Lost

انا تايه توهان السنين

أصلها بتفرق ...2

أصلها بتفرق فى حياتك واحده من اول ما تعيش وياها تلقاها معاك ملهاش بديل

يوم لما قدرك يجيلك ...وتحب واحدة...مينفعش تبدلها بأى واحدة

لما تحبها وتتجوزها

وتعيش معاها العمر كله

عارف يعنى ايه العمر كله ؟؟

تشوفها وبتغسل سنانها 50 سنة ...ووقت ما تيجى تسرح شعرها ...ولا يوم لما تبقى لسه صاحية طازة من النوم ولسه بتتاوب وبتشوف الدنيا فيها ايه

اصلها بتفرق فعلا لما تحب واحدة

بجد مش بيبقالها اى بديل

:)

أصلها بتفرق

أصلها بتفرق من واحدة لواحدة

فى واحدة بتنساها بواحدة

و واحدة مبتتنسيش

وزير الكهربة والتوفير

وزير الكهربا طالعنا بطلعته البهية من كام شهر وقالك بص ياعم الشعب كل عية عندها سبعتلاف تكييف مش تشغله وتلبس فلوسه ولا مؤاخذه ويقعدوا لازقين فى بعض تحت تكييف واحد عشان نوفر كهربا ونبطل نشغل النور والغسالات والكمبيوتر وخلافه ...ولا اكننا بناخد وصلة كهربا من حد

طبعا احنا اجدعها شعب يحب التنفيض والممنوع مرغوب دايما ...فتفتق ذهن الوزير بتاع التوفير تانى عن فكرة جهنمية...وفعلا بتودى جهنم
انه قرر انه يطفى عواميد النور بتاعت الشوارع بالليل ...كل يوم منطقة معينة...طب حلو يعنى مش ازمة...لاء ماهو الفكرة انه بيطفى الشوارع الرئيسية والبس بقى يا مواطن

وطبعا بردوا اغلب شعبنا بيوفر عشان بيحسبها صح عشان ميطلعش تربنتين اهله صح اخر الشهر، ففى ناس حسبى الله ونعم الوكيل فيها بتمشى بالليل بالعربية من غير نور امامى او خلفى او حتى فلاشر جانبى ..والبس تانى يا مواطن

بجد بجد بجد قمة فى سوء الادارة والتخطيط ...مش عارف دول اتخرجوا من جامعات ازاى ؟؟؟انا بفكر اصورلكم الشوارع بالليل من الضلمة بتبقى عاملة ازاى وكمية الحوادث اللى بتحصل وسرقة ونشل عينى عينك فى الضلمة دى

دى معلش اخوانا الخلايجة بيعيشوا ازاى وهما فى الصيف عندهم الحرارة اعلى مننا والتكييف عندهم زى شاى عندنا ...بيستعملوه 24 ساعه...بيجيبوا كهربا منين معلش؟؟ ولا عندهم سد عالى ولا سد واطى ولا احنا مسلفينلهم سلك كهربا ارضى من السد العالى ؟؟

قمة فى الاستفزاز اليومى اللى الواحد بيشوفه ...ياعم دى اثيوبيا عندها كهربا احسن مننا ...فين بقى مصادر توليد الكهربا اللى طلعونا ميتين اهالينا واحنا فى المدرسة من حضانة لثانوى بندرس فيها ، ولا كلام كتب وخلاص ...واللى بيحصل دلوقتى اجهاض مش توليد

اهم شىء التوفير

توفيرا فى الكهرباء = اهدار لروح المواطن

والعزا فى عمر مكرم باذن الله

!!!!!!!!!!!!!!!!!!!!!!!

خذوا الحكمة من

افواه سائقى الاتوبيس

******************

بقالى فترة بفتح البلوج هنا وببقى عاوز اكتب اى بوست والبوست يبقى فى راسى بس بلاقى نفسى اوتوماتيك بقفل الصفحة ومش بكتب

بقالى فترة معنديش الرغبة اعمل اى حاجه حتى فى حياتى ، كسل ...ولا حالة ومش هتعدى مش عارف مش متعود على كده ابداااا

*****************

كلنا بنعك وكلنا بنغلط ...بس الفرق من اللى شايف وعارف انه غلط غير التانى اللى بيبقى شايفك انت بس الغلطان ...وده شىء فى حد ذاته مستفززز

****************

عاوز اعمل حاجه جديدة...مش عارف ايه هى ...حاجه حلوة يا حاجه وحشة مش فارقة...كله عند العرب صابون زيست

***************

العمر بيجرى يا ولدى ...بيجرى بيجرى يعنى ...ومينفعش نفضل واقفين ..

