Copy Right


Copyright © Safa7_karmooz - 2012-2006 كافة المواد المنشورة في هذا الموقع محفوظة
ومحمية بموجب قوانين حقوق النشر والملكية الفكرية لا يجوز نسخ هذة المواد او اعاده
انتاجها او نشرها او تعديلها او اقتباسها لخلق عمل جديد او ارسالها او ترجمتها او اذاعتها
او اتاحتها للجمهور بأي شكل بدون الحصول علي اذن كتابي مسبق

Copyright !

MyFreeCopyright.com Registered & Protected

Monday, August 18, 2008

اتنين متجوزين

صحى من نومه الصبح ..اول حاجه عملها لما فتح عينه...مسك الموبايل...وبعت مسج ...فى نفس الوقت هى صحيت وقامت وفتحت عينها عالمسج اللى بتقول: صباح الخير يا حبيبتى اصحى يلا ...وبوسة

عالطوول تردله المسج: صباح النور على عيونك يا حياتى يلا اعمل الفطار وهاكل معاك

يروح عالطول بعد الدش التمام ويعمل القهوة...ويفتح اللاب توب بتاعه وبيعمل شات معاها ويتكلموا....وفى الاخر يبوسها وينزل يركب العربية....مين بقى يا ترى اللى قاعد جمبه...هى هى نفسها اللى كانوا بيعملوا الشات ده

ناس كتير متجوزين فى مصر اخر حاجه او وقت يبقوا مقربين من بعض يبقى بعد شهر العسل بكام شهر...بعدها الدوامة تبتدى...والراجل زى الحمار فى الساقية...والست بتتنضمله برضه...وساعات هما الاتنين يبقوا فى ساقية واحده

يرجعوا البيت...الراجل قرفان وتعبان وطالع دين امه فى الشغل...وهى مستنياه لو ربة منزل او جاية هالكانه وقرفانة....ويقولها الغدا ايه ويتخانقوا...انت هتتأمر يا روح امك...وكل عند مش عارف مين...فى الاخر هيغير هدومه ويقعد فى اى مخروبة وبعدها يرجع تانى يكون الدنيا بقت ليل وينام ولا يتصالحوا ويبتدوا يوم جديد

اللى خلانى ابتدى المقدمة دى....ان فعلا فيه ناس بقت كده...الاسم متجوزين....والحقيقة اتنين بيبصوا فى وش بعض وقت ما ياكلوا يناموا...وقت ما يبوسوا بعض الخ ...بس تلاقيهم قضوا وقت.؟؟؟؟لاء

عرفوا بعض اكتر....كل واحد ريح التانى...؟؟؟صعب فى الزمان ده

لييييييييييه

عشان احنا اتغيرنا...بقى الولاء الاكبر للفلوس وازاى هنصرف.....بس احنا لو راعينا ربنا فى كل حاجه بنعملها...والله العظيم هنلاقى الرزق بيجى من اماكن مش متوقعينها او فيه بركة اكتر

هل فيه امل ان المتجوزين يبقوا متجوزين فعلا وقولا؟؟؟
مش مجرد صورة؟؟؟

انا ان شاء الله مش هرضى انى ابقى التور فى الساقية دى....ولو لقيت انى يوم هبقى كده...مش هتجوز

عشان مش هوعدها انى هخليها اسعد انسانه فى الكون

واجى بعد كده ااقولها سورى ....الظروف وحشة يا حبى


8 comments:

Anonymous said...

عجبني كلامك يا ابريكوت كالعاده

اي اتنين في الاول بيبقوا مدلوقين على بعض
كل شوية يا حبيبي و يا حبيبتي
و الحب مقطع بعضه بعدين يخلفوا اول طفل يلاقيوا ان المصاريف زادت يقوم تحصل الحاجات اللي انت قلت عليها دي ف يقولوا ان الجواز وحش

ليه اتجوز و انا عارفه ان بعد فترة هتبقى حياتي عذاب و نخش في حاجات من نوعيه ابعت للجرنان .. باب جراح القلوب و استنى الرد على مشكلتي
مش بتريق بس اليأس بيعمل اكتر من كده في الناس

ادعيلي يا مشمش لما اتجوز .. اتجوز جوازة مستريحه
و يا رب انت كمان ربنا يديلك عشان تعرف تخلي مراتك ان شاء الله اسعد انسانه في الدنيا
بيست ويشيز

سوسو كعب الغزال

Anonymous said...

يبقى مش هتتجوز :P

Sara said...

بص انت قلتها في جملة
"احنا لو راعينا ربنا فى كل حاجه بنعملها...والله العظيم هنلاقى الرزق"
يعني الراجل لو راعى بيته وراعي اكل عيشه هايعرف ازاي يرضى زوجته ويحسسها بحبه وحنانه
والست كذلك لو راعت ربنا في جوزها مش هاترهقه بطلباتها وهاتحاول تسعده
ولو حتى الظروف صعبة اللى بيراعوا ربنا بيعرفوا يخرجوا من الظروف دي اقوى

بجد مش بالفلوس اه ومبقولش كده يعني نعيش من غير فلوس لا بس الاهم انهم يبنوا بيت صالح واسرة صالحة تقدر تعمر بعد كده
موضوع جميل بجد

oRiGiNaL HeArT said...

يرجعوا البيت...الراجل قرفان وتعبان وطالع دين امه فى الشغل...وهى مستنياه لو ربة منزل او جاية هالكانه وقرفانة....ويقولها الغدا ايه ويتخانقوا...انت هتتأمر يا روح امك...وكل عند مش عارف مين...فى الاخر هيغير هدومه ويقعد فى اى مخروبة وبعدها يرجع تانى يكون الدنيا بقت ليل وينام ولا يتصالحوا ويبتدوا يوم جديد

ههههههههههههههههههه
ايه الكلام دة
لا لسة فى ناس كتيييييييييير مش كدة
لسة فى ناس بتتقى ربنا :)

Mafrousa said...

تصدق فعلا هو ده اللي بيحصل
و ياتري تفتكر هوه بيحصل كده ليه؟؟؟
و لا انت عرفت ازاي؟؟؟؟؟؟
يالله
كل سنة و انت طيب

ماء تشرين said...

لااسف هى دى الحقيقه والدليل راجل بيطلق مراتو وام اولادو بعد 25 سنه جواز عادى جدا ويرفض انو يديه شئ من حقوقها وهى القسمتو الحلو والمر وهى عنادا فيه تتجوز واحد صحبوا انا مش بحكى فيلم انا بكلم عن حد اعرفو لاسف بيكتشفوا انهم معرفوش بعض غير فى الاخر ده طبعا غير الزوجات السريع بتاعت اليومين دول
ربنا يستر ومنكنش منهم موضوع جميل
تحياتى

عمرو فكرى said...

عقبالك lol

تخاريف خاصه! said...

ياريت بس الناس فعلا تفهم مسؤوليات الجواز النفسيه والمعنويه قبل المسؤوليات الماديه....

بوست حلو...