والبلوج ده مش بتاعى

بقالى فترة مستمتع بالاغانى الشعبية

هى فترة طويلة يعنى ...من كام سنة كده...وبحكم المنطقة اللى انا عايش فيها فبقيت بسمع الاغانى قبل ما تتسجل او بعد ما تتسجل مش فارقة المهم المصدر الغنائى موجود هنا من زمان

ناس كتير بتسمعهم بتقول يععععععععععع ايه القرف ...وفى الغالب بيعلقوا على صوت المطرب

وهوا الراجل مش غلطان ان الزمن حكم عليه انه يحشش لحد ما صوته غشلق وبقى الصوت حاجه والمنظر حاجه تانية

بس حاولوا تعصروا على نفسكم لمونة كده واسمعوا شوية اغانى ...كلماتها روعة بجد...لو مغنى ليه صوت حلو غناها ...هتكسر الدنيا :D

يعنى مثلا عبد الباسط حمودة ...الراجل بيغنى من زمان ومشهور اوى فى الشارع ...ليه اغنية اسمها ضحكة سلف...الراجل من كتر الزعل والحزن بيدور على ضحكة يستلفها يستمتع بيها شوية

وبردوا اغنية البانجو ده مش بتاعى ...اللى انا كاتب عنوان البوست عليه...فيها معنى انك يوم لو خارج مع اصحابك ولقيتهم معاهم اشولة بانجو...روح واقعد فى بيتكم

وبردوا سلسلة العبد والشيطان...دى اللى بجد من غير هزار ولا تريقة دوروا على كلماتها وشوفوا الحوار اللى الراجل عمله بين الشيطان والعبد...وده بيحصل كتير

يعنى بصوا كده

شيطان وقال للعبد
وريتك الدنيا والوانها وبعت الاخرة علشاني
وبقيت تخاف تخرج منها
ونسيت كمان الصلاة والفرض

مش بتحصل بردوا ...لما بنكسل اننا نصلى ؟؟؟

العبد قال للشيطان
من بعد ما طاوعتك مبقتش عارف اعيش
وديتني لحد النار وهناك معرفتنيش

ودى بردوا !!!

ناصر صقر لما غنى اغنية المحكمة بردوا...جاب كل المواقف اللى بنقراها فى جرنال الحوادث الصبح من عند الراجل بتاع الجرايد اللى قدام هارديز فى التحرير

وطبعا منقدرش ننسى شعبولا مبحبش اسرائيل :D

اينعم بردوا فى اغانى هلس هلس يعنى...بس النسبة الكبيرة منهم بيقولوا حكمة فى الاغنية...اوبيغنوا افلام عربى ...زى محمد رجب لما غنى عن الست المتجوزة واللى كانت بتلف عالشباب وكده

موضوع كبير اوى...بس مشعشع فى راسى بقالى فترة

المهم بس قبل ما انسى

شريط فيروز حلو :D

:(

لا ضير من التوقف قليلا ...لكى نستطيع الوقوف بعدها اقوياء

Excuses Ministry !!

يا سلام لو الوزارة دى موجودة

بجد كل مشاكلنا هتتحل فى ثوانى يا جدعان

وزارة هدفها الاوحد والوحيد انها تطلع اعذار للناس عشان اى حاجه

يعنى مثلا الزوج ياخد عذر يديه لمراته او مديره فى الشغل

مسئول حكومى عاوز يدى عذر عن ارتفاع اسعار وكده

طب ما حد يقولى ما هم بيدوا اعذار اصلا ...لاء بس انا هدفى اسمى من كده اننا نوحد جهودنا وبلاش التشتييييييييييييييييت اللى احنا فيه

بس واللى عاوزله عذر يقدم طلب للوزارة والمسئولين يبدأوا يبحثوا ويبتوا فى الطلب ويوافقوا عليه

وعاوز عذر مشكل وسلاطات بقى وعيش وطحينة ولا سلطة خضرا بس وعلى عينك يا تاجر

ومش بعيد نلاقى اعذار فى السوق السودا زى الشهادات الصحية المضروبة اللى بنجبها وكله بتمنه يا باشا طبعا

على الاقل اول مستفيد من الوزارة هيبقى المنتخب والحكومة والاهلى ...بما انهم اكتر ناس بيدوا اعذار استجنزبيل العنب

ومش مشكلة لما يبقى عدد وزارتنا 34 واهو كله فى سبيل التقدم ولا ايه؟؟

عامة انا هسيبكم الحق ااقدم على عذر عشان مش عارف اهتم بالمدونة او ارد عالناس زى زمان

سلامووز

شوية حاجات فوق بعض

فاضل يومين وبكده يكون عدى 10 شهور

والمضحك المبكى ان فيه شهر او اتنين اوت ...خارج نطاق الخدمة

ربنا يوفقك

************

عقاب النذل اجتنابه

انا عرفت دلوقتى ليه ناس كتير منفضلى والموبايل بقى صامت على غير العادة :D

*************

المرة دى مختلفة ...واللى مبيستحملنيش وقت الشدة ...يتفلق

************

البوست ده هرجع اكمل عليه تانى اكيد

BRB

سؤال يطرح نفسه

هوا لما حد ينافقك

بمعنى ورا ضهرك يشتمك وفى وشك يمدحك ويضحك ضحكة من الودن للودن

ده تعمل معاه او تتصرف معاه ازاى؟؟

انت وبس

هى صعبة بس مش مستحيلة

October

الشهر ده اكيد هيبقى مليان حاجات حلوة اوى

خلاص نرمى الوحش ورا ضهرنا

ونبص لقدام شوية

وعلى فكرة انا مش مخنووق

انا بس كنت تايه ومازلت اعامل الناس ازاى

اللى بنافقنى او اللى بيضحك فى وشى ومن ورا ضهرى يشتمنى اعامله ازاى

طب اللى بيكرهنى بس لسه معايا

او اللى بيعاملنى حلو ومرة اتغير عشان ظروف انا مش عارفها

حاجات كتير بتشتت الواحد طول ماهو ماشى

الحمد الله بس ان ربنا بيكشف كل واحد على حقيقته فى وقت المناسب

المهم

شهر اكتوبر ده اكيد هيبقى حلو باذن الله

عاوزين نعمل ايه الشهر ده بقى ؟؟

:D