقاليه بين شخصيه قديمه وشخصيه جديده هتكون احسن ..
انت دلوقتى فى مرحله عمريه لازم تحس فيها ده لان فيها تشكيل لحاجات كتير فى حياتك ..
اهم حاجحه مش تيأس ..
انت بخير بس هى مسأله وقت ..D:
"انهى سلم يا جدعان
بيطلع الدور الصح؟؟!!! "
مفيش سلم بيطلع للدور الصح ..
فى سلم بيطلع للى انت عايزه ..
وكله هيبقى صح بس المهم نقدر نختار اللى بعد السلم ايه مش السلم نفسه ..
وسورى لو طولت عليك ..
"لو كنت اعرف انى هبقى كده دلوقتى كنت اخدت نسخة احتياطية من شخصيتى"
لو كنت اعرف انى هبقى كده دلوقتى كنت اخدت نسخة احتياطية من شخصيتى
عجبنى التعبير اوى
وكلنا مرينا وحنمر فى كل مرحله من عمرنا ويبقى عندنا حنين لزمان مش لان دلوقتى وحش بس عشان زمان كان اسهل
ونفتكر كل مره ان زمان كان احسن من دلوقتى
لو تفتكر وانت في اعدادى كنت بتقول ان الابتدائى احلى ولما طلعت ثانوى تقول ان الاعدادى احلى
بس كل مرحله وليها حلاوتها ومرها
وليها مسئوليتها وتفكيرها
.:)
بوست جميل يا سفاح
========
بالنسبة للنقل
همممم
أوك بس يا ريت يكون فيه إشارة للمصدر
تحياتي ليك
بص
اتغيرت و مش عارف ترجعها زى ما كانت
تقبل التغيير ده
و استفيد منوا باقصى درجه ممكنه
لانك هتيجى كمان 3 سنين و تلاقيك اتغيرت
و مش عارف ترجع زى الاول تانى ..
المهم .. متضيعش وقت بس ..
كلنا بنتغير
دور على نفسك وانت تلاقيها
بس انا مش لاقى الشخصية القديمة"
فى اى موقع انترنت كل وقت معين بياخدوا نسخة احتياطية من الموقع
لو كنت اعرف انى هبقى كده دلوقتى كنت اخدت نسخة احتياطية من شخصيتى"
التعبير ده حلو اووى ..
هو مفيش اى حد بيقف عند الشخصيه بتاعته اللى كانت معاه من و هو صوغير
يعنى حضرتك دلوقتى مش زى 10 سنسن فاتوا ولا هتبقى زى بعد 10 سنسن قدام
اكيد المتغيرات اللى حواليان بتغيرنا احنا كمان لكن بيفضل معانا القيم و العادات اللى اتربينا عليها و احنا صوغيرين
تحياتى
المهم هل انت مستريح للتغيير دة وللا حاسس ان الاول كان احسن؟؟
فكر وحاول توصل للى يريحك
مش عارفة اقولك حاجة بجد
يمكن لانى فىنفس المكان الى انت واقف فيه واه عارفة انى اتغيرت للاحسن ولا الاوحش مش دى القضية اد ما هى انك اتغيرت
مش متقبلة التغير ده دلوقتى بس فى ايه مش فاهمة
عارفة انها لخبطة اوى بس قول يا رب
وزاكر بقى
مش عارف بجد ..:(
ميرسى ليكم كلكم
افدتونى والله ^_^
بص
كلنا بنتغير ونتغير وهنفضل نتغير
المهم انك كل ما تتغير تحاول تاخد حاجه حلوه من التغيير ده وتحافظ عليها للتغيير اللي بعده.. دور ع الايجابيات..
وممكن تكون متغيرتش للأسوأ ولا حاجه
ممكن تكون تايه شويتين بس
وبعد التوهان ده هترجع احسن واجمل وانضف من الاول كمان..
بس انت حط في دماغك كده
حط في دماغك سلم معين وثق انه صح.. ساعتها بس هيطلع السلم الصح!
بجد ربنا معاك..
عارف
بحب اوي نوع البوستات دي
بحب اكتبها واقراها
بحس ان الواحد بيصالح نفسه في شوية حاجات كده
او بيخرج كبت من جواه
او او.. مش دا المهم.. المهم انني بحبه وخلاص :D
بس اخر حاجه هقولهالك
انت حتي لو اتغيرت زي مانت بتقول
فأنا شايفه انك مش وحش ، ببساطه لأنك لو اتغيرت وبقيت وحش اوي مكنتش هتشوف انك وحش!
تحياتي
Post a Comment