بجد؟؟؟

عجبتنى الصورة دى قوى ....

ياترى معناها ايه ؟؟؟

ليلة اغتيال الريس

يا نهارك مش فايت...الريس حتة واحده ....طب قول وزير....محافظ...رئيس حى ...لكن تيجى عند الراس الكبيرة...وتحاول تقتله...لا حول ولا قوة الا بالله ...الواد اتجنن يا جدعان ..

طب استنى بقى ...ازاى حاولت تقتله ...وانت جاى تكتب هنا ...واد....بقولك مش ناقص اشتغالات عالمسا ....ااقعد كده واحكيلى عالحوار

يعنى يا جماعه اكتشفت ان الريس بتاعنا المصون ....فعلا من اهم الرؤساء فى العالم...وامنه وسلامته مهمين حتى لو على حساب الشعب ...وطلع انه اهم من جورج بوش اللى الكل نفسه يجز رقبته من على جسمه ...

لدرجة انك لو راكب عربية ...او ماشى على رجلك....تتنيل تقف فى مكانك ...لحد ما الريس يعدى ...طبعا ...انت عاوز تتحرك ليه اصلا ...مين اهم....انت ولا الريس...يعنى هوا لو مات لا قدر الله ...هتعرف تعيش من غيره ؟؟؟ عالم غريبة صحيح

المهم....يوم كنت مع اتنين من صحابى ...ماشين فى امان الله فى مصر الجديدة ....بجوار مقر اقامة الريس المصون ....اطال الله عمره ....فلقينا مرة واحده الشارع اترس عساكر من كل لون وشكل....سألنا ببراءة ايه يا جدعان...تشريفه ...طويب...عاتى يعنى...كانت اول تشريفه نشوفها يعنى ولا ايه

وطالما احنا عالرصيف ...يبقى احنا فى السليم ....بس تقريبا مش دايما ....واحد من اللى معايا كان عاوز يدخن ...طلع السيجارة ...وبيقول للواد هات ولاعه....لسه بيفتح الشنطة ....اوبس....اسك عليهم ...دى الكلمة اللى طبعا قالوها الباشوات اللى لابسين بدل ولاقيناهم هوب طالعين جرى علينا....قولنا بس...اوع تفتح الشنطة او تجرى او تتنفس....لو نجينا منهم ...مش هنفلت من اللى بيلعبوا counter strike عالسطوح بالـ sniper rifle بتاعهم..

المهم الباشوات ذوات البدل وصلوا لغاية عندنا ....وبكلمة امرة ....ايه اللى فى الشنطة ...بالاضافة الى اسلحة مشفتهاش الا فى الgames بس طلعت ....وبكل براءة ...طلع ايده ...ووراه السلاح الخطير ...اللى كان هيغتال بيه الريس

وطلع ايه....الولاااااااعه

الراجل مطمنش قوى ....وشكله شك فينا اكتر ....بس اطمنا اكتر لما ااصر انه يوصلنا بعربيته ....شايفين كرم الاخلاق ...بتاع الظباط قد ايه...وكمان مش لبيتنا ....ده الى لاظوغلى يا معلم...هيضيفونا يا جدعااااااااااااااااااااااااااان

ولذا ...انا بحيى فعلا المخترع العبقرى اللى اخترعلنا المحمول ...وبحيى من موقعى هذا شركة فودافون على خدمة call me

بس بعييب عليها انها خلت الحد الاقصى 3 رسايل ....بس بنشكر عمال خدمة تحويل الرصيد فى شركة موبينيل ...وبنشكر خطيبة واحد من اللى معانا ...اللى بعتتله 5 جند بالصدفه البحتة ...على سبيل الهدية...مما جعلنا نتصل بمحمد باشا عشان يصبح عالباشوات اللى زيه...ويقنعهم يوصلونا بيوتنا احسن من الفندق بتاعهم

بس ...نتعلم ايه من الحدوتة دى يا اطفااااااااااااااال؟؟؟

التدخين ضاااااااااار جدا على المستوى الشخصى

نشيل معانا خطين واحد موبينيل والتانى فودافون ...وممكن اتصالات عشان محدش يقول انى منحاز لناس معينة