**************

وبس يا سيدى راحت معيطة

وطبطبت عليها

واخدتها فى حضنى وقالتلى بحبك يا غضنفر

وظل يفكر

لحد اما لزق فى مكانه

متفرجين الى الابد

جربت يوم تروح استاد وتقعد تتفرج على ماتش؟؟

بلاش دى ...شعورك ايه وانت قاعد بتتفرج عالتلفزيون بتشجع اى حاجه او اى حد

مبتحسش من جواك انك عاوز تعمل حاجه فى يوم وتبطل تبقى مشجع ؟؟؟

مش كل الناس للاسف ...فيه ناس بتستمتع بالتشجيع ...واللى بيشجع اغلبهم فى حياتهم بيشجعوا بردوا...مبيحبوش يطلعوا فى الصورة ولا حتى ابطال مساعدين

انا بس امبارح لما ركزت اوى اكتشفت اننا كعرب عالطول بنشجع

ااه مشجعين فى المدرجات عالطول ...ولما تجيلنا فرصة ننزل تحت فى الملعب مش بنرضى

فى المدرجات بقى تلاقى الهلس على اصله ...والضحك والهزار

لكن اللى فى الملعب بيتكلموا جد...انت اتجننت يابنى...جد ايه اللى عاوز تعمله

حتى فى الافلام احنا مشجعين ودرجة تالتة كمان

شوف اى فيلم اجنبى

هاتلى بس كام فيلم كنا فيه قوة

مافيش الا كام فيلم يتعدوا عالصوابع

والباقى بنقعد ندعى ربنا قدام الجامع او الكنيسة

ومستنين الخطر يمشى

دى فكرة الغرب عننا ...والصراحة عداهم العيب وازح

اننا متفرجين...وهنفضل متفرجين

نشجع ونهيص

لكن وقت لما تجيلنا فرصة ويفتحولنا باب الملعب هنرفض

ليه ؟؟؟

عشان احنا وهمنا نفسنا اننا اتخلقنا عشان نشجع وبس

مع اننا الملعب الرئيسى اصلا

يا خسارة بجد

!

The Simpsons

We need something like that in Egypt :D

حداد على خالد سعيد

مشكلة العصر

القضية دلوقتى اننا نرفع قضية على عماد متعب عشان شبهة تطبيع او نكفر خالد النبوى عشان الفيلم كان فيه يهود او اى بتنجان

بالظبط عاملين زى واحد بيشترى بطيخة ولقى نملتين واقفين عالبطيخة راح مقروف منها ورماها...مقصدش ابدا انى اشبه الاتنين دول بحاجه

بس احنا فعلا كده بنمسك فى الصغيرة ونسيب الكبيرة

وبقت مصر مش بتطبع مع اسرائيل ...وجم الاتنين اللى خرجوا برا النص ولازم يتشنقوا فى ميدان عام...ااه ميدان عام ما احنا بقينا المدينة الفاضلة وكل حاجه حلوة ومش بنصدر غاز ولا اتفاقية كويز ولا سينا بيبرطعوا فيها ولا اى حاجه

يلا اما الحق اعمل جروب عالفيس اجمع مليون مصرى عشان نشنقهم فى الميدان العام

وقرفى !!

عذراً

البلوج فى التلييييين

شعب كلامنجى

ويوم بعد يوم

بيثبتلى الشعب بتاعنا بدءا من اللى قاعدين فوق لحد اللى ادفنوا تحت

اننا شعب كلامنجى بجد

!

??

