عدى اول وتانى يوم من رمضان هوا يعنى...بعد الفطار الوقت بيجرى بسرعة قاتلة..اول يوم اصبت بغيبوبة كام ساعة بعد الفطار وصاحى مصدع وعينى مدمعه، النهاردة غالبت شعور البلاهة ونزلت صليت وتبضعت ورجعت مأنتخ قدام المروحة ومش مجمع اى حاجه ولا الشاى او النسكافيه عملوا تأثير
والساعه بقت 11 ونص بسرعه اوى كده ليه ؟؟ ده فاضل 4 ساعات ونصوم :S
****
انا بقى عندى يقين انى يوم لما اموت - ان شاء الله - محدش هيفتكرنى اوى ولا حد هيزعل ويضايق فى نفسيته ، مش بطلب كده بس معرفش مش حاسس انى هفضل فى بال حد فترة طويلة ممكن شهر ولا اتنين وبخ على كده زى اللى راحوا قبلى ولا بعدى
****
انا بطلت من زمان اعمل اللى يبسط غيرى وبعمل اللى يبسطنى انا بس ، بس ساعات بعمل استثناء لكام حد بيتعدوا على الاصابع يعنى ، بس عامة لاحظت انى لما بقيت اعمل اللى يبسطنى الكل بيبعد واكنى انا اللى لازم اقدم فروض الولاء والطاعة عشان حد يفضل موجود...مش فارقة معايا اوى يعنى !
****
من مميزات انك تصلى برا الجامع هوا طراوة منعش اوى يعنى ومفيش الامراض اللى جوا من عطس وكحة، بس اكبر عيب انك واقف فى الشارع بمعنى الكلمة، طب يعنى حبة احترام ان فيه ناس بتصلى جمبك مش لازم تعمل دوشة او مش لازم فى القهوة بتاعتك تعلى صوت الكاسيت عشان تغلوش عالراجل اللى بيصلى !
****
حاجه تانية وطبقتها امبارح والنهاردة مهما حصل مش هحرق فى دمى الشهر ده، هعدى الدنيا وهبتسم والدنيا بييييس والى اخره
=)
5 comments:
صباحك رضا :)
أعجبتني أجوائك الرمضانية
وأجمل شيء
"وهبتسم والدنيا بييييس والى اخره"
^_*
فعلا
لما الناس بتتعود مننا نعملهم اللي يبسطهم حتى لو هنيجي ع نفسنا بعد كده بيعتبروا ده واجب علينا ولو معملناهوش يبقى اجرمنا
نفسي ابطل اعمل كده
بس مش عارفة
تعبت من كتر ما باجي ع نفسي علشان الناس واصلا لما بحتاج انا ان حد يبسطني كله بيختفي وبرده ف عز ما انا محتاجاهم بفضل جنبهم واجي ع نفسي
ابطله ازاي طيب؟
:)
يارب دايما مبسوط ومكبر :)
سواء كنت فى رمضان أو غير رمضان فمش مفروض أصلا انك تيجى على نفسك عشان أى حد , طالما مابتعملش أى حاجة غلط ولا حرام فإية المانع انك تبسط على طول
وحكاية أن الناس مش هتفتكرك بعد الموت فدا موضوع مش مهم وخصوصا بالنسبة للميت نفسه , زى ما قالت السيدة أسماء بنت أبى بكر (هل يضر الشاة سلخها بعد ذبحها )أنت أساسا مت فكدا كدا مش فارق
لو بجد بتفكر فى اللى يبسطك بلاش تفكر فى الناس ولا فى كلامهم لانك بالطريقة عمرك ما هتعرف تنبسط
فعلا الوقت من بعد الفطار بيعدي بسرعة رهيبة والواحد مش بيلحق فيه يعمل اي حاجة غير انه يصلي التراويح ويتسحر ويقرأ قران لحد الفجر :( اجمل حاجة انك بدأت تدور على اسعاد نفسك الاول وبعدين الاخرين ودي حاجة انا اتعلمتها السنة دي بس من الجميل اننا لما نبقى مبسوطين نبسط اللي حوالينا معانا ..
اما عن موضوع لو مت محدش هيفتكرك او الناس هتفتكر شهرين وبس معتقدش اني ممكن انسى ف حد اثر ف حياتي بشكل كبير سواء كان من قريب او من بعيد انا لسة فاكرة مدير مدرستي وعمي الله يرحمهم وبدعيلهم دايما وهما عدا على وفاتهم سنين طويلة دي اجمل حاجة انت هتاخدها من مساعدة الناس واسعادهم هيفتروك بعد ما تموت واكيد هيدعولك وربنا يديك طول العمر ان شاء الله
كل سنة وانت طيب
part 1: هو الوقت مابيعاديش بسرعة ولا حاجة ... هو كل الموضوع إننا بنصوم حوالي 16 ساعة و نص في اليوم :D فطبيعي جداً الفجر يأذن و أنت قاعد عادي زي العشاء كده :D
part 2: بيجيلي ساعات التفكير ده ... بس أما نموت لا أعتقد إن حيفرقلنا قوي إذا حد حيفتكرنا ولّا لا... و يا سيدي أهو البلوج بتاعك حيكون موجود و حيفكّّرنا بيك دايماً .. ده بعد عمر طويل يعني :D
part 3: طبعاً ده درس كبير أوي إتعلمته من تجارب الحياة المريرة ... إن محدّش بيقرف نفسه أوي عشان حدّ تاني ... و الغريب فعلاً إن أما أجبر نفسي إني أتعامل بالمثل الناس بتزعل ... طبيعة بشرية تحتاج للدراسة...
w Ramadan Kareem :D
Post a Comment