منهوبش ناحية مصر الجديدة تانى

عمار يا رجالة مصر

افرحى يا مصر برجالتك افرحى وقومى ارقصى بشبابك
افرحى بالجيل الصاعد الواعد
اللى هيشيل حملك ويظبط ارضك
افرحى يا يا مصربرجالتك
اللى قاعدين واخدين بالهم من ارضك
افرحى بس اوعى تعيطى وانتى بتزغرطى
على خيبتهم اللى اتعكوا فيها واللى مبقاش ليها اخر

يعنى ااقول ايه بجد عالرجالة

شنبات عالفاضى

اه والله

هتستغربوا

واللى هيسألنى

مش انت منهم

ايوة منهم

بس اللى بيحصل زاد عن حده

تلاقى ست كبيرة عاوزة تعدى الشارع...وانا مالى يا جدع

محدش يساعدها خالص

ست سايقه ...العربية عطلت فى نص الشارع

والله نزلت تزقها بنفسها ...

ولا راجل من اللى وقفوا يتفرجوا راح يساعدها

ولسه اخر منظر

اللى هحط صورته

لبانه ....وسلسلة دهب

وقاعد فى المترو

طب ااقفل بقك وانت بتاكلها

والله شكيت انه بنت ومتنكر

بس طلع راجل

وبشنب ودقن كمان

ااقول لواحد صاحبى تعال نعمل حاجه مفيدة....يقولى نشيش على قهوة

يقولوا بتعمل ايه يوم الجمعه

تيجى تشرح ايه هوا نموذج جامعة الدول العربية

تنمدم بعد كده انك فتحت بقك واتكلمت

انا عارف ان مصر تدار من المقاهى ...

واحنا مظبطين التتظابيط

طبعا

بس ما ميمنعش

انى اطرطش حبة

ومعلش لو حد الطرطشة بهدلت شاشته

بس انتوا وافقتوا

على القانون

من قبل ما تدخلوا :]

واهم حااااااااااااااااااااااجه

افرحى يا مصر برجالتك

كـــش مــــلك يـــا هالة

فعلا ...كش ملك يا هالة سرحان ...

انتهى وقت اللعب ...ومات الملك

بعد توالى سقوطه عدد لا يحصى من المرات

كش ملك هالة

انتهى وقت اللعبة للابد

مقدمة لابد منها ..

بسبب السقوط المدوى للاعلامية هالة سرحان

ومما جعلنى اتشجع اكتر فى كتابة تلك الطرطشة

مدونة http//kishmalik.blogspot.com/2007/02/blog-post_5699.html

طبعا تلك لم تكن اول مرة تسقط فيها هالة فى قناة ما

فسمعتها وصيتها يسبقها

من دريم ...لاوربت والبداية فى تلفزيون العرب

وجائت لتختمها تلك المرة فى روتانا

وسراى النيابة ايضا

حيث سيتم استدعائها للتحقيق ...

ورغم تشاؤمى قليلا حول تلك الزوبعه ...

حيث قام الوليد بن طلال بحشد العديد من المحامين

للدفاع عنها

والفتيات

اعتبروهن مجرد زوبعه صغيرة جدا فى بحر هائج اساسا

وربما من يأتى ويقول ان الفتيات هم فعلا فتيات ليل

وفعلوا هذا للنيل من سمعة الاعلامية الكبيرة الامعه

الحاقدين بقى ...انتم العالمون

وسنرى وسنرى...الخ من تلك الرؤية

وسنرى العجب العجاب فعلا فى الفترة القادمة

والايام بيننا

ولكن

الاكييييييييييد

ان هالة سرحان سقطت اخيرا

فى شر اعمالها

وعلمنا فعلا

ما الذى يدور

خلف الكواليس
----------------

ده لنك حملة ضد هالة سرحان

فهل هتقول لا معانا

http://www.petitiononline.com/StopHala/petition.Html

We'r back ..

عدت اخيرا ...الى مدونتى الحبيبة ...بعد غياب قارب على الشهر ...وبضعة ايام ...

لقد افتقدت الكتابة بها كثيرا ...افتقدت ان اكتب طرطشة من الطراطيش التى اصبحت حياتى جزء منها

افتقدت ان اقول ما اشعر به هنا ....

وافتقدت بعد كل طرطشة ان افكر اذا كان احدا ما سيدخل ويعقب....ام سأظل بمفردى هنا

اافتقدت ان اكتب ما افتقده ايضا

عموما

مرحبا بكى يا مدونتى مجددا

مرحبا بزوارها ايضا

واعدكم الا اطيل الغيبة مجددا ..:)