هوا حد ليه نفس يكتب ولا يسمع؟

يوم الخمييييييس

كل واحد يدخل يختار اغنية ...كليب عاليوتيوب حتى

صورة فيلم

ويحطلى اللنك بتاعها هنا

يعنى كل واحد على حسب الموود بتاعه ايه ...او بيحب ايه اكتر

بالنسبالى دى الاغنية اللى فى بالى الاسبوع ده











يلا مستنى ابداعاتكم

اريدوووو حلاً

طبعا اللى هيشوف العنوان هيقولك بس صباح التعليم المجانى وكده...بس اللى فيا مكفينى ...خلانى اكتبه كده :D

المهم انا مش جاى اتكلم عن فيلم فاتن حمامة لما رشدى اباظة شعلقها ولا طلقها ولا قعد معاها ...بس هى حاجه متعلقة بالسينما عموما ...تقريبا بقالى كتير قوى مشفتش فيلم بيجيب حلول،،كل الافلام ان لم تكن معظمها عشان مظلمش ناس كتير فى النص جايبة المشكلة..زى افلام خالد يوسف مثلا كمثال ...سواء حين ميسرة او حاجه تانية ...انا بتكلم عن الافلام اللى بتعرض مشاكل كله بيتكلم عن المشكلة لكن معتقدش ان حد فكر يجيب حل

حاجه بتضحكنى اوى بردوا فى فيلم عندليب الدقى لما هنيدى قعد مع ممثلى العرب فى الاخر وقالهم كلمتين فوقوهم وبس كله فى الاخر حط ايده فى ايد التانى ...الاطفال لما يتفرجوا عالحاجات دى ويكبروا بيفتكروا ان العملية سهلة وبتخلص فى بقين بس ..بردوا فين الحل يا جماعه...مش كفاية انك تتكلم عن المشكلة ...ما كلنا شايفين المشكلة...محاولش حد يوجع راسه ويفكر...ولو حصل فيلمه بيقع او مبيطلعش للنور كمان

حاجه تالته ...امريكا دخلت فيتنام...عملت كم افلام مهولة عنها...افغانستان كذلك العراق لحد يومنا هذا وبيتعمل افلام ومسلسلات وكل حاجه ممكن تتصوروها

واحنا اخر فيلم عملناه عن اكتوبر كان بعد الحرب بفترة...ليه محدش يصرف من اللى بيتصرف ويعمل فيلم كبير عنها...او عن اى بتنجان مخابراتى...بدل المسلسل العبيط بتاع حرب الجواسيس اللى كان ساذج اوى فى ادائه...بيتهيقلى محدش هيعمل حاجه زى رأفت الهجان او جمعه الشوان كده تانى ...او حتى السقوط فى بئر السبع ...احنا لو بنفكر صح ممكن نكسب دهب من اللى عندنا ...بس عشان احنا بقينا نكبر مخنا ونقول انا مالى ...فبينكتفى بالكرسى فى البلكون وناكل فيشار ونتفرج

اوبس...الفيشار اتحرق

:D

TagzzzzzzzzZzzzzzzzzzzzzzz

Special Tagz i received Recently , & I'm already missing these lovely tags by the way :D

O.K the first one from My Lovely friends blog..Spare Time


انت مين بقى ؟

سفاح كرموز..حلو كده

عندك كام سنة

23 وحبة

هل انت متزوج ؟

لع...محصليش الشرف :p

دراستك ايه

حقوق القاهرة..اسانس يعنى

كم طولك وما لون بشرتك

انا اقدر ااقول انى ولا قصير اوى ولا طويل اوى
رحم الله امرىء عرف قدر نفسه

هل تمارس عملا بشهادتك او عمل حر وما هو

ومين بس بيشتغل بالشهادة...صلى عالنبى بس...اغلبها حاجات وقتية

ماذا تفعل بوقت فراغك

بنام...بخرج..بقرا

هل لديك هوايات وهل تمارسها

الكتابة...وكرة اليد...والتأمل..ومش لاقى لوقت الا التأمل فى مخاليق ربنا

هل تشعر برضا ربنا عنك

بص...على حسب اليوم ماشى ازاى

عندما تكون فى موقف اتخاذ القرار..تخالف الجماعه.. ام تشرك معك الاخرين

على حسب الموقف او المكان...لو انا قائد وشايف بحكم الخبرة ان القرار ده صح همشى فيه اكيد

ماهو الشىء الذى فعلته وندمت عليه طول عمرك

حاجه عملتها من كذا سنة وكان نفسى معملهاش بس اتعملت وغيرت حاجات دلوقتى وتاثيرها لسه شغال

هل تصارح غيرك بالحقيقة ام تقول له ما يحب سماعه

بصارحه بس بطريقة كويسة مش تجرحه...وساعات بديها زى ماهى

متى يقسو قلبك

لما اقفل من الشخص اللى قدامى او وقت الانتقام...معنديش غالى فى الحتة دى

من هو اول من قلت له احبك

اكيد ابويا وامى :D

هل يمكن ان تحب احد من المدونين

كل شىء جايز..ممكن اقابل سفاحه فى مهمة اخرى ووقتها الفاس يقع فى راس الضحية ويحصل حاجه :p

ماذا تعنى لك المرأة والرجل

المرأة الحنية...الاهتمام...القلب الكبير يعنى...الراجل ..الحيطة اللى بتتسند عليه فى كل حاجه عامة

فى زمن البحث عن المادة ماذا تبحث انت

الستر والرضا

متى تعرف انك تحب

لما اعرف قبلها انى معجب ولهان..ههههههههههههههههههههه

الشخصية التى اثرت بحياتك

مممم..مش حد معين عامة...ناس كتير...سواء اهلى او اصدقائى...كل حد بيعدى بيسيب بصمة وناس معندهمش صوابع يسيبوا بصمات حلوة ..:)

هل يوجد من تراه سعيدا فى الدنيا ولماذا

اى حد ربنا بيكرمه وهوا بيطيع ربنا كويس ومراعى حق ربنا فى كل حاجه...ده اسعد الناس

ماهى درجة صراحتك

depend

ماهى المواقف التى يمكن ان تكذب فيها

depend also

بس ساعات عشان اطلع من مأزق ما وبتقلب على دماغى بعدين...بس الحمد الله بطلت

هل يتغير الحب بعد الزواج

مسألة نسبية..يا بيعلى اوى واكتر...يا بيقل على حسب اللى اتجوزوا دول بيطيقوا بعض ولا لاء

فيما تفكر الان

بفكر افطر ايه ولا اقعد فى البيت بدل ما انزل فى الحر..ههههههههههههههههههه

لو لم تعش بمدينتك ..فأى مدينة تفضل ان تعيش بها

اسكندرية او روما

من اول من يأتى ببالك لتحكى له اسرارك

ناس كتير بس المهم يكونوا فاضيين او فاتحين موبايلهم

من هو الد اعدائك

اى حد حقود عليا ..وكتير الحمد الله :D

من هو صديقك

وسام اولهم ^_^


ماذا تكره فى الحياة

القرف ودماغ الناس اللى مالهاش لازمة وبيفكروا ازاى يعقدوا الواحد فى حياته

ماذا تحب

بحب اتنين سوا ..هههههههههههههههههه

كيف تواجه ما يضايقك وكيف تتصرف فى المفاجأت

لما بضايق بنزل اتمشى فى الهوا كده وبحاول اركز ...عشان متهورش واعمل تصرفات بندم عليها بعدين

بالنسبة للمفاجأت ...ممم بتفاجىء زى زى غيرى بس مش بيغمن عليا :p

بصوا هوا التاج طويل بافترا :D

انا تعبت الصراحة..فكفاية دول مؤقتا وباقى الاسئلة هعملهم فى تاج تانى ^_^

التاج ده هديه لـ:

Silver eyes

Self meaning

عمرو فكرى

عصر الجنون

Fact

Waiting sucks ..

الخير فى بلدنا

اليوم المفتوح

اولا اللون الاسود بقى يعميى عينى وانا اصلا بقعد بالليل مطفى نور الشقة فمش بشوف انا بكتب ايه..فده مؤقتا لحد لما الاقى شكل يعجبنى

المهم النهاردة اوبن داى...اللى عاوز يقول حاجه يقولها..يسال يحكى..يغنى يرقص..براحتكم يعنى

وهفتح التعليقات المجهولة عشان لو حد كركر يشاركنا

كركر الحناوى

:D